ISAMBILILO 29

Bushe Umuntu aba Shani nga Afwa?

Ifimoneka Ulwapulintwa

Bushe mwalifwilwapo lupwa lwenu nelyo cibusa? Pali iyi inshita nalimo mwali sana no bulanda kabili mwaleyipusha amuti: ‘Bushe umuntu aba shani nga afwa? Bushe tukabala atumonanapo na kabili na balupwa lwesu ne fibusa abafwa?’ Muli lino isambililo e lyo na mu likonkelepo, twalalanda pa fyo Baibo yasuka aya mepusho, kabili ifyo yasuka kuti fyamusansamusha.

1. Bushe umuntu aba shani nga afwa?

Yesu alingenye imfwa ku tulo utukalamba. Umuntu uuli mu tulo utukalamba nga nshi teshiba ifilecitika. Bushe imfwa yapalana shani no tulo? Umuntu nga afwa tomfwa ubukali nelyo ukucula. Baibo itila: “Abafwa tabaishiba nangu cimo.”—Belengeni Lukala Milandu 9:5.

2. Busuma nshi bwaba mu kwishiba icine pa mfwa?

Abantu abengi balatiina ukufwa kabili balatiina na bafwa! Nomba ifyo Baibo isambilisha pa mfwa kuti fyamusansamusha. Yesu atile: “Icine cikalenga mukabe abantungwa.” (Yohane 8:32) Imipepele imo isambilisha ukuti kwaliba icishifwa umuntu nga afwa. Lelo ifi te fyo Baibo isambilisha, pantu umuntu tacula nga afwa. Na kabili apo abafwa tabaishiba nangu cimo, te kuti bacite ifyabipa kuli ifwe. E ico tatulingile ukupepa abafwa nelyo ukubacitila fimo pa kuti bekalipa. Kabili tatulingile no kulabapepelela.

Abantu bamo balanda ukutila kuti balanshanya na bafwa. Nomba ifi te kuti ficitike. Nga fintu tusambilile, abafwa “tabaishiba nangu cimo.” Kanshi abatontonkanya ukuti balalanshanya na bafwa nalimo balanshanya ne fibanda ifi-ifungushanya kwati bantu abafwa. Kanshi ukwishiba icine pa bafwa kulatucingilila ku fibanda. Yehova alitusoka ukuti tatufwile ukulalanshanya na bafwa, pantu alishiba ukutila ukulanshanya ne fibanda kuti kwatuletelela.—Belengeni Amalango 18:10-12.

SAMBILILENI NA FIMBI

Sambilileni ifyo Baibo isambilisha pa mfwa, kabili moneni ifingalenga mwacetekela sana Lesa uwaba no kutemwa kabili uushicusha abafwa.

Umwaume uwikele pa cipuna na bana bakwe babili abanono nafwilwa umwina mwakwe. Ifibusa na balupwa nabesa mu kumusansamusha.

3. Sambilileni icine pa fyo umuntu aba nga afwa

Mwi sonde lyonse, abantu basumina ifyalekanalekana pa fyo umuntu aba nga afwa. Kwena te fyonse ifyo basumina ifyaba ifya cine.

Finshi abantu abengi ku ncende mwikala basumina pa fyo umuntu aba nga afwa?

Pa kuti mwishibe ifyo Baibolo isambilisha, tambeni VIDIO.

Bushe Abafwa Baba Shani?—Iyo Baipifya (1:19)

Icikope icifumine muli vidio itila ‘Bushe Abafwa Baba Shani?—Iyo Baipifya.’ Ifikope: 1. Icitumbi nabacilaalika pa busanshi mu cipatala. 2. Umwaume nalaala mwi shitima.

Belengeni Lukala Milandu 3:20, lyena lanshanyeni aya mepusho:

Ukulingana ne li lembo, bushe umuntu aba shani nga afwa?
Bushe kwaliba icishifwa umuntu nga afwa?

Baibo yalilanda pa fyo cali ilyo cibusa wa kwa Yesu Lasaro afwile. Ilyo mulebelenga Yohane 11:11-14, mumone ifyo Yesu alandile pa fyo Lasaro ali ilyo afwile. Lyena lanshanyeni aya mepusho:

Ni kuli cinshi Yesu apashenye imfwa?
Bushe ifi Yesu apashenye imfwa ku kulaala utulo fitusambilisha finshi pa fyo umuntu aba nga afwa?
Bushe mulemona ukuti ifyo Baibo ilanda pa fyo umuntu aba nga afwa fya cine? Cinshi mwa-asukila ifyo?

4. Ubusuma bwaba mu kwishiba icine pa fyo umuntu aba nga afwa

Ukwishiba icine pa fyo umuntu aba nga afwa kulalenga twaleka ukutiina abafwa. Belengeni Lukala Milandu 9:10, lyena lanshanyeni ici cipusho:

Bushe abafwa kuti bacita ifyabipa kuli ifwe?

Na kabili ukwishiba icine icaba mu Baibo kulatucingilila pa kuti tatusumiine icisambilisho ca bufi ica kuti tufwile ukupepa abafwa nelyo ukubacitilako fimo pa kuti tabakalipe. Belengeni Esaya 8:19 na Ukusokolola 4:11, lyena lanshanyeni ici cipusho:

Bushe muletontonkanya ukuti Yehova omfwa shani nga ca kuti umuntu alepepa abafwa nelyo alefwaya ukuti abafwa bamwafwe?

Ifikope: Intambi isho abantu bacita pa kucindika abafwa. 1. Umwaume nafukama pa manda alepepa kabili natwalila no wafwa ifya kulya. 2. Abaume batatu baleshana ifinyau. 3. Ibumba lya bantu nabafwala ifya kucinga pa menso kabili nabasenda ifimpashanya fya cipanga ca muntu ilyo balesefya Ubushiku bwa Bafwa. — Ukwishiba icine pa fyo umuntu aba nga afwa kulatulubula ku ntambi isho Yehova apata

5. Ukwishiba icine pa fyo umuntu aba nga afwa kulatusansamusha

Abantu abengi babasambilisha ukuti nga bafwa bakalacula pa mulandu wa fyo balecita ilyo bashilafwa. Lelo tulaba sana ne nsansa ukwishiba ukuti takwaba nangu umo uucula nga afwa, ukubikako fye nabalecita ifyabipa ilyo bashilafwa. Belengeni Abena Roma 6:7, lyena lanshanyeni ici cipusho:

Baibo ilanda ukuti umuntu nga afwa, umulandu wakwe uwa lubembu ulapwa. Bushe muletontonkanya ukuti kwalibako bamo abafwa abacula pa mulandu wa fyo balecita ilyo bashilafwa?

Nga twaishiba bwino Yehova, kuti twamona ukutila te kuti akande abafwa. Belengeni Amalango 32:4 na 1 Yohane 4:8, lyena lanshanyeni aya mepusho:

Bushe Lesa uwaba ne mibele iyo balandilepo muli aya malembo kuti akanda abantu abafwa?
Bushe tamutemenwe ifi mwaishiba icine pa fyo umuntu aba nga afwa? Cinshi mwa-asukila ifyo?

ABANTU BAMO BATILA: “Ndatiina ukuti nkalacula nga nafwa.”