Kwati fye Fipaso

BUSHE walibala aucilinganyapo inika mu lusuba no kumona iminshipendwa ya fipaso ukutoloka ukufuma mu nshila? Fyamoneke ukuba mpanga yonse, nangu ca kuti pambi tawafisakamene nga nshi. Na kuba, fimoneka ukuba ifyabulo busanso kabili ifishacindama.

Nalyo line, icimoneko kukanacindama kwa fipaso kucilenga ukuba icishibisho calinga ica mutundu wa muntu. Nangu ca kuti abantu bamo abalumbuka kuti pambi bailanguluka abene ukuba abacindama nga nshi, Kabumba wesu atontonkanya mu mano yapusanako. Kasesema wakwe Esaya atile: “Uwaikala pa cinshingwa-ŋanda ca calo, na baikalapo bamoneka nge fipaso.”—Esaya 40:22.

Bumpalume bwa kwa Yehova Lesa, amaka, na mano fimusansabika pa muulu ukucisha abantunse fye, pamo fye nga fintu umuntu acila ifipaso mu mucetekanya na maka. Nangu cibe fyo, imibele yapulamo iya kwa Lesa kutemwa. Kabili ukutemwa kwakwe ukushingalinganishiwako kumukunta ukutusakamana, ukutwaafwa, no kutupususha—nga ca kuti twamutemwa no kumumfwila. Yehova abomba na ifwe mu kutemwa, nelyo fye cingati twapala ifipaso fishacindama. Kemba wa malumbo atile: “Ni ani uwaba nga Yehova Lesa wesu, uwasansama ku kwikala mu myulu, alolesesha apatali pa myulu na pe sonde? Emyo mulanda mu lukungu.”—Ilumbo 113:5-7.

Nga fintu ili Ilumbo lyalondolola, Yehova mu kutemwa atanununa ukwaafwa ku mulanda. Ee, Alaafwa abo mu kuicefya ‘bafwaya Lesa, kuumfwa nalimo bengapampanta no kumusanga.’ (Imilimo 17:27) Abo abasanga Lesa—no kumubombela—basanguka fye na ba mutengo mu menso yakwe. (Linganyako Esaya 43:4, 10.) Icipaso caicefya muli fyo cibomba ku kutucinkulako ulwa kukanacindama kwesu no lwa kutemwa kwa kwa Kabumba wesu uwa maka yonse, uupeela abantunse ba cumfwila bucibusa bwakwe ne cikuuku ca pa fye. Bushe ulelanga ukutesekesha kwa kutemwa kwa kwa Lesa?