“Ni Ani Uwaba Nga Yehova Lesa Wesu?”

“Ni ani uwaba nga Yehova Lesa wesu, uwasansama ku kwikala mu myulu?”—ILUMBO 113:5.

1, 2. (a) Ni shani fintu Inte sha kwa Yehova bamona Lesa na Baibolo? (b) Fipusho nshi fyawaminwa ukulangulukapo?

BAKALUMBA ba kwa Yehova baliba abapaalwa mu cine cine. Mwandi lishuko ukuba muli ulu lukuta lwa nsansa! Pamo nge Nte shakwe, tulapokelela ukufunda, amafunde, ifisambilisho, amalayo, na masesemo ifya Cebo ca kwa Lesa, Baibolo. Twaliba aba buseko ukusambilila ukufuma mu Malembo no ‘kusambilishiwa kuli [Yehova, NW].’—Yohane 6:45.

² Pa mulandu wa kucindikisha kwabo ukwashika ukwa kuli Lesa, Inte sha kwa Yehova kuti baipusho kuti: “Ni ani uwaba nga Yehova Lesa wesu?” (Ilumbo 113:5) Ayo mashiwi ya kwa kemba wa malumbo yalangilila icitetekelo. Lelo mulandu nshi Inte bakwatila icitetekelo ca musango yo muli Lesa? Kabili milandu nshi bakwata iya kulumbilapo Yehova?

Icitetekelo no Kulumba Fyalilinga

 3. Finshi fili Amalumbo ya Hallel, kabili mulandu nshi yainikilwe fyo?

³ Icitetekelo muli Yehova cili calungamikwa pantu wene ni Lesa waibela. Ici cakomailwapo mu Amalumbo 113, 114, na 115, ulubali lwa Amalumbo mutanda aya Hallel. Ukulingana ne Sukulu lya cirabi ilya Hillel, Amalumbo 113 na 114 yaimbilwe mu kati ka ca kulya ca Kucilila ca ciYuda pa numa lintu ulukombo lwa cibili ulwa mwangashi lwaitulwilwe no bupilibulo bwa kusefya bwalondolwelwe. Amalumbo 115 ukupulinkana ukufika ku 118 yaimbilwe pa numa ya lukombo lwa bune ulwa mwangashi. (Linganyeniko Mateo 26:30.) Yetwa “Amalumbo ya Hallel” pantu yabomfya mu kubwekeshiwabwekeshiwapo ukubilikisha kwa Aleluya!—“Lumbeni Jah!”

 4. Bupilibulo nshi ubwe shiwi “Aleluya,” kabili lingi lyaba shani limoneka muli Baibolo?

⁴ “Aleluya!” kulembululwa kwa numbwilo ya ciHebere iimoneka imiku 24 mu Amalumbo. Kumbi muli Baibolo, umusango wa ciGreek uwa yene umoneka imiku ine ukulosha ku buseko busangwa pa konaulwa kwa Babiloni Mukalamba, ubuteko bwa calo ubwa butotelo bwa bufi, no kusekelela kwaampanako mu kuba no kutendeka kwa kwa Yehova Lesa ukuteka nge Mfumu. (Ukusokolola 19:1-6) Ilyo nomba tulebebeta yatatu aya Amalumbo ya Hallel, kuti twaelenganya fwe bene ukwimba ishi nyimbo kwi lumbo lya kwa Yehova.

Lumbeni Jah!

 5. Ilumbo 113 lyasuka cipusho nshi, kabili ni kuli ani ukukambisha kwa Ilumbo 113:1, 2 ukucilisha kubomba?

⁵ Ilumbo 113 lyasuka icipusho ca kuti, Mulandu nshi uwa kulumbanishisha Yehova? Litendeka no kukambisha kwa kuti: “Lumbeni Jah, imwe mwe bantu! Peeleni ilumbo, Mwe babomfi ba kwa Yehova, lumbeni ishina lya kwa Yehova. Shi nalibe ilyapaalwa ishina lya kwa Yehova ukufuma kuli nomba no kufika umuyayaya.” (Ilumbo 113:1, 2, NW) “Aleluya!” Ee, “Lumbeni Jah!” Uko kukambisha kubomba ukucilisha ku bantu ba kwa Lesa muli iyi “nshita ya ku mpela.” (Daniele 12:4) Ukufuma pali nomba no kufika kuli pe na pe, ishina lya kwa Yehova likasansabikwa mu kusaalala kwe sonde. Inte shakwe ilelo babilisha ukuti Yehova ni Lesa, Kristu ni Mfumu, kabili Ubufumu bwalimikwa mu mulu. Satana Ciwa no kuteyanya kwakwe te kuti bacilikile uku kulumbanishiwa kwa kwa Yehova.

 6. Ni shani fintu Yehova alelumbanishiwa ‘ukufuma ku kutula kwa kasuba ukufika ku kuwa kwa kasuba’?

⁶ Ulwimbo lwa kulumba lukatwalilila ukufikila Yehova alenga lwene ukwisushe sonde. “Ukufuma ku kutula kwa kasuba ukufika ku kuwa kwa kako ishina lya kwa Yehova [lili no kulumbanishiwa, NW].” (Ilumbo 113:3) Ici cilepilibula ifingi ukucila ukupepa kwa cila bushiku ukwa fibumbwa fimo ifya pe sonde. Akasuba katula ku kabanga no kuwa ku masamba, ukufimba isonde lyonse. Ukuli konse uko akasuba kabalika, ishina lya kwa Yehova likalumbanishiwa mu kwangufyanya ku bantu bonse abalubulwa ukufuma mu busha ku butotelo bwa bufi no kuteyanya kwa kwa Satana. Na kuba, ulu lwimbo ulushakatale alupwa luleimbwa nomba ne Nte shasubwa isha kwa Yehova na abo abakaba abana ba pe sonde aba Mfumu yakwe, Yesu Kristu. Mwandi lishuko bakwata nga bakemba ba sha malumbo sha kwa Yehova!

Yehova Te Kuti Alinganishiweko

 7. Ni mbali nshi shibili isha kupulamo kwa kwa Yehova shamonwa pa Ilumbo 113:4?

⁷ Kemba wa malumbo alundako kuti: “Yehova alisansabala pa nko shonse, ubukata bwakwe buli pa mulu wa myulu.” (Ilumbo 113:4) Ici cipeelako kusakamana ku mbali shibili isha kupulamo kwa kwa Lesa: (1) Kuli Yehova, Uwapulishamo, ‘uwasansabala pa nko shonse,’ shili kwati litoni ukufuma mu ca kutapilamo kabili ngo bungululu ubuli pa fya kulingilo kufina; (Esaya 40:15; Daniele 7:18) (2) ubukata bwakwe bwalikulisha nga nshi ukucila ubo ubwa myulu ine ine, pantu bamalaika balacita ukufwaya kwakwe ukwa bumulopwe.—Ilumbo 19:1, 2; 103:20, 21.

 8. Mulandu nshi kabili ni shani fintu Yehova alolesesha apatali pa kumona imilandu mu mulu na pe sonde?

⁸ Pa kuseshiwa no kusansabala kwa kwa Lesa, kemba wa malumbo atile: “Ni ani uwaba nga Yehova Lesa wesu, uwasansama ku kwikala mu myulu, alolesesha apatali pa myulu na pe sonde?” (Ilumbo 113:5, 6) Lesa alisansabikwa nga nshi ica kuti afwile ukulolesha apatali pa kumona imilandu mu mulu na pe sonde. Nangu cingati Yehova taba uwacepako ku uli onse nelyo taba mu kunakila kuli bambi, alalanga ukuicefya mu kubeleshe nkumbu ne cililishi ukulola ku babembu bapetama. Ukupayanya Umwana wakwe, Yesu Kristu, nge “cikonsolwelo” ca Bena Kristu basubwa ne ca calo ca mutundu wa muntu ni numbwilo ya kuicefya kwa kwa Yehova.—1 Yohane 2:1, 2.

Yehova Wa Cililishi

9, 10. Ni shani fintu Lesa ‘asumbula umubusu, ku kumwikalika pamo na bakankaala’?

⁹ Ukukomaila pa cililishi ca kwa Lesa, kemba wa malumbo alundako kuti Yehova “emyo mulanda mu lukungu, no kusumbulo mubusu ukufuma pa cishala, ku kumwikalika pamo na bakankaala, pamo na bakankaala ba bantu bakwe; ekalike ŋumba mu ŋanda, nyina wa nsansa wa bana baume. [Lumbeni Jah, imwe mwe bantu, NW]!” (Ilumbo 113:7-9) Abantu ba kwa Yehova balikwata icitetekelo ca kuti wene kuti alubula abatambalala abali mu kukabila, ukwalula imibele yabo, no kwikusha ukukabila kwabo ukwalinga no kufwaisha. ‘Uwatumpuka kabili Uwasumbuka apuupuutulo mupashi wa basokopala ne mitima ya bafunshika.’—Esaya 57:15.

¹⁰ Ni shani fintu Yehova ‘asumbulo mubusu, no kumwikalika pamo na bakankaala’? Lintu caba kufwaya kwa kwa Lesa, alabika ababomfi bakwe mu fifulo fya bukata ifyalingana ne fyo ifya bakankaala. Acitile fyo mu mulandu wa kwa Yosefe, uwabele umukalamba wa fya kulya uwa mu Egupti. (Ukutendeka 41:37-49) Muli Israele, ukwikala pamo na bakankaala, nelyo abaume ba bulashi pa kati ka bantu ba kwa Yehova, cali lishuko lya kuteeswa. Ukupala baeluda ba Bwina Kristu ilelo, abaume ba musango yo balikwete ukwafwilisha kwa kwa Lesa ne paalo.

11. Mulandu nshi pambi cingasoselwa ukuti Ilumbo 113:7-9 ukucilisha libomba ku bantu ba kwa Yehova aba nshita sha muno nshiku?

¹¹ Ni shani pa lwa ‘kulenga iŋumba nyina wa nsansa’? Lesa apeele Hana uwali iŋumba umwana mwaume—Samwele, untu apeeleshe ku mulimo Wakwe. (1 Samwele 1:20-28) Icacilapo kukatama, ukutendeka na Yesu kabili no kupongololwa kwa mupashi wa mushilo pa basambi bakwe pa Pentekoste 33 C.E., umwanakashi wa cimpashanya uwa kwa Lesa, Sione wa ku mulu, atampile ukufyala abana ba ku mupashi. (Esaya 54:1-10, 13; Imilimo 2:1-4) Kabili pamo fye nga fintu Lesa abweseshemo abaYuda ku calo ca ku mwabo pa numa ya kuululwa bunkole mu Babiloni, mu 1919 alubwile abashalapo basubwa aba kwa “Israele wa kwa Lesa” ukufuma muli bunkole bwa cina Babiloni kabili alibapaala apakalamba nga nshi lwa ku mupashi ica kuti amashiwi ya Ilumbo 113:7-9 yabomba kuli bene. (Abena Galatia 6:16) Pamo nge Nte sha bucishinka isha kwa Yehova, abashalapo ba kwa Israele wa ku mupashi na babishanya nabo abakwata amasubilo ya pe sonde baleyankulako no mutima onse ku mashiwi ya kupelako aya Ilumbo 113 ukuti: “Lumbeni Jah, imwe mwe bantu!”

Ubushinino bwa Kuibela kwa kwa Yehova

12. Ni shani fintu Ilumbo 114 lilanga ukuibela kwa kwa Yehova?

¹² Ilumbo 114 lilanga ukuibela kwa kwa Yehova pa kulosha ku fya kuponako fyaibela ifilebimbamo abena Israele. E fyaimbile kemba wa malumbo ukuti: “Ilyo abena Israele bafumine mu Egupti, aba ŋanda ya kwa Yakobo mu bantu abalongofyanya, Yuda aishilebo mwashila mwakwe, Israele aishilebo bufumu bwakwe.” (Ilumbo 114:1, 2) Lesa alubwile Israele ukufuma mu busha ku bena Egupti, abo ululimi lwabo lwali ulweni ku matwi yabo. Ukulubulwa kwa bantu ba kwa Yehova, abetwa Yuda na Israele mu kulinganako kwa mishikakulo, kulanga ukuti Lesa kuti alubula ababomfi bakwe bonse ilelo.

13. Ni shani fintu Ilumbo 114:3-6 lilanga ukupulamo kwa kwa Yehova no kubomba ku fya kukumanya fya kwa Israele wa pa kale?

¹³ Bumulopwe bwa kwa Yehova pa bubumbo bonse bwamonwa muli aya mashiwi: “Bemba alimwene, no kufulumuka, Yordani abweleele ku numa; impili shacelebensele nga basukusuku, utupili nga bana ba mpaanga. Kwaba shani kuli iwe, we bemba, apo ulefulumuka? we Yordani, apo ulebwelela ku numa? mwe mpili, apo mulecelebensa nga basukusuku? mwe tupili, nga bana ba mpaanga?” (Ilumbo 114:3-6) Bemba Wakashika ‘afulumwike’ lintu Lesa aiswilile abantu bakwe inshila ya kupulamo. Israele lyene amwene ukuboko kukalamba ukwa kwa Yehova mu kubomba ukulwisha abena Egupti abafwile mu menshi yalebweluluka. (Ukufuma 14:21-31) Mu kulangisha kwapalako ukwa maka ya bulesa, umumana wa Yordani ‘watendeke ukubwelela ku numa,’ ukusuminisha abena Israele ukwabukila mu Kanaani. (Yoshua 3:14-16) ‘Impili shacelebensele nga basukusuku’ ilyo ulupili lwa Sinai lwafukile cushi no kututuma lintu icipingo ce Funde caimikwe. (Ukufuma 19:7-18) Mu kuba na kalume ka lwimbo lwakwe mu cilolwa, kemba wa malumbo abika imilandu mu musango wa cipusho, nakalimo ukutubululo kuti bemba, umumana, impili, no tupili ifishipema fyapuminwe ku mwenso kuli uku kulangishiwa kwa maka ya kwa Yehova.

14. Cinshi cacitilwe ku maka ya kwa Yehova pa Meriba na Kadeshi, kabili ni shani fintu ici cilingile ukwambukila ababomfi bakwe aba kasuba ka lelo?

¹⁴ Nalyo line ukulosha ku maka ya kwa Yehova, kemba wa malumbo aimbile ukuti: “Pa cinso ca kwa Shikulu kanka, we pano isonde, pa cinso ca kwa Lesa wa kwa Yakobo, uusangule cilibwe icasansuka icishiba ca menshi, ilibwe lya nakabwe akamfukumfuku ka menshi.” (Ilumbo 114:7, 8) Mu nshila ya mampalanya, kemba wa malumbo muli ifyo alangilila ukuti umutundu wa muntu ulingile ukwiminina mu mwenso wa kuli Yehova, Shikulu kabili Kateka wa mu Kubumbwa Konse uwe sonde lyonse. Aali “Lesa wa kwa Yakobo,” nelyo Israele, nga fintu aba wa bena Israele ba ku mupashi ne fibusa fyabo ifya pe sonde. Pa Meriba na Kadeshi mu matololo, Yehova alangile amaka yakwe pa kupayanishisha Israele amenshi mu cipesha amano, “[ukusangule] cilibwe icasansuka icishiba ca menshi, ilibwe lya nakabwe akamfukumfuku ka menshi.” (Ukufuma 17:1-7; Impendwa 20:1-11) Ifya kucinkulako fya musango yo ifya maka yapuutamo mwenso aya kwa Yehova no kusakamana kwabondoka fipeela Inte shakwe imilandu ituntulu iya kukwata icitetekelo cabulo kutwishika muli wene.

Ukukanapala Balesa ba Tulubi

15. Ni shani fintu pambi Ilumbo 115 lyaimbilwe?

¹⁵ Ilumbo 115 litucincisha ukulumba no kucetekela Yehova. Litila ipaalo no kwafwilisha fifuma kuli wene kabili lishininkisha ukuti utulubi twa fye. Ili lumbo kuti pambi lyaimbilwe mu kwankulana. Uko e kuti, ishiwi limo kuti pambi lyaimba ukuti: “Mwe batiina Yehova, tetekeleni Yehova!” Ulukuta kuti pambi lwaankwileko kuti: “Uwa kubaafwa kabili inkwela yabo ni Wene!”—Ilumbo 115:11.

16. Kucilana nshi kwingapangwa pa kati ka kwa Yehova no tulubi twa nko?

¹⁶ Ubukata bulingile ukuya te kuli ifwe lelo kwi shina lya kwa Yehova, Lesa wa cikuuku ca kutemwa, nelyo ukutemwa kwa bucishinka, na bucine. (Ilumbo 115:1) Abalwani kuti pambi baipusha mu kusenteka ukuti: “Nga ali kwi Lesa wabo?” Lelo abantu ba kwa Yehova kuti bayasuka ukuti: ‘Lesa wesu ali mu mulu kabili acita conse ico atemenwe ukucita.’ (Ifikomo 2, 3) Utulubi twa nko te kuti tucite icili conse, nangu cibe fyo, pantu fipasho fyapangwa no muntu ifya silfere na golde. Te mulandu no tunwa twa tuko, amenso, na matwi, tatusosa, tatumona, kabili tatuumfwa. Twalikwata imyona lelo te kuti tununshe, amakasa lelo tatwaba na maka ya kwenda, ne mikoshi lelo te kuti tufumye iciunda. Abo abacita utulubi tushaba na maka pamo pene na abo abacetekela muli twene bakaba ababulwo bumi ukulingana na twene.—Ifikomo 4-8.

17. Apantu abafwa te kuti balumbanye Yehova, cinshi tulingile ukucita, kabili mu kuba na filolelo nshi?

¹⁷ Ukukonkomesha kwapeelwa mu kukonkapo ku kucetekela muli Yehova nga Kaafwa kabili Inkwela ya kucingilila iya kwa Israele, iya ŋanda ya bushimapepo iya kwa Aarone, kabili iya bonse abatiina Lesa. (Ilumbo 115:9-11) Pamo nga abo abatiina Yehova, twalikwata ukucindikisha kwashika ukwa kuli Lesa no mwenso utuntulu uwa kumufulwisha. Na kabili twalikwata icitetekelo ca kuti “uwacitile umuulu na pano isonde” alapaala bakapepa bakwe aba bucishinka. (Ifikomo 12-15) Imyulu cifulo ca cipuna cakwe ica bufumu, lelo Lesa acitile isonde umushi wa ciyayaya uwa mutundu wa muntu uwa bucishinka kabili uwa cumfwila. Apantu abafwa aba mutalalila, abashaishiba akali konse te kuti balumbanye Yehova, ifwe, fwe bali abomi, tulingile ukucite fyo mu kuipeelesha konse na bucishinka. (Lukala Milandu 9:5) Ni abo beka abalumbanya Yehova e bakaipakisha ubumi bwa ciyayaya no kuba na maka ya ‘kupaala Jah’ (NW) kuli pe na pe, ukulanda bwino ulwa wene “umuyayaya.” E ico natwiminine muli bucishinka pamo na abo abaleumfwila ukukonkomesha kwa kuti: “Lumbeni Jah, imwe mwe bantu!”—Ilumbo 115:16-18, NW.

Imibele ya Kusungusha iya kwa Yehova

18, 19. Ni mu nshila nshi imibele ya kwa Yehova imulekanya ukufuma kuli balesa ba bufi?

¹⁸ Ukukanapala utulubi twabulamo bumi, Yehova ni Lesa wa mweo, uulangisha imibele ya kusungusha. Wene e mibele ine ine iya kutemwa kabili “wa nkumbu kabili uusenamina, uukokolo kukalipa, kabili uwafulisho luse.” (Ukufuma 34:6; 1 Yohane 4:8) Fintu apusana na Moleke lesa wa bunkalwe uwa bena Kanaani, ku untu abana bapeelwe lambo! Catubululwa ukuti ici cipasho ca kwa lesa cakwete imimonekele ya muntu no mutwe wa kwa cilume wa ŋombe. Cacitwa lipoti ukuti akalubi kalikafiwe ukufika ku kukaba kwakashika ce, kabili abana bapooselwe mu maboko ya kako ayafunguluka, ukuwila mwi lungu lyalebilima pe samba. Lelo Yehova alibo wa kutemwa nga nshi kabili uwa nkumbu ica kuti imfundo ya malambo ya musango yo aya buntunse tayabalile nelyo fye ‘aima mu mutima wakwe.’—Yeremia 7:31.

¹⁹ Imibele ikalamba iya kwa Yehova na kabili isanshamo ubulungi bwapwililila, amano yashapelela, na maka yonse. (Amalango 32:4; Yobo 12:13; Esaya 40:26) Ni shani pa lwa milungu ya nshimi? Mu cifulo ca kubelesha ubulungi, balesa ba cina Babiloni na balesa banakashi baali aba cilandushi. Imilungu ya cina Egupti tayali fya kumwenako finenene ifya mano lelo yacitilwe icikope nge yakwete amabunake ya buntunse. Ico tacili ca kupapusha, apantu balesa ba bufi na balesa banakashi baliba fisabo fya bantunse “aba fye” abaitunga ukuba aba mano. (Abena Roma 1:21-23) Imilungu ya bena Greece mu kutunganishiwa yaumene akapi ka kulwishanya. Ku ca kumwenako, mu nshimi, Seu abomfeshe amaka yakwe bubi bubi pa kufumya pa cipuna ca bufumu wishi, Cronus, uwali nafumya mu maka wishi wine, Uranus. Mwandi lipaalo ukubombela no kulumbanya Yehova, Lesa wa mweo kabili uwa cine, uulangisha ukutemwa, ubulungi, amano, na maka ifyapwililika!

Yehova Awaminwa Ukulumbanishiwa kwa Ciyayaya

20. Milandu nshi Imfumu Davidi yapeele iya kulumbanishisha ishina lya kwa Yehova?

²⁰ Nga fintu Amalumbo ya Hallel yalanga, Yehova awaminwa ukulumbanishiwa kwa ciyayaya. Mu kupalako, lintu Davidi na bena Israele banankwe basangwilileko ku bukuule bwe tempele, asosele ku cinso ca lukuta ukuti: “Mube [abapaalwa, NW], mwe Yehova Lesa wa kwa Israele shifwe, umuyayaya umuyayaya. Fyenu, mwe Yehova, ubukulu na bumpalume no kuyemba no kupulama na bukatebebe, pantu conse icili mu muulu na pa nshi cenu; ubufumu bwenu, mwe Yehova, kabili mwalitumpuka mwabo mutwe kuli bonse! Kabili ubucindami no bukata fifuma kuli imwe, mwe Kateka wa bonse; mu kuboko kwenu muli amaka na bumpalume, kabili mu kuboko kwenu e muli ukukusha no kukosha bonse. E ico nomba, mwe Lesa wesu, ifwe tulemutootela, no kutashe shina lyenu ilyalumbuka.”—1 Imilandu 29:10-13.

21. Ukusokolola 19:1-6 kupeela bushininkisho nshi ubwa kulumbanishiwa kwa kwa Yehova ku milalo ya mu mulu?

²¹ Yehova na kabili akapaalwa no kulumbanishiwa ku ciyayaya mu myulu. Umutumwa Yohane aumfwile “bumba likalamba mu muulu” lileti: “[Lumbeni Jah, imwe mwe bantu!, NW], ipusukilo no bukata na maka fya kwa Lesa wesu, ico ifya bupingushi fyakwe fya cine kabili fya bulungami; pa kuti apingwile cilende mukalamba [Babiloni Mukalamba], uwalelufyanye calo ku bulalelale bwakwe, kabili alandwile umulopa wa basha bakwe ku minwe ya mwanakashi.” Na kabili batile: “Lumbeni Jah, imwe mwe bantu!” (NW) E fyacitile na “bakalamba amakumi yabili na bane ne fya mweo fine.” Ishiwi ukufuma mu cipuna ca bufumu lyatile: “Tondeni Lesa wenu amalumbo, mwe basha bakwe bonse, mwe bamutiina abanono na bakalamba.” Lyene Yohane alundileko kuti: “Naumfwile kwati lishiwi lye bumba likalamba, kwati lishiwi lya menshi ayengi, kabili kwati lishiwi lya fibulukutu fya mfula ifyakosa, lileti [Lumbeni Jah, imwe mwe bantu, pantu Yehova, NW] Lesa wesu wa maka yonse ateka.”—Ukusokolola 19:1-6.

22. Ni shani fintu Yehova akalumbanishiwa mu calo cipya cakwe icalaiwa?

²² Fintu cili icalinga ukuti imilalo ya mu mulu ilumbanye Yehova! Mu calo cipya cakwe icipaleme nomba, ababuushiwa aba bucishinka bakailunda kuli bakapusunsuka ba mpela ya iyi micitile mu kulumbanya Jah. Impili shalulubala shikatumpula imitwe ya shiko mu nyimbo sha kulumba kuli Lesa. Utupili twa mimonekele ya katapakatapa ne miti itwale fisabo fikemba isha malumbo shakwe. Pantu, icibumbwa conse icili ca mweo kabili icipema cikalumbanya ishina lya kwa Yehova mu kwankulana kukalamba ukwa Aleluya! (Ilumbo 148) Bushe ishiwi lyobe likomfwika muli ulo lukuta lwa buseko? Likomfwika nga ca kuti wabombela Jah muli bucishinka pamo na bantu bakwe. Ico cilingile ukuba e mifwaile yobe mu bumi, pantu ni ani uwaba nga Yehova Lesa wesu?

Kuti Waasuka Shani?

◻ Mulandu nshi ukulumbanya Yehova Lesa?

◻ Ni mu nshila nshi umo Yehova ashingalinganishiwako?

◻ Bushininkisho nshi bwabako ubwa kuti Yehova wa cililishi?

◻ Ni shani fintu Yehova apusanako ukufuma ku tulubi tushabamo mweo ne milungu ya bufi?

◻ Mulandu nshi twingasosela ukuti Yehova akapokelela ukulumbanya kwa ciyayaya mu mulu na pe sonde?

[Icikope pe bula 9]

Amalumbo ya Hallel yaimbilwe mu kati ka ca kulya ca ca Kucilila