Isulenimo No Buseko

“Abasambi baisushiwamo ukusekelela no [mupashi] wa mushilo.”—Imilimo 13:52.

 1. (a) Ubuseko musango nshi uwa cisabo? (b) Ni pa mulandu wa kupayanya nshi ukwa buseko Lesa ali no kucindikilwa?

UBUSEKO! Iyi mibele ya Bwina Kristu ya bubili ukutantikwa ukukonka pa kutemwa mu bulondoloshi bwa kwa Paulo ubwa fisabo fya mupashi. (Abena Galatia 5:22-25) Kabili cinshi ciletako ubo buseko? Ni mbila nsuma intu malaika wa kwa Lesa abilishe ku bacemi abapiina ukucila pa myaka 1,900 iyapitapo ukuti: “Moneni, ndebila kuli imwe imbila nsuma ya kusekelela kukalamba ukukaba ku Bantu bonse: pantu mu mushi wa kwa Davidi mufyalilwe imwe lelo Umupusushi, uyo ni Kristu Shikulu.” Lyene umulalo wa bumalaika wamoneke no kuilunda kuli malaika mu kutonda Lesa no kusoso kuti: “Kube ubukata kuli Lesa umwapulishamo, na pano nse pabe umutende mu bantu abo abekelwamo.”—Luka 2:10-14.

2, 3. (a) Mulandu nshi cali icalinga ukuti Lesa atume Umwana wakwe ibeli ku kuba Kalubula wa mutundu wa muntu? (b) Ni mu nshila nshi shimbi Yesu abombele imifwaile ya kwa Lesa ilintu aali pe sonde?

² Ukubekelwamo kwa kwa Yehova ukulola ku bantu kwalumbululwa mu kupayanya ipusukilo ukupitila muli Kristu Shikulu. Uyu Mwana ibeli uwa kwa Lesa aba cipasho ca mano ya cine cine kabili alondololwa ngo ulesosa ulwa kwa Wishi pa nshita ya kubumba ukuti: “Lyene ine nabele mupepi na wene kabomba washangila kabili uwashininkisha, lyene naiswilemo kucankwa akasuba na kasuba, ukwanga ku cinso cakwe pa kashita akali konse; ukucankilwa mu mpanga ya kusandulula iye sonde lyakwe, ee ukukumanina kwandi ukwa kucankwa kwali na bana ba bantu.”—Amapinda 8:30, 31, Rotherham.

³ E ico, cali calinga, ukuti Yehova atume uyu Mwana, uwasangile ukucankwa kwa musango uyo mu bana ba bantu, ku kuba Kalubula wa mutundu wa muntu. Kabili ni shani fintu ici cali no kuleta ubukata kuli Lesa? Cali no kumwiswilako inshila ku kupwishishisha imifwaile yakwe ikalamba iya kwisushe sonde na bantunse balungama kabili abatemwo mutende. (Ukutendeka 1:28) Ukulundapo, ilintu aali pe sonde, uyu Mwana, Yesu, aali no kulanga pe samba lya kwesha kwatapatisha ukuti umuntu wapwililika kuti muli bucishinka aumfwila Yehova pamo nga Shikulu Mulopwe, muli ifyo ukwebela mu kukumanina imitekele yakwate nsambu iya kwa Wishi pa bubumbo Bwakwe bonse. (AbaHebere 4:15; 5:8, 9) Inshila ya kwa Yesu iya kusunga bumpomfu na yo ine yashile icipasho ku Bena Kristu ba cine bonse ukukonka mu nkasa shakwe mu kupalamisha.—1 Petro 2:21.

 4. Ukushipikisha kwa kwa Yesu kufumamo buseko nshi ubukalamba, kabili ni shani fintu ici cilingile ukutukoselesha?

⁴ Yesu asangile ubuseko bwacilapo mu kucita muli iyo nshila ukufwaya kwa kwa Wishi, kabili ico mu kwenekela kwa buseko bwacilapo bukulu, nga fintu umutumwa Paulo alangilila pa AbaHebere 12:1, 2 ukuti: “Tubutuke no mukoosha ulubilo ulwabikilwa ifwe, ukutonta amenso kuli Yesu, kelenganya kabili kawaminisha wa citetekelo cesu, uyo, pa mulandu wa kusekelela ukwabikilwe pa ntanshi yakwe, ashipikishe ku [cimuti ca kucushiwilwapo, NW], ukusuule nsoni, no kwikala ku kulyo kwa cipuna ca bufumu ca kwa Lesa.” Buseko nshi ubu? Buli buseko ubo Yesu akwata, te mu kushisha fye ishina lya kwa Wishi no kulubula umutundu wa muntu ukufuma ku mfwa lelo na kabili mu kuteka pamo nge Mfumu kabili Shimapepo Mukalamba ilyo abweseshamo abantunse ku bumi bwabule mpela mwi sonde lya paradise.—Mateo 6:9; 20:28; AbaHebere 7:23-26.

 5. Ni bani bali “bamunyina” ba kwa Yesu, kabili ni mu buseko nshi ubwaibela bakanamo?

⁵ Ee, Umwana wa kwa Lesa alisanga lyonse ubuseko mu kubombelo mutundu wa muntu. Kabili caliba buseko bwakwe ukubomba na Wishi mu kusala ibumba lya bantunse abasunga bumpomfu abo eta “bamunyina” kabili abo pa mfwa babuushiwa ukuya ku mulu. Aba bengila mu buseko bwaibela pamo na Yesu. Babilishiwa ‘aba nsansa kabili aba mushilo,’ kabili “bakaba bashimapepo ba kwa Lesa kabili ba kwa Kristu, kabili bakateka pamo nankwe imyaka ikana limo.”—AbaHebere 2:11; Ukusokolola 14:1, 4; 20:6.

 6. (a) Bwite nshi ubwa buseko Imfumu itambulwila ku ‘mpaanga shakwe shimbi’? (b) Mashuko nshi abengi aba ishi mpaanga baipakisha ilelo?

⁶ Ukulundako, ibumba likalamba ilya “mpaanga shimbi,” abo Imfumu ileteka ipaatwila ku kuboko kwa kulyo kwa iko ukwa kusuminishiwa, bapokelela ubwite bwakwe ubwa kuti: “Iseni, mwe bapaalwa ba kwa Tata, kwateni ubufumu ubwateyanishiwe imwe ukufuma pa kulengwa kwa pano isonde.” (Yohane 10:16; Mateo 25:34) Mwandi lishuko lya buseko! Muli aba abali no kupyana imitekele ya pe sonde iya Bufumu, abengi nelyo fye ni pali nomba balepokelela ukupeelwa kwa mbali ukwa kushingamwa capamo na basubwa, pamo fye nga fintu Yehova asobele ukuti: “Abeni bakema no kuceme mikuni yenu, na bambi bambi bakaba aba kumulimino mushili, kabili aba kumulimine myangashi; lelo imwe muketwa ni Bashimapepo ba kwa Yehova, bakasosela imwe, abati, ni Bakapyunga ba kwa Lesa wesu.” Aba bonse bailunda na kasesema wa kwa Lesa mu kusoso kuti: “Ukusekelela nkasekelela muli Yehova, umweo wandi ukalayangila muli Lesa wandi; pantu amfwika amalaya ye pusukilo.”—Esaya 61:5, 6, 10.

 7. Mulandu nshi aka “kasuba” ukutula 1914 kabela akaibela nga nshi?

⁷ Tuleikala nomba mu kasuba kaibela nga nshi. Ukutula 1914 kaliba kasuba ka kuteka kwa kwa Kristu pamo nge Mfumu ya mu mulu, akalondololwa pe Ilumbo 118:24, 25 ukuti: “Aka e kasuba ako Yehova acita; tulesekelelamo no kusamwa. Shi, mwe Yehova, shi pususheni! Shi, mwe Yehova, shi tulengeni ukushuka!” Kali kasuba akakafika pa kalume lintu Yehova aputunkanya ubutotelo bwa cina Babiloni no kwikatanya nabwinga wa kwa Kristu uwa bamunyina 144,000 ne Mfumu yabo iya ku mulu. Abantu ba kwa Lesa bonse ‘bakasekelela no kwanga’ pali ici. Bakasekelela na kabili ilyo Imfumu yabo iya buMesia yalwa pa Armagedone ku kupususha uluko lwakwe ulwa bucishinka ukulwingisha mu calo cakwe cipya icalungama. (Ukusokolola 19:1-7, 11-16) Bushe Yehova alalengo kushuka ilyo abantu bakwe balebilisha ili subilo lya buseko? Lipoti yakonkapo ili no kulondolola.

Ukutanunuka kwa mu Cibulungwa Conse

 8. (a) Ni shani fintu ubuseko no mupashi wa mushilo ulelangishiwa muli lipoti pa mabula 18 ukufika ku 21 aya uyu magazini? (b) Fishinka nshi fimo ifikalamba ifya lipoti?

⁸ Inte sha kasuba ka lelo isha kwa Yehova “bafulisho kucetekela ku maka ya [mupashi] wa mushilo.” (Abena Roma 15:13) Ici calangishiwa muli carti pa mabula 18 ukufika ku 21 aya iyi magazini, apo lipoti ya mu cibulungwa conse iya mulimo wa Bufumu uwa 1990 yalondololwa mu kulonsha. Fintu tusekelela ukumona icipimo ca pa mulu icipya ica batumikishi bacincila 4,017,213 mwi bala! Ici cilelangilila ukwingilishako kwa 77 peresenti mu kati ka myaka ikumi iyapitapo, ilyo ukulonganikwa kwa mpaanga kuletwalilila ukuselela ku ntanshi mu fyalo 212 ukushinguluka icalo conse. Pa numa ya myaka 15, imbatisho na kabili shafikile pa cipimo ca pa mulu ica nshita yonse—301,518! Kwaliko ifipendo fimo ifya lubatisho ifya pa mulu mu kuibela pa mabungano ayengi, ukucilisha ayo ayasangilweko ne Nte ukufuma ku Eastern Europe. Pa kati ka aba pali abacaice abengi, ukushininkisho bufi ukutunga kwa socialism ukwa kuti ubutotelo bwali no kufwila pamo na bantu bakote.

 9. (a) Ukukansha kwa mu kubangilila ukwa bafyashi kuleletako fya kufumamo nshi ifya buseko? (b) Fyakukumanya nshi ifya pa mwenu nelyo fimbi fileshininkisha ici?

⁹ Cinkupiti wa bacaice baleyasuka ubwite bwa pe Ilumbo 32:11: “Samweni muli Yehova, no kwanga, mwe balungama; kabili auleni, mwe batambalalo mutima bonse.” Cilemoneko kuti abafyashi abengi balebomfya ukufunda ku kukansha abanono babo “ukufuma ku bwaice.” (2 Timote 3:15) Imibomfeshe isuma ilecitwa iya fitabo na matepu ya makaseti ifyapayanishiwa abo aba myaka ya buteku. Ilyo aba baice baingile sukulu, mu kwangufyanya balepeela ubunte bwawama, pamo nge ca kumwenako umukashana wa myaka ya bukulu cinekonsekonse umwina Japan uwacitile lipoti ukuti: “Pa numa ya kutusha kwa mu lusuba, natununwike kafundisha wandi no kumwipusha ukuti: ‘Bushe mwalitandalila inshishi ya bashinwe mu kati ka kutusha?’ Umwanakashi ayaswike ukuti: ‘Ee, tata aali uwa cikuuku nga nshi, kabili ndatandalila inshishi yakwe cila mwaka.’ Natile: ‘Nga ca kuti mwasambilila Baibolo no kukonka ifisambilisho fya kwa Lesa, mukaba na maka ya kumona bashinwe batemwikwa muli paradise wa pe sonde.’ Lyene namupeele Icitabo Candi ca Malyashi ya mu Baibolo. Nomba kafundisha wesu alabelenga icipandwa cimo ica ici citabo kwi kalasi lyonse pa nshita ya ca kulya ca kasuba cila mulungu.

10. Mifwaile nshi iisuma yabombwa ne citabo ca Young People Ask, kabili fya kumwenako nshi fimo?

¹⁰ Abacaice mu myaka yabo iyacile kumi balicito kubomfya kusuma ukwa citabo ca Questions Young People Ask—Answers That Work, ponse pabili kwi sambililo lya pa mbali na mu kucitilo bunte ku baice bambi. Abafyashi na bo bene balitasha ici citabo. Nkashi mu Switzerland, uwalembeshe pamo nga painiya wa kwafwilisha, apingwilepo ukutandalila abafyashi ba banankwe ba pa sukulu aba mwana wakwe. Ici capayenye inshila ku kulanshanya kwawama na bafyashi abengi, kabili ifitabo 20 (ukucilisha Young People Ask) na bamagazini 27 fyashele kuli bene. Lintu umukashana wa pa sukulu mu Trinidad ashalike ici citabo kuli kafundisha wakwe pa sukulu, nyina akonkelelemo, ukwananya amakope 25 pa kati ka bakabomba 36. Alitwalilile ukwingila mu mweshi wakonkelepo mu kuba no kusakamana kwaibela ku bafyashi abo aishibe mu kulungatana, ukwananya ifitabo na fimbi 92 no kutampa amasambililo ya Baibolo aya mu ŋanda ayapya. Mu Korea kafundisha we sukulu lya pa kati abomfeshe icitabo ca Young People Ask mu kupeela utumalyashi utwipi pa mitwe ya musango uyo pamo nga “Ni Shani Fintu Ningawamya Amatoni Yandi?” na “Ni Shani fintu Ningomfwana na Kafundisha Wandi?” kabili lyene atambike icitabo. Pa numa abasambi babe nabapokelela ifitabo 39, abafyashi bamo batendeke ukuilishanya. Lelo kafundisha mukalamba abebetele kope, abilishe cene “icawama,” no kuorda cimo ica mwana mwanakashi wakwe wine.

Amasomo Yawamisha

11, 12. Bushininkisho nshi bumo ku cishinka ca kuti impapulo sha Watch Tower Society shilapayanya amasomo yawamisha?

¹¹ Ukukatama kwa kusambilisha kwa bamagazini besu na ko kwine kulatashiwa na bengi, pamo nga ku ca kumwenako isukulu lya mu U.S. ilyaordele amakope 1,200 aya Awake! ya July 22, 1990 (iyalesansalika ukukunkuma kwa crack) ku kubomfya mu makalasi ya liko. Ukulundapo, imyendele ya ca kumwenako cisuma pa sukulu iya bana ba Nte sha kwa Yehova itwalilila ukupanga ukwebekesha kwawama. Mu muputule we kalasi uwa fyongo mu Thailand, kafundisha aitile Racha wa myaka ya bukulu 11 ukwiminina pa ntanshi ye kalasi no kumutasha pa mibele yakwe, ukusoso kuti: “Mulandu nshi imwe bonse te kubuulila wene nge ca kumwenako? Alibo wa mukoosha mu kusambilila kwakwe kabili uwa mibele isuma.” Lyene uyu mwanakashi atile: “Cisuma, ndetunganya mufwile ukuba Inte sha kwa Yehova ukupala Racha pa kuwamya imyendele yenu.”—Linganyeniko Amapinda 1:8; 23:22, 23.

¹² Nkashi wacaice mu Dominican Republic alembo kuti: “Lintu naali fye ne myaka ya bukulu ine, nali mupepi no kupwisha ukusambilila ukufuma kwi sukulu lya mu kubangilila ilya butotelo, uko nasambilile ukubelenga no kulemba. Pamo nge ca bupe, napeele umushimbe mwanakashi uwa butotelo uwali kafundisha wandi icitabo ca Kuti Waikala Kuli Pe na pe muli Paradise Pe Sonde mu kuba no bukombe bwa kuti: ‘Ndi uwa kutasha nga nshi pa kuti mwalinsambilisha ukubelenga no kulemba. Kuti natemwa na kabili nga ca kuti mwaumfwikishe citetekelo candi no kwisa ku kukwata isubilo lyandi ilya kwikala kuli pe na pe pali ili sonde lintu lyalengwa paradise.’ Pali ici nalitamfiwe ukufuma pa sukulu. Imyaka cinekonsekonse pa numa nakumenye na kabili uyu kafundisha. Ashimike ifyo, te mulandu no kukaanya kukalamba ukufuma kuli shimapepo, aali na maka ya kubelenga icitabo. Aselele ku musumba ukalamba, uko aali na maka ya kusambilila Baibolo na Nte. Alibatishiwe pe Bungano lya Citungu ilya ‘Lulimi Lwine Lwine’ capamo na ine.” Nga fintu casesemwe, amano kuti nelyo fye yaisa ukufuma “mu tunwa twa bacece”!—Mateo 21:16; Ilumbo 8:1, 2.

13. Ni shani fintu aba myaka yacile kumi abengi baleyankulako ku kufunda kwa kwa Solomone, kabili ni shani fintu ici calangishiwa muli lipoti wa mu kusaalala kwa calo?

¹³ Solomone apeele ukufunda kwa kukoselesha ukuti: “Samwa mu bulumendo bobe, we mulumendo, no mutima obe ukusekeleshe mu nshiku sha bulumendo bobe; wende na mu mibele ya mutima obe.” (Lukala Milandu 11:9) Cili ca kucankilwamo ilelo ukumona abana bafule fyo aba Nte sha kwa Yehova balebomfya aya mashiwi, ukubomfya imyaka yabo iyacile kumi ku kuipekanya ku bumi bwa mulimo wa nshita yonse kuli Yehova no kwingila muli uyu mulimo wakulisha pali yonse ilyo bapwisha ukusambilila ukufuma ku sukulu. Imitande ya bapainiya iletwalilila ukwingilishako lubilo lubilo, mu kuba na 821,108 ukucita lipoti mu kati ka mwaka. Capamo na bamunyina ne nkashi 11,092 ababombele pa Bethel, ico cimininako 21 peresenti iya bwingi bonse ubwa bakasabankanya!

14. Kusangwilako nshi bankashi shesu balecita, kabili kutashiwa nshi bali abawaminwa?

¹⁴ Cili ica kusekesha ukuti mu fyalo ifingi, pamo nga mu United States, mupepi na 75 peresenti uwa bakasabankanya bapainiya ni bankashi, ukupeela amaka ku mashiwi ye Ilumbo 68:11: “[Yehova, NW] apeele icebo, abanakashi ababilishe bali umulalo ukalamba.” Bankashi shesu bali no kutashiwa mu kuti balebomba iciputulwa cacilapo bukulu ica mulimo wa mwi bala. Ukusambilisha kwabo ukwalamuka pa masambililo ya Baibolo aya mu ŋanda kuletungulula abengi ku cine, kabili bankashi baupwa abali aba kwafwilisha muli bucishinka ku balume bakwata imilimo iingi mu cilonganino na bo bene bali no kutashiwa mu kukaba.—Amapinda 31:10-12; Abena Efese 5:21-25, 33.

Amasomo ya Baibolo Yatemfuma

15. (a) Ni shani fintu ifyalo fimo ifyatantikwa muli lipoti ya mu kusaalala kwa calo fyapulamo mu mibombele ya masambililo ya Baibolo aya mu ŋanda? (b) Fyakukumanya nshi wingashimika, ukulanga ifyo amasambililo ya Baibolo yengaba aya kutwale fisabo?

¹⁵ Umulimo wa kusambilisha kwa Baibolo uletemfuma, amasambililo yaletungululwa mu kusaalala kwa calo muli avareji wa fifulo 3,624,091 umweshi umo umo. Icine ca Baibolo kuti cayalula ubuntu, pamo nga fintu lipoti wa Australia alelanga. Mu kubangilila mu January 1987, umwaume umo alitamfiwe mu calo ukuya ku New Zealand ukufuma mu Australia pa numa ya kubombela ukupingulwa kwa kuba mu cifungo pa myeshi 25 pa mulandu wa bupuupu no kufinsha. Akunkwime ku miti ikola kabili alishitishe yene na kabili pa myaka ukucila pali 17. Umwaka wakonkelepo umukashi wakwe atendeke ukusambilila Baibolo ne Nte sha kwa Yehova, kabili ilyo ukwishiba kwakwe kwakulileko, umwaume amwene ukwaluka kukalamba mu myendele yakwe. Abele umukashi na nyina wawaminako. Ku kucincisha kwa mukashi wakwe, asangilwe ku kulongana kwa muputule mu June 1989. Nomba apokelele isambililo lya Baibolo ilya mu ŋanda, kabili ukwaluka kukalamba kwatendeke ukumoneka mu mimonekele yakwe no musango wa bumi. Ifilundwa fyonse cinelubali ifya lupwa batendeke ukusangwa ku kulongana. Abatishiwe mu January 1990 pamo nga umo uwakonkele ukufunda kwacilishapo kuwama ukwa kwa Paulo pa Abena Efese 4:17-24.

16. (a) Ni shani fintu amalipoti ya Cibukisho aya 1990 yali ni ntulo ya buseko? (b) Lipamfya nshi lili no kumonwa, kabili kubombesha nshi tulingile ukucita pa kwaafwa?

¹⁶ Ulubali lwapulamo ulwa lipoti ya mwaka luli kusangwako kwawamisha ukucila kale lyonse ukwa 9,950,058 pa kusefya kwa Cibukisho, ukwacitilwe pali Cibili, April 10, 1990. Ukucila pali 70 mu fyalo 212 fyacitile lipoti abasangilweko abacililepo imiku itatu pa cipimo cabo ica pa mulu ica bakasabankanya! Ku ca kumwenapo, ukwabulo kusakamana ifibindo, ifyalo cinelubali ifya mu Africa mu kuba ne cipimo ca pa mulu icakumbinkana ica bakasabankanya 62,712 fyacitile lipoti abasangilwe ku Cibukisho 204,356. Bakasabankanya 1,914 aba mu Liberia walepaulwa basekelele ukukwata 7,811 pa Cibukisho. Haiti, mu kuba ne cipimo ca pa mulu ica bakasabankanya 6,427, bacitile lipoti 36,551. Bakasabankanya 886 mu fishi fyasalangana ifya Micronesia bakwete 3,958. Bakasabankanya ba mu Sri Lanka 1,298 bacitile lipoti 4,521, kabili Zambia, mu kuba na bakasabankanya 73,729 yakwete 326,991 abasangilwe ku cibukisho, icipimo ca muntu umo kuli 25 ica bwingi bwa bantu bonse mu Zambia. Lipoti ya cibulungwa conse ilesokolola na kabili ukuti kuliko amamilioni ya bantu bafumaluka abalelolela ukulonganikwa mwi cinka lya mpaanga. Lelo ukufumaluka takuli ukwakumanina. Bushe kuti twaingilishako no kuwamya imibele ya mulimo wesu uwa masambililo ya Baibolo aya mu ŋanda, ukwafwilisha abafulilako abasangilwe ku Cibukisho ukukuula icitetekelo cakosa? Tulefwaya bene ukuba ifibusa fyesu ifyacincila, ukulalumbanya Yehova. Cipilibula ubumi bwabo bwine!—Ilumbo 148:12, 13; Yohane 17:3; 1 Yohane 2:15-17.

Umwisulo wa Buseko

17. Fya kumwenako nshi ifya mu mwanda wa myaka wa kubalilapo filingile ukutwaafwa ukukosha umupampamina wesu ku kwikatisha ubuseko bwesu?

¹⁷ Te mulandu ne fya kwesha ifili fyonse ifilolenkana na ifwe, natube abapampamina ukwikatisho buseko bwesu. Nakalimo tatwakapite mu cakukumanya cayafisha ukupala cilya ica kwa Stefani, nalyo line ica kumwenako cakwe kuti catukosha. Pe samba lya kupeelwo mulandu, aali na maka ya kusungilila ukwiminina kwakwe ukwa buseko. Abalwani bakwe “bamwene icinso cakwe kwati cinso ca kwa malaika.” Lesa aiminine mupepi nankwe mu kati ka cakukumanya catapata. Acitile ubunte mu kushipa, ukuba “uwaisulamo [umupashi] wa mushilo” ukufika fye na ku mfwa yakwe iya kufwile cisumino. Ilyo Paulo na Barnaba baalukile ku nko mu kushimikila kwabo, na aba bene ‘batendeke ukusekelela no kucindike cebo ca kwa [Yehova, NW].’ Ukupakasa na kabili kwalimine. Lelo takwanenwine abo abasumine. “Abasambi baisushiwamo ukusekelela no [mupashi] wa mushilo.” (Imilimo 6:15; 7:55; 13:48-52) Te mulandu ne cili conse cintu abalwani besu bacita kuli ifwe, te mulandu ne fya kwesha fyesu ifya cila bushiku mu bumi, tatufwile ukusuminisha ubuseko bwesu ubwa mupashi wa mushilo ukutompoka. Paulo afundo kuti: “Ku kucetekela mube abasamwa; mu bucushi mube abashishimisha; ku kupepa mube aba mukoosha.”—Abena Roma 12:12.

18. (a) Cinshi cili Yerusalemu Mupya, kabili mulandu nshi abantu ba kwa Lesa balingile ukusekelela na wene? (b) Ni shani fintu “imyulu ipya ne calo cipya” fikapaala umutundu wa muntu?

¹⁸ Fintu lyabe lya kupapusha ilyo subilo! Ku bantu bakwe bonse, Yehova abilisho kuti: “Ndelenge myulu ipya, ne calo cipya! Ifya ntanshi tafyakebukishiwe, tafyakabukuluke mu mutima; kano kusekelela no kwanga pe pe pali ico ine ndelenga.” Kristu Shikulu capamo na “Yerusalemu Mupya” (nomba umusumba ukalamba uwa kuteyanya kwa mu mulu ukwa kwa Lesa, “Yerusalemu wa mu mulu”) na sosaite ya calo cipya pe sonde akaleta ubuseko bwapaka ku mutundu wa muntu. (Abena Galatia 4:26) Ukubuuka kwa bantunse bafwa, ukusumbulwa kwa bonse aba cumfwila ku bumi bwa muyayaya mu kupwililika kwa buntunse, iciyayaya ca mikalile isuma, iyabembela pe sonde lya paradise—mwandi ili lili lisubilo lya lulumbi kabili umulandu wa kwangilapo! Ilyo Yehova umwine wine ‘aleangila Yerusalemu no kusekelela abantu bakwe,’ e fyo na kasesema wakwe afumya ubwite bwalundwako ku bantu ba kwa Lesa ukuti: “Samweni na Yerusalemu, no kumwangila, mwe bamutemwa bonse; sekeleleni nankwe no kusekelela.” (Esaya 65:17-19; 66:10; Ukusokolola 14:1; 20:12, 13; 21:2-4) Shi natube lyonse abaisulamo buseko no mupashi wa mushilo ilyo tuleumfwila ukukonkomesha kwa kwa Paulo: “Sekeleleni pe muli Shikulu; ndetila kabili, Sekeleleni.”—Abena Filipi 4:4.

Ukusupawila Ubuseko Bwesu:

◻ Cilangililo nshi ica kushipikisha kwa buseko Yesu atushilile?

◻ Amabumba yabili ayaipeela nayakwata milandu nshi iya kusekelela?

◻ Ni shani fintu abacaice na bakalamba ilelo baleangila mu cine?

◻ Ukupituluka muli lipoti wa 1990, casuko nshi cilepeelwa nomba kwi pepo lya kuti, “Shi, mwe Yehova, shi tulengeni ukushuka”?

◻ Ni lilali kabili ni shani fintu umwisulo wa buseko ukafikwapo?

[Charti pe bula 18-21]

1990 SERVICE YEAR REPORT OF JEHOVA’S WITNESSES WORLDWIDE

(Moneni muli magazini)

[Icikope pe bula 16]

Malaika wa kwa Yehova abilishe ukufyalwa kwa kwa Kristu Shikulu pamo nge “mbila nsuma ya kusekelela kukalamba”