BUSHE cine cine Yehova Lesa alasuka amapepo ya babomfi bakwe abaipeelesha ayo bapepa ukufuma pa nshi ya mutima? Ilyashi lya mu Baibolo ililanda pa muntu uo tushaishiba sana, Yabese, lilanga ukuti cine cine Yehova ‘alomfwa ipepo.’ (Amalumbo 65:2) Ili lyashi ilipi lisangwa apo tushingenekela ukulisanga. Lisangwa pa mitande ya ndupwa sha bantu ishalandwapo mu fipandwa fya kubalilapo ifya mwi buuku lya 1 Imilandu. Natulande pa mashiwi yaba pali 1 Imilandu 4:9, 10.

Ifyalandwa muli ifi fikomo fibili e fyo twaishibapo fye pali Yabese. Ukulingana ne cikomo 9, nyina “e wamwinike ishina lya kuti Yabese, no kutila: ‘Namufyalila mu kucula.’”a Cinshi amwinikile ili shina? Bushe ni pa mulandu wa kuti aliculile sana pa kupaapa uyu mwana ukucila ifyo aculile pa bana bambi? Bushe nalimo ali ni mukamfwilwa, kabili aleilishanya ukuti umulume wakwe uwali no kupokelela umwana uwafyelwe alifwile? Kwena Baibolo tayalandapo. Nomba kwali no kuba inshita ilyo Yabese ali no kulenga nyina ukuba sana ne nsansa. Bamunyina kwa Yabese bafwile bali balungami, lelo “Yabese balimucindike sana ukucila bamunyina.”