Amapinda 3:5, 6—“Wilaaesha Kulaateetekela Maano Yoobe Iyoo”

“Tetekela Yehova no mutima obe onse kabili wishintilila pa mano yobe we mwine. Uko konse wenda umwishibe, na o akatambalika inshila shobe.”—Amapinda 3:5, 6, Amalembo ya Calo Cipya.

“Uleeteetekela Imfumu Leesa noomutima oobe onse, wilaaesha kulaateetekela maano yoobe iyoo. Lyonsefye ilyo uleecitapo cimo, uleeibukisha Imfumu Leesa, nao aakulaakulanga umusango wakucicitilamo.”—Amapinda 3:5, 6, Bible wa Mushilo.

Ilyo tulepingula pa fintu ifyacindama, tufwile ukuleka Yehovaa Lesa ukututungulula.

“Tetekela Yehova no mutima obe onse.” Tulanga ukuti twalicetekela Lesa nga tulecita ifintu ukulingana ne fyo afwaya. Tufwile ukucetekela Lesa, no mutima wesu onse. Mu Baibolo ishiwi lya kuti umutima lilosha ku fyo umuntu aba, ifyo omfwa pa fintu, ifilenga alefwaya ukucita ifintu fimo, ifyo atontonkanyapo, e lyo ne misango yakwe. Kanshi ukucetekela Lesa no mutima wesu onse te kulanda fye ukuti nalimucetekela. Lelo tuisalila fye fwe bene ukumucetekela pantu twalicetekela umupwilapo ukuti Kabumba wesu e waishiba ifingatuwamina.—Abena Roma 12:1.

“Wishintilila pa mano yobe we mwine.” Tufwile ukucetekela Lesa pantu te kuti tushintilile pa mano yesu apo tatwapwililika. Nga twashintilila pa mano yesu nelyo nga tulekonkelela fye ifyo tulefwaya, kuti twalasala ukucita ifintu ifilemoneka kwati fili fye bwino pa kubala lelo ifingatuletelela ku ntanshi. (Amapinda 14:12; Yeremia 17:9) Lesa alikwata sana amano ukutucila. (Esaya 55:8, 9) Nga tulecita ifintu ukulinga ne fyo Yehova afwaya tukaba ne nsansa.—Amalumbo 1:1-3; Amapinda 2:6-9; 16:20.

“Uko konse wenda umwishibe.” Tufwile ukwishiba ifyo Lesa amona ifintu muli fyonse ifyo tucita e lyo na muli fyonse ifyacindama ifyo tusalapo. Kuti twacita ifi nga tulepepa, ukulomba Yehova ukuti atwafwe no kukonka ifyo alanda mu cebo cakwe Baibolo.—Amalumbo 25:4; 2 Timote 3:16, 17.

“Na o akatambalika inshila shobe.” Lesa alatambalika inshila shesu ilyo aletwafwa ukwikala ukulingana na mafunde yakwe ayalungama. (Amapinda 11:5) Ici cilenga twilacita ifintu ifingalenga twaba na mafya, no kulacita ifingalenga twaba ne nsansa.—Amalumbo 19:7, 8; Esaya 48:17, 18.

Mwi buuku lya Amapinda mwaba amashinte ya mafunde ayatwafwa ukuba ne nsansa ukulingana na fintu Lesa afwaya. Amashiwi yaba mu fipandwa fya kubalilapo 9 yalembwa kwati mufyashi umwaume uulepanda amano umwana wakwe umwaume uo atemwa. Icipandwa 3 cilangilila ubusuma bwaba mu kukonka amano ayafuma kuli Kabumba wesu.—Amapinda 3:13-26.