Icipandwa 16

Ubukombe bwe Subilo Kuli Bankole Abakungumana

Esaya 55:1-13

 1. Londololeni imibele yalimo bankole abaYuda mu Babele.

YALI ni nshita yabipisha mu fyacitikilapo Yuda. Abantu Lesa apingene na bo icipingo balipatikishiwe ukusendwa ukufuma mu calo cabo kabili nomba balecula mu busha mu Babele. Kwena, balipeelweko ubuntungwa panono ubwa kubombe milimo yabo iya cila bushiku. (Yeremia 29:4-7) Bamo balisambilile ubutukushi nelyo ukucita amakwebo.a (Nehemia 3:8, 31, 32) Lelo, ubumi bwa aba baYuda bankole tabwayangwike. Bali mu busha, ku mubili na lwa ku mupashi. Natumone ifyo ico cali.

2, 3. Bushe bunkole bwayambukile shani ukupepa abaYuda balepepa Yehova?

² Ilyo imilalo ya bena Babele yaonawile Yerusalemu mu 607 B.C.E., tabapelele fye apa pene, balisanshile no kupepa kwa cine. Balisendele ifipe fya mwi tempele lya kwa Yehova no kulyonaula, balengele bushimapepo ukufubalishiwa pa kusenda bamo aba mu mukowa wa kwa Lebi bunkole no kwipaya abashala. Apo nomba ing’anda ya kupepelamo, iciipailo, na bushimapepo bwateyanishiwa bwino fyali nafyonaulwa, calyafishe kuli aba baYuda ukupeela amalambo kuli Lesa wa cine umwabelele Amalango.

³ AbaYuda ba busumino bali no kubakila imipepele yabo mu kusembululwa na mu kukonka Amalango ukufika apo bengapesha. Ku ca kumwenako, bali no kutaluka ku fya kulya fyabindwa no kubake Sabata. Lelo mu kucite fyo, bali no kupumiwa ku babekete bunkole, pantu abena Babele balemona uyu mwata wa mipepele ngo buwelewele. Kuti twamona ukukungumana kwa aba bankole mu mashiwi ya kwa kemba wa malumbo ayatila: “Pa milonga ya ku Babele, e po twaikele no kulila pa kwibukisha Sione. Pa mawilo ya mu kati ka uko e po twakobeke bansango besu; pantu e ko abatwikete bunkole balombele kuli ifwe ulwimbo; na baletucusha bafwaile umusamwe, abati, Twimbilenipo inyimbo sha mu Sione.”—Amalumbo 137:1-3.

 4. Mulandu nshi cingabela kuicusha fye ku baYuda ukwalukila ku nko shimbi ku kubalubula, lelo ni kuli nani bengaalukila ku kwafwiwa?

⁴ Kanshi, ni kuli nani, abaYuda bankole bali no kwalukila ukuti abasansamushe? Ni kwi kwali no kufuma ipusukilo lyabo? Ukwabulo kutwishika te ku nko ishabashingulwike! Shonse shiine tashakwete maka ya kulwisha imilalo ya bena Babele, kabili ishingi shali ishilwani sha baYuda. Lelo isubilo lyali licilipo. Yehova, uo babembukile ilyo bali abantungwa, mu nkumbu abatambike ubwite bwa kukoshe mitima yabo, nangula bali muli bunkole.

“Iseni ku Menshi”

 5. Bushe amashiwi ya kuti “iseni ku menshi” yalola mwi?

⁵ Yehova alandila muli Esaya ifyebo fya kusesema ku baYuda bankole mu Babele atila: “Iye, mwe ba cilaka bonse, iseni ku menshi, abashaba na silfere, iseni, shiteni ingano, mulye. Iseni mushite ingano apabula silfere, no mwangashi ne shiba apabulo mutengo!” (Esaya 55:1) Aya mashiwi yaba ne fingi ifyo yemininako mu mampalanya. Ku ca kumwenako, bebeteni ubwite bwa kuti: “Iseni ku menshi.” Te kuti kube ubumi ukwabula amenshi. Ukwabula aya menshi yacindama nga nshi, fwe bantunse kuti twaikala fye abomi nalimo pa mulungu umo. E co, nacilinga ukuti Yehova abomfye amenshi mu mampalanya ku kulangilila ico ifyebo fyakwe fikacita kuli aba bankole abaYuda. Ubukombe bwakwe bukabapembesula, bukomfwika kwati ca kunwa catalala ilyo kukabile. Bukafumyapo ukukungumana kwabo, kabili bukapwisha icilaka bakwete ica kufwaya icine no bulungami. Kabili bukabalenga ukuba ne subilo lya kulubulwa muli bunkole. Nalyo line, pa kuti bakamwenemo, aba baYuda bankole bakakabila ukunwa ubu bukombe bwa kwa Lesa, ukwangwa bwene, no kubombela pa fyo bakomfwa.

 6. Bushe abaYuda bakamwenamo shani mu kushita “umwangashi ne shiba”?

⁶ Yehova abatambika no “mwangashi ne shiba.” Ishiba lilakosha utunya kabili lilaafwa abana ukukula. E fyo ne cebo ca kwa Yehova cikakosha abantu bakwe lwa ku mupashi no kubalenga ukukosha bucibusa bwabo na wene. Lelo ni shani pa lwa mwangashi? Ilingi line umwangashi baunwa pa mitebeto. Muli Baibolo, ulosha ku nshita ya lubanda no kusekelela. (Amalumbo 104:15) Kanshi ifi Yehova aeba abantu bakwe ‘ukushita . . . umwangashi,’ alebalaya ukuti ukubwelela ku kupepa kwa cine no mutima onse kukabalenga ukuba “fye abasamwa.”—Amalango 16:15; Amalumbo 19:8; Amapinda 10:22.

 7. Mulandu nshi icisansamushi Yehova alanga kuli aba bankole cibelele ica kusungusha, kabili cinshi tusambililako pa lwa wene?

⁷ We nkumbu Yehova aba na sho isha kulaya ukupembesula kwa musango yo ukwa ku mupashi kuli aba bankole abaYuda! Tulasunguka nga nshi pa cisansamushi cakwe nga twaibukisha ukutalansuka kwa baYuda no kupondoka kwabo. Kanshi icalenga Yehova ukubasenamina te pa mulandu wa kuti nabawaminwa ukusenaminwa iyo. Lelo, kemba wa malumbo Davidi imyanda ya myaka iingi mu kubangilila alembele ati: “Yehova wa nkumbu, kabili wa kusenamina, akokolo kukalipa, kabili afulo luse; te kuti ebaule pe, nangu kusaamo mutima umuyayaya.” (Amalumbo 103:8, 9) Apo ca kutali kuli Yehova ukusuulilila abantu bakwe, acita ica kubalilapo pa fya kutungulula ku kuwikishanya. Cine cine, ni Lesa ‘uubekelwo luse.’—Mika 7:18.

Ukutetekela Ifya Fye

 8. Ni bani abaYuda abengi batetekele, te mulandu no kusokwa nshi?

⁸ Ukufika na nomba abaYuda abengi tabalati batetekele Yehova umupwilapo ukuti e wingabapususha. Ku ca kumwenako, ilyo Yerusalemu talawa, bakateka bakwe bayalukile ku nko isha maka ukuti e sho shibaafwe, bali nga balecita bucilende kuli Egupti na Babele. (Esekiele 16:26-29; 23:14) E ico, Yeremia abasokele ati: “Alitiipwo muntu uutetekela abantunse, uwacito wa mubili e kuboko kwakwe, na kuli Yehova umutima wakwe wafumako.” (Yeremia 17:5) Lelo, ici cine fye e co abantu ba kwa Lesa bacitile!

 9. Ni shani cingaba ukuti abaYuda abengi pambi ‘balepoosa indalama pa cishili cilyo’?

⁹ E co nomba nabatekwo busha ku luko lumo pali shilya batetekelemo. Bushe nabasambililako cimo? Nakalimo abengi tabasambilileko, pantu Yehova abepusha ukuti: “Cinshi ico [mupoosela indalama pa, NW] cishili cilyo, indalama sha mu kucucutika kwenu mu cishili ca ciikushi?” (Esaya 55:2a) Nga ca kuti aba baYuda bankole baletetekela umuntu umbi ukucilo kutetekela Yehova, ninshi ‘balepoosa indalama pa cishili cilyo.’ Cine cine Babele takabalubuleko ne co alikwete ne funde lishalealulwa ilya kukanasuminisha bankole ukubwelela ku mwabo. Ukulanda fye cine, Babele, uwatemwishishe ukuteka inko shimbi, amakwebo, no kupepa kwa bufi, te kuti acitile abaYuda bankole icisuma nangu cimo.

10. (a) Yehova akalambula shani abaYuda bankole nga baumfwa kuli wene? (b) Cipingo nshi Yehova apingene na Davidi?

¹⁰ Yehova apaapaata abantu bakwe atila: “Umfwisheni kuli ine, lyeni ne cisuma, no kuleke myeo yenu iilemene ku fyanona. Teyamikeni amatwi yenu, iseni na kuli ine, umfweni, ukuti mube aba mweo; ndepinga kuli imwe icipingo ca muyayaya, ifya luse ifya cishinka ifyalailwe Davidi.” (Esaya 55:2b, 3) Isubilo lyeka fye ilyo aba bantu ababa ne nsala ya ku mupashi bashele na lyo ni Yehova, uyo nomba alelandila muli Esaya ifyebo fya kusesema kuli bene. Imyeo yabo iine ishintiliile pa kukutika ku bukombe bwa kwa Lesa, pantu atila ni mu kucite co, e mo bali no ‘kubela aba mweo.’ Nga kanshi, ici “cipingo ca muyayaya” ico Yehova akapingana na bamumfwila cinshi? Ico cipingo ca ‘fya luse ifyalailwe Davidi.’ Kale sana, Yehova alaile Davidi ukuti icipuna cakwe cali no ‘kupampamikwa umuyayaya.’ (2 Samwele 7:16) E co, “icipingo ca muyayaya” icalumbulwa pano cakuma ku kuteka.

Impyani ya Muyayaya iya Bufumu bwa Muyayaya

11. Mulandu nshi ubulayo Lesa alaile Davidi pambi bwingamonekela kuli bankole abali mu Babele kwati teti bufishiwepo?

¹¹ Ca cine, ukulanda pa kuteka kwa mu mutande wa kwa Davidi nakalimo kulemoneka nge cintu icishingacitika kuli balya baYuda bankole. Tabakwata calo cabo nangu fye luko lwabo! Lelo ico ca pa kashita fye akanono. Yehova talaba ku cipingo apingene na Davidi. Nangu ku bantunse cingamoneka shani kwati tacingacitika, ubufwayo bwa kwa Lesa pa lwa Bufumu bwa muyayaya mu mutande wa kwa Davidi bukafishiwapo. Lelo bukafishiwapo shani kabili lilali? Mu 537 B.C.E., Yehova afumya abantu bakwe muli bunkole bwa ku Babele no kubabwesesha ku calo cabo. Bushe ici calenga ukuti ubufumu bwa muyayaya bupampamikwe? Iyo, batwalilila ukutekwa ku buteko na bumbi ubwa cisenshi, ubwa Madai na Persia. “inshita yasontwa” ukuti abena fyalo bafishepo ukuteka kwabo icili tailapwa. (Luka 21:24, NW) Apo fye Israele takwete imfumu, ubulayo Yehova alaile Davidi tabuli na kufishiwapo pa myaka iingi ku ntanshi.

12. Cintu nshi cimo Yehova acitile pa kutendeka ukufishapo icipingo ca Bufumu apingene na Davidi?

¹² Palipitile imyaka ukucila pali 500 apo Israele afumiine mu busha bwa mu Babele, e lyo Yehova acitilepo icintu icikalamba ku kufishapo icipingo ca Bufumu lintu akuushishe ubumi bwa Mwana wakwe ibeli, intendekelo ya milimo yakwe iya kulenga, ukufuma ku bukata bwa mu muulu ukwisa mwi fumo lya kwa nacisungu Maria, umuYuda. (Abena Kolose 1:15-17) Pa kubilisha uku kufyalwa, malaika wa kwa Yehova aebele Maria ati: “Wene akabo mukalamba, no kwitwa Umwana wa Wapulamo, kabili Shikulu Lesa akamupeele cipuna ca bufumu ica kwa Davidi wishi: kabili akabe mfumu pa lupwa lwa kwa Yakobo umuyayaya, na ku bufumu bwakwe takwabe impela.” (Luka 1:32, 33) E co Yesu afyalilwe mu mutande wa bufumu uwa kwa Davidi kabili apyene insambu sha bumfumu. Ilyo fye akabikwa pa cipuna ca bufumu, Yesu ali no kuteka “ku muyayaya.” (Esaya 9:7; Daniele 7:14) E fyo inshila nomba yaiswike iya kuti bufishiwepo ubulayo bwa kwa Yehova ubwakokwesha ubwa kucite Mfumu Davidi ukube mpyani ya muyayaya.

“Mushika wa Bantu na Bantu”

13. Bushe Yesu ali shani “inte ku bantu na bantu” mu nshiku sha butumikishi bwakwe na pa numa ya kunina kwakwe ukuya ku muulu?

¹³ Cinshi iyi mfumu ya ku ntanshi ikacita? Yehova atila: “Moneni, namupeele ukube nte ku bantu na bantu, cilongoshi kabili mushika wa bantu na bantu.” (Esaya 55:4) Ilyo Yesu akulile, ali e mwiminishi wa kwa Yehova pe sonde, inte ya kwa Lesa ku nko. Pa nshita ali umuntunse, alungatike ubutumikishi bwakwe ku “mpaanga ishaluba isha ng’anda ya kwa Israele.” Lelo, ilyo ali fye mupepi no kunina ukuya ku muulu, Yesu aebele abakonshi bakwe ati: “E ico kabiyeni, kalengeni aba nko shonse ukuba abasambi . . . Moneni, ine nakulaba na imwe ukufika na pa kupwa kwa nshita.” (Mateo 10:5, 6; 15:24; 28:19, 20) E fyo, mu kupita kwa nshita, ubukombe bwa Bufumu bwatwelwe ku bashali baYuda, kabili bamo muli bene baishileba mu cipingo Lesa apingene na Davidi icafikilishiwe. (Imilimo 13:46) Muli iyi nshila, na pa numa fye ya mfwa yakwe, ukubuushiwa, no kunina ukuya ku muulu, Yesu atwalilile ukubela Yehova “inte ku bantu na bantu.”

14, 15. (a) Bushe Yesu ailangile shani ukuti e “cilongoshi kabili mushika”? (b) Lisubilo nshi abakonshi ba kwa Yesu aba mu mwanda wa myaka uwa kubalilapo bakwete?

¹⁴ Yesu na kabili ali no kuba “cilongoshi kabili mushika.” Nga filya fine uku kusesema kwalondolwele, lintu Yesu ali pe sonde alibombele imilimo ya bumutwe bwakwe kabili e waletungulula muli fyonse, alengele amabumba ayengi ukwisa kuli wene, alebasambilisha ifyebo fya cine, no kubalanga ubusuma ubwisa ku bakonka ubutungulushi bwakwe. (Mateo 4:24; 7:28, 29; 11:5) Alikanshishe bwino abasambi bakwe, ukubapekanya ku kubomba kampeni wa kushimikila uwabalaalilile ku ntanshi. (Luka 10:1-12; Imilimo 1:8; Abena Kolose 1:23) Mu myaka fye itatu na hafu, Yesu aimike intendekelo ya cilonganino caikatana, ica mwi sonde lyonse ica bantu abafuma ku mishobo iingi! Ni “cilongoshi” fye wa cine cine “kabili mushika” e wali no kubomba umulimo ushaikulila ngo yu.b

¹⁵ Abalonganikwe mu cilonganino ca Bwina Kristu ica mu mwanda wa myaka uwa kubalilapo balisubilwe no mupashi wa mushilo uwa kwa Lesa, kabili bakwete isubilo lya kuba impyani shinankwe isha kwa Yesu mu Bufumu bwakwe ubwa ku muulu. (Ukusokolola 14:1) Lelo, uku kusesema kwa kwa Esaya kulelanda pa fikacitika ku ntanshi, te fya mu nshiku fye sha kutendeka kwa buKristu. Ifyacitika kale filango kuti Yesu Kristu tatendeke ukuteka Ubufumu bwa kwa Lesa mpaka mu 1914. Tapakokwele ukutule lyo, ifyalecitika pa kati ka Bena Kristu basubwa pe sonde fyalipalene umwingi kuli filya ifyalecitikila bankole abaYuda mu mwanda wa myaka uwalenga 6 B.C.E. Na kuba, ifyacitikile balya Bena Kristu e fyafishapo nga nshi ukusesema kwa kwa Esaya.

Bunkole bwa Muno Nshiku no Kulubulwa

16. Bulanda nshi bwaishile pa numa ya kubikwa kwa kwa Yesu pa cipuna ca bufumu mu 1914?

¹⁶ Ukubikwa kwa kwa Yesu pa cipuna ca bufumu ku kube Mfumu mu 1914 kwaishibikilwe ku bulanda bwali mu calo ubushatalile abucitikapo kale. Cinshi calengele? Pantu ilyo abele Imfumu, Yesu atamfishe Satana ne fibumbwa fimbi ifya ku mupashi ifibifi ukufifumya ku muulu. Apo nomba apooselwe pano isonde, Satana abuushishe ubulwi ukulwisha abashila abasheleko, abashalapo ba mu Bena Kristu basubwa. (Ukusokolola 12:7-12, 17) Ifintu fyabipiishe mu 1918 ilyo umulimo wa kushimikila kwa ku cintubwingi wapene wiminine kabili lintu abalashi ba Watch Tower Society abaleangalila bapooselwe mu cifungo pa milandu ya kubabepesha fye iya kuti baaleimina ubuteko. Ifi e fyo ababomfi ba kwa Yehova aba muno nshiku basendelwe muli bunkole bwa ku mupashi, nga filya abaYuda ba pa kale basendelwe muli bunkole bwa cine cine. Baliseebene nga nshi.

17. Bushe imibele abasubwa balimo yaishilealuka shani mu 1919, kabili bakoshiwe shani pali iyo nshita?

¹⁷ Lelo, bunkole ababomfi basubwa aba kwa Lesa balimo tabwakokwele. Pa March 26, 1919, abalashi ababikilwe mu cifungo balifumishiwe, na pa numa imilandu yonse bababepeshe yalifutilwe. Yehova apongolwelele umupashi wa mushilo pa bantu bakwe abalubulwa, ukubakosha ku kubombo mulimo wabalaalilile ku ntanshi. Bayankwileko no kusekelela ku bwite bwa ‘kubuulapo ica bupe amenshi ya mweo.’ (Ukusokolola 22:17) Bashitile “umwangashi ne shiba apabulo mutengo” kabili balikoshiwe lwa ku mupashi ku kulunduluka kwa kusungusha ukwali no kubako, ukulunduluka uko abashalapo basubwa bashatalile abamwena libela.

Ibumba Likalamba Lyabutukila ku Wasubwa wa kwa Lesa

18. Mabumba nshi yabili yasangwa pa kati ka basambi ba kwa Yesu Kristu, kabili yapanga cinshi pali lelo?

¹⁸ Abasambi ba kwa Yesu baba ne subilo limo pali aya yabili: Intanshi, “umukuni unono” uwabe mpendwa 144,000 walilonganikwa—e kuti Abena Kristu basubwa abaYuda mu kufyalwa e lyo na Bena fyalo ababa e “Israele wa kwa Lesa” kabili abakwata isubilo lya kuteka pamo na Yesu mu Bufumu bwakwe ubwa ku muulu. (Luka 12:32; Abena Galatia 6:16; Ukusokolola 14:1) Ukukonkapo, muli shino nshiku sha kulekelesha, “ibumba likalamba” ilya “mpaanga shimbi” lyaliilanga apabuuta. Aba muli ili bumba bakwata isubilo lya kwikala umuyayaya mwi sonde lya paradise. Ilyo ubucushi bukalamba bushilatendeka, ili bumba likalamba—abo impendwa yabo ishalingilwa libela—babombela pamo no mukuni unono, kabili aya mabumba yabili yapanga “umukuni umo” uutungululwa no “mucemi umo.”—Ukusokolola 7:9, 10; Yohane 10:16.

19. Bushe “uluko” ulushaishibikwe kuli Israele wa kwa Lesa lwayankula shani ku bwite bwa ulo luko lwa ku mupashi?

¹⁹ Ukulonganya kwa ili bumba likalamba tukwilukila kuli aya mashiwi yakonkapo aya mu kusesema kwa kwa Esaya ayatila: “Moneni, uketo luko ulo ushaishiba, no luko ulushakwishiba [lukakubutukila, NW], pa mulandu wa kwa Lesa obe Yehova, Wa mushilo wa kwa Israele uwakucindamika.” (Esaya 55:5) Mu myaka yakonkelepo pa numa ya kufumishiwa kwabo muli bunkole bwa ku mupashi, abashalapo basubwa pa kubala tabaumfwikishe ukuti ilyo Armagedone ishilaisa bakaba basolwesolwe mu kwita “uluko” lukalamba ukwisa ku kupepa kwa kwa Yehova. Lelo, mu kuya kwa nshita, abengi aba mitima ya bufumacumi abashakwete isubilo lya ku muulu batendeke ukubishanya na basubwa no kulabombela Yehova no kupimpa nga kulya kwine ukwakwatako abasubwa. Aba abapya abailundileko balimwene ukucindamikwa kwa bantu ba kwa Lesa, bailwike ukuti Yehova ali na bo. (Sekaria 8:23) Muli ba1930, abasubwa baishileishiba bwino ili bumba, ilyaleya lilekula mu kati kabo. Baishileiluka ukuti ku ntanshi kwali kucili umulimo ukalamba uwa kulonganika abantu. Ibumba likalamba lyalebutukila ku kwisa ku kubishanya na bantu Lesa apingana na bo icipingo, kabili pali umulandu wacindama balecitile fyo.

20. (a) Mu nshiku shesu, mulandu nshi cipamfiishe ‘ukufwaya Yehova,’ kabili ici cicitwa shani? (b) Bushe Yehova akankulako shani ku bamufwaya?

²⁰ Mu nshiku sha kwa Esaya kwali ubwite bwa kuti: “Fwayeni Yehova ilyo engasangwa, mulilileni ilyo ali mupepi.” (Esaya 55:6) Muno nshiku, aya mashiwi nayalinga bwino, kuli abo abapanga Israele wa kwa Lesa na kwi bumba likalamba ilileya lilekula. Amapaalo ya kwa Yehova tayesa fye apabule fipangano, kabili ubwite bwakwe tabwakatwalilile fye ukwabulo kupwa. Ino e nshita ya kufwaya ukusenamina kwa kwa Lesa. Ilyo ikese nshita yasontwa iya bupingushi bwa kwa Yehova, ninshi inshita ya kumufwaya ikaba naipwa kale. E ico, Esaya atila: “Imbifi ileke imibele ya iko, ne ncitatubi amapange ya iko; babwelele na kuli Yehova, na o akabacite nkumbu, babwelele na kuli Lesa wesu, pantu akabalekelela apakalamba.”—Esaya 55:7.

21. Bushe aba mu luko lwa kwa Israele balanga shani ukubulwa bucishinka ku fyebo bashibo basosele?

²¹ Amashiwi ya kuti “babwelele na kuli Yehova” yalelangilila ukuti abo abafwile ukulapila pa kubala baali fibusa fya kwa Lesa. Aya mashiwi yatucinkulako ukuti ifingi ifyaba muli ici ciputulwa ca kusesema kwa kwa Esaya intanshi filosha ku baYuda bankole abali mu Babele. Imyaka iingi ku numa, bashibo ba aba bankole basosele ifyo balefwaisha ukuba ne cumfwila kuli Yehova ilyo batile: “Ca kutali fye kuli ifwe ukusuula Yehova, no kuyabombele milungu imbi.” (Yoshua 24:16) Ifyacitika filango kuti ico balemona ukuti “ca kutali fye” calecitika fye libili libili! Ukubulwa bucishinka e kwalengele ukuti abantu ba kwa Lesa babe bankole mu Babele.

22. Mulandu nshi Yehova alandila ukuti amapange yakwe ne mibele yakwe fyalisansama ukucile mibele na mapange ya bantunse?

²² Cinshi cikacitika nga balapila? Yehova abalaya muli Esaya ukuti “akabalekelela apakalamba.” Alundapo no kutila: “Pantu amapange yandi te mapange yenu, kabili imibele yenu te mibele yandi, cisemo ca kwa Yehova; awe, ifyo imyulu yasansamo kucile calo, e fyo imibele yandi yapulamo ukucile mibele yenu, na mapange yandi ukucila amapange yenu.” (Esaya 55:8, 9) Yehova alipwililika, kabili amapange yakwe ne mibele yakwe fyalisansama nga nshi. Nangu fye ni nkumbu akwata shalifulisha ica kuti fwe bantunse te kuti twenekele no kukwata inkumbu akwatako. Tontonkanye pali ici: Ilyo twalekelela umuntunse munensu, ninshi twalekelela fye umubembu munensu. Tuleshiba ukuti na ifwe inshita imo tukakabila umuntunse munensu umbi ukutulekelela. (Mateo 6:12) Lelo, Yehova ena, nangula takabila kulekelelwa, alalekelela “apakalamba”! Cine cine, ni Lesa uwafulisho luse. Kabili mu nkumbu shakwe, Yehova alesula ifipunda fya mu muulu, no kupongolwela amapaalo pali abo ababwelela kuli wene ne mitima yabo yonse.—Malaki 3:10.

Amapaalo Kuli Abo Abalebwelela Kuli Yehova

23. Cinshi Yehova abomfya ku kulangilila ukuti nangu cibe shani icebo cakwe cikafishiwapo?

²³ Yehova alaya abantu bakwe, atila: “Ifyo iloke mfula ne mfula yabuuta ukufuma mu muulu, no kukanabwelelamo, lelo itapililo mushili no kuulengo kutwala no kupuuka, wasuka wapeele mbuto kuli katanda ne cilyo ku ulya, e fyo cikabe cebo candi icifuma mu kanwa kandi: tacakabwelele ibusha kuli ine, kano cacite co natemwa, no kushuka muli ico nacitumina.” (Esaya 55:10, 11) Fyonse ifyo Yehova alanda fikafishiwapo tafyakafilwe iyo. Filya fine imfula ne mfula yabuuta iiloka ukufuma mu muulu ibomba umulimo wa iko uwa kutapililo mushili no kulenga ifisabo ukubako, e fyo ne cebo ca kwa Yehova icifuma mu kanwa kakwe caba icacetekelwa conse ciine. Nangu cibe shani akafishapo ifyo alaya.—Impendwa 23:19.

24, 25. AbaYuda bankole abaumfwilile ubukombe bwa kwa Yehova ubo Esaya abaleteele mapaalo nshi balepembelela?

²⁴ E ico, nga ca kutila abaYuda baumfwila ifyebo fyasoselwe kuli bene ukupitila muli Esaya, cine cine bakapokelela ipusukilo Yehova abalaya. Ne ci cikalenga bakabe no kusekelela kukalamba. Yehova atila: “Mukafuma mulesekelela, no [kuletwa, NW] mu mutende; impili no tupili fikapongomoko tupundu ku cinso cenu, ne miti yonse ya mu mpanga ikombelako indupi; pe punda lya cimpuusa ca muunga pakameno mukupri, pe punda lya kaenya pakameno muhadasi; kabili conse ici cikabela Yehova ica kutashe shina, iciishibilo ca muyayaya icishakaputulweko.”—Esaya 55:12, 13.

²⁵ Mu 537 B.C.E., abaYuda cine cine bafumine mu Babele balesekelela. (Amalumbo 126:1, 2) Ilyo bafikile mu Yerusalemu, basangile icalo calisapilwa ne fimpuusa fya myunga na bakaenya—mwilaba ukuti, icalo cali amapopa pa myaka iingi. Lelo abantu ba kwa Lesa ababweshiwa nomba e bali no kwafwako ukusangule calo ukube cayemba! Imiti iitali, pamo ngo mukupri no muhadasi, fyapyene pa myunga na bakaenya. Amapaalo ya kwa Yehova yailangile fye apabuuta ilyo abantu bakwe ‘balepongomoko tupundu’ pa kumubombela. Cali kwati icalo icine e calesekelela.

26. Mapaalo nshi abantu ba kwa Lesa baipakisha pali lelo?

²⁶ Mu 1919 abashalapo ba mu Bena Kristu basubwa balilubwilwe ukufuma muli bunkole bwa ku mupashi. (Esaya 66:8) Capamo ne bumba likalamba ilya mpaanga shimbi, nomba balebombela Lesa no kusekelela muli paradise wa ku mupashi. Apo tabakantaikwa kuli fyonse ifya muli Babele, balisenaminwa, ne ci cabela Yehova “ica kutashe shina.” Ukusanduluka kwabo ukwa ku mupashi kulenge shina lyakwe ukucindikwa kabili kulamusansabika ukuti ni Lesa wa kusesema kwa cine. Ifyo Yehova abacitila filangilila ukuti ni Lesa wa cine no kuti wa cishinka ku cebo cakwe na ku nkumbu alanga abalapila. Shi bonse abatwalilila ‘ukushita umwangashi ne shiba apabule ndalama kabili apabulo mutengo’ basekelele mu kumubombela umuyayaya!

[Amafutunoti]

[Icikope pe bula 234]

AbaYuda ababa ne cilaka ca ku mupashi baleitwa ‘ukwisa ku menshi’ na ku ‘kushita umwangashi ne shiba’

[Icikope pe bula 239]

Yesu ailangile umwine ukuti e “cilongoshi kabili mushika” wa bantu na bantu

[Ifikope pe bula 244, 245]

“Imbifi ileke imibele ya iko”