Ifipusho Ukufuma ku Babelenga

◼ Kufunda nshi ukwa kutendekelako uko Amapinda 27:23 kuletambika kuli bakacema ba bumupashi na ku Bena Kristu mu cinkumbawile?

Icikomo cibelengwo kuti: “Sakamano kwishiba ifyo umukuni obe uli, biko mutima obe pa maombe yobe.” (Amapinda 27:23) Ili lembo lyalibomfiwa ilingi line ku kukoselesha bakacema ba bumupashi ku kulangisha ubuseko mu no kuba ababeleshanya ne mibele ne mpika sha Bena Kristu mu cilonganino. Ukukoselesha kwa musango uyo kuli ukwalinga, apantu Baibolo ipashanya baeluda kuli bakacema ne cilonganino ku mukuni wa mpaanga. (Imilimo 20:28, 29; 1 Petro 5:2-4) Nalyo line, nangula ni fyo icishinte cili pa mulu cilabomba, ici cikomo tacili mu kutendekelako pa lwa bakacema ba bumupashi.

Ibuku lya Amapinda lyabamo ifikomo ifingi ifyo fyaba fyeka ngo bulondoloshi bwaisulamo ubupilibulo ubwa kufunda, lelo Amapinda 27:23 yaba lubali lwe bumba lya fikomo: “Sakamano kwishiba ifyo umukuni obe uli, biko mutima obe pa maombe yobe; pantu ifyuma te fya muyayaya, ne fya mu cipao te fya ku nkulo ne nkulo. Ilyo cafumapo icani icauma, pamenapo ne citeku, no mulemfwe wa mu mpili walonganikwa, e lyo abana ba mpaanga bakabelapo ukufwala kobe, ne mbushi shikabo mutengo wa cilime, ne shiba lya mbushi likakumana ku cilyo cobe, na ku kulela abakashana bobe.”—Amapinda 27:23-27.

Ici cipande capuutwamo cilumbanya ukukwata umusango wa bumi ubwaishibikilwa ku mukoosha, ukubombesha, ukwanguka, no kwishiba ukushintilila kwesu pali Yehova. Cicite ci pa kwebekesha ubumi bwa bucemi ubwa kwa kacema umwina Israele, nakalimo mu kucilana no bumi bwa maliila ubwashimpwa pa fyakushitisha fya bukwebo ne cuma canonkwa lubilo lubilo.

“Icuma,” nelyo ifikwatwa ifinonkwa mu ncitilo sha bukwebo isha mu kwangufyanya, mu kuba no kulumbuka kufumamo (“amaka ya cifumu”), mu kwanguka kuti fyaluba, nga fintu abengi bengacitila ubunte. Kuliko muli ifyo ifingi ifili no kulandwa ku bumi bwayanguka, ukupala bulya ubwakonkelwe na bakacema ba pa kale mu kusakamana ifitekwa. Ilya nshila ya bumi tayali iyayanguka mu mano ya kuba iishasakamikwa. Kacema alekabila ukuba uubikako ukusakamana ku mukuni wakwe, ukushininkisha ukuti impaanga shalecingililwa. (Ilumbo 23:4) Nga ca kuti, mu kushipeela ukusakamana, asangile impaanga iyalwala nelyo iyacenwa, kuti pambi aisuba na mafuta yatalalika. (Ilumbo 23:5; Esekiele 34:4; Sekaria 11:16) Mu milandu iingi kacema wa mukoosha uwabikile umutima wakwe pa maombe yakwe kuti amona ukubombesha kwakwe kuleletako ifya kufumamo—ukwingilishiwako kwa panono panono ukwa mukuni wakwe.

Kacema ubombesha kabili usakamana akwete intulo yashintililwapo iya kwaafwa—Yehova. Ni shani ifyo? Cisuma, Lesa apayanya ifipande fya mwaka no kushinguluka ififumamo lyonse umulemfwe uwingi ifingaliisha umukuni. (Ilumbo 145:16) Lintu, mu kuba no kwaluka kwa fiputulwa fya mwaka, umulemfwe wa katapakatapa wauma ku fitungu fya mwi samba, kuti waba uwingi ku ncende sha pa mulu, uko kacema wasakamana engasesesho mukuni wakwe.

Amapinda 27:26, 27 yalumbula icakufumamo cimo ica kucula kwa musango uyo—ifya kulya ne fya kufwala. Ca cine, ubulondoloshi tabuli bwa fya kulya fyaumo mutengo nelyo umwangashi waumo mutengo, kabili tafipeela umubomfi umulandu ku kwenekela ifya kufwala mu mipangilwe ipya nelyo insalu yawamisha. Lelo nga ca kuti aali uwaitemenwa ukubikako ukubombesha, kacema no lupwa lwakwe kuti banonka ukufuma ku mukuni umukaka (na muli ifyo cisi), pamo pene no bushishi ku kubililako ifya kufwala fyakosa.

E co ukupanda amano kwa kuti: “Sakamano kwishiba ifyo umukuni obe uli” te kwa bakangalila ba bumupashi ukucilisha; kwaba kwa Bena Kristu bonse. Kwebekesha ukukatama kwa kuba kwesu abaikushiwa ne fya kulya ne fya kufwala ifyanonkelwa mu mulimo washikatala, uwa mukoosha, ukucetekela ukuti Lesa takatulekeleshe. (Ilumbo 37:25; 1 Abena Tesalonika 3:8, 12; AbaHebere 13:5) Ukulinganya Amapinda 27:23-27 no kufunda pali Luka 12:15-21 na 1 Timote 6:6-11, twamone fyo ukufunda kwa kwa Lesa kwaba ukwaumfwana pali uyu mulandu. E co umo umo uwa ifwe kuti pambi abelenga cipya cipya Amapinda 27:23-27, ukuipusha ukuti, ‘Bushe ndebike fi ku mutima no kufibomfya mu bumi bwandi ubwa cila bushiku?’

[Abatusuminishe Ukubomfya Icikope pe bula 31]

Pictorial Archive (Near Eastern History) Est.