Ukupayanya kwa kwa Yehova, “Abapeelwa”

“Abeni bakema no kuceme mikuni yenu.”—ESAYA 61:5.

 1. Mulandu nshi ishiwi “kapeela” pambi lingatwibukisha ulwa kwa Yehova?

MWANDI Lesa aba ni kapeela wabula akaso! Umutumwa Paulo asosele ukuti: “[Yehova] umwine e upeela bonse umweo, no kupema, na fyonse.” (Imilimo 17:25) Umo umo uwa ifwe kuti amwenamo mu kubelebesha pa ‘fya kupeela ifisuma ne fya bupe’ ifingi ifyo tupokelela ukufuma kuli Lesa.—Yakobo 1:5, 17; Ilumbo 29:11; Mateo 7:7; 10:19; 13:12; 21:43.

2, 3. (a) Ni shani fintu tulingile ukwankulako ku fya bupe fya kwa Lesa? (b) Ni mu mano nshi abena Lebi babelele “abapeelwa?”

² Mu kuba no mulandu usuma kemba wa malumbo alitwishike ulwa fintu pambi engabweseshapo kuli Yehova. (Ilumbo 116:12) Kabumba wesu mu kushininkisha takabila icili conse ico abantunse bengakwata nelyo bengaba na maka ya kupeela. (Ilumbo 50:10, 12) Yehova, nangula ni fyo, alangilila ukuti cilamutemuna lintu abantu baipeela abene mu nshila ya kutasha mu kupepa kwa cine. (Linganyeniko AbaHebere 10:5-7.) Abantunse bonse balingile ukuipeela kuli Kabumba wabo uyo, mu kukonkapo, engatanununa amashuko yalundwako, nga fintu cali ku bena Lebi ba pa kale. Nangu cingati abena Israele bonse baali abaipeela kuli Lesa, asalile ulupwa lwa kwa Aarone ulwa bwina Lebi nga bashimapepo ku kupeela amalambo mwi hema ne tempele. Ni shani pa lwa bena Lebi bashala?

³ Yehova aebele Mose ukuti: “Palamiko mukowa wa kwa Lebi . . . Bakabake ne fipe fyonse fye hema lya Kulaishanya . . . Kabili ukapeele abena Lebi kuli Aarone na ku bana bakwe abaume: bene ukupeelwa bapeelwa [iciHebere, nethu·nimʹ] kuli wene, abafuma mu bana ba kwa Israele.” (Impendwa 3:6, 8, 9, 41) Abena Lebi ‘bapeelwe’ kuli Aarone ku kufikilisha ifishingamo mu mulimo we hema, e co Lesa aali no kusoso kuti: “Ukupeelwa bapeelwa kuli ine ukufuma mu kati ka bana ba kwa Israele.” (Impendwa 8:16, 19; 18:6) Abena Lebi bamo babombele imilimo yayanguka; bambi bapokelele amashuko yakalamba, pamo nga ukusambilisha ifunde lya kwa Lesa. (Impendwa 1:50, 51; 1 Imilandu 6:48; 23:3, 4, 24-32; 2 Imilandu 35:3-5). Natwalwile ukusakamana kwesu ku bantu “bapeelwa” bambi no kupalana kwa muno nshiku.

Abena Israele Babwela Ukufuma ku Babiloni

4, 5. (a) Bena Israele nshi babwelele ukufuma mu kululwa muli bunkole mu Babiloni? (b) Mu nshita sha muno nshiku, cinshi calingana no kubwela kwa bena Israele ukufuma mu kululwa muli bunkole?

⁴ Esra na Nehemia bashimika fintu abashalapo ba bena Israele, ukutungululwa no Mulashi Serubabele, babwelele ukufuma ku Babiloni ukuya ku calo cabo, ku kubwesha ukupepa kwa cine. Ubulondoloshi bwalembwa bonse bubili bucita lipoti ukuti aba ababwelele bafikile ku bwingi bonse 42,360. Amakana ya iyo mpendwa baali “baume ba kwa Israele.” Ubulondoloshi bwalembwa mu kukonkapo butantika bashimapepo. Lyene kwisako abena Lebi 350, ukusanshako aba kwimba na ba ku mpongolo aba bwina Lebi. Esra na Nehemia na kabili balemba ulwa makana yalundwako abo mu kumonekesha bali abena Israele, nakalimo fye na bashimapepo, lelo abashashininkishe ukupende nkulo kwabo.—Esra 1:1, 2; 2:2-42, 59-64; Nehemia 7:7-45, 61-66.

⁵ Aba bashalapo abena Israele abaulwilwe muli bunkole kabili abo pa numa babwelele ku Yerusalemu na ku Yuda balangishe ukuipeelesha kwapulamo kuli Lesa no kukakililwako kwashika ku kupepa kwa cine. Nga fintu cilandilwepo, tulamona mu nshita sha muno nshiku ukupalana kwalinga mu bashalapo ba kwa Israele wa ku mupashi ababwelele ukufuma muli bunkole bwa Babiloni Mukalamba mu 1919.

 6. Ni shani fintu Lesa abomfya Israele wa ku mupashi mu nshita yesu?

⁶ Ukutula pa kukakulwa kwabo mu 1919, abashalapo ba bamunyina basubwa aba kwa Kristu baliselela ku ntanshi mu kupimpa mu kupepa kwa cine. Yehova alipaala ukubombesha kwabo ukulonganika aba kupelako aba ba 144,000 ukupanga “Israele wa kwa Lesa.” (Abena Galatia 6:16; Ukusokolola 7:3, 4) Pamo nge bumba, abashalapo basubwa bapanga ibumba lya “musha wa cishinka kabili uwashilimuka” ilibomba ku kupayanya mu kupaka ica kulya ca ku mupashi icipeelo bumi, ico cintu babombesha ukwananya mu kusaalala kwa calo.—Mateo 24:45-47.

 7. Ni bani balebishanya na basubwa mu kupepa kwa cine?

⁷ Nga fintu icipande citangilileko cilangilile, abantu ba kwa Yehova nomba basanshamo amamilioni aba “mpanga shimbi,” abakwata isubilo lyapeelwa na Lesa ilya kupula mu bucushi bukalamba ubupalamine. Bafwaisha ukubombela Yehova kuli pe na pe pe sonde, apo bashakomfwe nsala ne cilaka na kabili apo ifilamba fya bulanda tafyakakonkoloke na kabili. (Yohane 10:16; Ukusokolola 7:9-17; 21:3-5) Bushe tulasanga icili conse mu bulondoloshi bwalembwa ubwa babwelele ukufuma ku Babiloni icalinganako ku ba musango uyo? Ee!

Abashili Bena Israele Nabo Babwela

 8. Ni bani baile pamo na bena Israele balebwela ukufuma ku Babiloni?

⁸ Lintu ubwite bwaile ku batemwa Yehova mu Babiloni ukubwelela ku Calo Calaiwa, amakana ya bashali bena Israele balyankwileko. Mu mitande yapayanishiwe na Esra na Nehemia, tubelenga ulwa ‘bena Netinimu’ (ukupilibula, “abapeelwa”) na “bana baume ba babomfi ba kwa Solomone,” abo impendwa yabo iyakumbinkanishiwa yali 392. Ubulondoloshi bwalembwa na kabili bulumbula bambi abacila pali 7,500: ‘ababomfi baume na bacishiko,’ pamo pene na “ba kwimba abaume na ba kwimba abanakashi” abashali bena Lebi. (Esra 2:43-58, 65; Nehemia 7:46-60, 67) Cinshi caseseshe abashali bena Israele abafule ifyo ukubwela?

 9. Ni shani fintu umupashi wa kwa Lesa wabimbilwemo mu kubwela ukufuma mu kululwa muli bunkole?

⁹ Esra 1:5 alanda ulwa “bonse abo Lesa abuushishe imitima yabo ku kunina ku kuyakuule ŋanda ya kwa Yehova.” Ee, Yehova aseseshe bonse abo babwelele. Alicincimwishe imitima yabo, uko e kuti, ukukongama kwabo ukwa muntontonkanya ukuluminisha. Nangu fye kufuma mu mulu, Lesa aali no kucita ici pa kubomfya umupashi wakwe uwa mushilo, amaka yakwe ayabomba. Muli ifyo, bonse abaimine “ku kuyakuule ŋanda ya kwa Yehova” balyafwiwe “ku mupashi [wa kwa Lesa].”—Sekaria 4:1, 6; Hagai 1:14.

Ukupalana kwa Muno Nshiku

10, 11. Kupalana nshi kwingabako ku bashali bena Israele ababwelele ukufuma ku Babiloni?

¹⁰ Ni bani bacitwa icikope ku babwelele abashali bena Israele ba musango uyo? Abena Kristu abengi kuti pambi bayasuka ukuti: ‘Abena Netinimu balingana ne “mpanga shimbi” ilelo.’ Ca cine, lelo te bena Netinimu fye beka; pa kuti bonse abashali bena Israele ababwelele bemininako Abena Kristu ilelo abashaba ulubali lwa kwa Israele wa ku mupashi.

¹¹ Icitabo You May Survive Armageddon Into God’s New Worlda calandilepo ukuti: “Abashalapo ba bena Israele 42,360 tabali e beka fye abashile Babiloni na mushika Serubabele . . . Kwaliko amakana ya bashali bena Israele . . . Pa mbali ya bena Netinimu kwaliko bambi abashali bena Israele, abasha, abaishibisha ukwimba abaume na banakashi ne ntuntuko sha babomfi ba Mfumu Solomone.” Icitabo calondolwele ukuti: “Abena Netinimu, abasha, aba kwimba na bana baume ba babomfi ba kwa Solomone, bonse abashali bena Israele, bashiile icalo ca bunkole no kubwela mu kuba na bashalapo abena Israele . . . E co bushe cili icalinga ukutontonkanya ukuti ilelo abantu ba nko shapusanapusana abashili bena Israele ba ku mupashi kuti bailunda abene ku bashalapo ba kwa Israele wa ku mupashi no kusumbula ukupepa kwa kwa Yehova Lesa capamo na bene? Ee.” Aba musango uyo ‘baba bena Netinimu, aba kwimba, na bana baume ba babomfi ba kwa Solomone ba kasuba ka lelo, aba cimpashanya.’

12. Ni shani fintu Lesa abomfya umupashi wakwe mu nshila yaibela kuli Israele wa ku mupashi, lelo mulandu nshi twingabela abashininkisha ukuti eko waba kuli bonse bakapepa bakwe?

¹² Nga fintu cali mu mitantikile ya pa kale, Lesa na kabili alapayanishisha umupashi wakwe abo abasubila ukwikala kuli pe na pe pe sonde. Ca cine, tabafyalwa libili. Umo umo uwa ba 144,000 akwata fye ica kukumanya cimo ica kufyalwa libili pamo nga umwana wa ku mupashi uwa kwa Lesa no wasubwa ku mupashi wa mushilo. (Yohane 3:3, 5; Abena Roma 8:16; Abena Efese 1:13, 14) Kwena, uko kusubwa kwaba kulangisha kwaibela ukwa mupashi wa kwa Lesa mu kwimininako umukuni unono. Lelo umupashi wa kwa Lesa na kabili ulakabilwa ku kufikilisha ukufwaya kwakwe. E ico, Yesu asosele ukuti: ‘Shifwe wa mu mulu apeela umupashi wa mushilo kuli abo abamulomba.’ (Luka 11:13) Nampo nga uuleipusha akwata isubilo lya ku mulu nelyo aba uwa mpaanga shimbi, umupashi wa kwa Yehova eko waba mu kupaka ku kufikilisha ukufwaya Kwakwe.

13. Ni shani fintu umupashi wingabomba pa babomfi ba kwa Lesa bonse?

¹³ Umupashi wa kwa Lesa waseseshe bonse abena Israele na bashali bena Israele ukubwelela ku Yerusalemu, kabili ulakosha no kwaafwa bonse abantu bakwe aba cishinka ilelo. Nampo nga isubilo lya Mwina Kristu ilyapayanishiwa na Lesa lyaba bumi mu mulu nelyo ubumi pe sonde, afwile ukushimikila imbila nsuma, kabili umupashi wa mushilo umulenga ukuba uwa cishinka muli ico. Onse uwa ifwe—te mulandu ne caba isubilo lyesu—afwile ukukusha ifisabo fya mupashi, ifyo ifwe bonse tukabila mu kukumanina.—Abena Galatia 5:22-26.

Abapeelwa ku Mulimo Waibela

14, 15. (a) Pa kati ka bashali bena Israele ababwelele, mabumba nshi yabili yasobwelwepo? (b) Ni bani bali abena Netinimu, kabili cinshi cintu bacitile?

¹⁴ Pa kati ka makana ya bashali bena Israele abo umupashi waseseshe ukubwela pali amabumba yabili ayanono ayo Icebo ca kwa Lesa casobwelepo—abena Netinimu na bana baume ba babomfi ba kwa Solomone. Baali ni bani aba? Cinshi cintu bacitile? Kabili cinshi cintu ici pambi cingapilibula ilelo?

¹⁵ Abena Netinimu baali libumba abashakwete intuntuko sha bwina Israele kabili abali ne shuko lya kupyunga na bena Lebi. Ibukisha abena Kaanani ukufuma ku Gibeone abaali “aba kutebe nkuni kabili aba kutapila amenshi ku lukuta, na ku ciipailo ca kwa Yehova.” (Yoshua 9:27) Nakalimo bamo aba mu ntuntuko shabo bali pa kati ka bena Netinimu abalebwela ukufuma ku Babiloni, capamo na bambi abalundilweko nga abena Netinimu mu kati ka kuteka kwa kwa Davidi na pa nshita shimbi. (Esra 8:20) Cinshi cintu abena Netinimu bacitile? Abena Lebi bapeelwe ukwaafwa bashimapepo, kabili pa numa ya ico abena Netinimu bapeelwe ukwaafwa abena Lebi. Nangu fye kuli bambi bambi abashasembululwa, ici cali lishuko.

16. Ni shani fintu icifulo ca bena Netinimu cayalwike mu kupita kwa nshita?

¹⁶ Lintu ibumba lyabwelele ukufuma ku Babiloni, lyasanshishemo abena Lebi banono, ukulinganishiwa kuli bashimapepo nelyo abena Netinimu na “bana baume ba babomfi ba kwa Solomone.” (Esra 8:15-20) Dictionary of the Bible, iya kwa Dr. James Hastings, ilandapo ukuti: “Pa numa ya nshita imo tusanga [abena Netinimu] abaimikwa umupwilapo nge bumba lya bulashi ilyashila, ica kuti amashuko yapeelwa kuli bene.” Magazini ya fya kusambilila Vetus Testamentum yalandilepo ukuti: “Ukwaluka kwalicitike. Pa numa ya Kubwela ukufuma mu Kululwa muli Bunkole, aba [bambi bambi] tabamwenwe na kabili nga abasha be Tempele, lelo nga babomfi muli lyene, ukuipakisha icifulo ukupala ico ica mabumba yambi, ababombele imilimo yacindama mwi Tempele.”—Moneni umukululo “Icifulo Cayalulwa.”

17. Mulandu nshi abena Netinimu bapokelele ifingi ifya kucita, kabili bushinino nshi ubwa Baibolo bwabako ubwa ici?

¹⁷ Kwena, abena Netinimu tabalingene na bashimapepo na bena Lebi. Amabumba yalekeleshako bali bena Israele, abasalilwe na Yehova umwine kabili abashingapyanikwapo na bashali bena Israele. Nalyo line, ukulangilila kwa Baibolo kwaba kwa kuti mu cilola ca mpendwa yacefiwa iya bena Lebi, abena Netinimu balipeelwe ifingi ifya kucita mu mulimo wa kwa Lesa. Bapeelwe amayanda ya kwikalamo mupepi ne tempele. Mu kasuba ka kwa Nehemia babombele na bashimapepo mu kuwamya ifibumba mupepi ne tempele. (Nehemia 3:22-26) Kabili imfumu ya Persia yapeele icipope ca kuti abena Netinimu bafumishiweko ku musonko, nga fintu fye abena Lebi bafumishiweko pa mulandu wa mulimo wabo uwe tempele. (Esra 7:24) Ici cilangilila fintu aba “abapeelwa” (abena Lebi na bena Netinimu) mu kupalamisha lyene basuntinkanishiwe mu milandu ya ku mupashi na fintu imilimo ya bena Netinimu yaingilishiweko ukulingana no kukabila, nangu cingati tabapendelwe nga bena Lebi. Lintu Esra pa numa alonganike abaulwilwe muli bunkole ukubwela, takwaliko mu kutendekelako umwina Lebi pa kati kabo. E co alibombeshe ku kulonganya bamo. Ico cafuminemo abena Lebi 38 na bena Netinimu 220 ukubwela ku kubomba nga “aba kupyungila ku ŋanda ya kwa Lesa wesu.”—Esra 8:15-20.

18. Abana baume ba babomfi ba kwa Solomone balingile bafikilishe mibombele nshi?

¹⁸ Ibumba lya cibili ilya bashali bena Israele ilyasobwelwe bali bana baume ba babomfi ba kwa Solomone. Baibolo ipeela fye ifyebo fyalonshiwa finono pa lwa bene. Bamo bali “bana ba kwa Hasofereti.” Esra alundako ishiwi lya kulekanya kuli ilyo ishina, ukulilenga ukuba Has·so·pheʹreth, nakalimo ukupilibula “kalemba.” (Esra 2:55; Nehemia 7:57) Muli ifyo pambi bali libumba lya bakalemba nelyo bakambula, nakalimo bakalemba be tempele nelyo aba bwangalishi. Nangu cingati bali bambi bambi abafumishiwako, abana baume ba babomfi ba kwa Solomone bashininkishe ukuipeelesha kwabo kuli Yehova pa kusha Babiloni no kubwelela ku kwakana mu kubwesha ukupepa Kwakwe.

Ukuipeela Abene Ilelo

19. Kwampana nshi kwabapo pa kati ka basubwa ilelo ne mpaanga shimbi?

¹⁹ Mu nshita yesu, Lesa alibomfya abashalapo basubwa mu nshila ya bulamba mu kuluminisha ukupepa kwasanguluka no kubilisha imbila nsuma. (Marko 13:10) Fintu aba basekelela ukumona amakumi ya makana, imyanda ya makana, kabili lyene amamilioni ya mpaanga shimbi ukuilunda kuli bene mu kupepa! Kabili mwandi kubombela pamo kwawamisha ukwabapo pa kati ka bashalapo ne mpaanga shimbi!—Yohane 10:16.

20. Kumfwikisha nshi kupya kwabamo kupelulula ukulosha ku kupalana ku bena Netinimu na bana baume ba babomfi ba kwa Solomone? (Amapinda 4:18)

²⁰ Abashali bena Israele bonse ababwelele ukufuma ku kululwa muli bunkole mu Babiloni wa pa kale bapalana ne mpaanga shimbi abo babombela pamo na bashalapo ba kwa Israele wa ku mupashi. Nangula ni fyo, ni shani pa lwa cishinka ca kuti Baibolo isobolapo abena Netinimu na bana baume ba babomfi ba kwa Solomone? Ukulingana ne mitantikile abena Netinimu na bana baume ba babomfi ba kwa Solomone bapeelwe amashuko yacila pali abo babwelele bambi abashali bena Israele. Ici kuti cacita bwino icikope ca kuti ilelo Lesa alitambulula amashuko ne milimo yalundwako ku mpaanga shimbi bamo abakosoka kabili abaitemenwa.

21. Ni shani fintu bamunyina bamo ababa ne subilo lya pe sonde bapokelela imilimo yalundwako na mashuko?

²¹ Amashuko yalundwako aya bena Netinimu yasuntinkanishiwe mu kulungatika ne mibombele ya ku mupashi. Abana baume ba babomfi ba kwa Solomone mu kushininkisha bapokelele ifishingamo fya bwangalishi. Mu kupalako ilelo, Yehova alipaala abantu bakwe mu kuba ne ‘fya bupe mu bantu’ ku kusakamana ukukabila kwabo. (Abena Efese 4:8, 11, 12) Abasanshiwa muli uku kupayanya myanda iingi iya bamunyina bakosoka, ababelesha abakana mu ‘kucema imikuni,’ ababomba nga bakangalila ba muputule na ba citungu na mu Makomiti ya Misambo mu misambo 98 iya Watch Tower Society. (Esaya 61:5) Pa cishinte cikalamba ica calo conse ica Sosaite, pe samba lya butungulushi bwa ‘mulashi wa cishinka’ ne Bumba Litungulula lyakwe, abaume bafikapo balapokelela ukukanshiwa mu kwaafwa ukupekanya ica kulya ca ku mupashi. (Luka 12:42) Aba kuitemenwa bambi abakokole abaipeela balikanshiwa ku kutungulula amayanda ya Bethel no kwangalila amaprogramu mu kusaalala kwa calo mu kukuula ifibombelo fya misambo ipya na mayanda ya kupepa kwa Bwina Kristu. Balicita apo bengapesha mu kubomba nga bakaafwa bapalamisha aba bashalapo basubwa, abapanga ulubali lwa bushimapepo bwa cifumu.—Linganyeniko 1 Abena Korinti 4:17; 14:40; 1 Petro 2:9.

22. Mulandu nshi cibelele icalinga ukuti bamo aba mpaanga shimbi bapeelwe ifishingamo fyafina nomba, kabili ni shani fintu tulingile ukwankulako kuli ici?

²² Mu nshita sha pa kale, bashimapepo na bena Lebi balitwalilile ukubomba pa kati ka baYuda. (Yohane 1:19) Ilelo, nangu cibe fyo, abashalapo ba kwa Israele wa ku mupashi pe sonde bafwile ukutwalilila ukucepelako. (Cilanyeniko Yohane 3:30.) Mu kupelako, pa numa ya bonaushi bwa kwa Babiloni Mukalamba, bonse ba 144,000 ‘abakakatikwa’ bakasendwa ku mulu ku cupo ca Mwana wa Mpaanga. (Ukusokolola 7:1-3; 19:1-8) Lelo nomba impaanga shimbi shifwile ukutwalilila ukwingilishiwako. Icishinka ca kuti bamo aba bene, ukulinganishiwa ku bena Netinimu na bana baume ba babomfi ba kwa Solomone, nomba balepeelwa ifishingamo fyafina pe samba lya bwangalishi bwa bashalapo basubwa tacibalenga ukuba aba cilumba nelyo ukuyumfwa abacindamisha. (Abena Roma 12:3) Ici citupeela ukucetekela kwa kuti ilyo abantu ba kwa Lesa “bafuma mu Bucushi bukalamba,” kukabako abaume bafikapo—“bacilolo”—abapekanishiwa ku kubuula ubutungulushi pa kati ka mpaanga shimbi.—Ukusokolola 7:14; Esaya 32:1; linganyeniko Imilimo 6:2-7.

23. Mulandu nshi ifwe bonse tulingile ukukusha umupashi wa kupeela ukulosha ku mulimo wa kwa Lesa?

²³ Bonse ababwelele ukufuma ku Babiloni baali abaitemenwa ukubombesha no kushininkisha ukuti bakwete ukupepa kwa kwa Yehova intanshi mu mintontonkanya yabo ne mitima. Cili cimo cine ilelo. Capamo na bashalapo basubwa, ‘abeni balema no kuceme mikuni.’ (Esaya 61:5) E co te mulandu ne subilo lyapayanishiwa na Lesa lintu twakwata, kabili te mulandu na mashuko yengatambululwa kuli baeluda basontwa no mupashi pa ntanshi ya bushiku bwa kwebelwa kwa kwa Yehova pa Armagedone, shi ifwe bonse natulundulule umupashi wabula akaso, uutuntulu, uwa kupeela. Ilintu tatwingabweseshapo Yehova ku kumwenamo kwakwe konse ukukalamba, shi natube aba mweo onse mu cili conse ico tulecita mu kati na nkati ka kuteyanya kwakwe. (Ilumbo 116:12-14; Abena Kolose 3:23) Muli ifyo ifwe bonse kuti twaipeela fwe bene ku kupepa kwa cine, ilyo impaanga shimbi balebombela pamo mu kupalamisha na bashalapo, abalashikwa ‘ukuba no bufumu pe sonde.’—Ukusokolola 5:9, 10.

[Futunoti]

Ifishinka fya Kwibukisha

◻ Ni mu nshila nshi abena Lebi babelele “abapeelwa” muli Israele wa pa kale?

◻ Ni bani abashali bena Israele ababwelele ukufuma mu kululwa muli bunkole, ukucita icikope bani?

◻ Kwaluka nshi kwamoneke ukucitika ku bena Netinimu?

◻ Ukukuma ku bena Netinimu na bana baume ba babomfi ba kwa Solomone, kupalana nshi nomba kuletesekeshiwa?

◻ Kucetekela nshi kwaluminishiwa no kubombela pamo pa kati ka basubwa ne mpaanga shimbi?

[Akabokoshi pe bula 14]

ICIFULO CAYALULWA

Amadikishonari ya Baibolo na maencyclopedia ayengi yalanda ulwa kwaluka kwapitilemo bamo abashali bena Israele ababwelele ukufuma mu kululwa muli bunkole. Ku ca kumwenako, pe samba lya “Ukwaluka mu cifulo cabo,” Encyclopædia Biblica isoso kuti: “Icifulo cabo ica kwangalila pamo cali, nga fintu cilangililwe kale kale, mu nshila imo icasumbulwa pa nshita imo ine. [Abena Netinimu] tabamonwa na kabili nga basha mu bupilibulo bwine bwine ubwa ilyo ishiwi.” (Ukulembwa na Cheyne na Black, Volyumu III, ibula 3399) Muli The Cyclopædia of Biblical Literature, John Kitto alemba ukuti: “Tacaenekelwe ukuti abengi aba bene [abena Netinimu] bali no kubwela kuli ici cifulo ca pa nshi mu Palestine . . . Ukuipeelesha kwa kuitemenwa uko muli ifyo kwamwenwe na aba bantu mu kuwaminako kwaimishe icifulo ca bena Netinimu.” (Volyumu II, ibula 417) The International Standard Bible Encyclopedia isontako ukuti: “Mu cilola ca uku kubishanya ne cikulilo cabo mu ciputulwa ca nshita ica buSolomone, kuti catungwa ukuti ababomfi ba kwa Solomone balikwete ifishingamo fyacindama mwi tempele lya cibili.”—Ukulembwa na G. W. Bromiley, Volyumu 4, ibula 570.

[Icikope pe bula 15]

Lintu abena Israele babwelele ku kukuula cipya cipya Yerusalemu, amakana ya bashali bena Israele baile pamo nabo

[Abatusuminishe]

Pictorial Archive (Near Eastern History) Est.

[Icikope pe bula 17]

Komiti ya Musambo mu Korea. Nge fyacitile abena Netinimu ba pa kale, abaume ba mpaanga shimbi balikwata ifishingamo fyafina mu kupepa kwa cine ilelo