Ifyo Mwingacita pa Kuti mu Lupwa Lwenu Muleba Insansa—Ulubali 2

Abana bupe ubo Yehova apeela abafyashi. Kabili enekela abafyashi ukulasunga bwino abana babo. Yehova alafunda abafyashi ifingabafwa ukukusha bwino abana. Na kabili alafunda abana ifyo bengacita pa kuti mu lupwa muleba insansa.

1. Finshi Yehova afunda abafyashi?

Yehova enekela abafyashi ukulatemwa abana babo no kulaba pamo nabo inshita iitali. Kabili afwaya abafyashi balecingilila abana babo ku fingabaletelela no kuti balebomfya amashinte ya mafunde ya mu Baibo pa kubasambilisha. (Amapinda 1:8) Yehova eba abafyashi abaume ukuti: “Pa [kukusha abana benu] . . . mulebakonkomesha ukulingana ne fyo Yehova afwaya.” (Belengeni Abena Efese 6:4.) Yehova alatemwa nga ca kuti abafyashi balekonka ifyo abeba ilyo balekusha abana babo, kabili alomfwa bwino nga tabalepeela abantu bambi umulimo wa kubakushishako abana.

2. Finshi Yehova aeba abana ukulacita?

Yehova eba abana ukuti: “Muleumfwila abafyashi benu.” (Belengeni Abena Kolose 3:20.) Nga ca kuti abana balecindika abafyashi babo no kulabomfwila, balalenga Yehova na bafyashi babo ukusekelela. (Amapinda 23:22-25) Yesu aleumfwila abafyashi bakwe ilyo ali umwaice. Nangu ca kuti ali uwapwililika, aleumfwila abafyashi bakwe kabili alebacindika.—Luka 2:51, 52.

3. Kuti mwacita shani pa kuti ulupwa lwenu lupalame sana kuli Lesa?

Nga muli bafyashi, ukwabula no kutwishika mulafwaya abana benu batemwa Yehova nga fintu mwamutemwa. Finshi mwingacita pa kuti abana benu batemwe Yehova? Abana kuti batemwa Yehova nga mulekonka ifyo Baibo ilanda ukuti: “Mulingile ukulasambilisha abana benu [amashiwi ya kwa Yehova], muleyalandapo ilyo mwikele mu mayanda yenu na lintu mule-enda mu musebo.” (Amalango 6:7) Ishiwi bapilibula ukuti “ukulasambilisha,” kuti lyapilibula no kuti ukubwekeshabwekeshapo. Nalimo mwalimona ukuti pa kuti abana bebukishe ifyo mulebasambilisha, kano mwabwekeshapo imiku iingi. Ili ilembo likoselesha abafyashi ukulasambilisha abana babo pali Yehova lyonse. Kuti cawama sana nga ca kuti cila mulungu aba mu lupwa baleshako inshita ya kusambilila ifya kwa Lesa capamo. Nangu ca kuti tamwakwata abana, na imwe bene kuti mwanonkelamo nga ca kuti muleshako inshita ya kusambilila Icebo ca kwa Lesa cila mulungu.

SAMBILILENI NA FIMBI

4. Muleba no kutemwa ilyo mulesambilisha abana benu

Taca-anguka ukusambilisha umwana. Bushe Baibo kuti ya-afwa shani abafyashi ukusambilisha abana? Belengeni Yakobo 1:19, 20, lyena lanshanyeni aya mepusho:

• Bushe abafyashi kuti balanga shani ukuti balitemwa abana babo ilyo balelanshanya nabo?

• Mulandu nshi abafyashi bashilingile ukusalapwila abana babo ninshi nabakalipa?a

5. Mulecingilila abana benu

Pa kucingilila abana benu, calicindama sana ukulalanshanya na cila mwana pa malyashi ya kulaala pamo ukwa mwaume no mwanakashi. Nalimo kuti muleumfwa insoni ukulanda nabo pa malyashi ya musango uyu. Tambeni VIDIO, lyena lanshanyeni amepusho yakonkapo.

VIDIO: Mulecingilila Abana Benu ku Fyabipa (2:58)

• Cinshi cilenga abafyashi bamo cilebakosela ukulanshanya na bana babo pa malyashi ya kulaala pamo ukwa mwaume no mwanakashi?

• Finshi abafyashi bamo bacita pa kulanshanya na bana babo pa malyashi ya kulaala pamo ukwa mwaume no mwanakashi?

Nga fintu Baibo yasobeele, icalo ca kwa Satana cileya cilebipilako fye. Belengeni 2 Timote 3:1, 13, lyena lanshanyeni ici cipusho:

• Ababifi bamo abo Baibo yalandapo mu cikomo 13 ni balya abacenda abana. Cinshi cacindamina ukuti abafyashi balesambilisha abana babo pa kulaala pamo ukwa mwaume no mwanakashi na pa fyo bengaicingilila ku bantu abacenda abana?

Bushe mwalishiba ici cishinka?

Inte sha kwa Yehova balapanga impapulo ishingafwa abafyashi ukusambilisha abana pa kulaala pamo ukwa mwaume no mwanakashi no kubacingilila ku bengabacenda. Ku ca kumwenako, moneni impapulo shakonkapo:

• Cingilileni Abana Benu (1:52)

• Sambilila Kuli Kasambilisha Mukalamba, icipandwa 10 na 32

• “Mulesambilisha Abana Benu pa Kulaalana” (Loleni! Na. 5 2016)

6. Mwe bana mulecindika abafyashi benu

VIDIO: Ifyo Wingacita pa Kuti Ulelanshanya Bwino na Bafyashi Bobe (2:19)

• Mulandu nshi cacindamina ukuti umwana aleba no mucinshi ilyo alelanshanya na bafyashi bakwe?

• Bushe umwana kuti alanga shani ukuti alacindika abafyashi bakwe ilyo alelanda nabo?

Belengeni Amapinda 1:8, lyena lanshanyeni ici cipusho:

• Finshi umwana afwile ukucita abafyashi bakwe nga bamweba ukucita fimo?

7. Mulepepa Yehova capamo ngo lupwa

Inte sha kwa Yehova balapaatulako inshita cila mulungu iya kupepela pamo ngo lupwa. Finshi mufwile ukucita ilyo muli pa mapepo ya lupwa? Tambeni VIDIO, lyena lanshanyeni amepusho yakonkapo.

VIDIO: Amafya na Mapaalo Yaba mu Kukwata Amapepo ya Lupwa (8:04)

• Finshi aba mu lupwa bafwile ukucita pa kuti balekwata Amapepo ya Lupwa lyonse?

• Finshi abafyashi bengacita pa kuti amapepo ya lupwa yalewama?—Moneni icikope icili pa ntendekelo ya lino isambililo.

• Cinshi nalimo icingalenga ulupwa lwenu lulefilwa ukukwata amapepo ya lupwa?

Mu nshiku sha bena Israele, Yehova ale-enekela indupwa ukulalanshanya Amalembo lyonse. Belengeni Amalango 6:6, 7, lyena lanshanyeni ici cipusho:

• Kuti mwabomfya shani ifyaba pali ili ilembo?

Ifyo mwingacita pa mapepo ya lupwa:

• Kuti mwapekanya ukulongana.

• Kuti mwabelenga no kulanshanya ilyashi lya mu Baibo ilyo ulupwa lwenu lwingatemwa.

• Nga mwalikwata abana abanono, kuti mwakopolola nelyo ukupulinta ifyo abana bengacita pa kusambilila ifyaba pa jw.org.

• Nga mwalikwata abana imisepela, kuti mwalanshanya nabo ifyaba pa cipande citila “Abacaice Bepusha Ukuti” icaba pa jw.org.

• Kuti mwapangako icangalo ca mu Baibo na bana benu.

• Kuti mwatambako vidio ya pa jw.org no kulanshanyapo.

IFYO MUSAMBILILE

Yehova afwaya abafyashi ukutemwa abana babo, ukulabasambilisha, no kulabacingilila. Abana nabo bafwile ukulacindika abafyashi babo no kulabomfwila. Kabili indupwa na sho balingile ukulakwata amapepo ya lupwa.

Ukupitulukamo

• Bushe abafyashi kuti basambilisha shani abana babo no kubacingilila?

• Bushe abana kuti balanga shani ukuti balacindika abafyashi babo?

• Busuma nshi bwaba mu kukwata amapepo ya lupwa cila mulungu?

ISHIBILENIPO NA FIMBI

Finshi abafyashi bengasambilisha abana babo ifyo bengabomfya nga bakula?

“Amasambililo 6 ayo Abana Balingile Ukusambilila” (Loleni! Na. 2 2019)

Belengeni ifyo Baibo ilanda ifingafwa abasunga abafyashi abakalamba.

“Finshi Baibolo Yalandapo pa Kusakamana Abafyashi nga Bakota?” (Icipande ca pa jw.org)

Tambeni vidio pa kuti mumone ifyo umwaume uushaishibe ifya kukusha bwino abana aishileba umufyashi umusuma.

Yehova Alitusambilishe Ifya Kukusha Abana Besu (5:58)

Moneni ifyo abafyashi abaume bengakosha bucibusa bwabo na bana babo abaume.

“Finshi Abafyashi Abaume Bengacita pa Kutwalilila Ukulaumfwana na Bana Babo Abaume?” (Ulupungu lwa kwa Kalinda, November 1, 2011)