‘Ilemeneni Kuli Yehova’

“Ilemene kuli Yehova, na o akakupeele fifwayo mutima obe.”—AMALUMBO 37:4.

1, 2. Nani aba Intulo ya nsansa shine shine, kabili cinshi Imfumu Davidi yasosele pali ici cishinka?

“BA NSANSA abaibukila ukuti balakabila ifya ku mupashi, . . . ba nsansa aba luse, . . . ba nsansa aba mutende.” Ifi fyebo pamo na fimbi 6 ifyalondolola aba nsansa fyalengele abengi ukukutikisha kabili e fyaba mu mashiwi ya kwiswila aya Lyashi lya pa Lupili ilya lulumbi ilya kwa Yesu ilyo Mateo, kalemba we Landwe alembele. (Mateo 5:3-11) Amashiwi ya kwa Yesu, yatupeela ubushininkisho bwa kutila kuti twakwata insansa.

² Ulwimbo lwashila ulo Imfumu Davidi iya Israele wa ku kale yashikile lulanda pali Yehova, Intulo ya nsansa sha cine. Davidi atile: “Ilemene kuli Yehova, na o akakupeele fifwayo mutima obe.” (Amalumbo 37:4) Lelo, cinshi cingalenga umuntu ‘ukuilemena’ nga aishiba Yehova ne mibele yakwe iishaifulila? Bushe ukubebeta ifyo aacita ne fyo akacita ku kufishapo ubufwayo bwakwe kumupeela shani isubilo lya kupokelela ‘ififwayo mutima wenu’? Ukubebetesha Amalumbo 37, ifikomo 1 ukufika ku 11, kwalatupeela ifyasuko.

“Wifinuka”

3, 4. Nga fintu calembwa pa Amalumbo 37:1, cinshi Davidi atufunda, kabili mulandu nshi cicindamine ukukonka uko kufunda pali lelo?

³ Tuleikala mu “nshita shaibela ishayafya,” kabili ububifi nabufula. Twalimona ukufishiwapo kwa mashiwi ya kwa Paulo ayatila: “Ababifi kabili abafutika bakaya balebipilako fye, bakulalufya kabili bakulalufiwa.” (2 Timote 3:1, 13) Fintu cayanguka ukukumbwa ilyo twamona kwati ababifi bena ifintu filebendela bwino! Ifyo fyonse kuti fyatupumbula, fyalenga twaleka ukwangwa ku fya ku mupashi. Moneni ifyo amashiwi ya kwiswila aya Amalumbo 37 yatweba pa lwa bwafya bwingabapo. Yatila: “Wilalunguluka pa ncitatubi, wifinuka abacite fya bupondamishi.”

⁴ Cila bushiku tulomfwa ifingi ifya lufyengo pa milabasa na mu manyunshipepala. Bashimakwebo balacita ubufumfuntungu no kufinsha bambi ukwabula ukukandwa. Utupondo tulashukila bamo. Intalamisoka tashiikatwa nelyo kukandwa. Ifi fyonse ifilelanga ifyo ubupingushi bupotamikwa kuti fyatukalifya nelyo ukutusakamika. Ukumona kwati ababifi ifintu filebendela bwino kuti kwalenga no kuti mwalabakumbwa. Lelo, bushe ukufulwa kuti kwalungika ifintu? Bushe ukukumbwa ifimoneka ngo lubanda lwa babifi kuti kwayalula ifikabacitikila? Ca kutali! Kabili tatufwile ‘ukulunguluka.’ Mulandu nshi?

 5. Mulandu nshi ababifi babapashanishisha ku cani?

⁵ Kemba wa malumbo ayasuka ati: “Pantu bakabonsa bwangu ngo mulemfwe, kabili bakalokota nge cani citeku.” (Amalumbo 37:2) Icani iciteku kuti camoneka bwino, lelo cilabonsa bwangu no kuuma. E fyo ciba na ku mbifi. Ifimoneka ngo lubanda lwabo fiba fya pa nshita fye inono. Ilyo bafwa ifintu banonka mu bufumfuntungu tafibaafwa. Kuli pele pele balapingulwa. Paulo alembele ati: “Icilambu ca lubembu ni mfwa.” (Abena Roma 6:23) Ababifi pamo na bashalungama kuli pele pele bakapokelela “icilambu,” e kuti imfwa. Mwandini tamufuma fisuma muli iyi mikalile!—Amalumbo 37:35, 36; 49:16, 17.

 6. Cinshi twingasambililako ku Amalumbo 37:1, 2?

⁶ E co, bushe tulingile ukuleka ulubanda lwa pa kashita kanono ulwa babifi ukutufuupula? Kwena ico twingasambililako ku fikomo fibili ifya kubalilapo ifya Amalumbo 37 ni ci: Te kwesha ukuleka ulubanda lwabo ukumupumbula ku kusala mwasala ukubombela Yehova. Lelo muleangwa sana ku mapaalo na mabuyo ya ku mupashi.—Amapinda 23:17.

“Tetekela Yehova no Kucite Cisuma”

 7. Mulandu nshi tulingile ukutetekela Yehova?

⁷ Kemba wa malumbo atucincisha ukuti: “Tetekela Yehova no kucite cisuma.” (Amalumbo 37:3a) Nga twasakamikwa nelyo tuletwishika fimo, tufwile ukutetekela sana Yehova. E utupeela umutelelwe wa ku mupashi uwafikapo. Mose alembele ati: “Uwaikalo mwa kufisama ku Wapulamo, mu cintelelwe ca Wa maka yonse e mo atubilisha.” (Amalumbo 91:1) Nga ca kuti bumpulamafunde bwaba muli buno bwikashi bwatusakamika, tufwile ukucisha na po ukushintilila pali Yehova. Nga ca kuti twaifyutula ukuulu, tulomfwa bwino umunensu nga atwafwa ukuti twende. E fyo ciba na lintu tulefwaisha ukuba aba cishinka, tulakabila ukwafwa kwa kwa Yehova.—Esaya 50:10.

 8. Bushe ukubombako ubutumikishi bwa Bwina Kristu kuti kwapwisha shani ukufiitwa pa mulandu wa lubanda lwa babifi?

⁸ Cimo icingapwisha ukufiitwa pa mulandu wa lubanda lwa babifi, kuba abapimpa ukufwaya abapala impaanga no kubafwa ukwishiba bwino bwino ubufwayo bwa kwa Yehova. Ilyo ububifi bulefulilako, tufwile ukwangwa sana ku kwafwa bambi. Umutumwa Paulo asosele ati: “Mwilaba ukucita icisuma no kupeelana ifintu, pantu amalambo aya musango yu e yateemuna Lesa.” “Icisuma” sana ico twingacita, kwebako bambi ulwa mbila nsuma iya Bufumu bwa kwa Lesa iya bukata. Ukushimikila kwesu ku cintubwingi cine cine “lilambo lya kulumbanya.”—AbaHebere. 13:15, 16; Abena Galatia 6:10.

 9. Londololeni umwalola ukukonkomesha kwa kwa Davidi ukwa kuti “ikala mu calo.”

⁹ Davidi atwalilila ati: “Ikala mu calo no kubishanya ne cishinka.” (Amalumbo 37:3b) “Icalo” mu nshiku sha kwa Davidi cali cifulo Yehova apeele kuli Israele, Icalo Calaiwe. Ilyo Solomone aleteeka, imipaka ya ciko yafumine ku Dani, ku kapinda ka ku kuso ukufika ku Beere-sheba, ku kapinda ka ku kulyo. Uyu wali e mushi wa bena Israele. (1 Ishamfumu 4:25) Pali lelo, te mulandu na kuntu twikala, tulafulukisha inshita ilyo isonde lyonse likaba paradaise mu calo cipya ica bulungami. Pali ino nshita twikala mu mutelelwe wa ku mupashi.—Esaya 65:13, 14.

10. Cinshi cifumamo nga ‘twabishanya ne cishinka’?

¹⁰ Cinshi cikafumamo nga ‘twabishanya ne cishinka’? Ipinda lyapuutwamo litucinkulako ati: “Umuntu wa cishinka afula amapaalo.” (Amapinda 28:20) Ukutwalilila ukushimikila muli bucishinka konse uko twikala na ku uli onse uo twasanga, cine cine kukatuletela icilambu ukufuma kuli Yehova. Ku ca kumwenako, baFrank na bakashi babo, baRose, batendeke ukubomba bupainiya imyaka 40 iyapita mwi tauni lyabela ku kapinda ka ku kuso aka Scotland. Abanono abafwaile ukusambilila icine kulya balisensenwinwe. Ukwabula ukunenuka, aba bapainiya babili, batendeke ukushimikila no kupanga abasambi. Pali nomba mwaba icilonganino cakosa muli lilya itauni. Yehova alipaala icine cine aba baupana pa kutwalilila ukubomba. Mu kuicefya, baFrank batila, “ukutwalilila fye ukuba mu cine no kubomfiwa na Yehova, e paalo likalamba twakwata.” Ca cine, nga ‘twabishanya ne cishinka,’ tulapokelela amapaalo ayengi no kutasha pali yene.

“Ilemene Kuli Yehova”

11, 12. (a) Kuti ‘twailemena shani kuli Yehova’? (b) Buyo nshi mwingemika ukukuma isambililo lya pa lwenu, kabili cinshi napamo cingafumamo?

¹¹ Pa kukosha bucibusa bwesu na Yehova no kutwalilila ukumucetekela, tufwile ‘ukuilemena kuli Yehova.’ (Amalumbo 37:4a) Kuti twacita shani ifyo? Tufwile ukwangwa Yehova, te kwangwa fye ku fyesu nangu line tuli na mafya. Inshila imo iya kucitilamo ici yaba kubelenga Icebo cakwe. (Amalumbo 1:1, 2) Bushe mulaipakisha ukubelenga Baibolo? Mukalaipakisha nga mulebelenga no buyo bwa kusambilila na fimbi pali Yehova. Esheni ukukutumana pa numa ya kubelenga fimo e lyo no kuipusha ati, ‘Bushe ifi nabelenga filensambilisha cinshi pali Yehova?’ Kuti cawama nga mulekwata ibuuku nelyo ipepala mupepi ilyo mulebelenga Baibolo. Cila nshita nga mwakutumana pa kuti mumone umo amashiwi mwabelenga yalola, lembeniko amashiwi yamo aya kumwibukisha pa mibele ya kwa Lesa imo iisuma. Mwi lumbo limbi, Davidi aimbile ati: “Lekeni fibe ifyasuminishiwa ku cinso cenu ifyebo fya mu kanwa kandi na matontonkanyo ya mu mutima wandi, mwe Yehova, Icilibwe candi icasansuka, kabili Umulubushi wandi.” (Amalumbo 19:14) Uku kuposeshako amano ku Cebo ca kwa Lesa ‘kulasuminishiwa’ kuli Yehova kabili kulawama kuli fwe balecite fyo.

¹² Bushe ukusambilila no kwetetula kuti kwatuletela shani insansa? Kuti twaimika ubuyo bwa kusambilila ifingi pali Yehova ne nshila shakwe. Tukasanga ifyebo ifingi ifyo twingatemwa ukutontonkanyapo mu fitabo pamo nga Umuntu Wakulisha Uwabalile Abako uwa Mweo na Palameni Kuli Yehova.a Davidi aeba abalungami icikafumamo ati, nangu cibe shani, Yehova ‘akamupeele fifwayo mutima wenu.’ (Amalumbo 37:4b) Ukutetekela aya mashiwi kufwile e kwalengele Yohane ukulemba amashwi ya kuti: “Uku e kucetekela uko twacetekela wene, ukuti, te mulandu ne co twalomba icilingene no kufwaya kwakwe, alatuumfwa. Kabili, nga twaishiba ukuti alatuumfwa pali conse ico tulelomba, ninshi twaishiba ukuti twalakwata ifintu twalomba apo natulomba kuli wene.”—1 Yohane 5:14, 15.

13. Mu myaka ya nomba line, kulunduluka nshi kwamonwa mu mulimo wa kushimikila Ubufumu mu fyalo ifingi?

¹³ Ico fwe ba mpomfu tufwaisha, kumona bumulopwe bwa kwa Yehova bwaebelwa. (Amapinda 27:11) Imitima yesu ilacankwa pa kumona umulimo ukalamba bamunyinefwe balebomba. Aba bamunyinefwe baleshimikila mu fyalo umo kale ubuteeko bwale-enekela abekashi ukukonka ifipope fyabo fyonse na mu fyalo umwali bakateeka ba lucu. Tulafwaisha ukumona ubuntungwa na bumbi ubwingabapo ilyo buno bwikashi tabulapwa. Ababomfi ba kwa Yehova abengi abekala mu fyalo umo imilimo ya Bwina Kristu ishabindwa, balabombesha ukushimikila abaya ku masomo, imbutushi, na bambi abaya ku kwikala muli ifi fyalo pa nshita inono no kuba no buntungwa bwa kupepa mulya. Tusuubila ukuti ilyo aba bantu babwelela ku mwabo, batwalilila ukulenga ulubuuto lwa cine ukubalika no mumoneka kwati mwaba imfifi yatoola.—Mateo 5:14-16.

“Konkomwena Pali Yehova Inshila Yobe”

14. Bushininkisho nshi twakwata ubwa kutila kuti twashintilila pali Yehova?

¹⁴ Ala cilasansamusha ukwishiba ukuti amasakamika yesu ne fyo tumona nga mafya ya kulungulusha kuti fyafumishiwapo! Mu nshila nshi? Davidi asosa kabili ati: “Konkomwena pali Yehova inshila yobe, kabili mutetekele, na o akacita.” (Amalumbo 37:5) Mu filonganino fyesu, twalimona ubushininkisho bwa kutila kuti twashintilila pali Yehova. (Amalumbo 55:22) Ababa mu mulimo wa nshita yonse, nampo nga ni bapainiya, bakangalila benda, bamishonari, nelyo abaitemenwa ukubomba pa Bethel, bonse kuti bapeela ubushininkisho bwa kuti Yehova alishintililwapo ku kutwafwa. Cinshi mushingalandila na bo mwaishiba no kubepusha ifyo Yehova abafwa? Cine fye mukomfwa ifingi pa bumi bwabo ifilanga ukuti na mu nshita shayafya, ukuboko kwa kwa Yehova takwipipa. Lyonse alabapekanishisha ifyo bakabila mu bumi.—Amalumbo 37:25; Mateo 6:25-34.

15. Bushe ubulungami bwa bantu ba kwa Lesa bubalika shani?

¹⁵ Nga twashintilila pali Yehova no kumucetekela umupwilapo, ifyo kemba wa malumbo akonkeshapo ukusosa kuti fyatucitikila. Atila: “Ubulungami bobe akafumya ngo lubuuto, no bupingushi bobe nga kasuba pa kati.” (Amalumbo 37:6) Fwe Nte sha kwa Yehova, ilingi line balatubepesha. Lelo Yehova alashibula amenso ya ba mitima ya bufumacumi ku kubafwa ukukutuluka ukuti icilenga ifwe ukubomba ubutumikishi, kutemwa Yehova na banensu. Pa nshita imo ine, nangu line batubepesha, imyendele yesu iisuma ilamonwa kuli bambi. Yehova alatutungilila mu fya kukaanya fyonse na mu kupakaswa. Ne ci cilenga ubulungami bwa bantu ba kwa Lesa ukubalika nga kasuba pa kati.—1 Petro 2:12.

‘Ba Tondolo . . . Mulolele no Kuteekanya’

16, 17. Ukulingana na Amalumbo 37:7, ino ni nshita ya kucita nshi, kabili mulandu nshi?

¹⁶ Kemba wa malumbo akonkeshapo ukusosa ati: “Ba tondolo kuli Yehova, no kumulolela no kuteekanya; wilalunguluka pa muntu uwashuka umo enda, pa muntu uucita amapange yabi.” (Amalumbo 37:7) Ico Davidi akomailapo apa ca kuti, tufwile ukulolela no kuteekanya ukuti Yehova umwine acitepo fimo. Nangu line impela ya buno bwikashi tailaisa, ici tacifwile ukulenga twalailishanya. Bushe tatwamona ukuti uluse lwa kwa Yehova no kuteekanya fyalikula ukucila ifyo twaletontonkanya kale? Bushe pali nomba kuti twalanga ukuti na ifwe tulalolela no kuteekanya pa kwangwa ukushimikila imbila nsuma ilyo impela ishilaisa? (Marko 13:10) Ino e nshita ya kukanasuswa ukucita ifintu ifingapwisha icimwemwe cesu no mutelelwe wa ku mupashi. Nomba ni nshita ya kukosapo ukukaana ukusonga kwa calo ca kwa Satana. Kabili ino ni nshita ya kusungilila umusangwela no kukanaonaula ukulungama kwesu kuli Yehova. Shi natutwalilile ukutaluka amatontonkanyo yabipa no kutaluka ku micitile ya bucisenene ku baume nelyo ku banakashi nangu fye ku banakashi banensu atemwa abaume banensu.—Abena Kolose 3:5

¹⁷ Davidi atufunda ati: “Nashako ubukali, no kuleke cipyu; wilalunguluka, calola fye ku kubifya. Pantu incitatubi shikafitwa; lelo abalolela Yehova, bene bakapyaninine calo.” (Amalumbo 37:8, 9) Ca cine kuti twasuubila ukuti ku ntanshi—nomba line fye—Yehova akafumyapo ububifi bonse pe sonde kumo na babucita.

“Pashala Panono”

18, 19. Bushe amashiwi ya pa Amalumbo 37:10 yatukoselesha shani?

¹⁸ “Pashala panono, e lyo umubifi takabepo; awe ukalolekesha apo ali, no kusanga tabapo.” (Amalumbo 37:10) Fintu aya mashiwi yatukosha ilyo tulepalama ku mpela ya buno bwikashi na pa kalume ka kukanatekwa na Yehova ukwaleta utuyofi! Ubuteeko bonse no bulashi ubwapangwa no muntu bwalifilwa icabipisha. Kabili tuli mupepi no kutendeka ukuteekwa na Lesa, ukupitila mu Bufumu bwa kwa Yehova ubo apeela Yesu Kristu. Bukateka isonde lyonse no kufumyapo abakaanya Ubufumu bwa kwa Lesa.—Daniele 2:44.

¹⁹ Mu calo cipya ico Ubufumu bwa kwa Lesa bukalateeka, nangu mukafwayefwaye shani, tamwakasangemo “umubifi.” Cine cine, onse uukapondokela Yehova akafumishiwamo mu kwangufyanya. Takuli uukasansa bumulopwe bwakwe nelyo uukakaana ukukonka ubutungulushi bwa bulesa uukabamo. Abena mupalamano benu bonse bakalafwaya ukuteemuna Yehova. Mwandini ico cikaleeta umutelelwe—takwakabe ifya kukomenako ifiibi, ifya kupilikisha mu fiibi, kabili takwakabe ifikonaula ukucetekela kwafikapo ne nsansa!—Esaya 65:20; Mika 4:4; 2 Petro 3:13.

20, 21. (a) Bushe “abalanda” balumbulwa pa Amalumbo 37:11 ni bani, kabili ni kwi basanga “ubwingi bwa mutende”? (b) Mapaalo nshi tukakwata nga twapashanya Davidi Mukalamba?

²⁰ Lyene “abalanda bakapyaninine calo.” (Amalumbo 37:11a) Lelo, bushe aba “balanda” ni bani? Ishiwi lyapilibulwa “abalanda” lyafuma kwi shiwi lipilibula “ukucusha, ukuicefya, ukuseebanya.” Cine cine, “abalanda” ni balya abaicefya abalolela pali Yehova ukufumyapo ulufyengo lonse ulo baculako. ‘Bakailemeno bwingi bwa mutende.’ (Amalumbo 37:11b) Na pali ino nshita tulasanga umutende uwingi muli paradaise wa ku mupashi uwayampana ne cilonganino ca cine ica Bwina Kristu.

²¹ Nangu line tucili tulecula, tulaafwana no kusansamusha abakungumane mitima. Ne ci cilenga abantu ba kwa Yehova ukuba abaikushiwa icine cine. Bamunyina basontwa ukuba abacemi, mu kutemwa balatupyungila mu fyo tukabila lwa ku mupashi, kabili limo na lwa ku mubili kwine, ukutwafwa ukushipikisha ukucula pa mulandu wa bulungami. (1 Tesalonika 2:7, 11; 1 Petro 5:2, 3) Mwandini uyu mutende twakwata walicindama! Twalikwata ne subilo lya kwikala ku ciyayaya muli Paradaise wa mutende uwalaswa ese. Shi kanshi natupashanye Davidi Mukalamba, Yesu Kristu, uo ukupimpila Yehova kwacincinshe ukumubombela na bucishinka ukufika ku mpela. (1 Petro 2:21) Nga twacite fyo, tukatwalilila ukuba ne nsansa, ukulalumbanya Lesa wesu, Yehova, uo tuilemanamo.

[Futunoti]

Bushe Kuti Mwayasuka?

• Finshi mwasambilila mu Amalumbo 37:1, 2?

•Kuti ‘mwailemena shani kuli Yehova’?

•Bushininkisho nshi bulanga ukutila kuti twashintilila pali Yehova?

[Icikope pe bula 9]

Abena Kristu ‘tabafinuka abacite ifishalungama’

[Icikope pe bula 10]

‘Tetekeleni Yehova no kucite cisuma’

[Icikope pe bula 11]

Ilemeneni kuli Yehova pa kusambilila ifingi pali wene

[Icikope pe bula 12]

“Abalanda bakapyaninine calo, no kuilemeno bwingi bwa mutende”