“Ukupola ku Mubili Obe”

ABANTU batila amalwele ayafula ku bantu yatendeka no kukanshika kwa nkuntu pamo nga ukusakamikwa, ubulanda, akafindwe, ukukalifiwa, ulupato, no kulaumfwa uwa mulandu. Pa mulandu wa ici, ifyo yasansamusha amashiwi ya mu Baibolo ayatila ‘akatiina ka kuli Yehova’ kaba “kupola ku mubili [“mutoto,” mu ciHebere ca pa kale] obe, no kupembuka ku mafupa yobe”—Amapinda 3:7, 8.

Amafupa e yatungilila umubili onse. E co, Baibolo ibomfya ishiwi “amafupa” mu mampalanya, ukwimininako umuntu umwine—ukucilisha mu fyo ayumfwa na mu nkuntu. Lelo ni shani akatiina ka kuli Yehova kaba ‘kupola ku mutoto obe’?

Abasoma Baibolo balapusana mu mitontonkanishishe yabo ukulosha ku kushimbula pa lwa “mutoto” muli ici cipande. Uulandapo umo atile apo “umutoto” waba pa “kati na nkati ka mubili,” napamo wimininako ifilundwa fya mubili ifyacindama. Uwasoma na umbi atile ishiwi “umutoto” napamo kuti lyaba mutoto uushilaputulwa, nga fintu lyabomfiwa pali Esekiele 16:4. Nga e fyo cili, ninshi Amapinda 3:8 yakomaila pa fyo tukabila ukushintilila lyonse pali Lesa—nga filya akanya kapelelwa mwi fumo, kashintilila sana pali nyina mu kuliishiwa. Lelo icintu na cimbi caba ca kuti “umutoto” napamo walosha ku minofu ne mishipashipa mu mubili. E co kuti twatila muli ici cikomo, ifi filundwa fya mubili napamo balifipusanya ku “mafupa”—ayaba ulubali ulwakosa mu mubili.

Nomba nangu kube aya mashiwi, cimo cili icashininkishiwa: Ukuba na katiina ka kucindika Yehova yaba ni nshila ya mano. Ukukonka amafunde yapampamikwa na Lesa kuti kwalenga ubumi busuma pali nomba. Ne cacilapo, kuti kwatuletela ukusenamina ukufuma kuli Yehova, no kututungulula ku mweo wa muyayaya no bumi bwapwililika—lwa ku mubili na mu nkuntu—mu calo cakwe icipya icili no kwisa.—Esaya 33:24; Ukusokolola 21:4; 22:2.

[Abatusuminishe Ukubomfya Icikope pe bula 32]

Dr. G. Moscoso/SPL/Photo Researchers