Lintu Ukufwa Kupilibula Ukufwa

“Imbwa ya mweo yena yawamo kucile nkalamo iyafwa; pantu aba mweo bantu abaishibo kuti bakafwa, lelo abafwa bantu abashaishiba kantu nangu kamo, kabili takwaba cilambu kuli bene; pantu iciibukisho cabo calabwa.”—Lukala Milandu 9:4, 5.

ABANTU abengi tabaumfwikisha icisumino basumina ica kuti umweo taufwa lintu umo afwa nelyo ukuti ulafyalwa cipya cipya. Bamo basumina fye ne fyo umo kuti abwela ku bafwa. Thomas Lynch, uubombela pa fitumbi, nomba line aipushiwe ifyo aletontonkanya pa lwa kubwela ku bafwa. Atile: “Abamona ifinjelengwe tababwela ku bafwa—tutila nabafwa nga twafilwa ukumona ifishibilo filangilila ukuti bacili no mweo. Pantu nga ‘naufwa’ te kuti ubwele.” E fisosa The New York Times Magazine.

Baibolo yalanda icine ukutula kale. “Imbwa ya mweo yena yawamo kucile nkalamo iyafwa; pantu aba mweo bantu abaishibo kuti bakafwa, lelo abafwa bantu abashaishiba kantu nangu kamo, kabili takwaba cilambu kuli bene; pantu iciibukisho cabo calabwa.” (Lukala Milandu 9:4, 5) Ukuyatandala pa kashita kanono ku nshishi ya kale kwalashininkisha ico cishinka.

Bushe ico cilepilibula ukuti takwaba isubilo ku bafwa? Mu kushininkisha Baibolo tailandapo icili conse ica kulenga abantu ukusumina ukuti umweo taufwa ilyo umo afwa. (Ukutendeka 2:7; Esekiele 18:4, 20) Nangu cibe fyo, Yesu Kristu alishimikile pa lwa kubuukila ku mweo muli paradise wabweshiwa pe sonde. Umukonshi wakwe Marita umuYuda, uo munyina, Lasaro afwile, asumine mu kubuushiwa, pantu pa lwa kwa Lasaro atile: “Ninjishibo kuti akabuuka mu kubuuka kwa mu bushiku bwa kupelelekesha.” (Yohane 11:24) Pa fyo asosele, Yesu amwebele ukuti: “Ni ne kubuuka kabili umweo: uuntetekela, nangu afwa, akaba no mweo; na onse uuli no mweo kabili antetekela, takafwe umuyayaya. Bushe watetekela ici?” (Yohane 11:25-27) Ilyo ashilasosa ifi fyebo, aali nasosa ukuti: “Mwisunguka pali ici; pantu inshita ileisa, iyo bonse aba mu nshishi bakomfwamo ishiwi lyakwe, no kufumamo; abalecite fisuma bakabuukila ku mweo, na balebombe fibi bakabuukila ku bupingushi.” Mwamona ukuti Yesu talumbwilepo ati umweo taufwa!—Yohane 5:28, 29; Luka 23:43.

[Amashiwi pe bula 31]

“Nga ‘naufwa’ te kuti ubwele.” Thomas Lynch, uubombela pa fitumbi