“Bikeni Ifilamba Fyandi mu Nyambi Yenu”

12. Twaishiba shani ukuti Yehova alishiba ubucushi bonse ubwa bantu bakwe?

¹² Yehova alishiba bwino bwino umuntu onse uumubombela, na kabili alishiba no bucushi bwa muntu wakwe onse fye. Ica kumwenako fye, ilyo abena Israele balecushiwa mu busha, Yehova aebele Mose ukuti: “Ukumona namono kucululuka kwa bantu bandi abali mu Egupti, naumfwa ne nkuuta yabo pa cinso ca babacikilisha; pantu naishibo kukalipwa kwabo.” (Ukufuma 3:7) Awe mwandini tulasansamuka sana ukwishiba ukuti ilyo tuleshipikisha mu bucushi, Yehova alamona ifilecitika kuli ifwe kabili alomfwa no kulila kwesu! Cine cine Yehova tatulolesha misuula misuula ilyo tulecula.

13. Cinshi cilanga ukuti Yehova cilamukalipa ilyo abantu bakwe balecula?

¹³ Na kabili, ifyo Yehova aumfwile ilyo abena Israele balecula fitusambilisha ukuti alasakamana abantu bakwe. Nangu ca kutila ilingi line abena Israele baleculila umulandu wa bunkosa mitima bwabo, Esaya alembele ukuti: “Mu kumanama kwabo konse [Yehova] alimaneme.” (Esaya 63:9) Na imwe bene mubombela Yehova mu cishinka, e ico kanshi cetekeleni ukuti ilyo mulecula, Yehova na o cilamukalipa. Lekeni ukwishibe fyo kumulenge ukushipa, nangu mucule shani, twalilileni ukuibikilishako ukubombela Yehova!—1 Petro 5:6, 7.

14. Cinshi cacitike kuli Davidi ilyo ashikile Amalumbo 56?

¹⁴ Mu Amalumbo 56, tusambililamo ukuti Imfumu Davidi yalicetekele sana ukutila Yehova alasakamana, ukuti na o cilamukalipa ilyo umuntu wakwe alecula. Davidi ashikile Amalumbo 56 lilya alefulumuka Imfumu Shauli iyalefwaya ukumwipaya. Afulumukile ku Gati, lelo ilyo aishibe ukuti abaPelishiti nabamwishiba, alitiinine ukuti balamwikata. Alembele ukuti: “Abambesha balenyanyantila akasuba konse; pantu balifula abalwa na ine nabaituumika.” Ilyo aali muli bulya bwafya, Davidi apepele kuli Yehova. Atile: “Akasuba konse banungulusha ku fyebo, amapange yabo yonse yali pali ine ku kuncito bubi.”—Amalumbo 56:2, 5.

15. (a) Bushe Davidi aloseshe mwi ilyo alombele ukuti Yehova abike ifilamba fyakwe mu nyambi nelyo afilembe mwi buuku? (b) Cinshi tufwile ukucetekela ilyo tuleshipikisha ukweshiwa kwa citetekelo cesu?

¹⁵ Lyene, nga filya calembwa mu Amalumbo 56:8 Davidi alandile amashiwi ayo twingafwaya ukwishiba bwino umo aloseshe, atile: “Imwe mwapenda ukuuluba kwandi; bikeni ifilamba fyandi mu nyambi yenu, bushe tafyalembwa mwi buuku lyenu?” Awe mwandini pano Davidi alondolola bwino ifyo Yehova asakamana abantu bakwe! Ilyo tulecula, kuti twalila kuli Yehova, twalukusha ne filamba. Na Yesu wine uwapwililika alilile kuli Wishi no kulukusha ifilamba. (AbaHebere 5:7) Davidi alicetekele ukuti Yehova alemona ifyo alecula kabili takalabe ukucula kwakwe, kwati Yehova alesunga ifilamba fya kwa Davidi mu nyambi nelyo kwati alefilemba mwi buuku lyakwe.d Nakalimo kuti mwatila nga ni fyo ninshi ifilamba fyenu kuti fyaisula fye inyambi ya kwa Lesa nelyo ibuuku lyakwe. Nga e fyo muleumfwa, mwisakamikwa. Baibolo itukoselesha ukuti: “Yehova aba mupepi na ku baputuke misana, kabili abafunshike mitima alabapususha.”—Amalumbo 34:18.