‘Yalabilisha’

Icipandwa 8 ica Amapinda citendeka ne ci cipusho: “Bushe te Mano ayabilisha, no Mucetekanya uusansule shiwi lya uko?”a Ca cine, amano no mucetekanya fitwalilila ukubilisha, lelo fyalipusanako no mwanakashi cisenene uwendauka mu mfifi no kutepelesha amashiwi ya kubeleleka mu matwi ya mulumendo wapelwa amano uuli eka. (Amapinda 7:12) “Pa muulu apatumpuka pa mbali ya nshila, muli bakumba e mo yaiminina, ku mbali ya mpongolo, ku bwingililo bwa musumba, apa kwingilila pa miinshi e po yapundula.” (Amapinda 8:1-3) Ishiwi lyakosa ilya mano lilomfwika bwino sana mu fifulo fya cintubwingi—pa mpongolo, muli bakumba, na pa miinshi ya kwingilila mu musumba. Abantu kuti baumfwa ili shiwi ukwabula ubwafya no kwankulako.

Nani wingakaana ukuti amano ya bulesa ayaba mu Cebo capuutwamo ica kwa Lesa, Baibolo, yalasangwa ku bengi abafwaya ukuyanonka? Icitabo ca The World Book Encyclopedia citila: “Baibolo e citabo cibelengwa sana.” Cisosa no kuti: “Baibolo e citabo casabankanishiwa sana pa fitabo fyonse. Na kabili Baibolo yalipilibulwa imiku iingi, kabili mu ndimi ishingi, ukucila ifitabo fyonse.” Apo Baibolo iyakumanina atemwa iyakwata fye imbali shimo ilasangwa mu ndimi shikalamba ne shinono ukucila pali 2,100, ukucila pa mapesenti 90 aya bantu balikwata Icebo ca kwa Lesa, conse nelyo fye imbali shimo isha ciko mu lulimi balanda.

Inte sha kwa Yehova shilabilisha ubukombe bwa mu Baibolo mpanga yonse. Balicincila ukushimikila imbila nsuma iya Bufumu bwa kwa Lesa no kusambilisha abantu icine cisangwa mu Cebo ca kwa Lesa mu fyalo 235. Impapulo shabo ishilanda pali Baibolo, Ulupungu lwa kwa Kalinda, ulusabankanishiwa mu ndimi 140, na Loleni!, iipulintwa mu ndimi 83, lumo na lumo lulananishiwa ukucila pa mamilioni 20. Cine cine amano yalabilikisha mu fifulo fya cintubwingi!