Tetekela Yehova!

“Tetekela Yehova umutima obe onse.”—AMAPINDA 3:5.

 1. Ni shani fintu Amapinda 3:5 yaebekeshe umulumendo umo, kabili mu kuba na fya kufumamo nshi ifya nshita ntali?

MISHONARI umukokole umo alembo kuti: “‘TETEKELA SHIKULU UMUTIMA OBE ONSE; KABILI WISHINTILILA KU KWILUKA KOBE WE MWINE.’ Ayo mashiwi ukufuma muli Baibolo, ayabikilwe mwi fremu kabili ayakobeme ku cibumba ca ŋanda natandalile, yacebwishe ukusakamana kwandi. Inshita yonse iyasheleko kalya kasuba nalelanguluka pali yene. Bushe ine, e fintu naipwishe ne mwine, kuti natetekela Lesa no mutima wandi onse?” Uyu muntu pali iyo nshita aali ne myaka ya bukulu 21. Nomba pa myaka ya bukulu 90 kabili acili alebomba mu busumino nga eluda mu Perth, Australia, kuti alolesha ku numa pa bumi bwanonshiwa ku fisabo fya kutetekela Yehova umutima onse, ukusanshako imyaka yakakala 26 iya kupansa amabala ya bumishonari yapya mu Ceylon (iili nomba Sri Lanka), Burma (iili nomba Myanmar), Malaya, Thailand, India, na Pakistan.a

 2. Kucetekela nshi Amapinda 3:5 yalingile ukukuula muli ifwe?

² “Tetekela Yehova umutima obe onse”—aya mashiwi ya pa Amapinda 3:5, nga fintu yapilibulwa muli Baibolo wa Cibemba, yalingile ukukunta ifwe bonse ukutwalilila ukupeela ubumi bwesu no mutima onse kuli Yehova, ukucetekela ukuti akakosha icitetekelo cesu, nelyo fye ukufika ku cipimo ca kucimfya ifipindami fyaba ngo lupili. (Mateo 17:20) Lekeni nomba tubebete Amapinda 3:5 mu mashiwi ya yako ayashingulukako.

Ukufunda kwa Buwishi

 3. (a) Kukoselesha nshi kuli no kusangwa mu fipandwa pabula ifya kubalilapo ifya Amapinda? (b) Mulandu nshi tulingile ukupeelelako ukusakamana ku Amapinda 3:1, 2?

³ Ifipandwa fya kwiswila pabula ifye buuku lya Baibolo ilya Amapinda fyaisulamo ukufunda kwa buwishi, ukufunda kwa mano ukufuma kuli Yehova kuli bonse abalolesha ku ntanshi ku kuipakisha ubwana mu myulu nelyo “ubuntungwa bwa bukata bwa bana ba kwa Lesa” pe sonde lya paradise. (Abena Roma 8:18-21, 23) Uku kwaba kufunda kwa mano uko kwingabomfiwa na bafyashi mu kukusha abana baume na bana banakashi. Ukwapulamo kuli kupanda amano kwa Amapinda icipandwa 3, iciswila no kusoka kwa kuti: “We mwana wandi, wilaba amalango yandi, na mafunde yandi leko mutima obe uyalinde.” Ilyo inshiku sha kulekelesha isha calo cibifi ica kwa Satana shilesela ukulola kuli kapeleko wa shiko, shi ifwe bonse natulepeepekako ku fya kucinkulako fya kwa Yehova. Inshila kuti pambi yamoneke yalepa, lelo ubulayo kuli bonse abashipikisha bwa kuti ‘ukutantalila kwa nshiku, ne myaka ya mweo, no mutende fikalundwako kuli iwe’—ubumi bwa ciyayaya mu micitile ipya iya kwa Yehova.—Amapinda 3:1, 2.

4, 5. (a) Kwampana nshi ukwa nsansa ukwalondololwa pali Yohane 5:19, 20? (b) Ni shani fintu ukufunda pa Amalango 11:18-21 kubomba ukutentemuka ukufika mu kasuba kesu?

⁴ Ukwampana kwa nsansa pa kati ka kwa wishi no mwana mwaume kuti kwaba ukwa mutengo nga nshi. Kalenga wesu, Yehova Lesa, atantike ukuti e fyo cileba. Kristu Yesu asosele ulwa kwampana kwakwe kwine kwabamo isenge na Yehova ukuti: “Umwana te kuti acite kantu eka, kano ico amona Wishi acita; pantu ifyo wene acita, e fyo no Mwana acita ifyo fine. Pantu Wishi atemwo Mwana, kabili amulanga fyonse ifyo umwine acita.” (Yohane 5:19, 20) Imifwaile ya kwa Yehova yali ya kuti isenge lyapalako lilingile ukubapo pa kati ka wene no lupwa lwakwe lonse pe sonde, na pa kati ka bashibo ba buntunse na bana babo.

⁵ Ukwampana kwa mu lupwa kwabamo ukucetekela kwalikoseleshiwe mu Israele wa pa kale. Yehova afundile bashibo kulya ukuti: “Mulebake fyebo fyandi ifi ku mitima yenu na ku myeo yenu; mulefikaka ku kube ciishibilo pa minwe yenu, kabili ku kube mpeneno pa kati ka menso yenu. Mulefisambilisha abana benu, ukufisosa pa kwikala mu mayanda yenu, na pa kwenda mu nshila, kabili pa kulaala na pa kubuuka. Mulefilemba pa filu fya pa miinshi fya mayanda yenu, na mu mpongolo shenu: ku kuleka shifule inshiku shenu, ne nshiku sha bana benu, mu mpanga iyo Yehova alapile kuli bashinwe ku kupeela kuli bene, umwabele nshiku apo umuulu wakupama pa calo.” (Amalango 11:18-21) Icebo capuutwamo ica kwa Kafundisha wesu Uwakulisha, Yehova Lesa, mu cine cine kuti caafwa ku kusuntinkanya wene mu kubamo isenge na bafyashi na bana babo, pamo pene na kuli bonse bambi ababombela wene mu cilonganino ca Bwina Kristu.—Esaya 30:20, 21.

 6. Ni shani twingasanga ububile kuli Lesa no muntu?

⁶ Ukupanda amano kwalamuka ukwa buwishi ku bantu ba kwa Lesa, abakalamba na banono, kulatwalilila mu fikomo 3 na 4 ifya Amapinda icipandwa 3 ukuti: “Wileka luse [“icikuuku ca kutemwa,” NW] ne cishinka fikutaluke, fikake mu mukoshi obe (filembe pa cipampa ca mutima obe); e fyo ukasango bubile no kushilimuka kusuma mu menso ya kwa Lesa na ya bantu.” Yehova Lesa umwine alipulamo mu kulangisha icikuuku ca kutemwa ne cishinka. Nga fintu Ilumbo 25:10 lilondolola, “monse umwendela Yehova luse [“cikuuku ca kutemwa,” NW] ne cishinka.” Mu kupashanya Yehova, tulingile ukukatamika iyi mibele na maka ya iko aya kucingilila, ukuimona iya mutengo nga fintu twingamona umunyololo wa mu mukoshi uwa mutengo no kuifwatika pa mitima yesu. Mu mukoosha, lyene, kuti twapepa atuti: “Mwe Yehova, . . . lekeni uluse [“icikuuku cenu ica kutemwa,” NW] lwenu ne cishinka cenu fininde pe.”—Ilumbo 40:11.

Ukutetekela Kwatwalilila

 7. Ni mu nshila nshi Yehova alangishishamo ifyo kuti atetekelwa?

⁷ Ishiwi lya ciNgeleshi ilyapilibulwa ukutetekela lilondololwa muli Webster’s Ninth New Collegiate Dictionary nga “ukushintilila kwaebekeshiwa pa mibele, amaka, ubukose, nelyo icishinka ca umo nelyo icintu cimo.” Imibele ya kwa Yehova yaikashiwa mu kukosa mu cikuuku cakwe ica kutemwa. Kabili kuti twakwata ukucetekela kwakumanina mu maka yakwe aya kucita cintu alaya, pantu ishina lyakwe line, Yehova, limwishibisha nga kapanga mukalamba uwa Mifwaile. (Ukufuma 3:14; 6:2-8) Pamo nga Kalenga, e Kamfukumfuku ka bukose na maka ayengi. (Esaya 40:26, 29) E ca kumwenako cine ica cishinka, pantu ‘Lesa tengabepa.’ (AbaHebere 6:18) E co, twalikoseleshiwa ukubika ukutetekela kwesu ukwakumanina muli Yehova, Lesa wesu, Intulo ikalamba iya cine conse, uwakwata amaka yapulamo ku kucingilila abamutetekela no kuleta imifwaile yakwe yonse iikalamba ku kutunguluka kwabamo ubukata.—Ilumbo 91:1, 2; Esaya 55:8-11.

 8, 9. Mulandu nshi ukucetekela kwabulila apakalamba mu calo, kabili ni shani fintu abantu ba kwa Yehova bapayanya ukupusana?

⁸ Mu calo cabotelela icatushinguluka, ukucetekela kwalibula apakalamba. Mu cifulo ca ico, tumona ubufunushi no kubosha mpanga yonse. Inkupo ya pa ntanshi iya magazini wa World Press Review uwafumine uwa May 1993 yakwete ubukombe bwamonekesha ubwa kuti “UKUTEMFUMA KWA KUBOSHA—Indalama sha Fiko mu Muyano Upya uwa Calo. Ukubosha kwatanunuka ukufuma ku Brazil ukufika ku Germany, ukufuma ku United States ukufika ku Argentina, ukufuma ku Spain ukufika ku Peru, ukufuma ku Italy ukufika ku Mexico, ukufuma ku Vatican ukufika ku Russia.” Apantu cashimpwa pa lupato, ubufunushi, no kubulwo kutetekela, ico umuntu eta umuyano upya uwa calo cilelobolwela umutundu wa muntu amalanda.

⁹ Ukupusana ne nko sha bupolitiki, Inte sha kwa Yehova baliba aba nsansa ukuba “uluko ulo Yehova e Lesa wa luko.” Ni bene beka fye e bengasosa mu cishinka ukuti, “Lesa e o twatetekela.” Umo umo uwa bene kuti aaula mu buseko ati: “Muli Lesa e mo ntashishe cebo cakwe; . . . Lesa e o natetekela, nshatiine.”—Ilumbo 33:12; 56:4, 11.

10. Cinshi cakosha Abena Kristu bacaice abengi ukusungilila bumpomfu?

¹⁰ Mu calo ca mu Asia umo amakana ya Nte shacaice shapita mu kupumwa kwatapata no kubikwa mu fifungo, ukutetekela Yehova kwalipeela icinabwingi amaka ya kushipikisha. Inshita ya bushiku imo mu cifungo, Nte wacaice uwali napita mu kulungulusha kwabipisha ayumfwile ukuti taali na kushipikisha na kabili. Lelo umusepela umbi walishile cinshinshi kuli wene mu mfifi. Atepeleshe ati: “Winenuka; ine nalisuuswike kabili ukutule lyo nshatala nkwata umutende wa muntontonkanya.” Uyu musepela uwaebelwe fyo walibukulwile ukupingulapo kwa uko ukwa kwiminina uwashangila. Kuti twakwata ukutetekela kwakumanina muli Yehova ukuti akatwaafwa ukucimfya ukubombesha ukuli konse kabili konse kwine ukwa kwa Satana ku kukubulula bumpomfu bwesu.—Yeremia 7:3-7; 17:1-8; 38:6-13, 15-17.

11. Ni shani fintu tucilimushiwa ukutetekela Yehova?

¹¹ Ifunde lya kubalilapo lubali libelengwa ukuti: “Uletemwa [Yehova, NW] Lesa obe ku mutima obe onse.” (Marko 12:30) Ilyo tuleetetula pa Cebo ca kwa Lesa, icine cawamisha ico tulesambilila cilatotobela mu kushika ukwingila mu mutima wesu ica kuti tulakuntwa ukuyobeka mu kukumanina mu mulimo wa kwa Lesa wesu uwa kusungusha, Shikulu Mulopwe Yehova. Ni pa kuba no mutima uusempaukamo ukutasha kuli wene—pali fyonse ifyo atusambilisha, ifyo atucitila, kabili fintu ali no kutucitila—e citucincimusha ku kutetekela mu kupususha kwakwe mu kukumanina.—Esaya 12:2.

12. Mu kupita kwa myaka, ni shani fintu Abena Kristu abengi balangisha ukutetekela Yehova kwabo?

¹² Uku kutetekela kuti kwalundululwa mu kupita kwa myaka. Inte ya kwa Yehova uwaicefya uwabombele mu busumino pa myaka 50 pa cishinte cikalamba ica Watch Tower Society mu Brooklyn, ukutula mu April 1927, alembele ukuti: “Pa mpela ya ulya mweshi napokelele alawansi wa $5.00 uwaisalilwe muli enifulupu mu kuba na kardi uwayemba uwakwetepo ilembo lya mu Baibolo ilya Amapinda 3:5, 6 . . . Kwali imilandu iyafulisha iya kutetekela Yehova, pantu pa cishinte mu kwangufyanya naishiletesekesha ukuti Yehova alikwata ‘umusha wa cishinka kabili uwashilimuka’ uusakamana amabuseko ya Bufumu yonse pano pe sonde mu busumino.—Mateo 24:45-47.”b Umutima wa uyu Mwina Kristu waimikwe, te pa kutemwe ndalama, lelo pa kunonka “icuma ca mu muulu icishipwa.” Mu musango umo wine ilelo, amakana ababomba pa mayanda ya Bethel aya Watch Tower Society ukushinguluka isonde bacite fyo pe samba lya mulapo wa bupiina uwa mwi funde. Batetekela Yehova ukubapayanishisha ukukabila kwabo ukwa cila bushiku.—Luka 12:29-31, 33, 34.

Shintilileni Pali Yehova

13, 14. (a) Ni kwi kweka ukwingasangwa ukupanda amano kwakosoka? (b) Cinshi cifwile ukusengaukwa nga tuli no kupusunsuka ukupakaswa?

¹³ Shifwe wa mu muulu atukonkomesha ati: “Ku kwiluka kobe we mwine wishintililako.” (Amapinda 3:5) Impanda mano sha ku calo na baishibisha ifya mintontonkanya tabakatale abafika ku mano no kwiluka ifyo Yehova alangisha. “Umucetekanya wakwe wabulwe mpendwa.” (Ilumbo 147:5) Ukucila ukushintilila pa mano ya baume balumbuka aba ku calo nelyo pa nkuntu shesu shine ishishaebwa bwino, lekeni tulelolesha kuli Yehova, Icebo cakwe, na baeluda mu cilonganino ca Bwina Kristu ku kupanda amano kwakosoka.—Ilumbo 55:22; 1 Abena Korinti 2:5.

¹⁴ Amano ya buntunse nelyo cilumba pa mulandu wa cifulo ca umo tafyakatwafwe mu bushiku bwa ca kwesha catapata ubulepalamina lubilo lubilo. (Esaya 29:14; 1 Abena Korinti 2:14) Mu Japan mu kati ka Nkondo ya Calo iya II, kacema wafikapo lelo uwa cilumba uwa bantu ba kwa Lesa asalilepo ukushintilila pa kwiluka kwakwe umwine. Pe samba lya kutitikisha abele umusangu, kabili impaanga na sho ishafulilako shalishimine pe samba lya kupakaswa. Nkashi wa bucishinka umwina Japan, uyo mu bukose uwapusunswike ukusungwa buluku buluku mu miputule ya cifungo iya busali, alandilepo ukuti: “Abo abatwalilile aba busumino tabakwete ukulamuka kwaibela kabili tabaali abalumbuka. Mu kushininkisha ifwe bonse tufwile ukutetekela Yehova imitima yesu yonse.”c

15. Mibele nshi iya bukapepa yaba iyakabilwa nga tuli no kutemuna Yehova?

¹⁵ Ukutetekela Yehova, ukucila ukwiluka kwesu kwine, kusanshamo ukuicefya. Fintu iyi mibele yaba iyakatama kuli bonse abafwaya ukutemuna Yehova! Pantu, nelyo fye ni Lesa wesu, nangula cingati ni Shikulu Mulopwe uwa kubumbwa konse, alangishe ukuicefya mu kubomba kwakwe no bubumbo bwakwe ubwa mucetekanya. Kuti twaba aba kutasha pali ico. “Alolesesha apatali pa myulu na pe sonde. Emyo mulanda mu lukungu.” (Ilumbo 113:6, 7) Pa mulandu wa nkumbu shakwe ishikalamba, alatulekelela amabunake yesu pa citendekelo ca bupe bwakwe ubwakulisha ku mutundu wa muntu, ilambo lya cilubula ilyaumo mutengo ilya Mwana wakwe uwatemwikwa, Kristu Yesu. Fintu tulingile ukuba aba kutasha pali ici cikuuku ca pa fye!

16. Ni shani fintu bamunyina pambi bengatinamina ifishingamo mu cilonganino?

¹⁶ Yesu umwine wine atucinkulako ukuti: “Uuntu aisansabika akacendwa, no untu aicenda akasansabikwa.” (Mateo 23:12) Mu kuicefya, bamunyina babatishiwa balingile ukutinamina ifishingamo mu cilonganino ca Bwina Kristu. Nalyo line, bakangalila balingile ukumona ukusontwa kwabo, te pamo nge cifulo ca kwishibikilwako, lelo nge shuko lya mu nshita ku kubomba umulimo, mu kuicefya, mu kutasha, mu kuswatuka, nge fyacitile Yesu, uwatile: “Tata acili alebomba, na ine ndebomba.”—Yohane 5:17; 1 Petro 5:2, 3.

17. Cinshi ifwe bonse tulingile ukutesekesha, ukutungulula ku mibombele nshi?

¹⁷ Shi lyonse mu kuicefya kabili mu kubamo ipepo tuletesekesha ukuti mu menso ya kwa Yehova tuli lukungu fye. Fintu twingaba aba buseko lyene, ukuti “Uluse [“icikuuku ca kutemwa,” NW] lwa kwa Yehova lwafumo muyayaya no kuyo muyayaya, no bulungami bwakwe buya ku bana ba bana”! (Ilumbo 103:14, 17) Ifwe bonse tulingile kanshi ukuba abasambi ba Cebo ca kwa Lesa abaswatuka. Inshita ipooswa mwi sambililo lya pa lwesu ne lya lupwa, na mu kulongana kwa cilonganino, ilingile ukuba pa kati ka maawala yesu ayaumisho mutengo cila mulungu. Muli iyi nshila tulakuulo “kwishiba Uwa mushilo.” Uyo “e mucetekanya.”—Amapinda 9:10.

“Uko Konse Wenda . . .”

18, 19. Ni shani pambi twingabomfya Amapinda 3:6 mu bumi bwesu, kabili mu kuba ne fya kufumamo nshi?

¹⁸ Ukututungulula kuli Yehova, Intulo ya bulesa iya kwiluka, Amapinda 3:6 mu kukonkapo yalondololo kuti: “Uko konse wenda umwishibe, na o akatambalike nshila shobe.” Ukwishiba Yehova kusanshamo ukupalamina kuli wene mwi pepo. Uko konse pambi twingaba kabili te mulandu ne mibele iingemako, kuti twafika kuli wene apo pene mwi pepo. Ilyo tulebomba imilimo yesu iya cila kasuba, ilyo tulepekanishisha umulimo wa mwi bala, ilyo tuleya ku ŋanda ne ŋanda ukubilisha Ubufumu bwakwe, ipepo lyesu ilya lyonse kuti lyaba ilyo ilya kuti apaale imibombele yesu. Muli ifyo, kuti twakwata ishuko lishingapimwa no buseko ubwa ‘kwenda na Lesa,’ ukucetekela ukuti ‘akatambalike nshila shesu,’ nga fintu acitile kuli Enoke utiina Lesa, Noa, na bena Israele ba busumino, pamo nga Yoshua na Daniele.—Ukutendeka 5:22; 6:9; Amalango 8:6; Yoshua 22:5; Daniele 6:23; moneni na kabili Yakobo 4:8, 10.

¹⁹ Lintu twalenga ukupaapaata kwesu ukwishibikwa kuli Yehova, kuti twacetekela ukuti ‘umutende wa kwa Lesa uwapulamo mu kwiluka konse, wakulalinde mitima yesu na mapange yesu muli Kristu Yesu.’ (Abena Filipi 4:7) Uyu mutende wa kwa Lesa, uubelebeshiwa ku mpumi ya buseko, kuti watasha ubukombe bwesu ku bene mayanda abo tukumanya mu kati ka mulimo wesu uwa kushimikila. (Abena Kolose 4:5, 6) Na kabili kuti wakoselesha abo pambi abapumwa no kukanshika nelyo ulumanimani ifyaseeka mu calo ca lelo, nga fintu ubulondoloshi bwakonkapo bulelanga.d

20, 21. (a) Mu kati ka kululunkanya kwa ciNazi, ni shani fintu bumpomfu bwa Nte sha kwa Yehova bwakoseleshe bambi? (b) Kupingulapo nshi ishiwi lya kwa Yehova lilingile ukubalamuna muli ifwe?

²⁰ Max Liebster, umuYuda ku cifyalilwa uyo ku camoneke nge cipesha amano apusunswike Akayofi ka ciNazi, alondolwele ulwendo lwakwe ukuya ku nkambi ya kufitilamo iya ciNazi muli aya mashiwi: “Twakomenwe mu matolokoshi ayasangwilwe imiputule ya fifungo iyacepesha ku kwikalamo abantu babili. Ilyo napantilwe ukwingila muli limo ilya yene, nalolenkene no mufungwa uyo amenso yakwe yabelebeshe umutalalila. Ali mulya pa mulandu wa mucinshi wakwe kwi funde lya kwa Lesa, ukusalapo ukubikwa mu cifungo nangu fye imfwa ukucila ukusuumyo mulopa wa bantu bambi. Aali ni umo uwa Nte sha kwa Yehova. Abana bakwe baali nabasendwa ukufuma kuli wene, kabili umukashi wakwe aali naputunkanishiwa. Aleenekela impela imo ine. Ulwendo lwa nshiku 14 lwaletele icasuko ku mapepo yandi, pantu cali ni pali ulu lwendo lwine ulwa kuya ku mfwa e lintu nasangile isubilo lya bumi bwa muyayaya.”

²¹ Pa numa ya kupita mu Auschwitz, intu aitile “ininga ya nkalamo,” no kubatishiwa, uyu munyina aupile umo uwa Nte sha kwa Yehova uyo uwabikilwe mu cifungo na o wine kabili uo wishi aculile mu nkambi ya kucushiwilwamo pa Dachau. Ilintu wishi aali kulya, aumfwile ukuti umukashi wakwe no mwana mwanakashi wakwe munono baliketwe. Alondolwele ukwankulako kwakwe ukuti: “Nalisakamikwe cibi. Lyene kasuba kamo ilintu natantamine ukuya ku kusamba, naumfwile ishiwi lileambula Amapinda 3:5, 6 . . . Lyaumfwike nge shiwi lileika ukufuma ku muulu. E cintu fye nalekabila ku kupuupuutula ukushikimana kwandi.” Na kuba, ishiwi lyali lya mufungwa umbi uwaleambula ili lembo, lelo ici ca kucitika cebekesha amaka ayo Icebo ca kwa Lesa cingakwata pali ifwe. (AbaHebere 4:12) Shi ishiwi lya kwa Yehova nalilelanda na maka kuli ifwe ilelo ukupitila mu mashiwi ye Lembo lyesu ilya mwaka wa 1994 aya kuti: “Tetekela Yehova umutima obe onse”!

[Amafutunoti]

Mu Kusupawila

◻ Kufunda kwa musango nshi kwapeelwa mu Amapinda?

◻ Ni shani fintu ukutetekela Yehova kutunonsha?

◻ Cinshi casanshiwamo mu kushintilila pali Yehova?

◻ Mulandu nshi tulingile ukwishibila Yehova uko konse twenda?

◻ Ni shani fintu Yehova atambalike nshila shesu?

[Ifikope pe bula 15]

Ubukombe bwa Bufumu ubwa buseko bulacebusha abantu ba mitima ya bufumacumi