Ukusaamikwa No Mupeto uwa Golde wa ku Kutwi

UKUFUMA ku kale, utupe twa golde twalicindeme pa mulandu wa mutengo no kuyemba kwa tuko. Ilyo aishileba cilolo mukalamba mu Egupti, Yosefe apokelele umunyololo wa golde uwa mu mukoshi ukufuma kuli Farao. (Ukutendeka 41:42) Rebeka apeelwe icipini ca golde na makoosa yabili aya golde, ifya mutengo amadola 1,400 (U.S.) mu ndalama sha nomba. (Ukutendeka 24:22) Ukwabulo kutwishika, ifi fya bupe fyapokelelwe mu kutasha e lyo no kufwalwa mu kusangalala.

Baibolo ilanda ulwa tupe twaumo mutengo twa cimpashanya utwakwato mutengo ukucila tulya Yosefe na Rebeka bafweleko. Amapinda 25:12 yatila: “Ngo mupeto wa golde wa ku kutwi kabili icisaamo ca golde uwalopolwa, e fyabo kwebaula kwa mano mu kutwi kwa uleumfwa.” Lintu impanda mano ilefunda ukushimpwa pa Cebo ca kwa Lesa ukucila pa fyo iletontonkanya, mu cine cine ninshi ilepeela ica bupe icaumo mutengo. Mulandu nshi? Pa mulandu wa kuti ukufunda kwa musango yu kufuma kuli Yehova umwine. Baibolo itwebo kuti: “Ukufunda kwa kwa Yehova wilakupata, we mwana wandi, nangu kutendwo kwebaula kwakwe; pantu untu Yehova atemwa e o ebaula, ifyo na wishi ebaulo mwana mwaume uo acankilwa.” (Amapinda 3:11, 12) Lintu kakutika mu kuicefya apokelela no kubomfyo kufunda, ali kwati aleisaamika no mupeto wa golde uwa ku kutwi. Cili nga fintu ipinda lyapuutwamo ilya mu Baibolo litila: “Alishuko muntu uusanga amano, no muntu uumono mucetekanya; pantu ukusanduluka kwa yako kwawamo kucilo kwa silfere, ne cibwesha ca yako cawamo kucila golde.”—Amapinda 3:13, 14.