“Antwala pa Menshi Ayatekanya”

MU NSHITA ya lusuba mu ncende shalembwa mu Baibolo, impaanga shilakabila ukunwa amenshi cila bushiku. Kanshi, umulimo wacindama umo uo kacema abomba kupeela umukuni wakwe amenshi. Bakacema limo limo batapa amenshi mu cishima no kwitulwila mu ca kunwenamo pa kuti impaanga shinwe. (Ukutendeka 29:1-3) Lelo, maka maka mu nshita ya mainsa, incende shapalama ku milonga ne mimana shilakwata amenshi ayasuma, “ayatekanya.”—Amalumbo 23:2.

Kacema musuma afwile ukwishiba uko engasanga amenshi no mulemfwe uusuma ifya kupeela umukuni wakwe. Kacema alepususha impaanga shakwe nga ca kutila alishiba incende bwino. Davidi, uwali kacema wa mpaanga pa myaka iingi mu mpili sha Yudea, apashenye ubutungulushi bwa kwa Lesa ubwa ku mupashi ku fyo kacema atungulula impaanga shakwe ku mulemfwe uusuma na menshi yapeela umweo. Davidi atile, “antwala pa menshi ayatekanya.”—Amalumbo 23:1-3.

Ilyo papitile imyaka, ukupitila muli kasesema wakwe Esekiele, Yehova abomfeshe icilangililo capalako. Alaile ukulonganya abantu bakwe ukubafumya mu fyalo umo basalanganine, nga filya umucemi alonganya impaanga shakwe. Abalaile ukuti: “Nkashifumya . . . no kushicemena ku mpili sha kwa Israele, mu mpito sha menshi.”—Esekiele 34:13.

Yehova Lesa na kabili alyangwa sana ku kuteyanya amenshi ya ku mupashi. Ibuuku lya Ukusokolola lilondolola “umulonga wa menshi ya Mweo” ayafuma ku cipuna ca kwa Lesa. (Ukusokolola 22:1) Abantu bonse balitwa ku kunwa muli uyu mumana. “Uulefwaya [kuti abuulapo] ica bupe amenshi ya Mweo.”—Ukusokolola 22:17.

Aya menshi ya mweo aya mampalanya yemininako ukuteyanya kwa kwa Lesa ukwa mweo wa muyayaya. Onse kuti atendeka ukunwa aya menshi ukupitila mu ‘kwishiba Lesa wine wine eka, no yo atumine, Yesu Kristu.’—Yohane 17:3.