Ukukosha Ukutetekela Kwesu mu Bulungami bwa kwa Lesa

“Ico ndekulengelo kwishiba lelo na iwe, ni pa kuti icitetekelo cobe cilole kuli Yehova.”—AMAPINDA 22:19.

1, 2. (a) Mulandu nshi Inte sha kwa Yehova shatetekelela Yehova? (Amapinda 22:19) (b) Cinshi cilangililo kuti bamo balekabila ukukosha ukutetekela kwabo muli Yehova?

ABENA Kristu ba cine balishuka pa kukwata ukwishiba kwalungikwa pa lwa kwa Yehova ne mifwaile yakwe. “Umusha wa cishinka kabili uwashilimuka” mu kutemwa alabapeela ‘ifya kulya fya ku mupashi mu nshita iyene.’ (Mateo 24:45) Ukwishiba kuntu banonka kubapeela icitendekelo cakosa apa kushimpa ukutetekela muli Lesa. Kanshi abantu ba kwa Yehova nge bumba balalangisha mu kumonekesha ukuti balitetekela Yehova no bulungami bwakwe.

² Nangu cibe fyo, cilemoneke fyo abantu umo umo muli baNte balekabila ukukosha ukutetekela kwa musango yo. Limo limo Sosaite ilapokelelako bakalata abalangilila ukutwishika kumo pa lwa bulondoloshi ubufuma mu mpapulo. Uku kutwishika kuti pambi kwaba kwankulako ku kuteuluka mu kumfwikisha, nelyo kuti kwaba pa milandu iikumine uuleipusha, maka maka imilandu ilengo kukuntukilwa.—Linganyeniko Yohane 6:60, 61.

 3. Cinshi cingacitika nangu ni ku babomfi ba busumino aba kwa Yehova, kabili mulandu nshi?

³ Nangu fye babomfi ba cine aba kwa Yehova amashiwi ya muli Lukala Milandu 9:11 yalabakuma aya kuti: “Nabwekeshepo no kumona: mwi samba lya kasuba, ukucishamo mu kubutuka te kwa mpalalubilo, kabili ukucishamo mu bulwi te kwa mpalume, na kabili ukupeelwe cilyo te kwa ba mano, nangu bucindami ku ba mucetekanya, nangu bubile ku baishiba; pantu inshita ne ca mankumanya fiponena kuli bonse bene.” Ni shani fintu aya mashiwi yengabomba nga twayatanununa mu nshila ya ku mupashi? Napamo kuti twalishibeko Abena Kristu abalebutukisha mu kubomfya ukufunda kwa Baibolo, abaali impalume mu kucingilila icine, aba mano mu kubomfya ifishinte fya Baibolo, kabili abaali abapimpa mu kukonkelela ukwishiba kwalungikwa. Lelo pa mulandu wa “nshita ne ca mankumanya,” bamo nomba balesango kuti nabacepelwa amaka pa mulandu wa busanso nelyo ubukote. Kuti pambi baletwishika nampo nga bakengila mu calo cipya ica kwa Lesa ukwabulo kufwa.

4, 5. Mulandu nshi pashabela mulandu ku Bena Kristu uwa kukanacetekela ubulungami bwa kwa Yehova?

⁴ Lintu Umwina Kristu afwilwa umwina mwakwe, cilakalipe cine cine. Kuti pambi babombele Yehova capamo nga abaupana pa myake ingi nangu fye pa makumi ya myaka. Umunankwe uwashala aleshibo kuti imfwa ilaputula icikakilo ca cupo.a (1 Abena Korinti 7:39) Nomba afwile alama inkuntu shakwe epali ukutetekela kwakwe kwanenuka.—Linganyeniko Marko 16:8.

⁵ Fintu cingawama ukumone mfwa ya mwina mwesu, iya mufyashi, umwana nelyo cibusa wapalamisha uwa Bwina Kristu nge shuko lya kulangisha ukutetekela mu bulungami bwa kwa Yehova! Nangu fye ni lintu twapusulwa pa lwesu, kuti twacetekele fyo Yehova taba uushalungama. Kuti twacetekele fyo uuli onse uukanonko mweo, nampo nga kupitila mu kupusunsuka nelyo ni mu kubuuka, ali no kuba uwa nsansa. Kemba wa malumbo alandile pa lwa kwa Lesa ati: “Ni mwe mufumbatule minwe yenu, no kwikusha conse ica mweo ifyo cilefwaya. Yehova alilungama mu mibele yakwe yonse, kabili wa luse mu micitile yakwe yonse; Yehova ali mupepi kuli bonse abalilila kuli wene, kuli bonse abalilila kuli wene mu cishinka; ukufwaya kwa bamutiina, wene alakucita, ne nkuuta yabo ayumfwa, no kubapususha.”—Ilumbo 145:16-19.

Ukuyumfwo Kuti Twaculile fye Apabulo Mulandu

6, 7. (a) Mulandu nshi untu baNte bamo abaculilepo ku numa bamwene fintu mu kupusanako nomba? (b) Mulandu nshi tushilingile ukumwena Yehova ngo ushalungama pa kuti asuminishe ukuti tucule ku numa?

⁶ Akale, baNte bamo baliculapo pa kukanabombako umulimo untu kampingu wabo nomba abasuminisha ukubombako. Ku ca kumwenako, kuti pambi cali kukaanako imisango imo iya mulimo wa mu bwikashi mu myaka yafumako. Munyina kuti nomba pambi ayumfwe fyo kuti kampingu amusuminisha ukubomba umulimo wa musango yo ukwabulo kupula mwi funde lya kukanaibimbamo mu milandu iyakuma kuli ino micitile ya fintu.

⁷ Bushe Yehova aali uushalungama pa kumusuminisha ukucula ilyo akeene ukucita cintu nomba engacita mu kukakuka? Abengi abapita mu cintu ca musango yo tabengacimono kuti Yehova aali uushalungama. Mu cifulo ca ico, balasekelela ukuti balikweteko ishuko lya kulangilila apabuuta ukuti baalipampamine pa kuba abashangila pa fikansa fya bumulopwe bwa mu kubumbwa konse. (Linganyeniko Yobo 27:5.) Mulandu nshi uuli onse engakwata uwa kulilishikila ukuti alikonkele kampingu wakwe mu kwiminina uwashangila ku lubali lwa kwa Yehova? Pa kusumbula ifishinte fya Bwina Kristu muli bucishinka ilyo balefishiba nelyo pa kwankula ku kusonga kwa kampingu, bashininkishiwe ukukwata bucibusa na Yehova. Cine cine, calibamo amano ukusengauka inshila iingapumfyanya kampingu wa muntu nelyo ico nakalimo cingalenga bambi ukupunwishiwa. Pa lwa ici kuti twatontonkanya pa lwa ca kumwenako cintu umutumwa Paulo aimike.—1 Abena Korinti 8:12, 13; 10:31-33.

 8. Mulandu nshi Abena Kristu ba ciYuda abo kale baikatilile kwi Funde bashakwatile umulandu wa kutwishikilo bulungami bwa kwa Yehova?

⁸ Pa kutemuna Yehova, abaYuda balefwaikwa ukumfwila Amafunde Ikumi na mafunde yalekanalekana ayalundilweko ayali mupepi na 600. Pa numa, mu kutantika kwa Bwina Kristu, ukumfwila amafunde ya musango yo pa kubombela Yehova takwalefwaikwa na kabili, nangu fye ni ku bali abaYuda ku mubili. Pa mafunde ayo nomba yashalebomba paali na yo ayaakumine ku kusembululwa, ukusunge Sabata, ukutuula amalambo ya nama, no kubaka ifibindo fimo ifya miliile. (1 Abena Korinti 7:19; 10:25; Abena Kolose 2:16, 17; AbaHebere 10:1, 11-14) AbaYuda, ukusanshako na batumwa abasangwike Abena Kristu balikakwilwe ku kubaka amafunde ayo balekabilo kumfwila mu cipingo ce Funde. Bushe baleilishanya ukuti Lesa tali uwalungama mu kuti akale alefwaya fimo kuli bene ifyo nomba fishalefwaikwa? Iyo, balisekelele pa kumfwikisha kwatanunuka pa lwa mifwaile ya kwa Yehova.—Imilimo 16:4, 5.

 9. Cinshi cacitikila Inte shimo, lelo mulandu nshi ico cishingabalengela ukulilishika?

⁹ Muno nshiku kwalibako baNte bamo abakoseshe ifintu sana mu nshila balemwenamo ifyo bengacita na fintu bashingacita. Ico cabalengele ukuti bacule ukucila pali bambi. Pa numa, ukwishiba kwafulilako kwabafwilishe ukumwene fintu mu nshila na shimbi. Lelo takuli umulandu wa kulilishikila inshila babombelemo mu kubangilila iyaumfwene na kampingu wabo, nangu line ici calengele ukucula mu kucishamo. Baletashiwa ukuti balilangilile ifyo bali abaitemenwa ukucula mu busumino kuli Yehova “ifintu fyonse [ukucitile] mbila nsuma.” Yehova alapaala ulya musango wa kuipeelesha kwa bukapepa. (1 Abena Korinti 9:23; AbaHebere 6:10) Umutumwa Petro alembele no kushilimuka ati: “Nga mushipikisha ilyo mwacite cisuma no kucula, ici cena Lesa atunge ca kusenamina.”—1 Petro 2:20.

Ukusambililako Kuli Yona

10, 11. Ni shani fintu Yona alangile ukukanatetekela Yehova (a) lintu atuminwe ukuya ku Ninebe? (b) lintu Lesa ashaonawile abena Ninebe?

¹⁰ Lintu Yona bamwebele ukuya ku Ninebe, alangishe ukukanatasha pa fyo Yehova amucetekele. Pa numa ya ca kukumanya ca kutiinya cintu apitilemo icaishileko pa mulandu wa kushimunuka kwakwe pa kumfwila ico bamwebele, calimwishile ku mano no kwiluke cilubo acitile, no kuya ku calo ca cilendo kuntu atuminwe kabili ailesoka abena Ninebe pa lwa bonaushi bwaleisa. Nomba ico ashaenekele e caishilecitika: Pa mulandu wa kuti abena Ninebe balilapile, Yehova apangile ukukanaleta ubonaushi.—Yona 1:1–3:10.

¹¹ Ni shani fintu Yona ayankwileko? Pa mulandu wa kukalifiwa, aliilishenye kuli Lesa mwi pepo. Icikalamba icali mu kukalipa kwakwe ca kuti: ‘Nalishibe ukuti e fyo cikesaba. E co nakaanine fye pa kubala pene ukukanaisa kuno Ninebe. Nomba ilyo napita muli fyonse ifi, ukusanshako ne ca kutiinya no museebanya wa kuminwa ku cisabi, e lyo na fintu mombeshe ukusoka abena Ninebe ulwa bonaushi ubusungamine, nomba mwamone cacitika! Fintu mombele na fintu nculile fyonse fyaonaika fye! Kuti cawama kanshi mfwe fye!’—Yona 4:1-3.

12. Cinshi cintu twingasambilila ku caponeene Yona?

¹² Bushe Yona alikwete umulandu uwalinga ukuilishanishishapo? Bushe Yehova aali uushalungama pa kulange nkumbu kuli bakacita wa fibi abalapile? Na kuba Yona alekabila ukusekelela; pantu amakumi ya makana ya bantu tabaipaiwe! (Yona 4:11) Lelo iyi mibele yabulo mucinshi, iya kuilishanya yalangile fyo tatetekele mu kushika ubulungami bwa kwa Yehova. Aletontonkanya sana pa lwa mwine wine no kukanatontonkanya sana pali bambi. Natusambilileko kuli Yona ukupitila mu kukanailolekesha fwe bene no kuyumfwa kwesu. Natuleshininwa ukuti icalungama ico twingacita caba kumfwila Yehova, ukukonka ukutungulula kwakwe uko apishisha mu kuteyanya kwakwe e lyo no kulasuminisha fintu apingula. Twalishininwa ukuti “kukabo busuma ku batiina Lesa.”—Lukala Milandu 8:12.

Nomba E Nshita ya Kukosha Ukutetekela Kwesu!

13. Ni shani fintu ifwe bonse twingakosha ukutetekela kwesu muli Yehova?

¹³ Ukukosha ukutetekela kwesu muli Yehova ni nshila ya mano. (Amapinda 3:5-8) Kwena, tatufwile ukupelela fye pa kupepa ukuti Yehova atwafweko ukulundako kutetekela. Pa kuti ukutetekela kukule cishintilila pa kwishiba kwalungikwa, kanshi isambililo lya Baibolo ilya pa lwesu, ukubelenga Baibolo ne mpapulo ishilondolola Baibolo fifwile ukuba pa fintu tucita cila bushiku. Ukusangwa ku kulongana lyonse kwalikatama, filya fine fyakatama no kupekanya no kwasukapo ukufika pantu twingapesha. Ukucipange cibelesho ukulandako na bambi icine ca mu Baibolo, ukucimfya ukukaanya mu kucenjela, na co cilalenga ukutetekela Yehova ne Cebo cakwe ukushika. E nshila twendelamo pamo nankwe cila bushiku.

14. Mulandu nshi bwangu bwangu abantu ba kwa Lesa bali no kufwaikilwa ukulangisha ukutetekela kwabo ukucila na kale lyonse?

¹⁴ Tapakalepe sana ubucushi bwakulisha ubushatala abuponenapo abantunse bukesa fye mu kupumikisha. (Mateo 24:21) Ilyo bukesa, ababomfi ba kwa Lesa e lyo bakakabila sana ukulangisho kutetekela mu bulungami bwa kwa Yehova na mu butungulushi buntu ukuteyanya kwakwe kupeela. Mu nshila ya mampalanya, e lyo mu kutetekela bakomfwila ukukambisha kwa kwa Lesa ukwa kuti: “Kabiyeni, mwe bantu bandi, ingileni mu miputule yenu, no kwisalako ifiibi fyenu; fisamenimo inshita inono iyacepesha, cisuke cipite icipyu cakwe.” (Esaya 26:20) Kale kale balingila mu mibele yacingililwa mu filonganino ifyacila pali 85,000 mu fyalo 232. Nga kukabako icili conse icikasanshiwa mu kukambisha kwa kuti “ingileni mu miputule yenu,” kuti twacetekele fyo Yehova akatwaafwa ukucicita.

15. Ni shani fintu umulandu wa kutetekela ukomailwepo mu 1998, kabili mulandu nshi ico cibelele icalinga?

¹⁵ Cili icafwaikwa ukukosha ukutetekela kwesu nomba. Nga tatucetekele bamunyinefwe, ukuteyanya kwa kwa Yehova e lyo ukucilisha nga tatutetekele Yehova umwine, tatwakapusuke. E co kanshi cibelele calinga ukuti mu 1998, Inte sha kwa Yehova icalo conse bacinkulweko mu kubwekeshabwekeshapo ku mashiwi ya mwi lembo lya mwaka aya kuti “umuntu onse uwalilila kwi shina lya kwa Shikulu akapusuka.” (Abena Roma 10:13) Tufwile ukutwalilila ukukwata uko kucetekela. Nga ca kuti muli uku kucetekela twamonamo nangu fye ukutwishika kunono, tulingile ukubombelapo nomba line, kabili lelo line.

Ubupingushi bwa kwa Yehova Bukaba Ubwalungama

16. Cinshi cingacitika nga ca kuti ukutetekela takulundulwilwe, kabili ni shani twingacincintile co?

¹⁶ Pa AbaHebere 3:14, Abena Kristu basubwa balisokwa ukuti: “Twaba abakumako kuli Kristu, nga twaikatisho kutendeka kwa kuyanga kwesu ukwaikashiwa na ku mpela.” Ukubomfyako icishinte cimo cine, aya mashiwi yalabomba na ku Bena Kristu abasubila ukwikala pe sonde. Ukutetekela kwa pa kutendeka kuti kwakubuluka nga takulundulwilwe. Mwandi calikatama ukuti tuletwalilila ukukonkelela ukwishiba kwalungikwa, muli fyo ukukosha icitendekelo apengashimpwa ukutetekela kwesu!

17. Mulandu nshi twingacetekelelo kuti pa fya kupusunsuka Yesu akapingula mu kulungama?

¹⁷ Inko shonse mu kwangufyanya fye shili no kubebetwa kuli Kristu ica kuti “akabapaatukanya, ifyo umucemi apaatukanye mpanga ku mbushi.” (Mateo 25:31-33) Kuti twacetekele fyo Kristu akaba uwalungama mu kupingula abakalinga ukupusunsuka. Yehova alimupeela amano, ukushilimuka, ne mibele imbi iifwaikwa ku “[kupingwila] aba pano isonde mu bulungami.” (Imilimo 17:30, 31) Shi natushininwe nge fyashininwe Abrahamu uwatile: “Citaluke kuli imwe [mwe Yehova] ukucita ngo musango uyu, ukwipaila abalungami pamo na babi, no kuleka abalungami babe nga babi! Citaluke kuli imwe. Bushe Kapingula wa pano isonde ponse takacite icalungama?”—Ukutendeka 18:25.

18. Mulandu nshi tushilingile ukucishamo ukusakamikwa pa fintu ifyo pambi tushingeshiba pali ndakai?

¹⁸ Nga ca kuti twalicetekela mu kukumanina ubulungami bwa kwa Yehova, tatulekabila ukusakamikwa pa lwa kusanga amasuko ku mepusho pamo nga aya kuti: ‘Ni shani fintu utunya na bana banono bakapingulwa? Ilyo Armagedone akesa, bushe nakalimo icinabwingi ca bantu bakaba ninshi tabalashimikilwe mbila nsuma? Cikaba shani ku balwalo bushilu? Ni shani nga ca kuti . . . ?’ Kwena pali ino nshita pambi tatwingeshiba fintu Yehova akapikulula ayo mafya. Nangu cibe fyo, akayapikulula mu bulungami kabili mu nkumbu. Ico tatulingile ukutwishika. Na kuba, tukapapa kabili tukacankwa ukumona uko akayapikulula mu nshila intu tushatontonkenye na po.—Linganyeniko Yobo 42:3; Ilumbo 78:11-16; 136:4-9; Mateo 15:31; Luka 2:47.

19, 20. (a) Mulandu nshi cishalubanina ukwipusha amepusho yalinga? (b) Ni lilali lintu Yehova akapayanya amasuko ayengakabilwa?

¹⁹ Ukuteyanya kwa kwa Yehova takulesha abantu ukwipusha amepusho yafumaluka, ayalinga, nge fitunga bakakaanya bamo. (1 Petro 1:10-12) Nangu cibe fyo, Baibolo ilatufunda ukuti tulesengauka ifya kwipusha fya buwelewele, ifya kutunganya. (Tito 3:9) Ukwipusha amepusho ya mano no kusokota mu Cebo ca kwa Lesa na mu mpapulo sha Bwina Kristu ku kusanga amasuko ya mu Malembo kuti kwaingilishako ukwishiba kwesu ukwalungikwa no kukosha ukutetekela kwesu muli Yehova. Ukuteyanya kukonka ica kumwenako ca kwa Yesu. Alekaana ukwasuka amepusho ayo inshita yali tailafika iya kuti yasukwe. Alondolwele ati: “Ncili na fyo ifingi ifya kusosa kuli imwe, lelo te kuti mufyumfwe nomba.” (Yohane 16:12) Na kabili alisumine ukuti kwaliko ifintu fimo ifyo ashaishibe ilya nshita.—Mateo 24:36.

²⁰ Kwalibe fingi ifyo Yehova ashilasokolola. Fintu caba ica mano ukumulolela, ukutetekelo kuti nshita yalinga ikamoneka fye ukuti nomba cili icakabilwa ukuti alangishe imifwaile yakwe. Kuti twacetekelo kuti lintu inshita ya kwa Yehova ikafika, tukasekelela ukwishibilapo na fimbi pa lwa nshila shakwe. Ee, tukalambulwa, kulila fye twatetekela mu kukumanina muli Yehova no kuteyanya kuntu alebomfya. Amapinda 14:26 yatulayo kuti: “Uwa katiina kuli Yehova aba ne ca kusuubilako icakosa; ku bana bakwe na bo Wene abe cubo.”

[Futunoti]

Muletipo Shani?

◻ Mulandu nshi cishingawamina ukuleka ukukuntukilwa ukunenuna ukutetekela kwesu muli Yehova?

◻ Cinshi cintu twingasambilila ku caponene Yona?

◻ Mulandu nshi ukusambilila Baibolo no kusangwa ku kulongana fyacindamina nga nshi?

[Icikope pe bula 16]

Nangu fye ni lintu twaipaiwa, kuti twacetekela ukuti Yehova alilungama

[Ifikope pe bula 18]

Bushe cine cine ukutetekela kwenu kwaba muli Yehova?