“We Mweo Wandi, Paala Yehova”

NANCY atila: “Mu myeshi ya nomba line nalitendwa ukubomba mu butumikishi kabili nshileba ne nsansa.”a Pa myaka 10 alibomba bupainiya, bukabilisha bwa nshita yonse ubwa mbila nsuma. Lelo alundapo ukuti: “Nshileumfwa bwino ifilecitika kuli ine. Ubukombe bwa Bufumu ndebushimikila fye cikulu kushimikila, ifyo ndelanda tafilefuma ku mutima. Bushe kuti nacita shani?”

Umfweni na kuli Keith, eluda mu cilonganino ca Nte sha kwa Yehova. Alisungwike pa kumfwa abena mwakwe batila: “Cilemoneka kwati amano yenu yaciba fye kuli fimbi, mwi pepo mwacipepa, mwacitasha pa fya kulya, cibe te nshita ya kulya!” Keith asumina ukuti: “Kanshi amapepo yandi ndepepa fye cikulu kupepa.”

Ukwabula ukutwishika, teti mutemwe ukulumbanya Yehova kwenu ukusanguka ukwa munsaunte fye. Mufwaya kulefuma ku mutima, pa nshi ya mutima wa kutasha. Lelo, ukutontonkanya te kuti mukufwale nelyo ukukufuula kwati ca kufwala. Kufwile ukufuma mu mutima wa muntu. Bushe umo kuti atasha shani ukufuma ku mutima? Ilumbo lyalenga 103 lilatulondolwela bwino fintu twingacite co.

Davidi Imfumu ya pa kale iya mu Israele e yashikile Ilumbo lyalenga 103. Yasaamwine ulwimbo aiti: “We [mweo wandi, paala, NW] Yehova, we conse mu kati ka ine, cindike shina lyakwe lya mushilo.” (Amalumbo 103:1) Mu citabo cimo mwaba amashiwi ya kuti, “ishiwi lya ukupaala ukulibomfya kuli Lesa, lipilibula ukulumbanya, e kuti ukumutemwisha lyonse no kulamutootela.” Apo alefwaisha ukulumbanya Yehova no mutima wa kumutemwisha no kumutootela, Davidi akonkomesha umweo, e kutila umwine wine, ‘ukupaala Yehova.’ Nomba cinshi cacincisha Davidi ukutemwisha Lesa apepa mu nshila ya musango yo ukufuma ku mutima?

Atwalilila ukuti: “Wilaba fya kutesa [fya kwa Yehova] fyonse.” (Amalumbo 103:2) Ukufwaisha ukutasha Yehova kwalyampana no kwetetula nga nshi pa “fya kutesa fyakwe.” Bushe finshi ifya kutesa nelyo imilimo ya kwa Yehova ifyo Davidi aletontonkanyapo? Ukulolesha ububumbo bwa kwa Yehova Lesa, ifili nga iulu lyaisulamo intanda pa bushiku kushili amakumbi, cine cine kuti kwalenga imitima yesu yafwaisha ukutasha Kabumba. Davidi alitontonkenyepo nga nshi ilyo alelolesha iulu lyaisulamo intanda. (Amalumbo 8:3, 4; 19:1) Lelo mwi Lumbo lyalenga 103, Davidi aibukisha imibombele na imbi iya kwa Yehova.

Yehova “E Ulekelela Amampuulu Yobe Yonse”

Muli ili lumbo, Davidi alanda pa mibombele ya kwa Lesa iya nkumbu. Ukulanda pa nkumbu shapulamo isha kwa Yehova, Davidi aimba ukuti: “E ulekelela amampuulu yobe yonse.” (Amalumbo 103:3) Davidi afwile alishibe imibele yakwe iya lubembu. Lintu kasesema Natani amutununwike pa bucende bwakwe na Bati-sheba, alisumine ukuti: “Kuli imwe, kuli imwe [mwe Yehova] mweka, e ko nabembuka, no kucite cabipa mu menso yenu.” (Amalumbo 51:4) Apo umutima wakwe walicululwike, apaapeete ukuti: “Mumbelele uluse, mwe Lesa, umwabele cikuku cenu; umwabelo bwingi bwa nkumbu shenu, paseni ifya bupulumushi fyandi. Nsambeni bwino bwino ku mampuulu yandi, na ku lubembu lwandi nsangululeniko.” (Amalumbo 51:1, 2) Mwandi Davidi afwile alitashishe cine cine pa kumweleela! Apo ali muntunse ushapwililika, alicitile imembu na shimbi mu bumi bwakwe, lelo alilapiile, apokelele ukwebaulwa, kabili alilungike imibele yakwe. Ukwetetula pa mibombele yawamisha iya nkumbu kuli wene, kwalengele Davidi ukucindika Yehova.

Bushe na ifwe tatuli babembu? (Abena Roma 5:12) No mutumwa Paulo wine alilishike ati: “Ndesaminwe mbela ya kwa Lesa ku buntu bwa mu kati, lelo namone mbela imbi mu filundwa fyandi iilelwa ne mbela ya mutima wandi no kuntwala bunkole ku mbela ya lubembu iili mu filundwa fyandi. Iye, ne muntu wa nkumbabulili ne! Nani akampokolola ku mubili uno uwa mfwa?” (Abena Roma 7:22-24) Mwandi tufwile ukutootela Yehova pantu alalabako ku membu shesu! Alafuutapo ulubembu nga twalapila no kulomba ukweleelwa.

Davidi umwine aicinkulako ukuti: “[Yehova] e uposha amalwele yobe yonse.” (Amalumbo 103:3) Apo ukuposha kulabwekeshamo amaka, ili shiwi talipilibula fye ukweleela ulubembu. Lisanshamo ukufumyapo “amalwele,” e kutila fyonse ifyo ukulufyanya kwesu kutuletelela. Mu calo cipya ico akalenga, Yehova akafumyapo fyonse ificusha imibili yesu pa mulandu wa lubembu, ifili nga ukulwala ne mfwa. (Esaya 25:8; Ukusokolola 21:1-4) Na ndakai line Lesa aletuposha amalwele ya ku mupashi. Kuli bamo ici cisanshamo kampingu wacushiwa no konaika kwa bucibusa na Lesa. “Mwilaba” ifyo Yehova kale kale atucitila pa lwesu.

“E Ulubulo Mweo Obe ku Nindi”

Davidi aimba ukuti: “[Yehova] e ulubulo mweo obe ku Nindi.” (Amalumbo 103:4) “Inindi” ni nshishi ya bantunse bonse. Libe talaba imfumu ya Israele, Davidi apene afwe. Ku ca kumwenako, Shauli Imfumu ya Israele yamupatile ulupato lwa bukomi, kabili imiku iingi yalyeseshe ukumwipaya. (1 Samwele 18:9-29; 19:10; 23:6-29) AbaPelishiti na bo bene balefwaya ukumwipaya. (1 Samwele 21:10-15) Lelo lyonse, Yehova alemupokolola ku “nindi.” Mwandi Davidi alitashishe icine cine ilyo aleibukisha ilya mibombele ya kwa Yehova!

Ni shani pa lwa imwe? Bushe Yehova alimukoshapo lintu mwapopomenwe nelyo ukuponenwa no bwafya bumo? Nelyo bushe mwalishibapo inshita shimo lintu apokolwelepo Inte shakwe isha busumino muno nshiku ukufuma ku nindi? Napamo mwalibelengapo muli uno magazini ifyo Yehova apusushapo ababomfi bakwe kabili calimupita ku mutima. Bomfyeniko inshita ku kwetetula pali iyi mibombele ya kwa Lesa! Na kuba, bonse tufwile ukutootela Yehova pe subilo lya kubuuka.—Yohane 5:28, 29; Imilimo 24:15.

Yehova alitupeela fyonse, ubumi ne filenga ukuti tulesangalala no kuilemena ukwikala muno calo. Kemba wa malumbo atile Lesa “e ukufwika ku mutwe uluse ne nkumbu.” (Amalumbo 103:4) Lintu tuli mu kukabila, Yehova tatulekelesha, alatwafwa ukupitila mu kuteyanya kwakwe ukumoneka na baeluda, nelyo bakacema, mu cilonganino. Uku kwafwa kulatulenga ukushipikisha ubwafya ukwabula no kulufya umucinshi wa pa lwesu. Bakacema ba Bwina Kristu balyangwako icine cine ku mpaanga. Balakoselesha abalelwala na bapopomenwa, kabili balabombesha ukwimya abalewa. (Esaya 32:1, 2; 1 Petro 5:2, 3; Yuda 22, 23) Umupashi wa kwa Yehova ulacincisha aba bakacema ukuba aba nkumbu kabili aba kutemwa ku mukuni. Cine cine “uluse [lwakwe] ne nkumbu” fyaba nge cilongwe icitusaamika no kutucindamika! Shi twilaba imibombele yakwe, natulecindika Yehova ne shina lyakwe ilyashila.

Kemba wa malumbo Davidi atwalilila ukuicincisha pa kwimba ukuti: “[Yehova] e wikusha akanwa kobe ifisuma, ukuti ubwaice bobe bulengwe cipya cipya nga kapumpe.” (Amalumbo 103:5) Imikalile Yehova atupeela yaba iya kwikushiwa no kusangalala. Na kabushe, ukwishiba icine kweka kweka fye, cuma icacindamisha kabili iciletulenga ukusangalala nga nshi! Tontonkanyeni na pa fyo twikushiwa nga nshi mu mulimo Yehova atupeela uwa kushimikila no kupanga abasambi. Mwandi tulasangalala ilyo twasanga umuntu uulefwaisha ukusambilila pa lwa kwa Lesa wa cine no kumwafwa ukwishiba Yehova no kumucindika! Lelo, nangu fye baumfwa nelyo tabomfwile, lishuko lyakulisha ukubombako umulimo wa kushisha ishina lya kwa Yehova no kwebela bumulopwe bwakwe.

Ilyo tuletwalilila mu mulimo wa kubilisha Ubufumu, nani ashinaka nelyo ukupomponteka? Lelo Yehova alatwalilila ukulenga amaka ya babomfi bakwe “cipya cipya nga kapumpe” uwaba na mapindo aya maka ayalenga wene ukupupuka ukuya umwaleepa icine cine mu lwelele. Mwandi tufwile ukutootela apo Shifwe wa ku muulu uwa kutemwa alatupayanishisha aya “maka” pa kuti muli bucishinka twingatwalilila ukubomba ubutumikishi bwesu cila bushiku!—Esaya 40:29-31.

Ku kulangilila: Clara alabomba, lelo alashimikila amaawala mupepi na 50 cila mweshi mu mulimo wa mwi bala. Atila: “Limo ndanaka, nomba ndaikoselesha pa mulandu fye wa kuti ninshi kale kale natupangana no wa kubomba nankwe mwi bala. Cilya fye twaya, lyonse amaka yalabwelelamo.” Napamo ne mwe bene mwalyumfwapo ifyo amaka yesa ukufuma kuli Lesa ilyo mubomba ubutumikishi bwa Bwina Kristu. Shi namucincishiwe ukulanda nge fyaimbile Davidi pa kusaamuna ulwimbo ukuti: “We mweo wandi, paala Yehova, we conse ica mu kati ka ine, cindike shina lyakwe ilya mushilo.”

Yehova Alalubula Abantu Bakwe

Kemba wa malumbo atwalilila ukwimba ukuti: “Yehova acite fya bulungami, ne fya bupingushi kuli bonse abacitwo lumanimani; alengele imibele yakwe ukwishibwa kuli Mose, ne milimo yakwe ku bana ba kwa Israele.” (Amalumbo 103:6, 7) Davidi afwile aletontonkanya pa “lumanimani” lulya abena Israele balecitwa ku bena Egupti bakaluka mu nshiku sha kwa Mose. Ukwetetula pa fyo Yehova alengele amaka yakwe aya kulubula ukwishibwa, kwacincishe umutima wa kwa Davidi ukutasha Yehova.

Ne fwe kuti twacincishiwa ukutasha nga filya acitile nga tuleetetula pa fyo Lesa abombele na bena Israele. Lelo tatufwile kulaba ukwetetula na pa fya kukumanya fya babomfi ba kwa Yehova aba muno nshiku, ifili nga filya fyaba mu fipandwa 29 na 30 mu citabo ca Jehovah’s Witnesses—Proclaimers of God’s Kingdom. Ilyashi lyalondololwa mulya na mu mpapulo shimbi isha Watch Tower Society lilatulenga ukumona ifyo Yehova ayafwa abantu bakwe aba muno nshiku ukushipikisha mu fifungo, ukubemina ku mabungwe, ukubabinda, ukubapoosa mu nkambi sha bucushi, no kubasenda icibaalo. Kwaliba amesho mu fyalo umwaba inkondo sha mutatakuya, ifili nga mu Burundi, Liberia, Rwanda, na mu yali kale Yugoslavia. Lyonse lintu bapakaswa, ukuboko kwa kwa Yehova kwalikoselesha ababomfi bakwe aba busumino. Ukwetetula pali iyi mibombele ya kwa Lesa wesu umukulu, Yehova, kuti kwalenga ne fwe twaumfwa nge fyaumfwile Davidi ilyo aleetetula pa lyashi lya kulubulwa mu Egupti.

Tontonkanyeni pa fyo Yehova atutentemba pa kutulubula ku cisendo ca lubembu. Alitupayanishisha “umulopa wa kwa Kristu” ku ‘kusangulula ba kampingu besu ku milimo yafwa.’ (AbaHebere 9:14) Nga twalapila ku membu shesu no kulomba ukweleelwa pa cishinte ce lambo lya mulopa wasuumiwe uwa kwa Kristu, Lesa alatalusha ifya bupulumushi fyesu, kwati ni filya “akabanga katalukana na masamba,” e fyo atalusha imembu ku babile bakwe. Tontonkanyeni na pa fyo Yehova atupayanishisha ukulongana kwa Bwina Kristu, ukubishanya kukuulilila, bakacema ba mu cilonganino, ne mpapulo shabamo ifyebo fifuma mu Baibolo, ifyo tupokelela ukupitila mu “musha wa cishinka kabili uwashilimuka.” (Mateo 24:45) Bushe iyi mibombele ya kwa Yehova yonse taitukoselesha ukuba sana bacibusa na wene? Davidi aimba ukuti: “Yehova wa nkumbu, kabili wa kusenamina, akokolo kukalipa, kabili afulo luse; . . . tacita kuli ifwe umwabele membu shesu, tatupeelo mwabela amampuulu yesu.” (Amalumbo 103:8-14) Ukwetetula pa fyo Yehova atusakamana mu kutemwa cine cine kukatucincisha ukumucindika no kusumbula ishina lyakwe ilyashila.

“Paaleni Yehova, mwe Milimo Yakwe Yonse”

Nga kulinganya kuli Yehova uushifwa, “Lesa wa muyayaya,” “inshiku” sha muntunse umwina kufwa shalicepelela fye, “shaba ngo mulemfwe.” Lelo Davidi mu kutasha aetetula ukuti: “Uluse lwa kwa Yehova lwafumo muyayaya no kuyo muyayaya, no bulungami bwakwe buya ku bana ba bana, ku babake cipingo cakwe, na ku bebukishe fya kulangulula fyakwe ku kuficita.” (Ukutendeka 21:33, NW utulembo twa pe samba; Amalumbo 103:15-18) Yehova talaba abamutiina. Ilyo inshita yakwe iyalingwa ikafika, akabapeela umweo wa muyayaya.—Yohane 3:16; 17:3.

Pa kuilandila ifyo acindikisha bumfumu bwa kwa Yehova, Davidi atila: “Yehova napampamike cipuna cakwe mu muulu, no bufumu bwakwe buteka bonse.” (Amalumbo 103:19) Nangu cingati Yehova alilangile bumfumu bwakwe ku bantu pa kashita akanono mu mitekele ya mu Israele, icipuna cakwe ica bufumu caba mu muulu. Apo e Kabumba, Yehova e Mulopwe Kateka wa fibumbwa fyonse, kabili alacita ifyo alefwaya muli bulesa, mu muulu na pano isonde ukulingana ne mifwaile yakwe.

Davidi akonkomesha fye ne fibumbwa fya bumalaika ifya mu muulu. Aimba ukuti: “[Paaleni, NW] Yehova, mwe bamalaika bakwe, mwe mpalume sha maka ishicite cebo cakwe, ukuumfwe shiwi lya cebo cakwe. [Paaleni, NW] Yehova, mwe milalo yakwe yonse; mwe bakapyunga bakwe abacite co afwaya. [Paaleni, NW] Yehova, mwe milimo yakwe yonse; mu ncende shonse sha bufumu bwakwe. We mweo wandi, paala Yehova!” (Amalumbo 103:20-22) Bushe ukwetetula pa mibombele ya kwa Yehova iya nkumbu kuli ifwe takwakatucincishe ne fwe ukumucindika? Ukwabula no kutwishika! Kabili kuti twashininkisha ukuti iciunda cesu ica kulumbanya Lesa cikomfwikila capamo ne ciunda cakulisha icisanshamo na bamalaika abalungama. Shi natulelumbanya Shifwe wa ku muulu no mutima onse, ukulandapo ifisuma pa lwa wene. Cine cine natumfwile amashiwi ya kwa Davidi aya kuti, “We mweo wandi, paala Yehova!”

[Futunoti]

[Icikope pe bula 23]

Davidi aleetetula pa mibombele ya kwa Yehova iya nkumbu. Bushe na imwe muletetulapo?