Icipandwa 22

Ubulungami Bwapuuka mu Sione

Esaya 61:1-11

1, 2. Kwaluka nshi kuli no kucitikila Israele, kabili nani akalenga kwene?

LEKENI ukulubulwa kubilishiwe! Yehova napanga ukulubula abantu bakwe no kubabwesesha ku calo ca fikolwe fyabo. Ukupepa kwa cine kuli no kumoneka na kabili nga filya ulubuto lupuuka pa numa ya kumima kwa mfula. Ilyo ubo bushiku bukafika, apali ukupeleelwa pakabo kutasha kwa kusekelela, ne mitwe iyasubilwe imito ya kuloosha ikafwikwe cilongwe ca kusenamina kwa bulesa.

² Nani akaleta uku kwaluka kwa kusungusha? Ni Yehova fye e wingacite cintu ca musango yo. (Amalumbo 9:19, 20; Esaya 40:25) Kasesema Sefania asesemene abantu ica kucita ilyo atile: “Aula, we mwana mwanakashi Sione; welesha, we Israele; samwa no kwanga umutima onse, we mwana mwanakashi Yerusalemu. Yehova nafumyapo ifyapingwililwe pali iwe.” (Sefania 3:14, 15) Kwena iyo ikaba ni nshita ya kwaula! Ilyo Yehova akalonganya abashalapo babweshiwa ukufuma ku Babele mu 537 B.C.E., cikaba kwati ifyo baleloota fyasanguka ifya cine cine.—Amalumbo 126:1.

 3. Kufishiwapo nshi ifyebo fya kusesema ifya kwa Esaya icipandwa 61 fyafishiwapo?

³ Uku kubweshiwa kwalisobelwa muli Esaya icipandwa 61. Lelo, nangu kwena kulya kusesema kwalifishiwepo mu 537 B.C.E., kwafishiwapo muli tonse pa nshita ya ku ntanshi. Ukufishiwapo ukwa fyonse ifyali muli uku kusesema kusanshamo Yesu na bakonshi bakwe mu mwanda wa myaka uwa kubalilapo e lyo na bantu ba kwa Yehova aba muno nshiku. Cine cine, ifi fyebo fyapuutwamo fyalicindama nga nshi!

“Umwaka wa Luse”

 4. Mu kufishiwapo kwa ntanshi ukwa kwa Esaya 61:1 nani atuminwe ku kubile mbila nsuma, kabili nani atuminwe mu kufishiwapo kwa bubili?

⁴ Esaya alemba ati: “Umupashi wa kwa Shikulu Yehova waba pali ine, pa kuti Yehova ansubila ku kubile mbila nsuma ku balanda; antuma ku kukakililako [abanakuka imitima, NW] ku kubilisha kuli bankole ukulubuka, na ku bakakwa ukwiswilwa [amenso, NW].” (Esaya 61:1) Nani uyu uwatumwa ukubile mbila nsuma? Alemoneka ukuti, mu kubalilapo fye ni Esaya, uupuutilwemo kuli Lesa ukulemba imbila nsuma kuli bankole mu Babele. Lelo, Yesu alandile pa lwa kufishiwapo kwacindamisha ilyo ailungatike ifi fyebo umwine. (Luka 4:16-21) Ca cine, Yesu atuminwe ku kubile mbila nsuma ku balanda, na pali ici asubilwe no mupashi wa mushilo ilyo alebatishiwa.—Mateo 3:16, 17.

 5. Ni bani bashimikila imbila nsuma pa myaka nalimo 2,000?

⁵ Kabili, Yesu asambilishe abakonshi bakwe ukuba bakabila, nelyo bakashimikila ba mbila nsuma. Pa Pentekoste wa mu 33 C.E., bakashimikila ba mbila nsuma nalimo 120 balisubilwe no mupashi wa mushilo kabili basangwike abana ba ku mupashi aba kwa Lesa. (Imilimo 2:1-4, 14-42; Abena Roma 8:14-16) Na bo bene balituminwe ku kubile mbila nsuma ku balanda na ku banakuka imitima. Balya 120 e babalilepo muli ba 144,000 ukusubwa muli uyu musango. Aba kulekeleshako muli ili bumba lya bashalapo bacili abapimpa pano isonde na lelo. E ico, pa myaka nalimo 2,000, abakonshi basubwa aba kwa Yesu balishimikila pa lwa “kulapila kuli Lesa no kutetekela kuli Shikulwifwe Yesu Kristu.”—Imilimo 20:21.

 6. Ni bani bapokelele ukwilulukwa pa kumfwa imbila nsuma iyabililwe mu nshita sha pa kale, kabili caba shani pali lelo?

⁶ Ubukombe bwapuutwamo ubwa kwa Esaya bwalengele abaYuda abalapila abali mu Babele ukwilulukwa. Mu nshiku sha kwa Yesu na basambi bakwe, ubu bukombe bwaletele ukwilulukwa ku baYuda abali ne mitima iyanakuka pa mulandu wa bubifi bwali mu Israele kabili abalebombomana muli bunkole bwa ku fishilano fya mu mipepele ya bufi iya buYuda bwa mu mwanda wa myaka uwa kubalilapo. (Mateo 15:3-6) Pali lelo imintapendwa ya bantu abaikatwa mu fiteyo fya ntambi sha cisenshi ne fishilano mu Kristendomu ifisaalula Lesa ‘baleteta no kulila’ pa mulandu wa fya muselu ificitwa muli ulya musango wa mipepele. (Esekiele 9:4) Abankula ku mbila nsuma balalubulwa kuli iyi mibele ya bulanda. (Mateo 9:35-38) Amenso yabo aya kwiluka ifintu yalesulwa ilyo basambilila ukupepela Yehova “mu Mupashi na mu cine.”—Yohane 4:24.

7, 8. (a) Bushe iyi ‘myaka ya luse’ ibili myaka nshi? (b) Bushe ‘inshiku sha cilandushi ca kwa Yehova’ ni shili kwi?

⁷ Kwaliba inshita yapimwa iya kubilamo imbila nsuma. Yesu na bakonshi bakwe batuminwe: “Ukubilisho mwaka wa luse lwa kwa Yehova, no bushiku bwa cilandushi ca kwa Lesa wesu, ku kusansamusha bonse abaloosha.” (Esaya 61:2) Umwaka ni nshita iyalepa, lelo walikwate ntendekelo ne mpela. “Umwaka wa luse” lwa kwa Yehova ni nshita ilyo apeela ishuko ku balanda ukuti bankule ku kubilisha kwakwe pa lwa kulubulwa.

⁸ Mu mwanda wa myaka uwa kubalilapo, umwaka wa luse ku baYuda watendeke mu 29 C.E. ilyo Yesu atendeke ubutumikishi bwakwe ubwa pe sonde. Aebele abaYuda ati: “Lapileni, pantu ubufumu bwa mu muulu nabupalama.” (Mateo 4:17) Ulya mwaka wa luse e ko wali mpaka ukwisafika ku “bushiku bwa cilandushi” ca kwa Yehova, ubwafikile pa kalume mu 70 C.E. ilyo Yehova asuminishe imilalo ya bena Roma ukonaula Yerusalemu ne tempele lya uko. (Mateo 24:3-22) Ifwe pali lelo tuleikala mu mwaka na umbi uwa luse, uyo uwatendeke ilyo Ubufumu bwa kwa Lesa bwaimikwe mu myulu mu 1914. Kukaba na bumbi ubushiku ubukesa pa numa ya uyu mwaka wa luse, ubukaba bushiku bukalamba ubwa cilandushi ilyo Yehova akaleta ubonaushi pa bwikashi bwa cino calo conse pa nshita ya “bucushi bukalamba.”—Mateo 24:21.

 9. Ni bani lelo bamwenamo mu mwaka wa luse lwa kwa Yehova?

⁹ Ni bani lelo bamwenamo mu mwaka wa luse lwa kwa Lesa? Ni abo abapokelela ubukombe, abafuuka, kabili abatungilila ukubilisha pa lwa Bufumu bwa kwa Lesa mu “nko shonse.” (Marko 13:10) Aba musango yo basango kuti imbila nsuma ilapeele cisansamushi cine cine. Lelo, abo abakana ubu bukombe, abashishukila umwaka wa luse lwa kwa Yehova, nomba line bali no kwisacimona pa bushiku bwa cilandushi cakwe.—2 Abena Tesalonika 1:6-9.

Ifisabo fya ku Mupashi Ificindamika Lesa

10. Bushe abaYuda abalebweluluka ukufuma ku Babele baumfwa shani pa mulimo ukalamba Yehova abacitila?

¹⁰ AbaYuda ababwela ukufuma ku Babele bailuka ukuti umulimo Yehova abacitila uukalamba nga nshi. Ukuloosha kwabo ilyo bali bankole kwasanguko kusekelela no kutasha pantu nomba basuka balubulwa. E ico, Esaya afishapo umulimo wakwe uwa mu kusesema, e kuti, ‘ku kufumba abaloosha pali Sione, ku kupeela kuli bene umwaala pe punda lya mito, amafuta ya kusekelela pe punda lya kuloosha, umwingila wa kutasha pe punda lya mutima wa kutuusuka; no kuleka betwe [imiti ikalamba, NW] iya bulungami, iyalimbwa kuli Yehova, ku kuleka acindamikwe.’—Esaya 61:3.

11. Ni bani mu mwanda wa myaka uwa kubalilapo balekabila ukutasha Yehova pa mulimo wakwe uukalamba?

¹¹ Mu mwanda wa myaka uwa kubalilapo, abaYuda abasumine ukulubulwa mu busha bwa kupepa kwa bufi balitashishe Lesa na pa mulimo ukalamba abacitile. Pe punda lya mutima wabo uwa kutuusuka paishile “umwingila wa kutasha” ilyo balubwilwe ukufuma mu luko ulwafwa ku mupashi. Abasambi ba kwa Yesu e babalilepo ukupita muli uko kwaluka ilyo ukuloosha baleloosha imfwa yakwe kwayalwike ukusekelela lintu Shikulu wabo uwabushiwa abasubile no mupashi wa mushilo. Tapapitile na nshita, ukwaluka kumo kwine e kwapitilemo na bantu 3,000 abafuuka abayankwile ku kushimikila kwa balya Bena Kristu abasubilwe fye pali ilya ine nshita kabili balibatishiwe pa Pentekoste wa mu 33 C.E. (Imilimo 2:41) Mwandi cifwile caliweme ukucetekela ukuti Yehova ali no kubapaala! Ukucilo ‘kuloosha pali Sione,’ bapokelele umupashi wa mushilo kabili balipembeswilwe ku “mafuta ya kusekelela,” ayemininako ukusekelela kwa abo abapaalwa apakalamba kuli Yehova.—AbaHebere 1:9.

12, 13. (a) Ni bani bali “imiti ikalamba iya bulungami” pa baYuda abalebweluluka mu 537 B.C.E.? (b) Ni bani baba “imiti ikalamba iya bulungami” ukutula pa Pentekoste wa mu 33 C.E.?

¹² Yehova apaala abantu bakwe pa kubapeela “imiti ikalamba iya bulungami.” Bushe iyi miti ikalamba ni bani? Mu myaka ya pa numa ya 537 B.C.E., bali bantu abalebelenga no kwetetula pa Cebo ca kwa Lesa kabili abalundulwile ifipimo fya mibele yalungama iya kwa Yehova. (Amalumbo 1:1-3; Esaya 44:2-4; Yeremia 17:7, 8) Abaume pamo nga Esra, Hagai, Sekaria, na Shimapepo Mukalamba Yoshua cine cine bali “miti ikalamba”—abaume abashangiliile icine kabili abalecincintila ifingakowesha ulu luko lwa ku mupashi.

¹³ Ukufuma pa Pentekoste wa mu 33 C.E. ukuya na ku ntanshi, Lesa alimbile mu mpanga ya ku mupashi iya luko lwakwe ulupya, “imiti ikalamba iya bulungami” iyapala kuli iyi—e kuti Abena Kristu basubwa abashipa. (Abena Galatia 6:16) Pa numa ya myaka iingi, iyi “miti” yafika ku mpendwa ya bantu 144,000, abatwale fisabo fya bulungami ku kuyemfya, nelyo ukucindamika, Yehova Lesa. (Ukusokolola 14:3) Aba kulekeleshako muli iyi “miti” yapuulama balilunduluka mu myaka yonse iyi ukutula mu 1919, ilyo Yehova abuukulwile abashalapo ba muli Israele wa kwa Lesa ukuti batendeke ukubomba na kabili pa numa ya kuleka pa nshita inono. Pa kubapeela amenshi ya ku mupashi ayengi, Yehova aliletako icapala umutengo wa miti ya bulungami iitwale fisabo.—Esaya 27:6.

14, 15. Milimo nshi bakapepa ba kwa Yehova ababweshiwe batendeke ukucita mu (a) 537 B.C.E.? (b) 33 C.E.? (c) 1919?

¹⁴ Esaya atwalilila ukulanda pa mulimo ukalamba iyi “miti” ibomba ati: “Bakakuule fibolya fya muyayaya, no kwimya [ififulo fya kale ifyapomoka, NW]; bakalenga cipya cipya imishi ya mapopa, [ififulo ifyabe fyapomoka, NW] ku nkulo ne nkulo.” (Esaya 61:4) Pa kukonke cipope ca Mfumu Koreshe iya ku Persia, abaYuda ba busumino ababwelulwike ukufuma ku Babele bakuulile cipya cipya Yerusalemu ne tempele lya uko, ifyaleele amapopa pa nshita ntali. Mu myaka ya pa numa ya 33 C.E. na 1919 na mo mwali no kucitika imilimo ya kubwesha ukupepa kwasanguluka.

¹⁵ Mu 33 C.E., abasambi ba kwa Yesu bali no bulanda icine cine pa kwikatwa, ukulubulushiwa, no kwipaiwa kwakwe. (Mateo 26:31) Lelo ubulanda bwabo bwalyalwike ilyo amonekele kuli bene pa numa ya kubuushiwa kwakwe. Kabili ilyo fye umupashi wa mushilo wapongolwelelwe pali bene, balipamfiwe mu mulimo wa kushimikila imbila nsuma, “mu Yerusalemu, na monse mu Yudea na Samaria, no kufika ku mpela ya pano nse.” (Imilimo 1:8) E fyo batendeke ukubwesha ukupepa kwasanguluka. Mu nshila imo ine, ukutendeka mu 1919 ukuya ku ntanshi Yesu Kristu alengele abashalapo ba muli bamunyina abasubwa ukukuula cipya cipya “ififulo ifyabe fyapomoka ku nkulo ne nkulo.” Pa myaka iingi bashimapepo ba mu Kristendomu balifililwe ukusambilisha abantu ukwishiba Yehova, lelo bapyanikepo ifishilano fya bantu ne fifundisho fishili fya mu malembo. Abena Kristu basubwa bafumishe mu filonganino fyabo imicitile iyakoweshiwe ku mipepele ya bufi pa kuti ukubweshiwa kwa kupepa kwa cine kwingaya pa ntanshi. Kabili batendeke umulimo uwali no kwisaba kampeni wakulisha uwa kushimikila uushatala aucitikapo kale pali cino calo.—Marko 13:10.

16. Ni bani bafwilisha Abena Kristu basubwa mu mulimo wabo uwa kubwesha ukupepa kwasanguluka, kabili milimo nshi baseekeshiwa?

¹⁶ Uyu wali mulimo uushaikulila bapeelwe. Bushe abashalapo ba muli Israele wa kwa Lesa abali abanono nga nshi bali no kubomba shani umulimo wa musango yo? Yehova apuutilemo Esaya ukusoso kuti: “Abeni bakema no kuceme mikuni yenu, na bambi bambi bakaba aba kumulimino mushili, kabili aba kumulimine myangashi.” (Esaya 61:5) Aba abeni na bambi bambi aba mampalanya baba “libumba likalamba” ilya “mpaanga shimbi,” isha kwa Yesu.a (Ukusokolola 7:9; Yohane 10:11, 16) Bena tabasubwa no mupashi wa mushilo ukuti bakakwate ica bupyani ca mu muulu. Lelo, bakwate subilo lya bumi bwa muyayaya pali paradise wa pe sonde. (Ukusokolola 21:3, 4) Lelo, na bo bene balitemwa Yehova kabili baliseekeshiwa imilimo ya bucemi, ukulimo mushili, no kulime myangashi, lwa ku mupashi. Iyo milimo te milimo yasuulwa. Pa kutungululwa na bashalapo ba muli Israele wa kwa Lesa, aba bakabomba balafwilisha mu kucema, mu kusakamana, na mu kulobolola abantu.—Luka 10:2; Imilimo 20:28; 1 Petro 5:2; Ukusokolola 14:15, 16.

17. (a) Bushe aba muli Israele wa kwa Lesa baketwa shani? (b) Lilambo nshi lyeka fye ilifwaikwa ku kulekelelwa imembu?

¹⁷ Ni shani pa lwa kwa Israele wa kwa Lesa? Yehova alandila muli Esaya kuli bene ati: ‘Imwe muketwa Bashimapepo ba kwa Yehova, bakasosela imwe, abati, ni Bakapyunga ba kwa Lesa wesu; mukalalye fyuma fya nko, no kuitakishisha mu bukata bwa shiko.’ (Esaya 61:6) Muli Israele wa pa kale, Yehova abikileko bashimapepo abena Lebi ukutuula amalambo ya bena Israele banabo e lyo na malambo yabo abene. Lelo, mu 33 C.E., Yehova alekele ukubomfya bashimapepo abena Lebi kabili abikileko imitantikile iyacililepo kuwama. Apokelele ubumi bwapwililika ubwa kwa Yesu ubwapeelwe ukube lambo lya pa membu sha bantu. Ukutula lilya, tapaba kabili ilambo limbi ilyakabilwa ukupeelwa. Ilambo lya kwa Yesu libomba ku nshita yonse.—Yohane 14:6; Abena Kolose 2:13, 14; AbaHebere 9:11-14, 24.

18. Ni bushimapepo bwa musango nshi Israele wa kwa Lesa apanga, kabili mulimo nshi apeelwa?

¹⁸ Kanshi, ni shani, aba muli Israele wa kwa Lesa baba “bashimapepo ba kwa Yehova”? Pa kulemba ku Bena Kristu banankwe abasubwa, umutumwa Petro atile: “Imwe muli lupwa ulwasalwa, bushimapepo bwa bufumu, uluko lwa mushilo, abantu abo aikwatila, kuleka balondolole ifya bulumba fya wamwitile ukuti mufume mu mfifi mwingile mu lubuuto lwakwe ulwapesha amano.” (1 Petro 2:9) Kanshi, Abena Kristu basubwa, bonse pamo, e bapanga ibumba lya bushimapepo ilyapeelwa umulimo wa kulungatika: uwa kwebe nko pa lwa bukata bwa kwa Yehova. Balingile ukube nte shakwe. (Esaya 43:10-12) Muli ishi nshiku shonse isha kulekelesha, Abena Kristu basubwa balibomba uyu mulimo wacindama muli bucishinka. Na pa mulandu wa kubomba kwabo, imintapendwa ya bantu nomba balebombela pamo na bo mu kushimikila pa lwa Bufumu bwa kwa Yehova.

19. Mulimo nshi Abena Kristu basubwa bakakwate shuko lya kubomba?

¹⁹ Kabinge, aba muli Israele wa kwa Lesa baba ne cilolelo ca kubomba bushimapepo bwa musango umbi. Ilyo bafwa, balabuushiwa ukuyaba no bumi bwa ku mupashi ku muulu ubwa kukanafwa. Kulya baya mu kuba bakateka pamo na Yesu mu Bufumu bwakwe e lyo no kuba bashimapepo ba kwa Lesa. (Ukusokolola 5:10; 20:6) Apo bakabe fyo, bakapeelwe shuko lya kuleta amapaalo yakafuma mwi lambo lya cilubula ilya kwa Yesu ku bantu aba busumino pe sonde. Mu cimonwa ico umutumwa Yohane amwene icalembwa mu Ukusokolola icipandwa 22, na kabili balondololwa ukuti ‘miti.’ Iyi “miti” yonse, e kuti ba 144,000, yamonwa ili mu muulu, iletwale ‘fisabo ikumi na fibili, iitwala ifisabo cila mweshi. Kabili amabula ya iyi miti yaba ya kundapilako inko.’ (Ukusokolola 22:1, 2) Mwandi uyu mulimo wa bushimapepo uwa kusungusha!

Pa Nsoni no Musaalula, Pakonko Kusekelela

20. Te mulandu no kukaanya bapitamo, kupaalwa nshi aba muli bushimapepo bwa bufumu balepembelela?

²⁰ Ukutula mu 1914 ilyo umwaka wa luse uwa kwa Yehova watendeke, aba muli ubu bushimapepo bwa bufumu balipita mu kukaanya kwa mutatakuya ukufuma kuli bashimapepo ba mu Kristendomu. (Ukusokolola 12:17) Lelo, amatukuto yonse aya kwesho kulesho kushimikila imbila nsuma kuli pele pele tayabomba. Ukusesema kwa kwa Esaya kwasobele ci, akuti: “Pe punda lya nsoni shenu mukaba ne cakaniko ca miku ibili, pe punda lya musaalula mukasekelela mu cikwatwa cenu; e ico mu calo cenu mukakwate cakaniko ca miku ibili, ukusekelela kwa muyayaya kukaba kuli imwe.”—Esaya 61:7.

21. Bushe Abena Kristu basubwa baishilekwata shani icakaniko ca miku ibili ica mapaalo?

²¹ Mu Nkondo ya Calo iya Kubalilapo, abashalapo basubwa balilengelwe nsoni no kusaalulwa kuli Kristendomu waba na kapaatulula ka luko. Bashimapepo na bo baali pa bantu ababepeshe bamunyina ba busumino aba pa maofeshi yakalamba mu Brooklyn imilandu ya kupinuna ubuteko. Aba bamunyina babikilwe mu cifungo pa myeshi 9 pa mulandu fye wa lufyengo. Kuli pele pele, muli shinde wa mu 1919, balikakwilwe, na pa numa imilandu yonse iyo bababepeshe yalifuutilwe. E co ipange lya kufwaya ukwimika umulimo wa kushimikila talyabombele. Yehova talekele bakapepa bakwe ukulengwe nsoni pa nshita ntali, lelo alibalubwile no kubabwesesha ku mpanga yabo iya ku mupashi, ku ‘calo cabo.’ Kulya e ko bapokelele icakaniko ca miku ibili ica mapaalo. Ukupaala Yehova abapaalile kwafumishepo fyonse ifyo bapitilemo. Cine cine mwandi ni nsambu kuti basekelela!

22, 23. Bushe Abena Kristu basubwa bapashanya shani Yehova, kabili aabalambula shani?

²² Ifyo Yehova akonkeshapo ukusosa na fyo filenga Abena Kristu ukusekelela pali lelo, atila: “Ine Yehova natemwo bupingushi, napato kwiba no bupondamishi; e ico nkabapeele cilambu cabo mu cishinka, nkapinga kuli bene ne cipingo ca muyayaya.” (Esaya 61:8) Ukupitila mu kusambilila Baibolo, abashalapo basubwa basambilile ukutemwo bupingushi no kupato bubifi. (Amapinda 6:12-19; 11:20) Basambilile ‘ukufule mpanga shabo ukube fya kuliminako mushili,’no kukanaitumpa mu nkondo na mu fikansa fya calo ifya pa mitekele. (Esaya 2:4) Na kabili bashiile ne misango yonse iisaalula Lesa, pamo nga ulwambo, ubucende, ubupupu, na bucakolwa.—Abena Galatia 5:19-21.

²³ Pa mulandu wa kuti Abena Kristu basubwa balapashanya Kabumba wabo mu kutemwo bupingushi, Yehova alibapeela “icilambu cabo mu cishinka.” Cimo pali ifyo ‘filambu’ cipingo ca muyayaya—icipingo cipya—ico Yesu alumbwile ku basambi bakwe mu nshita ya bushiku ilyo ashilafwa. Ni pali ici cipingo e po basangukila uluko lwa ku mupashi, abantu ba kwa Lesa abaibela. (Yeremia 31:31-34; Luka 22:20) Ni muli ici cipingo e mo Yehova akalengela amapaalo yonse aye lambo lya cilubula ca kwa Yesu ukubomba, ukusanshako no kulekelela imembu sha basubwa ne sha bantu bonse bambi aba busumino.

Ukwangila mu Mapuaalo ya kwa Yehova

24. Bushe “ubufyashi” ubupaalwa mu kati ka nko ni bani, kabili baasanguka shani “ubufyashi”?

²⁴ Bamo mu nko balimona ifyo Yehova alepaala abantu bakwe. Ici casobelwe mu bulayo bwa kwa Yehova ubwa kuti: “Mu nko ubufyashi bwabo bukeshibwa, na bafuma mu nda shabo bakeshibwa mu kati ka bantu na bantu; bonse ababamona bakasumino kuti bene bufyashi ubo Yehova apaala.” (Esaya 61:9) Aba muli Israele wa kwa Lesa, Abena Kristu basubwa, balipikintika mu nko mu nshita ya mwaka wa luse lwa kwa Yehova. Pali lelo abo abayankula ku butumikishi bwabo bafikile ku mintapendwa. Pa kubombela capamo na Israele wa kwa Lesa, aba mu nko balikwata ishuko lya kusanguko “bufyashi ubo Yehova apaala.” Insansa bakwata shilamoneka ku bantu bonse.

25, 26. Ni shani Abena Kristu bonse basuminisha ku mashiwi yalembwa pali Esaya 61:10?

²⁵ Abena Kristu bonse, abasubwa e lyo ne mpaanga shimbi, bafuluka inshita bakalatasha Yehova ku ciyayaya. Balasuminisha no mweo onse ifyasosele kasesema Esaya, uyo uwapuutilwemo ukusoso kuti: “Ukusekelela nkasekelela muli Yehova, umweo wandi ukalayangila muli Lesa wandi; pantu amfwika amalaya ye pusukilo amfimba tambatamba wa bulungami, ifyo shibwinga afwalo mwaala uwayemba [kwati ni shimapepo, NW] ifyo nabwinga asaame fisaamo fyakwe.”—Esaya 61:10.

²⁶ Apo bafwala “tambatamba wa bulungami,” Abena Kristu basubwa bapampamina pa kutwalilila abasanguluka kabili abashakowela mu menso ya kwa Yehova. (2 Abena Korinti 11:1, 2) Apo Yehova alibalungamika ukuti bakapyane ubumi bwa muulu, tabakatale ababwelela ku mpanga yapomoka iya kwa Babele Mukalamba, uko balubulwa. (Abena Roma 5:9; 8:30) Amalaya ye pusukilo ya mutengo nga nshi kuli bene. Abanabo ba mu mpanga shimbi na bo bene bapampamina pa kukonka ifipimo fya kwa Yehova Lesa ifyasumbuka ifya kupepa kwasanguluka. Apo ‘basamba amalaya yabo, no kuyabuutusha mu mulopa wa Mwana wa Mpaanga’ balilungamikwa kabili bakapusuka “ubucushi bukalamba.” (Ukusokolola 7:14; Yakobo 2:23, 25) Mpaka iyo nshita ikafike, batwalilila ukupashanya abanabo basubwa mu kutaluka ku kukantana konse ukufuma kuli Babele Mukalamba.

27. (a) Mu kuteka kwa myaka ikana limo, “kupuuka” nshi ukwaibela kukabako? (b) Bushe kale kale ubulungami bulepuuka shani mu kati ka bantu?

²⁷ Pali lelo bakapepa ba kwa Yehova babekelwa ukuba muli paradise wa ku mupashi. Nomba line bali no kuipakisha na Paradise wa cine cine. Tulelolela ne mitima yesu yonse iyo nshita, iyalondololwa bwino mu mashiwi ya kwisalila aya kwa Esaya icipandwa 61 ukuti: “Ifyo umushili ufumyo mumeno, ifyo ibala lilenge fyabyalwamo ukupuuka, e fyo Shikulu Yehova akalengo bulungami no kutasha ukupuuka ku mulola wa nko shonse.” (Esaya 61:11) Mu kuteka kwa myaka 1,000 ukwa kwa Kristu, mu calo mukabo ‘kupuuka kwa bulungami.’ Abantunse bakabilisha ukubilisha kwa kucimfya, no bulungami bukakumana pano isonde ponse. (Esaya 26:9) Lelo, ifwe, tatulekabila ukupembelela mpaka bulya bushiku bwa lulumbi bukese e lyo tukatendeke ukutasha ku mulola wa nko shonse. Kale kale ubulungami bulepuuka pa kati ka bantu imintapendwa abacindika Lesa wa mu muulu no kubilisha imbila nsuma pa lwa Bufumu bwakwe. Na nomba line icitetekelo cesu ne subilo filingile ukube fintu fya kwangilapo mu mapaalo ya kwa Lesa wesu.

[Futunoti]

[Icikope pe bula 323]

Esaya nakwate mbila nsuma iya kubila ku baYuda bankole

[Icikope pe bula 331]

Ukutendeka mu 33 C.E., Yehova alilimba ba 144,000 “imiti ikalamba iya bulungami”

[Icikope pe bula 334]

Ubulungami bukapuuka mu calo