ISAMBILILO 34
Finshi Tulingile Ukulacita pa Kuti Tulelanga Yehova Ukuti Twalimutemwa?
Ukutula apo mwatendekela ukusambilila Baibo, bushe mwalitemenwako Lesa ukucila ifyo mwamutemenwe kale? Bushe kuti mwatemwa ukutwalilila ukukosha bucibusa mwakwata na Yehova? Nga kuti mwatemwa, muleibukisha ukuti Yehova nga amona mulemutemenwako na o akamutemwa kabili akalamusakamana. Kuti mwamulanga shani ukuti mwalimutemwa?
1. Finshi twingacita pa kuti tulange Yehova ukuti twalimutemwa?
Tulalanga Yehova ukuti twalimutemwa nga tulemumfwila. (Belengeni 1 Yohane 5:3.) Tatupatikisha ukulamumfwila. Na kuba alitupeela insambu sha kuisalilapo nga tulefwaya ukulamumfwila nelyo iyo. Cinshi acitila ifi? Ni co Yehova afwaya tuleba ne “cumfwila ukufuma panshi ya mitima.” (Abena Roma 6:17) Ici cilepilibula ukuti tamulingile ukulaumfwila Yehova pa mulandu fye wa kuti e fyo atweba, lelo mulingile ukulamumfwila pa mulandu wa kuti mwalimutemwa. Ifyaba mu cipande 3 na 4 muli cino citabo bafilembela ukumwafwa pa kuti mwishibe ifyo mwingacita pa kulenga Yehova ukusekelela, na pa kuti mwilacita ifingamukalifya.
2. Mulandu nshi cingafisha ukulanga ukuti twalitemwa Yehova?
Baibo itila: “Amafya ayo uwalungama akwata yengi.” (Amalumbo 34:19) Bonse kwaliba ifyo tucita ifitwafya ukuleka pa mulandu no kukanapwililika. Na kabili kuti twakwata amafya pa mulandu ne mikalile ukwafya, ulufyengo, nelyo amafya yambi. Nga twakwata amafya nalimo kuti catukosela ukucita ifyo Yehova afwaya, pantu nalimo icingatwangukila kucita ifyo ashifwaya. Lelo nga mwatwalilila ukukonka ifyo Yehova amweba, ninshi mulelanga ukuti mwalimutemwa ukucila icintu icili conse, kabili ninshi mulelanga ukuti muli ba cishinka kuli ena. Ici cikalenga na o akabe uwa cishinka kuli imwe, kabili takamushe nakalya.—Belengeni Amalumbo 4:3.
SAMBILILENI NA FIMBI
Sambilileni umulandu Yehova atemenwa nga mulemumfwila, e lyo ne cingamwafwa ukulamumfwila.
3. Umulandu uwamukuma
Mwi buuku lya mu Baibo ilya kwa Yobo tubelengamo ukuti Satana alibepeshe Yobo na bantu bonse abafwaya ukubombela Yehova. Belengeni Yobo 1:1, 6–2:10, lyena lanshanyeni aya mepusho:
Bushe Satana atile cinshi calengele Yobo aleumfwila Yehova?—Moneni Yobo 1:9-11.
Cinshi Satana abepeshe abantu bonse ukubikako fye na imwe bene?—Moneni Yobo 2:4.
Belengeni Yobo 27:5b, lyena lanshanyeni ici cipusho:
Bushe Yobo alangile shani ukuti alitemenwe sana Yehova?
Yobo alilangile ukuti alitemenwe Yehova ilyo atwalilile ukuba uwa cishinka kuli ena
Tulanga ukuti twalitemwa Yehova nga twatwalilila ukuba aba cishinka kuli ena
4. Mulecita ifingalenga Yehova alesekelela
Belengeni Amapinda 27:11, lyena lanshanyeni aya mepusho:
Bushe Yehova omfwa shani nga mulemumfwila kabili nga mulecita ifilanga ukuti muli ba mano? Cinshi mwa-asukila ifyo?
5. Kuti mwaba aba cishinka kuli Yehova
Ukutemwa twatemwa Yehova e kulenga tule-ebako abantu pali ena. Apo tulafwaya ukuba aba cishinka kuli ena, tulamumfwila na lintu cafishe. Tambeni VIDIO, lyena lanshanyeni amepusho yakonkapo.
Bushe cilamukosela ukwebako abantu pali Yehova?
Muli vidio twatamba, cinshi ca-afwile ba Grayson ukuleka ukuba no mwenso?
Cilanguka ukuba aba cishinka kuli Yehova nga ca kuti twatemwa ifyo atemwa no kupata ifyo apata. Belengeni Amalumbo 97:10, lyena lanshanyeni aya mepusho:
Ukulingana ne fyo musambilile, fintu nshi fimo ifyo Yehova atemwa? Kabili fintu nshi fimo ifyo apata?
Cinshi cingamwafwa ukutemwa ifisuma no kupata ifyabipa?
6. Nga tuleumfwila Yehova ifintu filatuwamina
Ukumfwila Yehova kusuma. Belengeni Esaya 48:17, 18, lyena lanshanyeni aya mepusho:
Bushe muletontonkanya ukuti Yehova lyonse aleshiba ifingatuwamina? Cinshi mwa-asukila ifyo?
Ukutula apo mwatendekela ukusambilila, busuma nshi mwasanga mu kusambilila Baibo no kwishiba Lesa wa cine Yehova?
ABANTU BAMO BATILA: “Lesa tabikako amano ku fyo ncita.”
Lilembo nshi mwingabomfya pa kulanga umuntu ukuti ifyo tucita kuti fyalenga Yehova atemwa nelyo aumfwa ububi?
IFYO MUSAMBILILE
Tulanga ukuti twalitemwa Yehova nga tulemumfwila kabili nga tulecita fyonse ifyo atweba na lintu cafishe.
Ukupitulukamo
Finshi musambilile ku fyo Yobo acitile?
Finshi mufwile ukulacita pa kulanga ukuti mwalitemwa Yehova?
Finshi fikamwafwa ukutwalilila ukuba aba cishinka kuli Yehova?
ISHIBILENIPO NA FIMBI
Moneni ifingamwafwa ukuba aba cishinka kuli Yehova na ku cilonganino.
Belengelenipo na fimbi pa bufi ubo Satana abepeshe abantu.
“Yobo Alitwalilile Ukuba uwa Cishinka” (The Bible—What Is Its Message? icipande 6)
Tambeni vidio pa kuti mumone ifyo na bana bengalanga ukuti balitemwa Yehova.
Bushe abana kuti bacita shani ifyo Yehova afwaya nangu ca kuti abana banabo balefwaya ukuti bacite ifyabipa?