Ukusambililako ku Kancindu

ICITABO cimo icilondolola amashiwi ya mu Baibolo cilondolola akancindu ukuti: “Muti wayemba icine cine.” Mu nshita sha mu Baibolo na lelo, utuncindu tutwala ifisabo beta ati ama date twayemfya Umupokapoka wa Naelo mu Egypt, kabili utuncindu twaba mu mbali ya tumilonga twa mu Ciswebebe ca Negeb utupanga icintelelwe.

Ngo tuncindu twa misango yalekanalekana, utucindu tutwala ama date tulaleepa sana. Tumbi tulalepa amamita 30 no kutwalilila ukutwala ifisabo pa myaka 150. Cine cine, utuncindu tutwala ama date tulamoneka bwino kabili tulatwala nga nshi. Cila mwaka akancindu kamo kalakwata ifisansangu ifingi ifya fisabo. Icisansangu fye cimo kuti cakwata ifisabo fya ma date ukucila pali 1,000. Pa lwa ifi fisabo, kalemba umo alembele ukuti: “Abalya fye . . . ama date yauma aya mu matuuka, te kuti belenganye ifyo ifi fisabo fyawama ukulya ilyo fishilauma.”

Calilinga ukuti Baibolo ipashanya abantu bamo ku tuncindu. Pa kutemuna Lesa, umuntu afwile ukuba ne mibele isuma no kutwalilila ukutwala ifisabo fya milimo isuma nga kancindu akatwala sana ifisabo. (Mateo 7:17-20) E mulandu wine, ifyabaswa fya tuncindu fyabikilwe mwi tempele lya kwa Solomone ne tempele lya mu cimonwa ilya kwa Esekiele ku kuyemfyamo. (1 Ishamfumu 6:29, 32, 35; Esekiele 40:14-16, 20, 22) E co, pa kuti Lesa asuminishe ukupepa kwa muntu, uyo muntu afwile ukukwata imibele isuma nga kancindu katwala ifisabo fya date. Icebo ca kwa Lesa cilondolola ukuti: “Uwalungama akalemba nga kancindu.”—Amalumbo 92:12.