Ukwananya Icine ca Baibolo mu Portugal

AMAKANA ya maato yabalabata aya balondo bakupa bakilomita 800 aba lulamba lwabela ku Atlantic ulwa Portugal, ukufuma ku Caminha ku kapinda ka kuso ukufika ku Vila Real de Santo Antônio ku kapinda ka kulyo. Pa myanda ya myaka abalondo ‘balitentemukila kuli bemba mu ngalaba,’ ukulenga isabi ukusanguka e cilyo cikalamba ica bena Portugal abengi.—Ilumbo 107:23.

Pa myaka yapitapo 70, kwalibako umusango wa bulondo na umbi uucitwa mu Portugal. Inte sha kwa Yehova baliba abapamfiwa ukuleta imbila nsuma ku makana ya makumi aye sabi lya mampalanya. (Mateo 4:19) Icipimo ca pa muulu ica bakasabankanya ba Bufumu mu May 1995 cali 44,650—icipimo ca kwa kasabankanya umo ku bekashi mupepi na 210. Mu misumba imo icipimo ca kwa kasabankanya umo ku bekashi 105.

Apantu kwaba ababomfi abafulishe fyo, ififulo fya kucitilamo ubunte mu ncende ishingi filabombelwamo cila mulungu nelyo ukucilapo. Inte sha ku Portugal muli fyo baliba abaswangaana mu kubomfya imitununukile yapusanapusana pa kuti bengebako bambi isubilo lyabo ilya muli Baibolo. Ee, balitesekesha ubucindami bwa kulenga icine ca Baibolo ukumfwika mu misango yonse iingabomba.—1 Abena Korinti 9:20-23.

Ukwaafwa Abatemwo Kupepa

Ukulingana no kupenda abekashi ukwa mu 1991, abena Portugal amaperesenti 70 aba myaka 18 nelyo abakalambako baitunga ukuba ba Roma Katolika. Te mulandu ne ci, ukwishiba kwa Baibolo ukwa bantu abengi kwalibotelela. Inyunshipepala ya Jornal de Notícias yatile: “Akayofi kamo akakulisha aka bekashi ba ciKatolika ni aka: Ukukanaishiba Baibolo!” Mulandu nshi cabele fi? Inyunshipepala ya ku Portugal Expresso ilapeele casuko. Pa kushimika pa kukumana kwa bashimapepo 500 ukwali mu Fátima, inyunshipepala yatile: “Ukulingana na bashimapepo mukalamba, caliba icakabilwa ukuti shimapepo atalukeko ku fishikumine ku milimo yakwe pa kuti engemika cipya cipya icifulo cakwe icaibela ica kuba ‘kabilisha.’ . . . Nga ca kuti shimapepo aleshimikila Ilandwe no mweo wakwe onse, te kuti akwate nshita ya kucita ifishampeneko ku mulimo wakwe.”

Mu kupusanako, Inte sha kwa Yehova isha mu Portugal shalipamfiwa ukulenga icine ca mu Baibolo ukwishibwa mu misango yonse iingabomba. Icafumamo ca kuti, baKatolika abengi nomba baleishiba Baibolo.

Carlota aali ni Katolika waipeelesha kabili icilundwa ce bumba lya misepela ilya mu bwikashi butungululwa ne calici. Na kabili aali ni kafundisha pa sukulu lya bana banono apo Antônio, Inte, alebomba. Apantu ni painiya, nelyo umutumikishi wa nshita yonse, Antônio lyonse aletukuta ukulanda na babomfi banankwe pa lwa Baibolo pa nshita sha kutuusha. Bushiku bumo, Carlota amwipwishe pa lwa cisumino ca helo wabamo umulilo no kupepa Maria. Antônio alimulangile ifyo Baibolo isambilisha pa lwa ifi fintu, kabili uko kwali e kutendeka kwa kulanshanya kwashimpwa pali Baibolo ukwingi. Lintu Carlota asangilwe ku kulongana pa muku wa kubalilapo ku Ŋanda ya Bufumu iya kuntu aleikala, calimwambukile apakalamba. Nangu cibe fyo, inshita sha kulongana shalepunkana ne nshita she bumba lya misepela uko aali cilundwa. Aishileiluka ukuti aali no kupingulapo. Cinshi aali no kucita?

Carlota alonganike ibumba lya misepela lyonse no kubalondolwela ukufuma muli Baibolo umulandu alelekela. Bonse balimulengulwile, ukufumyako fye umukashana umo uwe shina lya Stela, uwapooseleko amano sana mu kukutika. Lintu Carlota alandile na uyu mukashana inshita imbi, Stela aipwishe ifipusho ifingi pa lwa ntulo ya bumi ne mifwaile ya buko. Carlota amupeele icitabo ca Life—How Did It Get Here? By Evolution or by Creation?a kabili atampile isambililo lya Baibolo nankwe.

Pali iyi nshita yonse Carlota alelunduluka bwino lwa ku mupashi, alibatishiwe mu June 1991, kabili pati papite imyeshi 6, atendeke ukubomba bupainiya bwa nshita yonse. Mu May 1992 alyupene na Antônio, batwalilile umulimo wa bupainiya capamo mu cilonganino ca mu bwina mupalamano umwali ukukabila kwakulilako. Nga Stela wena? Mu May 1993 alibatishiwe kabili nomba alebomba bupainiya bwa nshita yonse.

Francisco wacaice aali uwaobelwa no kupepa. Inshiku ya Mulungu lyonse aleya ku Minsa ulucelo no kupepa amapepo ya kubomfya Kolona mu kasuba. Alebomba bukampenga, ukwaafwa shimapepo mu Minsa. Alepepa fye na kuli Lesa ukuti akamulenge ukuba “umutakatifu” bushiku bumo!

Francisco alefwaisha sana ukukwatako Baibolo, kabili ubushiku bumo cibusa wakwe alimwashimeko. Alisungwike ukusange fyo Lesa alikwate shina, Yehova. (Ukufuma 6:3; Ilumbo 83:18) Alicililepo no kusunguka, lintu abelengele pa Ukufuma 20:4, 5 no kusango kuti Lesa alibinda ukubomfya ifipasho mu kupepa! Pa kumono kuti mu calici mwaiswile fye ifipasho, alipepele no mupampamina kuli Lesa ukuti amwaafwe ukumfwikisha icimfulumfulu conse ci. Pati papite nshiku shafulilako akumenye umo untu balesambilila nankwe ku sukulu no kumwipusha umulandu alekela ukusangwa ku sukulu lya mu cungulo bushiku.

“Nomba nsambilila isukulu lya mu cungulo bushiku ilyawaminako,” e fyayaswike cibusa wakwe.

“Lisukulu nshi ilyo line, kabili finshi ulesambilila?” e fintu Francisco aipwishe. Alipapushiwe nga nshi ku casuko ca kwa cibusa wakwe.

“Nsambilila Baibolo ku Ŋanda ya Bufumu iya Nte sha kwa Yehova,” e fyo cibusa wakwe amwebele. “Bushe kuti watemwo kukonka?”

Francisco alifililwe ukusumina cintu aamwene lintu asangilwe ku kulongana umuku wa kubalilapo—ifinso fya nsansa, ifilemwentula; abantu balelanshanya mu nshila ya cikabilila, iya bucibusa; abana nabekala na bafyashi babo no kulakutika ku cilesoswa.

“Ine nali fye umweni wine wine, lelo nayumfwile ukuba ulubali lwa lupwa!” e fyacilimwike Francisco. Ukutule lyo alasangwa ku kulongana lyonse. Nomba Francisco ni eluda mu cilonganino, kabili wene capamo no mukashi wakwe na bana bakwe babili, baliba aba buseko mu mapaalo yawamisha aya Bufumu ayaba mu Cebo ca kwa Lesa.

Ukwakane Cine na Balupwa

Manuela, painiya wa nshita yonse uwa mu Lisbon, alikata isabi lya ku mupashi ilingi pa mulandu wa mukoosha wakwe mu kushimikila kuli bonse mu cikuuku, ukusanshako na kuli balupwa lwakwe. Pali abo pali ndume yakwe José Eduardo, uwaishibishe ulubuli lwa kupanta ne fya kubomfya ifyanso. Alitobele ifunde imiku ne miku ica kuti mu kupelako alitwelwe ku kulubulushiwa pa milandu 22 kabili apingwililwe ukupooswa mu cifungo pa myaka 20. Aali umukali ica kuti nelyo fye bafungwa banankwe balemutiina, kanshi apooselwe mu kalokoni ako balelonda ukucishamo.

Pa myaka 7 Manuela mu kutekanya aletandalila José Eduardo, lelo lyonse alekaana ubukombe bwa nkashi yakwe ubwa mu Baibolo. Mu kupelako, lintu icitabo ca Life—How Did It Get Here? By Evolution or by Creation? casabankanishiwe, alicipokelele, kabili isambililo lya Baibolo lyalitampilwe. Ilyo line fye alyalwile apakalamba imibele yakwe. Ilyo papitile fye umulungu umo alishimikile pa lwakwe ku bafungwa 200, kabili umulungu wakonkelepo ashimikile kuli bambi 600. Alilombele fye no lusa lwa kuti aletandalila abafungwa mu fiyanda fya minkulinkuli fimbi. Pa mulandu wa kwaluka kwamonekesha mu mibele yakwe, imyaka bamupingwilile yalibweshiwe kuli 15. Pa numa ya kuba mu cifungo pa myaka 10, alilubwilwe pa cipangano ca kuti aali no kukakilwa ku nse. Ukutule lyo napapita ne myaka isano, kabili nomba José Eduardo ni Nte ya kwa Yehova iyabatishiwa, alebomba ngo mubomfi utumikila mu cilonganino ca pa mwabo. Mu cine cine ca kumwenako ca ‘mumbulu ukwikala no mwana wa mpaanga’!—Esaya 11:6.

Pa mulandu wa kubombesha kwakwe ukwa kucitilo bunte kuli balupwa lwakwe, Manuela alikwata ubuseko pa kwaafwa umulume wakwe na balupwa bambi bane ukusanguka bakabomba ba mulimo wa kwa Yehova. Umulume wakwe nomba mubomfi utumikila.

“Nkabapanta no Kubalompolamo na Meembya”

Maria do Carmo aleikala mu mushi wa mu Lisbon lintu Inte shamutandalile. Alitemenwe ifyo aumfwile kabili aipwishe umulume wakwe, Antônio nga engalasambilila Baibolo pa ŋanda. “Wikesha no kwesha!” e fintu amwaswike. “Nga nkasangepo Inte sha kwa Yehova pano ŋanda, nkabapanta no kubalompolamo na meembya.” Antônio, na kuba, aali ni kafundisha wa cangalo ca kupanta kabili aali incenshi ya mushipi wafiita. E co Maria do Carmo apingwilepo ukulakwatila isambililo lya Baibolo kumbi.

Pa numa, Antônio aali no kuya ku England kuli kosi wa nshiku 8 uwa fya kufundisha icangalo ca kupanta, kabili Maria do Carmo asokeleshe muli sutikeshi wakwe ulupapulo lwa Icitabo Candi ca Malyashi ya mu Baibolo.b Apantu Antônio alikwete nshita ikalamba pa lwendo lwakwe, alibelengele icitabo. Pa lwendo lwa kubwelela ku myabo, inkuuka yalisunkenye ndeke icabipisha, kabili yalikwete ubwafya pa kwikila. E muku wa kubalilapo Antônio apepele kuli Yehova.

Lintu Antônio afikile ku ŋanda, Nte waletungulula isambililo ku mukashi wakwe alimulaalike ukusangwako ku kulongana. Alisumine kabili asangile ukuti bonse bali aba bucibusa. Isambililo lya Baibolo lyalitantikwe, kabili mu nshita fye iipi, Antônio alishibe ukuti aali no kupingulapo. Icafuminemo ca kuti alilekele ukusambilila ifyangalo fya kupanta kabili atendeke ukufunda abo alesambilisha ifyangalo ifyo bengekala ubumi bwa nsansa nomba na kuli pe na pe. Umo uwa bene, na o uwali ni ncenshi ya mushipi wafiita, nomba Mwina Kristu wabatishiwa.

Kumfwa kuli Antônio mu April 1991 alibatishiwe. Ubushiku bumo pa numa ya lubatisho lwakwe, atendeke ukubomba bupainiya bwa kwafwilisha. Pa numa ya myeshi ibili atendeke ukubomba bupainiya bwa nshita yonse, kabili tapalapite nshita, aletungulula amasambililo ya Baibolo 12. Mu July 1993 alisontelwe ukuba umubomfi utumikila mu cilonganino.

Mu Cifulo Cabombelwamo Libili Libili

Mu ncende shingi isha calo, icifulo ca kubombamo cilabombwamo cila mulungu nelyo ukucilapo. Ni shani fintu Inte babomba bwino umulimo wabo uwa “bulondo?”

João alesha ukulanda na bonse abekala mu ŋanda iili yonse. Ilyo aletandalila namayo umo, alipwishe nga ca kuti kwaliko bambi abekala pali ilya ŋanda. Namayo ayaswike ukuti aleikala no mulume wakwe na bana bakwe abaume babili, lelo cali no kwafya ukubasanga pantu balabomba kabili bakomboka icungulo bushiku. E co João alitwalilile no kutandalila bambi muli ilya ncende. Papitile mupepi ne awala limo na hafu, ilyo umwaume amupaleme.

“Mwacifwaya ukulanda na ine,” e fintu uyu mwaume aebele João. “Mukwai njebeni ico mulemfwaila.”

“Napamo mwapumbila fye, kwena nshimwishibe,” e fyayaswike João, uku nasunguka. “Bushe ni mwe bani?”

“Nine Antônio kabili njikala muli uno wine musebo. Mwaceba mayo ati mwacilafwaya ukulanda na bekala pa mwakwe abashilipo, e co naisa ukuti ŋumfwe ico mwacilafwaya.”

João ashimikile Antônio ubunte bwakapela makufi kabili alitampile ne sambililo lya Baibolo na wene. Ilyo bapwishishe isambililo umuku walenga ibili, Antônio aipwishe nga kuti balesambilila imiku ibili mu mulungu. Mu myeshi fye ine, ailundile kuli João no kutendeka ukushimikila imbila nsuma mu musebo wine aleikala. Ilyo papitile imyeshi ibili, alibatishiwe. Nomba line fye nyina na o alitendeke ukusambilila Baibolo. Fintu caba icakatama ukwesha ukulanda na ba mu ŋanda bonse fye ilyo tuli mu butumikishi!

Ifya kukumanya fya kucincimusha ifya musango yo filangilila ukuti mu menshi ya mu Portugal ubulondo bwa ku mupashi ubwingi bucili kuti bwabombwa. Yehova alipaala shilya Nte shibombesha pa kushipeela amasambililo ya Baibolo ayengi ayalunduluka. Ilyo baletwalilila ukufwaya inshila shafulilako isha kulenga bonse ukwishiba icine ca mu Baibolo, amashiwi ya mutumwa Paulo aya ku Bena Kristu ba mu Filipi aya kuti: “Ku misango yonse, . . . Kristu alebilwa,” mu cine cine yalefikilishiwa mu Portugal ilelo.—Abena Filipi 1:18.

[Amafutunoti]

[Mapu pe bula 23]

(Nga mulefwaya ukumona mapu, moneni muli magazini)

SPAIN

PORTUGAL

[Ifikope pe bula 24, 25]

Inte sha mu Portugal babomfya ishuko ilili lyonse ku kulenge cine ca mu Baibolo ukwishibwa