Icipandwa 18

Yehova Apuupuutule Myeo ya Basokopala

Esaya 57:1-21

 1. Bulayo nshi Yehova alaile, kabili amashiwi yakwe yalenga fipusho nshi ukwipushiwa?

“E FYO asosa uwatumpuka, uwasumbuka, uwaikala [umuyayaya, NW], Wa mushilo e shina lyakwe: Apatumpuka kabili apashila e po naikala, kabili ndi pamo no wafunshika, uwasokopalo mweo, ku kupuupuutule myeo ya basokopala, no kupuupuutule mitima ya bafunshika.” (Esaya 57:15) E fyalembele kasesema Esaya mu mwanda wa myaka uwalenga 8 B.C.E. Finshi fyalecitika mu Yuda ifyalengele ukuti ubu bukombe bube ubwa kukoselesha nga nshi? Bushe aya mashiwi yapuutwamo yafwa shani Abena Kristu pali lelo? Ukubebeta Esaya icipandwa 57 kwalatwafwa ukwasuka ifi fipusho.

‘Mwe Baume, Palameni Kuno’

 2. (a) Ni lilali amashiwi ya muli Esaya icipandwa 57 yamoneka ukuti e lyo yabombele? (b) Bushe ifintu fili shani ku balungama mu nshiku sha kwa Esaya?

² Ulu lubali lwa kusesema kwa kwa Esaya lumoneka kwati lwabombele mu nshiku shakwe shiine. Moneni ifyo ububifi bwalimbile imishila pali ilya nshita: “Umulungami aloba, tapali na muntu uubikapo umutima. Na baume aba luse balelonganikwa ku bafwa, ilyo tapali no wa kwiluka ukuti ni pa mulandu wa kayofi umulungami asendelwa. Aingila mu mutende; batusha pa fya kusendamapo fyabo, bonse abenda muli bumpomfu.” (Esaya 57:1, 2, NW) Umulungami nga awa, tapaba uusakamana. Imfwa yakwe iya kupumikisha taishibikwa. Ukulaalo twa mfwa kumuletelo mutende, kumulubula ku kucula uko abashipepa baleta pali wene, kabili kumupususha ku kayofi. Uluko lwasalwa ulwa kwa Lesa lwalitotobela mu mibele ya kulengo bulanda. Awe mwandi abatwalilila aba bucishinka balingile ukukoseleshiwa ukwishiba ukuti Yehova alamone filecitika kabili akabatungilila!

 3. Ni shani Yehova alanda ku nkulo ibifi iya kwa Yuda, kabili cinshi calenga?

³ Yehova alaalika inkulo ibifi iya kwa Yuda, atila: “Lelo imwe palameni kuno, mwe bana baume ba mwanakashi uucite cimpa, ubufyashi bwa ucito bucende no ucita bucilende.” (Esaya 57:3) Balilinga nga nshi ukulondololwa muli iyo nshila ya museebanya pamo nga abana baume ba ucite cimpa kabili ubufyashi bwa ucito bucende na bucilende. Ukupepa kwa bufi uko bayalukila kusanshamo ukupepo tulubi ukwe shiku no kupupe mipashi e lyo na bucilalelale. E ico, Yehova aipusha aba babembu ati: “Ni pali ani [mwabela ne nshita ya kusangalala, NW], ni pali ani mwasamwina akanwa, no kusenteko lulimi? Bushe imwe tamuli bana ba bupulumushi, ubufyashi bwa kubepa, abailengo lunkumbwa mu mioke, mwi samba lya muti onse uwalelema, abakoma abana amalambo mu mipokapoka, mwi samba lya fimilale fya mu fimabwe ifyasansuka?”—Esaya 57:4, 5.

 4. Mulandu nshi ababifi ba mu Yuda bakwete?

⁴ Ababifi ba mu Yuda bacitila ukupepa kwabo ukwe shiku kabili ukwa cisenshi pa nse fye, ninshi bali “ne nshita ya kusangalala.” Mu bukali bapumya bakasesema ba kwa Lesa abatumwa ku kubalungika, kabili balebakonya pa kusenteka indimi shabo mu musaalula. Nangu bene bana ba kwa Abrahamu, bucintala bwabo bwabalenga ukuba abana ba bupulumushi kabili ubufyashi bwa kubepa. (Esaya 1:4; 30:9; Yohane 8:39, 44) Ilyo bafumina mu mioke mu mpanga, baluminisha abantu mu fya mapepo ya kupepo tulubi. Kabili mwandi uko kwali kupepa ukwakaluka! Pantu na kuba, baipaya fye na bana ba kuifyalila, baba nge nko isho Yehova atamfishe mu calo pa mulandu wa micitile yabo iya muselu!—1 Ishamfumu 14:23; 2 Ishamfumu 16:3, 4; Esaya 1:29.

Ukupongolwela Ilambo lya Mwangashi pa Mabwe

5, 6. (a) Cinshi abekashi ba mu Yuda basalapo ukucita ukucila ukupepa Yehova? (b) Bushe ukupepo tulubi ukuli mu Yuda kubipile shani kabili kwanene shani?

⁵ Shi moneni ifyo abekashi ba mu Yuda baitumpile icabipisha mu kupepo tulubi: “Mu mabwe ayatelela ya mu mumana e mwabe cakaniko cobe, yene, yene e yo mwapendwilwa. Kuli yene kabili e ko upongolwele [ilambo lya mwangashi, NW], e ko uninikile ca buunga. Bushe ni pali ifi e po nkonsolwele umutima?” (Esaya 57:6) AbaYuda bantu abo Lesa apingana na bo icipingo, lelo bakaana ukumupepa no kubuula amabwe ya mu menshi kabili kuli yene bacitako tulesa. Davidi asosele ati Yehova e wali icakaniko cakwe, lelo aba babembu basalilepo ifilubi fya mabwe ifishaba na mweo ukuba ifipendwilo fyabo no kupongolwela ilambo lya mwangashi pali fyene. (Amalumbo 16:5; Habakuki 2:19) Cisansamushi nshi Yehova engasanga mu kupepa kwapaasuke fyo ukwa bantu abainikwa ishina lyakwe?

⁶ Abekashi ba mu Yuda bapepo tulubi mpanga yonse—mu mioke, mu mipokapoka, pa tupili, na mu misumba yabo. Lelo Yehova alemona fyonse ifi, kabili ukupitila muli Esaya, Asokolola ifyo imibele yakwe ibipile atila: “Pa lupili ulwasansama ulwasumbuka wabikapo ica kusendamapo cobe, kabili e po wanina waya ku kwipaye lambo. Ku numa ya fiibi na maingwe e ko wabika ne ciibukisho cobe.” (Esaya 57:7-8a) Pa misansama, e po Yuda acite ca kusendamapo cakwe ica kukowela kwakwe ukwa ku mupashi, kabili palya e po aipaila amalambo kuli balesa bambi bambi.a Nangu fye mayanda ya bantu nayakwata utulubi ku numa ya fiibi na maingwe.

 7. Mibele nshi Yuda akwete ilyo aitumpa mu kupepa kwe shiku?

⁷ Bamo kuti bapapa ico Yuda aitumpila sana mu kupepa kwakowela. Bushe kuli cimo icikalamba icimusongele ukusha Yehova? Awe takuli. Acita fye ku kutemwa kwakwe kabili mu kucincila. Yehova atila: “Ukununuka kuli ine waifuula kuli bambi, wanina, wakushe ca kusendamapo cobe, no kucita na bo icipingo, watemwe ca kusendamapo cabo, wamona pa bwamba.” (Esaya 57:8b) Yuda alicite cipingo na tulesa twakwe utwa bufi, kabili alitemwa bucibusa bwalubana na twene. Ico atemwa maka maka ni bucisenene—cilemoneka kwati alebomfya fye ne fipasho fya bwamba—ifibomfiwa sana mu kupepa kwa utu tulesa!

 8. Ni mu kuteka kwa mfumu nshi maka maka ilyo ukupepo tulubi kwafulile mu Yuda?

⁸ Ubu bulondoloshi pa lwa bucilalelale bwabipisha, no kupepa utulubi ukwa bukalushi, fyalingana ne co twaishiba pa lwa mfumu sha Yuda shimo ishibifi. Ku ca kumwenako, Manase, akuulile imisansama, aimikiile Baali ifipailo, kabili ifipailo fyalebomfiwa mu kupepa kwa bufi afibikile mu mansa shibili ishe tempele. Apishishe abana bakwe abaume mu mulilo, acitile icimpa, no kupendula, kabili atungilile ukupupe mipashi. Imfumu Manase yabikile mwi tempele lya kwa Yehova ne fyabaswa ifya baAshera ifyo yapangile.b Alubanshishe Yuda ku kucito “bubi, ukucile nko isho Yehova afitile.” (2 Ishamfumu 21:2-9) Bamo basumina ukuti Manase e waipeye Esaya, nangu ishina lya kwa Manase talimonekamo muli Esaya 1:1.

“Watuma ne Nkombe Shobe”

 9. Mulandu nshi Yuda atumina inkombe “ukutali”?

⁹ Ubupulumushi bwa kwa Yuda nabucila pa kubombela fye balesa ba bufi. Yehova alandila muli Esaya atila: “Watolo lwendo waya kuli Moleke na mafuta, no kufushe fyatobenkana fyobe fye fungo; watuma ne nkombe shobe shiye ukutali, no kulenga shitentemuke ukufika ku Mbo.” (Esaya 57:9) Ubufumu bwabulwa bucishinka ubwa kwa Yuda bwaile kuli “Moleke,” icipilibula “imfumu” mu ciHebere—uufwile ali ni mfumu ya calo cimbi cimbi—no kumupeela ifya bupe ifyaumo mutengo kabili ifya kucebusha, ifyapashanishiwa ku mafuta na ku fyatobenkana ifye fungo. Yuda atume ntumi ku fifulo fya kutali. Mulandu nshi? Ku kuyanashanasha inko ishisenshi ukuti shumane akapi nankwe mu fya mitekele. Pa kuba nafutatila Yehova, atetekela ishamfumu sha ku fyalo fimbi fimbi.

10. (a) Bushe Imfumu Ahasi afwaya shani ukuumana akapi ne mfumu ya ku Ashuri? (b) Ni mu nshila nshi Yuda ‘atentemushishe inkombe ku Mbo’?

¹⁰ Ica kumwenako cimo ica ici cacitike mu nshiku sha Mfumu Ahasi. Ilyo amwene ukuti Israele aumana akapi na Aramu, ilya mfumu yabulwa bucishinka iya Yuda yatumine inkombe kuli Tiglati-pilesere imfumu yalenga butatu iya Ashuri, no kutila: “Nine mubomfi wenu kabili mwana wenu; nineni no kumpususha mu minwe ya mfumu ya bena Aramu, na mu minwe ya mfumu ya bena Israele, ishanjimina.” Ahasi atuma ifya bupe, silfere na golde ku mfumu ya Ashuri, kabili iyi mfumu yaankulako, yabalamuna ukusansa kwabipisha pali Aramu. (2 Ishamfumu 16:7-9) Mu fyo aleumfwana ne nko ishisenshi, Yuda afwilamine “ku Mbo.” Pa mulandu wa uko kumfwana, ali no kufwa, nelyo ali no kuleka ukuiteka no kuikwatila imfumu.

11. Kucingililwa nshi ukwa cimbepa Yuda ailanga?

¹¹ Yehova atwalilila ukulanda kuli Yuda ati: “Wafunshika ku butali bwa lwendo lobe, lelo tawatila, Icilolelo cabula; wasanga amaka yobe yabwelelamo, ni pali ici tawanenuka.” (Esaya 57:10) Cine cine, ulu luko lwalifunshika mu kukonke nshila sha luko isha busangu, kabili lwalifilwa ukumona ukuicusha kuli mu matukuto ya luko. Lelo, lwaikopeka pa kusumina ukuti ni pa mulandu wa maka lwakwata e co luletungulukila. Lwaimona ukukwata amaka no bumi. We buwelewele we!

12. Mibele nshi yaba mu Kristendomu iyapalana na ilya yali mu Yuda?

¹² Lelo kwaliba akabungwe ako imicitile ya kako yapalana na ilya iya kwa Yuda uwaliko mu nshiku sha kwa Esaya. Kristendomu abomfya ishina lya kwa Yesu, lelo acita ifipangano ne nko kabili aisusha ifilubi mu mayanda yakwe aya kupepelamo. Abakonshi bakwe balabika fye na mu mayanda yabo ifipasho fya tulubi. Kristendomu alisuminisha abacaice ukuba mu nkondo sha fyalo. Ifyo ifi fyonse fikalifya Lesa wa cine, uwaeba Abena Kristu ukuti: “Butukeniko ku kutootelo tulubi”! (1 Abena Korinti 10:14) Ifi Kristendomu aitumpa mu mapolitiki, ‘alicito bulalelale ne shamfumu sha pe sonde.’ (Ukusokolola 17:1, 2) Na kuba, e lubali lukalamba ulutungilila akabungwe ka United Nations. Cinshi cili no kucitikila uyu cilende wa fya mipepele? Cinshi Yehova asosa kuli Yuda wabulwa ubusumino uo Kristendomu apashanishiwako, maka maka filya aleimininwako na Yerusalemu, umusumba wakwe uwa bwangalishi?

‘Ifyo Wakolonganya Tafyakakupokolole’

13. “Bufi” nshi Yuda atendeka ukubepa, kabili amona shani ukushishimisha kwa kwa Yehova?

¹³ Yehova aipusha ati: “Nani watiinine no kuba no mwenso, ica kuti watendeke ukubepa?” (NW) We cipusho ulawama! Cine cine Yuda talanga katiina kene kene aka bukapepa aka kuli Yehova. Aba na katiina, nga tasangwike uluko lwa bakabepa, kabili bakapepa ba tulesa twa bufi. Yehova akonkanyapo ukusosa ati: ‘Tawanjibukisha nangu kubikapo umutima obe. Bushe te ifyo? Ine nabo wafinda, uwafimba pa menso, lelo kuli ine tawayangwa tawantiina.’ (Esaya 57:11) Yehova alifinda, taaleta ukukanda kwa mu kwangufyanya pali Yuda. Bushe Yuda aliiluka no kutasha pali ci? Iyo, lelo amona ukushishimisha kwa kwa Lesa kwati mulekelesha. Takwete katiina nangu panono kuli wene.

14, 15. Cinshi Yehova asosa pa micitile ya kwa Yuda na pa ‘fintu akolonganya’?

¹⁴ Lelo, inshita ya kushishimisha kwa kwa Lesa ili no kupwa. Pa kulanda pali iyi nshita Yehova atila: “Ine nkalongola ubulungami bobe ne micitile yobe, ukuti fyene tafyakakwafwe. Ilyo wakuuta ukuti wafwiwe ifintu wakolonganya tafyakakupokolole, lelo fyonse fiine umwela ukafyulula. Umupu ukafisenda.” (Esaya 57:12, 13a, NW) Yehova ali no kusansalika ubulungami bwa bumbimunda ubwa kwa Yuda. Imicitile yakwe iya bumbimunda tayakamwafwe. ‘Ifintu akolonganya,’ ifilubi atutila, tafyakamupokolole. Ilyo akayofi kakesa, tulesa acetekela tukolulwa fye ku mwela.

¹⁵ Ifyebo fya kwa Yehova fyafishiwapo mu 607 B.C.E. Iyi e nshita Imfumu ya Babele Nebukadnesari aonaula Yerusalemu, aoca itempele, no kusenda abantu abengi bunkole. “E fyo abena Yuda baulwilwe ukufuma mu mpanga yabo.”—2 Ishamfumu 25:1-21.

16. Cinshi cili no kucitikila Kristendomu na bonse ababa muli “Babele Mukalamba”?

¹⁶ Na kuli Kristendomu cimo cine, ifilubi ifishaifulila akolonganya tafyakamupokolole mu bushiku bwa cipyu ca kwa Yehova. (Esaya 2:19-22; 2 Abena Tesalonika 1:6-10) Kristendomu akonawilwa capamo na bashala aba muli “Babele Mukalamba”—ubuteko bwa calo ubwa kupepa kwa bufi. Iciswango cakashika ce ica mampalanya ne nsengo sha ciko 10 “fikamupomona [Babele Mukalamba] no kumucito bwamba; fikalya no mubili wakwe, no kumulungulushisha mu mulilo.” (Ukusokolola 17:3, 16, 17) Ifyo twaba abasekelela pa kuti twalyumfwila ukusoka kwa kuti: “Fumenimo muli wene, mwe bantu bandi, epali mwawilako mu membu shakwe, epali mwakumako ku finkunka fyakwe”! (Ukusokolola 18:4, 5) Shi twikatala atubwelela kuli wene nelyo ku micitile yakwe.

“Uuba Muli Ine Akakwate Calo”

17. Bulayo nshi ‘uuba muli Yehova,’ alaiwa kabili ni lilali bwafishiwapo?

¹⁷ Ni shani pa lwa fyebo fya kusesema ifya kwa Esaya ifyakonkapo? “Uuba muli ine akakwate calo, akapyaninino lupili lwandi lwa mushilo.” (Esaya 57:13b) Ni kuli nani Yehova alelanda pali ino nshita? Talelanda pa kayofi kaleisa lelo alesobela pa kulubulwa kwa bantu bakwe ukufuma muli Babele na pa kubweshiwa kwa kupepa kwasanguluka mu lupili lwakwe ulwa mushilo, Yerusalemu. (Esaya 66:20; Daniele 9:16) Mwandi ici cifwile cakoselesha abaYuda bonse abatwalilila aba cishinka! Yehova alundapo: “Atila: Lundumikeni, lundumikeni, kunguleni inshila, fumyeni ica kuipununako mu nshila ya bantu bandi.” (Esaya 57:14) Ilyo inshita ikafika iya kuti Lesa akapusushe abantu bakwe, ikaba naipekanishiwa inshila, fyonse ifya kuipununako fikaba nafifumishiwamo.—2 Imilandu 36:22, 23.

18. Bushe ukusumbuka kwa kwa Yehova kwalondololwa shani, lelo kwangwa nshi ukwa kutemwa alanga?

¹⁸ Ni pali iyi nshita e lyo kasesema Esaya ashimika amashiwi yambwilwe pa kutendeka atila: “E fyo asosa uwatumpuka, uwasumbuka, uwaikala pa cipuna, Wa mushilo e shina lyakwe: Apatumpuka kabili apashila e po naikala, kabili ndi pamo no wafunshika, uwasokopalo mweo, ku kupuupuutule myeo ya basokopala, no kupuupuutule mitima ya bafunshika.” (Esaya 57:15) Icipuna ca kwa Yehova caba mu muulu umwasumbukisha. Takwabe cifulo cimbi icasumbuka nelyo icatumpuka ukucila pali ici. Ifyo cabe ca kusansamusha ukwishiba ukuti alamwena ifintu fyonse ukufuma pali ici cifulo—te membu sha babifi sheka amona lelo ne micitile ya balungami abesha ukumubombela! (Amalumbo 102:19; 103:6) Kabili, alomfwa ukuteta kwa bacitwo lumanimani no kupuupuutule mitima ya bafunshika. Aya mashiwi yafwile yalifikile pa mitima ya baYuda abalapila aba mu nshiku sha pa kale. Cine cine na ifwe yalatufika pa mitima yesu.

19. Ni lilali ubukali bwa kwa Yehova bupwa?

¹⁹ Amashiwi Yehova akonkeshapo ukusosa na yo yali aya kusansamusha, atila: “Nshakomane umuyayaya, kabili nshakakalipe pe; pantu umweo wa buntunse kuti wafwo mutombo ku cinso candi, imyeo iine iyo nacitile.” (Esaya 57:16) Tapali icibumbwa ca kwa Lesa nangu cimo icingapusuka nga ca kuti icipyu ca kwa Yehova cali ca pe, ica muntapwa. Icawamako fye, nangu cibe fyo, ca kuti ukukalipa kwa kwa Lesa kwa pa kashita fye kanono. Ilyo kwabomba ubufwayo bwa kuko, kulapwa. Ukumfwikisha kwa musango yu ukwapuutwamo kutwafwa ukulundulula ukutasha kwashika pa kutemwa Yehova atemwa ububumbo bwakwe.

20. (a) Cinshi Yehova acita ku ncitatubi iishilapila? (b) Ni mu nshila nshi Yehova asansamushisha umulanda?

²⁰ Twalatesekesha ifingi ilyo Yehova aletwalilila ukulanda. Ica ntanshi atila: “Ku mampuulu ya lwinso lwakwe e ko nakalipiile, nalimuumine, nafishile icinso candi, no kukalipa; na o aya afutatuka mu mibele ya mutima wakwe.” (Esaya 57:17) Ifilubo fyacitilwe pa mulandu wa bufunushi cine cine fyalenga Lesa ukukalipa. Nga umo atwalilila no mutima wafutatuka, Yehova akatwalilila ukuba no bukali. Lelo kuti caba shani nga ca kuti uwafutatuka aumfwila ukusalapula? Lyena Yehova alanga ifyo ukutemwa kwakwe ne nkumbu fimulenga ukucitapo fimo, atila: “Namwene ukwenda kwakwe: . . . Lelo nomba nkamuundapa, nkamutungulula, no kubwesesha ifya kusansamusha kuli wene, [na ku baloosha bakwe, NW].” (Esaya 57:18) Pa numa ya kumusalapula, Yehova aundapa umulanda kabili amusansamushisha capamo na baleloosha nankwe. E mulandu wine mu 537 B.C.E., abaYuda babwelele ku mwabo. Ca cine ukuti Yuda tabalile atekwa kabili ne mfumu iya mu mutande wa kwa Davidi. Lelo, itempele lya mu Yerusalemu lyalikuulilwe cipya cipya, no kupepa kwa cine kwalibweshiwe.

21. (a) Bushe Yehova apuupuutwile shani imibele ya Bena Kristu basubwa mu 1919? (b) Mibele nshi ifwe pa lwesu tulingile ukulundulula?

²¹ Yehova “uwatumpuka,” kabili “uwasumbuka,” ayangilwe ne fingawamina abashalapo basubwa mu 1919. Pa mulandu wa bulanda bwabo, no kuicefya kwabo, uyu Lesa mukulu, Yehova, mu luse lwakwe amwene ukumanama kwabo no kubafumya muli bunkole bwa muli Babele. Afumishepo fyonse ifya kuipununako no kubatungulula ku buntungwa pa kuti bengamupepa mu kusanguluka. E fyo Icebo ca kwa Yehova ico alandiile muli Esaya cafishiwepo pali ilya nshita. Kabili muli yalya mashiwi mwaliba ifishinte fya muyayaya ifibomba na kuli ifwe umo umo. Yehova apokelela fye ukupepa ukufuma ku bantu abapetama. Kabili nga umo pa babomfi ba kwa Yehova abembuka, alingile ukwangufyanya ukusumina icilubo cakwe, ukupokelela ukwebaulwa, no kulungika imibele yakwe. Shi twikatala atulaba ukuti Yehova alondapa no kusansamusha abaicefya lelo “acincintila aba miiya.”—Yakobo 4:6.

‘Umutende ku wa Kutali no wa Mupepi’

22. Fintu nshi Yehova asobela ukuti e fikacitikila (a) abalapila? (b) ababifi?

²² Pa kucilanya ifikacitikila abalapila ku fikacitikila abatwalilila mu mibele yabo iibi, Yehova atila: “[Ndelenga icisabo ca milomo, NW]; umutende, umutende ku wa kutali no wa mupepi; kabili nkamuundapa. Lelo imbifi shili nga bemba uusunkaniwa, pantu afilwo kutekanya, na menshi yakwe yendulo lutikiti na matipa; tapali mutende ku mbifi.”—Esaya 57:18b-21.

23. Bushe icisabo ca milomo cinshi, kabili ni shani Yehova “alelenga” ici cisabo?

²³ Icisabo ca milomo lilambo lya malumbo ilituulwa kuli Lesa, e kutila, ukubilisha pe shina lyakwe pa cintubwingi. (AbaHebere 13:15) Bushe Yehova ‘alelenga’ shani uko kubilisha pa cintubwingi? Pa kuti atuule ilambo lya malumbo, umuntu alingile intanshi asambilila pa lwa kwa Lesa no kumutetekela. Icitetekelo, icaba cisabo ca mupashi wa kwa Lesa cilenga uyo muntu ukwebako bambi ifyo aumfwa. Mu nshila imbi kuti twatila, alabilisha pa cintubwingi. (Abena Roma 10:13-15; Abena Galatia 5:22) Tulingile no kwibukisha ukuti ni Yehova e utuma ababomfi bakwe ukubilisha pa lwa kumutasha. Kabili ni Yehova e ulubula abantu bakwe, ku kuleka batuule amalambo ya musango yo aya kutasha. (1 Petro 2:9) E ico, kuti caba fye bwino ukusosa ukuti Yehova e ulelenga ici cisabo ca milomo.

24. (a) Ni bani beshiba pa lwa mutende wa kwa Lesa, kabili finshi fitumbukamo? (b) Ni bani bashiishiba umutende, kabili cinshi cibacitikila?

²⁴ Mwandi cisabo ca kucincimusha ica milomo ico abaYuda bafwile balepeela ilyo babwelela ku calo cabo ninshi baleimba ne sha malumbo kuli Yehova! Bafwile nabasekelela pa kwishiba pa lwa mutende wa kwa Lesa, konse uko bali, nampo nga bali “ukutali”—ukutali sana ukufuma kuli Yuda, pa nshita balepembelela ukubweluluka—nelyo nga bali “mupepi”—mulya mwine mu calo cabo. Lelo mwandi ifintu nafiibela nga nshi ku babifi! Bonse abakaana ukumfwila ifya kusalapula fya kwa Yehova, e kutila ababifi nelyo bengaba ba musango nshi na konse uko bengaba, tabengakwata mutende nangu panono. Pa kululunkaniwa nga bemba uusunkaniwa, batwalilila ukwindulo “lutikiti na matipa,” e kutila conse icakowela, no kukanatwala icisabo ca milomo.

25. Bushe abengi aba kutali na ba mupepi baleishiba shani umutende?

²⁵ Na lelo line, bakapepa ba kwa Yehova konse konse balabilisha imbila nsuma pa lwa Bufumu bwa kwa Lesa. Konse uko Abena Kristu baba mu fyalo ificilile pali 230 balapeela icisabo ca milomo yabo, ukubilisha amalumbo ya kutasha Lesa wine wine eka. Isha malumbo isho bemba shilomfwika “ukutula pa mpela sha pano isonde.” (Esaya 42:10-12) Abakutika ku fyo babilisha no kumfwila fyene balapokelela icine ca mu Cebo ca kwa Lesa, Baibolo. Aba musango yo baleishiba umutende, uufuma mu kubombela “Lesa wa mutende.”—Abena Roma 16:20.

26. (a) Cinshi cili no kucitikila ababifi? (b) Bulayo nshi ubukalamba abalanda balaiwa, kabili cinshi tulingile ukupampaminapo?

²⁶ Ca cine, ababifi tabakutika ku bukombe bwa Bufumu. Lelo, kwashala panono ilyo tabakasuminishiwe ukupumfyanya umutende wa balungami. Yehova alaya ati, “Pashala panono, e lyo umubifi takabepo.” Abooba muli Yehova bakapyaninine calo mu kusungusha. “Abalanda bakapyaninine calo, no kuilemeno bwingi bwa mutende.” (Amalumbo 37:10, 11, 29) Mwandi isonde lyesu likasanguke cifulo icayemba nga nshi pali iyo nshita! Shi ifwe bonse natupampamine pa kukanalufya umutende wa kwa Lesa, pa kuti tukembile Lesa isha malumbo umuyayaya umuyayaya.

[Amafutunoti]

[Icikope pe bula 263]

Yuda acito kupepa kwe shiku mwi samba lya muti onse uwalelema

[Icikope pe bula 267]

Yuda akuula ifipailo mu calo conse

[Icikope pe bula 275]

“Ndelenga icisabo ca milomo”