Bushe Lesa Alacita Ifintu mu Nshila ‘Shapondama’?

INSOSELO imo iya bena Brazil itila: “DEUS ESCREVE CERTO POR LINHAS TORTAS” (“LESA ALALEMBA bwino ukubomfye fishilwa fyapondama”). Iyi nsoselo itubululo kuti lyonse Lesa alacite calungama lelo limo limo mu nshila iimoneka iyapondama ku muntunse. Ku ca kumwenako, lintu uwacaice afwa, abengi batila, ‘Lesa alimwitile ku muulu.’ Umuntu nga alilemana atemwa aponenwa no bucushi, bamo batila, ‘Kufwaya kwa kwa Lesa.’ Apantu bamo batila Lesa e uletako imfwa, amafya, na fimbi ifilenga ubulanda, insoso sha musango yo shitubululo kuti Lesa ‘alalemba mu nshila yapondama,’ pa kucite fintu mu nshila iyo umuntunse ashingomfwikisha.

Mulandu nshi abengi abapepa basuminino kuti Lesa e uletako imfwa na macushi? Ilingi line icilenga ifisumino fya musango yo kukanaumfwikisha amalembo ya mu Baibolo ayaibela. Natubebete yamo aya yene.

●“Nani acita cibulu, napamo nkomamatwi, napamo uulolesha, napamo impofu? Bushe te ine, Yehova?”—Ukufuma 4:11.

Bushe ici cilolele mu kuti bonse abalemana ni Lesa uwalenga? Iyo. Ici kuti capusana no buntu bwa kwa Lesa. Baibolo itwebo kuti: “Icibumbwa conse ca kwa Lesa cisuma.” (1 Timote 4:4) Lesa te ulenga umuntu ukufyalwe mpofu, cibulu nelyo nkomamatwi. Afwaya fye ukucitila ifibumbwa fyakwe icisuma, pantu “ica kupeelwa conse icisuma ne ca bupe conse icafikapo” Cifuma kuli wene.—Yakobo 1:17.

Abafyashi besu aba kubalilapo, Adamu na Efa, e basalilepo abene ukupondokela Lesa kabili balufishe ukupwililika, no kulufya amaka ya kufyala abana abapwililika. (Ukutendeka 3:1-6, 16, 19; Yobo 14:4) Ilyo abana babo baupile no kufyala abana, ukukanapwililika, ukusanshako ukulemana, kwatendeke ukufulilako mu bantunse. Nangu cingati Yehova Lesa te walengele ukuti cibe fi, alicisuminisha ukucitika. E mulandu wine engasoselo kuti ‘e ucita’ bacibulu, bankomamatwi, ne mpofu.

●“Icapondama cafilwo kololoka.”—Lukala Milandu 1:15.

Bushe ni Lesa uwapondamike ifintu? Iyo. Lukala Milandu 7:29 atila: “Lesa alenga abantunse abatambalala; lelo bene nabafwaye fya kwelenganya ifingi.” Baibolo wa Contemporary English Version alondolola ili lembo ati: “Twali abafumacumi nga nshi lintu Lesa atubumbile, lelo nomba twalikolobanya imintontonkanya yesu.” Ilingi line abaume na banakashi tabakonka ifipimo fyalungama ifya kwa Lesa, lelo ku mufulo balisalapo ukukonka amapange yabo, amatontonkanyo, ifya kwelenganya nelyo imibele ifibaletela uboni.—1 Timote 2:14.

Na kabili, nga fintu umutumwa Paulo asosele, pa mulandu wa lubembu lwa bantunse, “ifibumbwa fyalengelwe ukulamba ku kuicusha fye.” (Abena Roma 8:20) Kabili iyi mibele ‘taingololwa’ ku matukuto ya bantunse. Ni Lesa fye e ukafumyapo ukupondama konse no kuicusha fye ukwa pano nse.

●“Tontonkanyo mulimo wa kwa Lesa; pantu nani uwingolole co wene apondamika?”—Lukala Milandu 7:13.

Mu mashiwi yambi, Imfumu Solomone yaipwishe ukuti: ‘Nani pa bantunse engalungika ubulema no kukanapwililika ifyo Lesa asuminisha?’ Tapaba, pantu kwaliba umulandu Yehova Lesa asuminishisha ifi fintu ukucitika.

E ico, Solomone atubululo kuti: “Mu bushiku bwa busuma sekelela, na mu bushiku bwa bubi tontonkanye ci: Lesa acita ubu pamo no bu, pa mulandu wa kuti umuntunse eiluka nangu cimo icikesamukonkapo.” (Lukala Milandu 7:14) Umuntu alingile ukutasha ubushiku ifintu fyamuwamina kabili afwile ukutasha ukupitila mu kucito busuma. Alingile ukumono bushiku bwa busuma nge ca bupe icafuma kuli Lesa. Lelo ni shani nga ca kuti ubushiku bwaleto bubi? Lyene umuntu alingile ‘ukutontonkanya,’ e kutila, alingile ukwiluko kuti Lesa nasuminisha ububi ukucitika. Mulandu nshi acitile fyo? Solomone atila: “Pa mulandu wa kuti umuntunse eiluka nangu cimo icikesamukonkapo.” Bushe ici calola mwi?

Icishinka ca kuti Lesa alasuminisho kuti tulesekelela no kucula citucinkulako kuti tatwingeshiba ifya ku ntanshi. Ububi kuti bwaponena abalungama na babifi. Bonse ni nkupilwa kumo. Ici cilingile ukutulenga ukwiluka ubucindami bwa kukanashintilila pali fwe bene, lelo ukulashintilila pali Lesa, pa kwibukisho kuti “Lesa kutemwa.” (1 Yohane 4:8) Nangu cingati pali nomba tatwingomfwikisha ifintu fimo, kuti twashininkisho kuti ilintu fyonse fyapwishishiwa, ifintu Lesa asuminisha fikaba nafibomba imifwaile isuma kuli bonse ababimbilwemo.

Fyonse fintu Lesa asuminisha tafyakaletele abalungami ububi ku ciyayaya. Pa kulanda pa bucushi bwaleponena abasumina banankwe, umutumwa Petro alilondolwele bwino ati: “Lesa wa kusenamina konse, uwamwitile ku kwisa mu bukata bwakwe bwa muyayaya muli Kristu Yesu, ilyo mukacula inshita inono, wene akamulengo kuti mube abapwililila, akamwikasha, akamukosha.”—1 Petro 5:10.

Inshita ya Kulungike Fintu

Yehova alatupa amaka ya kushipikisha amesho tukumanya. Na kabili alilaya ‘ukulenga ifintu fyonse ifipya.’ (Ukusokolola 21:5) Na kuba, yaba mifwaile yakwe ukuti Ubufumu bwa mu muulu bukondape bonse abalemana no kubuusha abafwa. Ubo buteko na kabili bukafumyapo Satana Kaseebanya uwa mibele yapondama icine cine. (Yohane 5:28, 29; Abena Roma 16:20; 1 Abena Korinti 15:26; 2 Petro 3:13) Mwandi ku bantu abatiina Lesa mwi sonde lyonse likaba lipaalo lintu inshita ya kwa Lesa iya kulungika ifintu ikafika!

[Abatusuminishe Ukubomfya Icikope pe bula 28]

Yobo Aleumfwa pa lwa Boni Bwakwe/The Bible Illustrations/Dover Publications