Bushe Muleibukisha?

Bushe mwaliipakishe ukubelenga bamagazini ba Ulupungu lwa kwa Kalinda abafumine nomba line? Nga mwalicitile fyo, moneni nga kuti mwayasuka amepusho yakonkapo:

• Kuti twalanda shani bwino “ululimi lwine lwine,” e kutila, icine pali Lesa na pa fyo afwaya akacite? (Sefa. 3:9)

Nga fintu caba ku ndimi isho balanda, pa kulanda bwino “ululimi lwine lwine” tulingile ukulakutikisha, ukupashanya abalanda bwino, ukusungila amashina ya mabuuku ya muli Baibolo ne fikomo fimo fimo, ukulapituluka mu fyo tusambilila, ukulafumya ishiwi pa kubelenga, ukukolobonda mu fyo ululimi lulandwa, nangu mu fyo icine caba, no kulaya pa ntanshi mu kwishiba, ukutantika inshita ya kusambilila, no kulaesha “ukulanda” libili libili ululimi lwine lwine.—8/15, amabula 21-25.

• Finshi fimo ifyo mufwile ukwishiba pa kuti mwishibe ifyo Lesa aba?

“Yehova e shina lyakwe,” alafwaya ukuti twishibe ishina lyakwe. (Ukufu. 15:3) Ni “Lesa wa kutemwa kabili uwa mutende.” (2 Kor. 13:11) Ni “Lesa umwine uwaishiba” kabili ‘uwe pusukilo.’ (1 Sam. 2:3; Amalu. 25:5) Lesa akapalama ku bamwishiba muli ishi inshila twalandapo.—9/1, amabula 4-7.

• Insoselo ya kuti “umwando uwapyatwa ne ntambo shitatu” kuti yabomba shani mu cupo?

“Umwando uwapyatwa ne ntambo shitatu” ni nsoselo ya mampalanya. (Luk. Mil. 4:12) Nga twaileta mu cupo, umulume no mukashi e ntambo shibili ishipyatilwa pamo, ne ntambo ya pa kati, ni Lesa. Abaupana nga babika Lesa mu cupo cabo kuti baba na maka ya ku mupashi aya kucimfya amafya kabili kuti baleba ne nsansa.—9/15, ibula 16.

• Bushe amashiwi yaba pa AbaHebere 6:2 aya kuti “ukubikapo iminwe” yalola mwi?

Aya mashiwi tayapilibula ukusonta baeluda, lelo yafwile yapilibula ukubikapo iminwe ku kupeela amaka ya kupokelela umupashi wa mushilo ku kucita ifisungusho. (Imil. 8:14-17; 19:6)—9/15, Ibula 32.

• Finshi ifyo umufyashi mwaume eshiba ukuti abana balefikabila?

Fimo ifyo abana bakabila ni ifi (1) ukubatemwa, (2) ukuba no mufyashi wa mibele isuma iyo bengapashanya, (3) insansa pa ng’anda, (4) ukubasambilisha ifya kwa Lesa, (5) ukubasalapula, (6) ukubacingilila.—10/1, amabula 18-21.

• Bushe abaletungulula kuti balangilila shani ukuti balacindika abantu?

Inshila imo iyo eluda engalangilamo ukuti alacindika bantu, kukanabeba ukucita ifintu ifyo ena ashingatemenwa ukucita. E lyo kabili, kuti alanga umucinshi nga ca kuti alelondolola umulandu alebalombela ukucita fimo nangu umulandu alebebela ukucita fimo.—10/15, ibula 22.

• Finshi fimo ifingatwafwa ukuba ne cishinka mu cupo?

Pano pali fibili: (1) Bikeni sana amano ku cupo cenu. (2) Talukeni ku misango yonse iya bupulumushi. Nampo nga mwalikala bwino mu cupo nangu iyo, umwina mwenu alingile ukwishiba ukuti mulafwaya sana ukwikala bwino mu cupo cenu; ifi ifishinka fibili kuti fyamwafwa.—11/1, amabula 18-21.

• Finshi eluda engasambilila ku fyo kacema umwina Israele alebomfya inkonto?

Kacema alebomfya inkonto nangu umutambu, pa kucema umukuni. Impaanga pa kufuma mwi cinka nangu pa kwingila shalepita mwi samba lya nkonto, e lyo kacema aleshipenda. (Lebi 27:32) Kacema Umwina Kristu na o wine alingile ukwishiba umukuni wa kwa Lesa uwaba mu maboko yakwe.—11/15, ibula 9.

• Bushe nacifyashi kuti alangilila shani ukuti alibika amano ku busaka?

Inshila ifya kulya fyonaikilamo shalilekanalekana, kanshi ilyo talatampa ukwikata ifya kulya alabala asamba ku minwe kabili alakupika pa fya kulya. Alasunga ing’anda iya busaka pa kuti tamuleisa bakwindi ne mpuku e lyo ne fishiishi. Inshila shimbi isho alangilamo ukuti alibika amano ku busaka, kulasunga bwino ifya kufwala no kulasamba lyonse. Ukulacita ifi kulomfwana ne fyo Baibolo ilanda.—12/1, amabula 9-11.