Ukupala Inkunda Ishilepupuka Ukuya ku Fitele fya Shiko

INKUNDA nakalimo shali pa kati ka fyuni fya kubalilapo ukutekwa no muntu. Amakana ya myaka ayapitapo, abena Egupti—mu kupekanishisha ifya kulya fya mwaka ukushinguluka—bakuulile ifitele mupepi na mayanda yabo. Inama ya nkunda yalitashiwe apakalamba, kabili amatotoli ya shiko yabomfiwe ngo mufundo. Ukufika mu Nkulo sha pa Kati, ifitele fyali fikwatwa fyatemwikwa nga nshi ica kuti mu fyalo fimo bakankaala fye beka nelyo abacindikwa aba butotelo e basuminishiwe ukukwata fyene.

Nangu cingati inkoko nomba shalipyana pa fipeele nge ntulo ya munani mu mayanda ayengi, ifitele fya pa kale kuti fyasangwa. Ifitele fyalangishiwa pano fisangwa mu Egupti.

Ukubwela shonse pamo mu nshita ya bushiku, ikumbi lya cine cine ilya fyuni fikilila pa fitele. Kasesema umuHebere Esaya aloseshe kuli ici lintu aipwishe ukuti: “Finshi ifi fipupuka nge kumbi, kabili nge nkunda ku miinshi ya shiko?” Ubupilibulo na bumbi bucibika ukuti: “Finshi ifi ifyendela pamo nge kumbi, ifyo fipupuka nge nkunda mu fitele fya shiko?”—Esaya 60:8, The New English Bible.

Icasuko cilasangwa ilelo mu myanda ya makana ya bantu batiina Lesa abalekonkomokela ku kuteyanya kwa kwa Yehova. Mu Mayanda ya Bufumu aya Nte sha kwa Yehova, basambilila ukusubila muli Lesa. (Esaya 60:9) Pa kati ka bantu ba kwa Lesa, basanga ukuti ifyakatamikwa fya ku mupashi, icitetekelo icumi, na bucibusa butuntulu fisonga itontonkanyo lya mutende no mutelelwe ukupala uyo usangwa ku nkunda mu citele ca iko.

[Abatusuminishe Ukubomfya Icikope pe bula 32]

Pictorial Archive (Near Eastern History) Est.