Ukulanshanya Ilyashi lya mu Baibolo—Bushe Abantu Bonse Abasuma Balaya ku Muulu?

INTE SHA KWA YEHOVA balatemwa sana ukulanshanya Baibolo na bantu. Bushe kwaliba ilyashi ilyo Baibolo yalandapo ilyo mufwaisha ukwishiba? Bushe mulafwaya ukwishiba ifyo Inte sha kwa Yehova basuminamo nelyo umulandu bashicitilako ifintu fimo? Nga mulafwaya ukwishiba, mukabepushe nga bamutandalila. Bakatemwa sana ukulanshanya na imwe.

Ifi e fyo Inte sha kwa Yehova balanshanya na bantu. Natutile Nte uwe shina lya kuti Marcus aya mu kushimikila pa ng’anda ya mwaume uwe shina lya kuti Robert.

Finshi Ifyo Abakaya ku Muulu Bakaya mu Kucita?

Marcus: Nga mwatontonkanya pa nshita ya ku ntanshi, bushe mumona ukuti ifintu fikawama, atemwa fikacilapo ukubipa, nelyo fikaba fye ifi fine fyaba?

Robert: Imona ukuti ifintu fikawama. Ndafwaisha ukuya ku muulu pa kuti nkayeba na Shikulu.

Marcus: Isubilo mwakwata lisuma nga nshi. Baibolo yalilandapo sana pa fyo ku muulu kwaba no kuti abantu bamo balikwata ishuko lya kuyako. Bushe mwalitontonkanyapo ifyo abakaya ku muulu bakaya mu kucita?

Robert: Tukayaba pamo na Lesa kabili tukalamulumbanya pe.

Marcus: Ilyo isubilo mwakwata lisuma sana. Na kuba, Baibolo tailanda fye pa fisuma ifyo abakaya ku muulu bakalaipakisha, lelo ilalanda na pa mulimo wacindama uo bakalabomba.

Robert: Mulimo nshi bakalabomba?

Marcus: Umulimo bakalabomba ni uyu balemba pa Ukusokolola 5:10. Pali ili lembo patila: “[Mwe Yesu] mwabalengele ukuba ishamfumu kabili bashimapepo ba kwa Lesa wesu, kabili bakaba bashamfumu abakalateka isonde.” Ba Robert, bushe mwaumfwa ukuti abakaya ku muulu bakaya mu kucita finshi?

Robert: Baibolo yalanda ati bakaba bashamfumu abakalateka isonde.

Marcus: Ici cishinka Baibolo yalanda caumfwika bwino, bushe te ifyo fine?

Bakalateka Bani?

Marcus: Nomba, bushe tamulesumina ukuti nga ca kuti abaya ku muulu bakaba ishamfumu, ninshi kufwile kwaba abantu abo bakalateka? Pantu na kuba, cinshi ubuteko bwingabelako nga ca kuti takuli abantu aba kuteka?

Robert: Naumfwa ifyo mulelandapo.

Marcus: Kanshi kuti cawama ukwipusha ukuti, Ni bani abo bakalateka?

Robert: Ndemona kwati tukalateka abantu abakaba pe sonde, abashilati bafwe no kuya ku muulu.

Marcus: Ico kuti calolamo fye nga ca kutila abantu bonse abasuma balaya ku muulu. Lelo kuli na cimbi ico mufwile ukutontonkanyapo. Bushe kuti kwabako abantu bamo abasuma, abashakaye ku muulu?

Robert: Nshatalaumfwapo Umwina Kristu nangu umo uwasumina ukuti abantu bamo abasuma tabakaye ku muulu.

Marcus: Ico naipushisha icipusho ici mulandu wa fyo tubelenga pa Amalumbo 37:29. Kuti mwabelengapo mukwai.

Robert: Paleti: “Abalungama e bakekala mu calo, kabili bakekalamo umuyayaya.”

Marcus: Mwabelenga bwino sana. Bushe mwaumfwa ukuti abantu abengi abasuma bakekala kwi?

Robert: Baibolo yatila bakekala pe sonde.

Marcus: Mwalungika. Kabili tabakekale pe sonde pa nshita fye iinono. Moneni ukuti Baibolo yatila: “Bakekalamo umuyayaya.”

Robert: Nalimo ici cilolele fye mu kuti lyonse pe sonde pakalaba abantu abasuma. Nga twafwa, twaya na ku muulu, abantu bambi abasuma balafyalwa no kutupyana.

Marcus: Ifi mwalanda, nalimo e fyo abengi bengasosa. Lelo, bushe namwishiba ukuti ili ilembo lipilibula fimbi? Bushe talilelanda fye ukuti abantu abasuma bakekala pe sonde umuyayaya?

Robert: Nshumfwikishe ifyo mulelandapo.

Isonde Likaba Paradaise

Marcus: Cisuma, natumone ifyo ilembo limbi lilanda pa fyo ubumi bukaba pe sonde ku ntanshi. Natubelenge Ukusokolola 21:4. Ili ilembo lilanda pa bantu abakabako pali ilya nshita ukuti: “[Lesa] akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.” Bushe ili talili lisubilo ilisuma?

Robert: Ee, lisuma. Lelo ndemona kwati lilelanda pa fyo ubumi bukaba ku muulu.

Marcus: Ca cine ukuti abakaya ku muulu bakaipakisha amapaalo nga aya yene. Lelo belengenipo pali ici cikomo na kabili. Bushe mwaumfwa ati cinshi cikacitika ku mfwa?

Robert: Baibolo yatila “imfwa tayakabeko na kabili.”

Marcus: Cishinka. Ukwabula no kutwishika, na imwe bene kuti mwasumina ukuti pa kuti icintu cimo cileke ukubako, ninshi kale e ko cali, bushe te ifyo fine?

Robert: Ee, ni fyo fine.

Marcus: Lelo bushe ku muulu kwalitala akubapo imfwa? Ni pano calo e po abantu bafwa.

Robert: Kwena, mfwile ukutontonkanyapo pali ifi mwalanda.

Marcus: Mwamona ba Robert, Baibolo isambilisha ukuti abantu bamo abasuma bakaya ku muulu lelo bambi abengi bakekala pano pene pe sonde umuyayaya. Na kuba, mufwile mwalyumfwapo aya mashiwi ayaishibikwa sana ayatila: “Balipaalwa abafuuka, pantu bakapyana isonde.”—Mateo 5:5.

Robert: Ee, nalyumfwapo. Ili ilembo balalibelenga sana ku calici ku mwesu.

Marcus: Nga ca kuti abafuuka bakapyana isonde, bushe ici tacilolele mu kuti abantu bakekala pe sonde? Abakekala pe sonde bakaipakisha amapaalo aya balandapo muli ili ibuuku lya Ukusokolola. Bakamonako ifyo isonde likawama pantu Lesa akafumyapo fyonse ifyabipa, ukubikako fye ne mfwa.

Robert: Naumfwa ifyo mwalanda, nomba nshilemona ukuti ilembo fye limo nangu yabili kuti yanshinina ukuti ifyo mulelanda fya cine.

Marcus: Ca cine. Na kuba muli Baibolo mwaliba amalembo ayengi ayalondolola ifyo imikalile ikaba pe sonde ku ntanshi. Nga namukwata inshita kuti namulangako ilembo limo ilyo natemwa sana.

Robert: Mukwai cili fye bwino, ninkwatako akashita.

“Umubifi Takabepo”

Marcus: Twacibelenga Amalumbo 37:29. Nomba lekeni tubelenge ifikomo 10 na 11. Belengenipo mukwai.

Robert: Patila: “Pashala fye panono no mubifi takabepo; awe ukalolekesha apo aali, no kusanga talipo. Lelo abafuuka e bakekala mu calo, kabili bakasekelela nga nshi pantu umutende ukafula.”

Marcus: Mwabelenga bwino. Ukulingana ne cikomo 11, ni kwi “abafuuka” nelyo abantu abasuma, bakekala?

Robert: “Bakekala mu calo.” Lelo ndemona kwati ili lembo lilelanda pali ino ine nshita, pantu na kuba, ino nshita abantu abasuma bekala pano calo.

Marcus: Ico cishinka. Lelo nga namumona, ici cikomo cilanda no kuti abantu abasuma bakaipakisha “umutende” uwingi. Nomba ba Robert, bushe muno calo mwaliba umutende uwingi?

Robert: Awe kwena tamwaba.

Marcus: Nomba ninshi ifi Lesa alaya, fikafikilishiwa shani? Nalimo kuti nalangilila muli iyi nshila: Tutile mwalikwata ing’anda iyo musonkesha. Bamo pa basonkela ing’anda yenu bantu abasuma, balasunga bwino ing’anda kabili baliba bwino ku bantu bambi. Mwalitemwa ukuti balekala mu ng’anda yenu. Lelo bambi abasonkela ing’anda yenu bantu ababi; tabasunga bwino ing’anda kabili balacusha na bantu bambi. Nomba, nga ca kuti aba bantu bakaana ukuleka imisango yabo iibi, bushe kuti mwacita shani?

Robert: Kuti nabafumyamo.

Marcus: Ifi fine e fyo na Lesa akacita ku bantu ababipa ababa muli lino isonde. Moneni na kabili icikomo 10. Citila: “Umubifi takabepo.” Mu nshila imbi, kuti twatila Lesa ‘akafumya’ pa calo abantu abacusha abanabo. Lyena abantu abasuma bakekala umutende pe sonde. Ninjishiba ukuti ifi twalandapo ukuti abantu abasuma bakekala umuyayaya pe sonde nalimo fyapusana ne fyo mwaishiba.

Robert: Ee, nshatala nsambililapo ifya ifi ku calici ku mwesu.

Marcus: Kabili nge fyo mulandile ba Robert, pa kumfwikisha ili lyashi, teti tubelenge fye ilembo limo nelyo yabili, tufwile ukubebeta ifyo Baibolo yonse ilanda pa fikacitikila abantu abasuma. Nomba ukulingana na malembo tubelengele, bushe muletontonkanya ukuti abantu bamo abasuma bakaya ku muulu, e lyo bambi abasuma abengi nabo bakekala umuyayaya pano pene pe sonde?

Robert: Kwena nshishibe bwino, lelo ukulingana na malembo tubelengele, cilemoneka kwati e fyo cikaba. Nomba mfwile ukutontonkanyapo na kabili.

Marcus: Ilyo muletontonkanyapo pali ili lyashi nalimo kuti mwakwata amepusho. Ku ca kumwenako, nalimo kuti mwaipusha ukuti, inga balya abantu ba kale abali abasuma, bushe nabo baliya ku muulu? Nga ca kuti tabaya, ninshi baba kwi?

Robert: Aya mepusho yaumfwika bwino.

Marcus: Kuti natemwa ukumushilako amalembo na yambi ayalelanda pa fyo twacilalanshanya.a Nga mwayabelenga no kutontonkanyapo, kuti natemwa ukubwela pa kuti tukeselanshanyapo. Bushe kuti caba fye bwino?

Robert: Ee, cili fye bwino. Natasha mukwai.

[Futunoti]