Ukwenda no Mutima Waikatanishiwa

“Nsambilisheni, mwe Yehova . . . Ikatanyeni umutima wandi ku kutiine shina lyenu.”—ILUMBO 86:11, NW.

 1. Ni shani fintu Yehova alambula aba bucishinka bakwe?

‘MWE [YEHOVA], ni mwe Lesa mweka.’ (Ilumbo 86:8, 10) Davidi alumbenye Lesa ukufuma ku mutima waisulamo kutasha. Nelyo fye ilyo Davidi talabe mfumu pali Israele onse, Yehova aali namulubula ukufuma kuli Shauli no kufuma ku baPelishiti. Muli ifyo, aali na maka ya kwimbo kuti: “Yehova e cilibwe candi icasumbuka, licele lyandi, kabili kapokolola wandi—wandi wine. Ku wa [bucishinka mukabomba muli bucishinka, NW].” (2 Samwele 22:2, 26) Yehova alibakile umubomfi wakwe uwa bucishinka ukupula mu fya kwesha ifingi. Davidi aali na maka ya kubika ukushintilila kwakwe no kucetekela muli Lesa wakwe uwa bucishinka, lelo akabile ubutungulushi bwatwalilila. Davidi nomba apaapaatile Lesa ukuti: “Nsambilisheni, Mwe Yehova, inshila yenu.”—Ilumbo 86:11.

 2. Ni shani fintu Yehova acita ukupayanya ku kusambilishiwa kwesu na wene?

² Davidi afwaile ukusengauka umupwilapo imfundo sha ku calo nelyo amano ya buntunse. Afwaile ‘ukusambilishiwa kuli Yehova,’ nga fintu kasesema wa kwa Lesa pa numa acilumbulwile. (Esaya 54:13) Davidi mu kupalako aali na maka ya kwetetula pa mabuku fye pabula aya Baibolo ayaliko mu kasuba kakwe. Nalyo line, kulya kufunda ukufuma kuli Yehova kwali ukwaumo mutengo kuli wene! Mu kusambilishiwa, ifwe ilelo kuti twalya pa mabuku yonse 66 aya Baibolo, pamo pene no kupaka kwa fitabo fya Bufumu ifyapayanishiwa ukupitila mu “musha wa cishinka kabili uwashilimuka.” (Mateo 24:45) Ukupala Davidi, natulilile kuli Yehova, ukuti umupashi wakwe utwaafwe ukusapika mu “fyo Lesa apekanishisha abamutemwa, . . . ne fyashika fya kwa Lesa.”—1 Abena Korinti 2:9, 10.

 3. Ni mu nshila nshi ukufunda kwa Baibolo kwingatunonsha?

³ Baibolo yalikwata icasuko ku cipusho icili conse ne mpika ifingema pambi mu bumi bwesu. “Pantu fyonse ifyalembelwe kale fyalembeelwe ku kutusambilisha, ukuti mu kutwalilila kabili mu kutukoselesha kwa malembo e mo tube no kucetekela.” (Abena Roma 15:4) Ukupokelela ukufunda ukufuma kuli Yehova kukatukosha ku kushipikisha amafya, kukatusansamusha mu nshita sha kupopomenwa, no kusungilila isubilo lya Bufumu ilyabilima mu kubengeshima mu mitima yesu. Shi natusange ukubekwa mu kubelenga Icebo ca kwa Lesa na mu kwetetula pali cene “akasuba no bushiku,” pantu amano yashimpwa pali Baibolo yasanguko “muti wa mweo ku baikatako, na bakonenako [ba nsansa, NW].”—Ilumbo 1:1-3; Amapinda 3:13-18; moneni na kabili Yohane 17:3.

 4. Ukukuma ku ncitilo shesu, ca kumwenako nshi Yesu atwimikile?

⁴ Umwana wa kwa Lesa, Yesu, uwitwa na kabili “mwana [Davidi],” aloleshe lyonse kuli Yehova ku kufundwa. (Mateo 9:27)a Atile: “Umwana te kuti acite kantu eka, kano ico amona Wishi acita; pantu ifyo wene acita, e fyo no Mwana acita ifyo fine.” “Nshicita kantu neka nangu kamo, lelo nanda ifi fintu nge fyo Tata ansambilishe.” (Yohane 5:19; 8:28) Yesu ashile ica kupashanya ukuti ‘tukonke mu makasa yakwe.’ (1 Petro 2:21) Citontonkanye! Nga ca kuti twabelenga kwati fintu Yesu afwile acitile, mu mibele iili yonse tukaba na maka ya kubomba nga fintu Yehova engatemwa ukuti tubombe. Inshila ya kwa Yehova yaliba lyonse inshila yalungama.

 5. “Icine” cinshi?

⁵ Davidi mu kukonkapo abilisho kuti: “Nalaenda mu cishinka cenu.” (Ilumbo 86:11) Imyaka ikana limo pa numa, Pilato, ukulanda kuli Mwana Davidi, Yesu, aipwishe ukuti: “Icine cinshi?” Lelo Yesu e lintu fye ayaswike ici cipusho, ukweba Pilato ukuti: “Ubufumu bwandi te bwa pano isonde,” ukulundako kuti: “Mwasosa ni mwe ukuti ine ndi mfumu. Pali ici e co nafyalilwe, kabili pali ici e co naishiile pano isonde, pa kuti nkeseshimike cine ubunte.” (Yohane 18:33-38) Yesu muli ifyo acilengele ukwishibikwa ukuti icine cisanikila pa Bufumu bwa buMesia. Mu cine cine, umutwe wa lyashi onse uwa Baibolo waba kushishiwa kwe shina lya kwa Yehova ukupitila muli bulya Bufumu.—Esekiele 38:23; Mateo 6:9, 10; Ukusokolola 11:15.

 6. Mu kwenda mu cine, ni ku lwa cinshi tulingile ukuba abacenjela?

⁶ Cinshi cipilibula ukwenda mu cine? Cipilibula ukulenga isubilo lya Bufumu ukuba e kwangwako kukalamba mu bumi bwesu. Tufwile ukwikala ukulingana ne cine ca Bufumu. Tufwile ukuba abashayakanikana mu kubika amabuseko ya Bufumu pa ntanshi, abapimpa ukulingana na mashuko yesu aya mu nshita mu kucitilo bunte ku cine ca Bufumu, ukukonka ica kumwenako ca kwa Yesu. (Mateo 6:33; Yohane 18:37) Te kuti twende ulubali lwa nshita mu cine, ukupeela umulimo wa cipamanso lelo lyene ukuitemuna fwe bene pa kufwaya umwa kushokela pa kuyobeka mu kukokoloka kwacishamo nelyo ukwingila mu mulimo wa kulye nshita nelyo ‘ukubombela . . . Mamone.’ (Mateo 6:24) Kuti twaluba pali imo iya iyo misebo ishaishibikwa bwino, ica kufilwa ukusanga na kabili inshila ya ‘kamfyemfye iitwala ku mweo.’ Twipumbuka ukufuma kuli ilya nshila! (Mateo 7:13, 14) Kasambilisha Wakulisha wesu, Yehova, ukupitila mu Cebo cakwe no kuteyanya, alabalikile nshila, ukusoso kuti: ‘Iyi e nshila, e mo mwende, ilyo mwapaatukila ku kwa kulyo nangu ku kwa kuso.’—Esaya 30:21.

Akatiina Kalinga

 7. Ni shani fintu pambi ‘twingekatanya’ imitima yesu?

⁷ Ipepo lya kwa Davidi lyatwalilila mu cikomo 11 ukuti: “Ikatanyeni umutima wandi ku kutiine shina lyenu.” Ukupala Davidi, tulingile ukufwaya imitima yesu ukuba iishayakanishiwa, iyapwililila, mu kucita ukufwaya kwa kwa Lesa. Ici cili mu kumfwana no kufunda kwa kwa Mose ukuti: “Nomba, mwe bena Israele, cinshi ico Yehova Lesa wenu alefwaya kuli imwe, kano ukutiina Yehova Lesa wenu, ukwenda mu mibele yakwe yonse, no kumutemwa, no kubombela Yehova Lesa wenu imitima yenu yonse ne myeo yenu yonse, ukubaka amafunde ya kwa Yehova ne fipope fyakwe ifyo ndemweba lelo, ku kuleka kuwame kuli imwe?” (Amalango 10:12, 13) Cili, mu cine cine, ku busuma bwesu ukuti tupongolwele umutima no mweo mu kubombela Yehova. Muli ifyo tulanga akatiina kalinga aka kwi shina lyakwe ilyalumbuka mu kusaalala. Ishina lya kwa Yehova mu kukonke shiwi lipilibula “Uulengo Kubako,” ukucilisha ukulosha ku kuleta imifwaile yakwe iyakulisha ku kupwishishiwa. Limininako na kabili ubulashi bwakwe ubwapulamo pa kubumbwa konse. Ukubomba mu mwenso wakulisha uwa bukatebebe bwa kwa Lesa, tatwakapumbulwe ku kutiina umuntu umwina kufwa. Imitima yesu tayakakanishiwe. Ukucila, tukatiina ukucita icili conse icingafulwisha Yehova, Kapingula Wapulishamo kabili Shikulu Mulopwe, uwaikata ubumi bwesu bwine mu kuboko kwakwe.—Esaya 12:2; 33:22.

8, 9. (a) Cinshi cipilibula ‘ukukanaba uwa pano isonde’? (b) Ni ntampulo nshi tulingile ukubuula pa mulandu wa kuti twaba “ica kutamba”?

⁸ Nelyo fye mu kulolenkana no museebanya no kupakasa, tukakonka ica kumwenako cabulo mwenso ica kwa Yesu mu kukanaba ulubali lwa calo cibifi icatushinguluka. (Yohane 15:17-21) Ici tacilepilibulo kuti abasambi ba kwa Yesu balingile ukwikala nga batukami nelyo ukulongwa mu cikuulwa ca bashimbe baume aba butotelo. Yesu asosele mwi pepo kuli Wishi ukuti: “Nshilelomba ukuti mubafumye pano isonde, lelo ukuti mubabake ku mubifi. Tabali ba pano isonde, ifyo na ine nshili wa pano isonde. Bashishisheni ku cine cenu: icebo cenu e cine. Ifyo mwatumine ine njise pano isonde, e fyo na ine natuma aba baye pano isonde.” (Yohane 17:15-18) Ukupala Yesu, twalitumwa ku kubilishe cine ca Bufumu. Yesu aali uutununukwa. Abantu balipembeswilwe ku nshila yakwe iya misambilishishe. (Linganyeniko Mateo 7:28, 29; 11:28, 29; Yohane 7:46.) Cilingile ukuba cimo cine kuli ifwe.

⁹ Bucibusa bwesu ubwa kusakana mu kukakuka na bambi, imisakwile isuma ne mimonekele, ilyashi lya cikuuku kabili ilyasanguluka, filingile ukutulenga abapokelelwa no bukombe bwesu ku bantu ba mitima yalungama. Tufwile ukutaluka ku busanku, imifwalile iishayana, ukubishanya ukwingatungulula ku kubimbwamo kwa ku calo, ne nshila yasekemuka, iyabulwe fishinte iya bumi intu tumona mu calo catushinguluka. Pa “[kulengwe] ca kutamba ku ba pano isonde, kuli bamalaika na ku bantu,” twaliba pa mulimo amaawala 24 akasuba kamo kamo ku kubomba no kwikala nga Bena Kristu ba ca kumwenako cisuma. (1 Abena Korinti 4:9; Abena Efese 5:1-4; Abena Filipi 4:8, 9; Abena Kolose 4:5, 6) Umutima wesu ufwile ukwikatanishiwa kuli iyi mifwaile.

10. Ni shani fintu Yehova ebukisha abo abekatanya imitima yabo mu mulimo washila?

¹⁰ Ifwe fwe bekatanya imitima yesu mu katiina ka kwi shina lya kwa Yehova, ukwetetula pa mifwaile yakwe iyakulisha no kwisusha ubumi bwesu no mulimo washila, tukebukishiwa kuli Yehova. “Pantu amenso ya kwa Yehova yalolo ku no ku yalabebeta mu calo conse ku kuilango kuti wa maka ku kwafwa ababa ne mitima ya mpomfu kuli wene.” (2 Imilandu 16:9) Ukulosha mu busesemo ku kasuba kesu, Malaki 3:16 abelengwo kuti: “E lyo abali na katiina kuli Yehova balesoshanya; na o Yehova alepeepeka, no kuumfwa, ne buuku lya kwibukisha lyalembelwe ku cinso cakwe, ilya babela Yehova akatiina, ilya batontonkanye shina lyakwe.” Shi imitima yesu naikatanishiwe muli kalya katiina katuntulu aka kuli Yehova!

Icikuuku ca Kutemwa ica kwa Yehova

11. Ni shani fintu uluse lwa kwa Yehova lukalumbululwa ukulola ku ba bucishinka?

¹¹ Fintu ipepo lya kwa Davidi lili ilyafumaluka mu kushika! Atwalilila ukuti: “Ndemutootela, mwe [Yehova, NW] Lesa wandi, no mutima wandi onse, kabili nakulacindike shina lyenu umuyayaya; pantu uluse lwenu lukalamba pali ine, kabili mwapokololo mweo wandi ku Mbo ukwanokesha.” (Ilumbo 86:12, 13) Pa muku walenga ibili muli ili lumbo, Davidi alumbanya Yehova pa luse Lwakwe—ukutemwa Kwakwe ukwa bucishinka. Kukalamba nga nshi uku kutemwa ica kuti kuti kwapususha mu mibele iilemoneka iishingacitikako. Lintu Shauli alemubutusha mu matololo, Davidi kuti pambi ayumfwile ngo uleamfula mu cifutu ku kufwa. Cali kwati kulolenkana mu kulungatana na ku Mbo ukwanokesha—ukushika kwa nshishi. Lelo Yehova alimulubwileko! Mu musango wapalako, Yehova ilingi line alileta ukutauluka ku babomfi bakwe aba kasuba ka muno nshiku mu nshila sha kusungusha, kabili alitungilila na kabili bakasunga ba bumpomfu abashipikisha mu busumino nelyo fye ukufika ku mfwa. Bonse aba bucishinka bakakwata icilambu cabo, nelyo fye ukupitila mu kubuuka nga cakabilwa.—Linganyeniko Yobo 1:6-12; 2:1-6, 9, 10; 27:5; 42:10; Amapinda 27:11; Mateo 24:9, 13; Ukusokolola 2:10.b

12. Ni shani fintu bashibutotelo baba abatusauka kabili aba culukusu, kabili cinshi cikaba icilambu cabo?

¹² Ukukuma kuli bakapakasa Davidi abilikisho kuti: “Mwe Lesa, abatusauka banjimina, no lukuta lwa ba kututumya bafwayo mweo wandi, no kukanabika imwe ku mulola wabo.” (Ilumbo 86:14) Ilelo, bakapakasa balisanshamo bashibutotelo ba Kristendomu. Aba batunga ukupepa Lesa lelo bapyanika ishina lyakwe ilya mushilo ne lumbo lya kuti “Shikulu” no kumutambika nga Bulesa Butatu bwa nkama ubushalumbulwa mu cine cine ukuli konse muli Baibolo. Fintu baba abatusauka! Ukulundwa kuli ici, besha ukunashanasha amaka ya bupolitiki ukubinda no kubika mu cifungo Inte sha kwa Yehova, nga fintu cicili cilecitwa mu mpendwa ikalamba mu kusungusha iya fyalo ukushinguluke sonde. Aba aba miponto be shina lya kwa Lesa abafwale mingila bakaseepa icilambu cabo, capamo ne mbali shonse ishapala umwanakashi cilende isha Babiloni Mukalamba.—Ukusokolola 17:1, 2, 15-18; 19:1-3.

13. Mibele nshi Yehova alanga mu kwishibisha ubusuma bwakwe?

¹³ Mu kucilana kwa nsansa ipepo lya kwa Davidi litwalilila ukuti: “Lelo imwe, mwe [Yehova, NW], muli Lesa wa nkumbu, kabili uwa kusenamina, uwakokolo kukalipa, kabili uwafulo luse ne cishinka.” (Ilumbo 86:15) Iyapulamo, mu cine cine, mibele ya musango yo iya kwa Lesa wesu. Aya mashiwi yatubwesesha ku numa ku lupili lwa Sinai lintu Mose aipwishe ukumona ubukata bwa kwa Yehova. Yehova ayaswike ukuti: “Ine ndepisho busuma bwandi bonse pa cinso cobe, no kubilishe shina lya kwa Yehova ku cinso cobe.” Lelo asokele Mose ukuti: “Te kuti umone icinso candi; pantu umuntunse takamone, no kuba no mweo.” Pa numa ya ico, Yehova aikile mwi kumbi, alebilisho kuti: “Yehova, Yehova, Lesa wa nkumbu kabili uusenamina, uukokolo kukalipa, kabili uwafulisho luse ne cishinka.” (Ukufuma 33:18-20; 34:5, 6) Davidi ayambwile aya mashiwi mwi pepo lyakwe. Imibele ya musango yo iya kwa Yehova ipilibula ifingi nga nshi kuli ifwe ukucila imimonekele iili yonse iya ku mubili! Ukufuma ku ca kukumanya cesu ciine, bushe tatutasha ubusuma bwa kwa Yehova nga fintu bwalangililwa muli iyi misango ishaiwamina?

“Iciishibilo ca Busuma”

14, 15. Ni shani fintu Yehova asangila ababomfi bakwe “iciishibilo ca busuma”?

¹⁴ Davidi na kabili alomba ipaalo lya kwa Yehova, ukusoso kuti: “Alukileni kuli ine, no kumbelelo luse, peeleni ubukose bwenu ku mubomfi wenu, no kupususho mwana wa kwa cishiko wenu; citeni kuli ine iciishibilo ca busuma, no kuleka abampata bamone, no kulengwe nsoni, pantu imwe, mwe Yehova, mwanjafwa no kunsansamusha.” (Ilumbo 86:16, 17) Davidi aishiba ukuti pamo ngo ‘mwana wa kwa cishiko wa kwa Yehova,’ na o wine afwile ukuba kuli Yehova. Cili cimo cine na kuli ifwe bonse ilelo abapeela ubumi bwesu kuli Yehova no kupyunga mu mulimo wakwe. Tukabila ubukose bwa kupususha ubwa kwa Yehova ukupitila mu mupashi wakwe uwa mushilo. E ico, twipusha Lesa wesu ukusanga pamo na ifwe “iciishibilo ca busuma.” Ubusuma bwa kwa Yehova busanshamo imibele ishaiwamina intu twalandapo nomba line. Pali ici cishinte, ciishibilo nshi, nelyo iciikatilo, twingenekela Yehova ukutupeela?

¹⁵ Yehova ni Kapeela wa “ca kupeelwa conse icisuma ne ca bupe conse icafikapo” kabili ni kapekape, nga fintu Yesu atwebekesha, mu kupeelo “[mupashi] wa mushilo ku bamulomba.” (Yakobo 1:17; Luka 11:13) Umupashi wa mushilo—mwandi ca bupe cishingapimwa no mutengo ukufuma kuli Yehova! Ukupitila mu mupashi wa mushilo, Yehova alapayanya ubuseko bwa mutima, nelyo fye mu nshita ya kupakasa. Muli ifyo, abatumwa ba kwa Yesu, lintu balelubulula pa mulandu wa bumi bwabo, baali na maka ya kubilisha mu buseko ukuti Lesa alapeela umupashi wa mushilo kuli abo abalemumfwila nga kateka. (Imilimo 5:27-32) Ubuseko bwa mupashi wa mushilo mu kutwalilila bwasangile pamo na bene “iciishibilo ca busuma.”—Abena Roma 14:17, 18.

16, 17. (a) Ciishibilo nshi ica busuma bwakwe Yehova apeele Paulo na Barnaba? (b) Ciishibilo nshi capeelwe ku bena Tesalonika bapakeswe?

¹⁶ Mu kati ka nshita ya lwendo lwabo ulwa bumishonari ukupulinkana Asia Minor, Paulo na Barnaba bakumenye amafya, nelyo fye ukupakasa kwatapata. Lintu bashimikile mu Antioke ya ku Pisidia, abaYuda bakeene ubukombe bwabo. E ico, baalukile ku bantu ba nko. Cinshi cafuminemo? “Awe Abena fyalo pa kuumfwa balasekelela no kucindike cebo ca kwa [Yehova, NW]; kabili bonse abasontelwe ku kuya mu mweo wa muyayaya balitetekele.” Lelo abaYuda balengele mpokota, ica kuti balya bamishonari bapooselwe ukufuma muli cilya calo. Bushe bene na basumina abapya baali abafuupulwa pa lwa ici? Nakalya! Ukucila, “abasambi baisushiwamo ukusekelela no [mupashi] wa mushilo.” (Imilimo 13:48, 52) Yehova abapeele cilya ciishibilo ca busuma bwakwe.

¹⁷ Pa numa, icilonganino cipya mu Tesalonika calipakeswe. Ici catungulwile umutumwa Paulo ukulemba kalata wa kusansamusha, ukutasha ukushipikisha kwabo pe samba lya bucushi. “[Bapokelele] icebo mu bucushi ubwingi, pamo no kusekelela mu [mupashi] wa mushilo.” (1 Abena Tesalonika 1:6) “Ukusekelela mu [mupashi] wa mushilo” kwatwalilile ukubakosha ngo bushininkisho bwa ciishibilo ukufuma kuli Lesa uuli uwa nkumbu kabili uwa kusenamina, uukokolo kukalipa, kabili uwafulisho luse ne cishinka.

18. Ni shani fintu bamunyinefwe muli Europe ya ku Kabanga balanga ukutasha pa busuma bwa kwa Yehova?

¹⁸ Mu nshita sha nomba line, Yehova alilumbulula ubusuma bwakwe ukulola kuli bamunyinefwe ba busumino muli Europe ya ku Kabanga, ukulenge nsoni abo abapata bene—abaali bakapakasa babo. Nangu cingati balitaulukwa nomba line ukufuma ku makumi ya myaka ya kukaanya, aba bamunyinefwe batemwikwa nalyo line bali no kushipikisha, pantu abengi balolenkana na mafya yatapata aya fya bunonshi. Nangu cibe fyo, “ukusekelela mu [mupashi]” kwabo kulabasansamusha. Kusekelela nshi ukwakulisha bengakwata ukucila mu kubomfya ubuntungwa bwabo ubwasangwa ubupya mu kutanununa ubunte? Abantu abengi balekutika kuli bene, nga fintu amalipoti pa mabungano no lubatisho yalesokolola.—Linganyeniko Imilimo 9:31.

19. Ni shani fintu twingapanga amashiwi ya Ilumbo 86:11 ukuba ayesu yene?

¹⁹ Conse icilanshiwepo muli ici na mu cipande cibangilileko cilebwekeshapo ipepo lyafumaluka mu kushika ilya kwa Davidi kuli Yehova ukuti: “Nsambilisheni, Mwe Yehova . . . Ikatanyeni umutima wandi ku kutiine shina lyenu.” (Ilumbo 86:11) Natupange ayo mashiwi ye lembo lyesu ilya mwaka ilya 1993 ukuba ayesu ilyo tulebomba no mutima onse mu kwafwilisha amabuseko ya Bufumu na mu kutesekesha ubusuma bushipwa ubwa kwa Lesa wesu umo, Shikulu Mulopwe Yehova.

[Amafutunoti]

Kuti Wayasuka Shani?

◻ Cinshi tulangilila pa kupepo kuti, “Nsambilisheni, mwe Yehova”?

◻ Cinshi capilibulwa ku mitima yesu ukuba iyaikatanishiwa ku kutiine shina lya kwa Yehova?

◻ Ni shani fintu Yehova akalanga uluse lwakwe ukulola ku ba bucishinka bonse?

◻ Ni shani fintu Yehova asanga pamo nga ifwe “iciishibilo ca busuma?”

[Akabokoshi pe bula 16]

Ilembo lya mwaka ilya 1993: “Nangeni inshila yenu, mwe Yehova, . . . lengeni umutima wandi ukusaminwo kuba na katiina kwi shina lyenu.”—Ilumbo 86:11.

[Icikope pe bula 15]

Yehova cilibwe casumbuka kabili icele kuli abo abenda mu kutambalala mu cine

[Icikope pe bula 18]

Pe Bungano lya pa Kati ka Nko ilya “Bakasenda ba Lubuuto” ilya Nte sha kwa Yehova mu St. Petersburg, Russia, mu June, 46,214 balisangilweko kabili 3,256 balibatishiwe. Fintu aba balepokelela abene ubusuma bwa kwa Yehova, mu kuba no “kusekelela mu [mupashi] wa mushilo”!