ICIPANDWA 22
Ubufumu Bulacita Ukufwaya kwa kwa Lesa pe Sonde
1, 2. (a) Mulandu nshi limo twingatwishikila nga ca kuti Paradaise ikabako? (b) Cinshi cingatwafwa ukukosha icitetekelo cesu mu malayo ya kwa Lesa?
MUNYINEFWE uwa cishinka kuli Lesa afika pa kulongana ninshi nanaka pa mulandu ne ncito. Abakalamba ba ncito bacimubomfya bubi bubi, aletontonkanya pa fyo alasakamana aba mu ng’anda yakwe, kabili nasakamikwa pantu umwina mwakwe mulwele. Ilyo ulwimbo lwa kwiswila ukulongana lwatendeka ukulila, aisha icefu, aumfwa bwino ukuti ali pamo na ba bwananyina pa Ng’anda ya Bufumu. Ulwimbo lulelanda pe subilo lya kwikala mu Paradaise, kabili amashiwi yalenga ale-elenganya ukuti ali mu calo cipya. Alitemwa ulu lwimbo, kabili ilyo aleimba pamo na ba mu ng’anda yakwe, isubilo lya nshita ya ku ntanshi lyamusansamusha.
2 Bushe mwalyumfwapo ifi? Fwe bengi twalyumfwapo. Ca cine, imikalile muli cino calo ca kwa Satana yalyafya ica kutila kuti twatwishika no kutwishika nga ca kuti Paradaise ikabako. Shino ni “nshita ishayafya nga nshi,” kabili icalo twikalamo te paradaise iyo. (2 Tim. 3:1) Cinshi cingatwafwa ukushininkisha ukuti paradaise ikabako? Bushe twaishiba shani ukuti nomba line Ubufumu bwa kwa Lesa buli no kutendeka ukuteka abantu bonse? Natulande pali fimo ifyo Yehova asobele ifyafikilishiwe ifyo abantu bakwe aba ku kale bamwene. Lyena twalalanda pa fyo kulya kusesema no kusesema kumbi kulefikilishiwa muno nshiku. Na mu kulekelesha, apo icitetekelo cesu calakoselako, twalalanda pa fyo uku kusesema kukafikilishiwa ku ntanshi.
Ifyo Yehova Afikilishe Amalayo Yakwe Kale Sana
3. Bulayo nshi ubwasansamwishe abaYuda abaali bankole mu Babiloni?
3 Baleni elenganyeni ifyo imikalile yali ku baYuda abo basendele bunkole ku Babiloni muli ba 500 B.C.E. Abengi bakuliile mu busha, nga fintu cali na ku bafyashi babo, kabili imikalile yalyafishe. Abena Babiloni balebapumya pa mulandu wa kuti batetekele Yehova. (Amalu. 137:1-3) Pa myaka iingi, abaYuda aba cishinka balitwalilile ukuba na ili subilo: Yehova alilaile ukuti akabwesesha abantu bakwe ku calo cabo. Yehova atile ifintu fikawama muli cilya calo. Alingenye icalo ca Yuda ico ali no kubabweseshamo kwi bala lya Edeni, ilyali paradaise! (Belengeni Esaya 51:3.) Amalayo ya musango yu yali no kulenga abantu ba kwa Lesa ukuleka ukutwishika. Mulandu nshi twalandila ifi? Moneni fimo ifyo Yehova abalaile.
4. Mashiwi nshi Yehova asobele pa kweba abaYuda ukuti baali no kwikala umutende nga babwelelamo ku calo cabo?
4 Umutende. AbaYuda baali muli bunkole tabaali no kuya mu paradaise ya cine cine, lelo baali no kubwelela ku calo ca kutali icashele icibolya pa myaka 70, icalo ico abengi bashamwenepo. Pali ilya nshita, inkalamo, imimbulu, imbwili e lyo ne nama shimbi ishikali, shalifulile sana mu ncende isho Baibolo yalandapo. Umufyashi umwaume nalimo kuti alaipusha ati, ‘Bushe nkacingilila shani abakashi na bana? Nga impaanga ne ng’ombe, nkashicingilila shani?’ Uuli onse kuti asakamikwa pa fintu fya musango yu. Nomba tontonkanyeni pa malayo ya kwa Lesa ayaba pali Esaya 11:6-9 ne fyo aya mashiwi yabasansamwishe. (Belengeni.) Ukubomfya aya mashiwi, Yehova ale-eba abantu bakwe abali muli bunkole ukuti akabacingilila kumo ne nama shabo. Kuti twatila inkalamo shali no kulya icani pantu tashali no kulalya ing’ombe sha baYuda. AbaYuda tabali na kulatiina ishi nama mbi. Yehova alaile abantu bakwe ukuti abali no kubwelela ku Yuda bali no kucingililwa, na lintu baali mu matololo na mu mpanga.—Esek. 34:25.
5. Kusesema nshi ukwayafwile abaYuda abaali no kufuma muli bunkole ukucetekela ukuti Yehova ali no kubapeela ifyo balekabila?
5 Ifintu ukufula. Nalimo kwaliko na fimbi ifyalebasakamika. Baleipusha abati, ‘Bushe nkasunga shani aba mu ng’anda yandi nga twabwelelamo? Ni kwi tukalaikala? Bushe tukakwata incito, kabili bushe ikawama ukucila ishi ncito sha lucu isho batupatikisha ukubomba kuno?’ Yehova alyaswike na aya mepusho ukupitila mu Cebo cakwe ica kusesema. Yehova alaile abantu bakwe ukuti ku calo bali no kuya imfula yali no kulaloka ica kuti umushili wali no kulamesha ifya kulya ifya ‘mulyo kabili ifya mafuta.’ (Esa. 30:23) Kumfwa ku mayanda na pa ncito, Yehova alaile abantu bakwe ukuti: “Bakakuula amayanda no kwikalamo; bakalima na mabala ya myangashi no kulya ifisabo fya yako. Tabakakuule amayanda e lyo bambi bakekalemo; tabakalime amabala e lyo bambi bakalye ifisabo.” (Esa. 65:21, 22) Ca cine, imikalile ikawama nga nshi ukucila imikalile ya mu Babiloni, umwaleikala abashalepepa Lesa. Inga pa bwafya ubukalamba sana bakwete, ubwalengele ukuti babasende na muli bunkole?
6. Bwafya nshi abantu ba kwa Lesa bakwete, kabili finshi Yehova alaile abaYuda abaali no kubwelelamo ku mwabo?
6 Bucibusa bwabo na Lesa. Ilyo bashilabasenda muli bunkole, abantu ba kwa Lesa balilekeleshe bucibusa bwabo na Lesa. Muli kasesema Esaya, Yehova alandile pa bantu bakwe ukuti: “Umutwe onse naulwala, no mutima onse naunaka.” (Esa. 1:5) Ku fya kwa Lesa, baali impofu kabili bankomamatwi, pantu tabaleumfwa ifyo Yehova alebafunda kabili tabalemona ubusuma bwa mafunde alebapeela. (Esa. 6:10; Yer. 5:21; Esek. 12:2) Nga ca kuti abaali no kubwelelamo ku Yuda bali no bu bwafya, nga tabakwete umutende iyo. Pantu Yehova nga tabapaalile. Kanshi ubu bulayo Yehova abalaile bufwile bwalibakoseshe, atile: “Muli ubo bushiku bankomamatwi bakomfwa amashiwi ya mu citabo, kabili mu kati ke kumbi ilyafiita na mu mfifi amenso ya mpofu yakamona.” (Esa. 29:18) Kanshi Yehova ali no kundapa abantu bakwe abalapiile. Nga batwalilila ukuba ne cumfwila kuli ena, ali no kulabapeela amafunde ayali no kulenga baba abomi.
7. Bushe ifyo Lesa alaile abaYuda bankole fyafikilishiwe shani, kabili mulandu nshi filingile ukukosesha icitetekelo cesu?
7 Bushe Yehova afikilishe shani amalayo yakwe? Icasuko kuti twacisanga mu fyalembwa mu Baibolo. Lesa alipaalile abaYuda ababwelelemo ku mwabo, baleikala umutende, balikwete ifya kulya ifingi, kabili baali ifibusa fisuma na Lesa. Ku ca kumwenako, Yehova alibacingilile ku fyalo ifikalamba ifya mu bwina mupalamano ifyali na maka ukubacila. Inama ishikali tashalelya ifitekwa fyabo. Ca cine ukuti balya baYuda bamwene fye ukusesema kumo kumo ukwasobele Esaya, Yeremia, na Esekiele ukwalelanda pa fyo ifintu fikaba mu paradaise kwafikilishiwa. Na lyo line, ukusesema kwafikilishiwe uko abantu ba kwa Lesa bamwene, kwalibasansamwishe kabili kwacitike pa nshita iyalinga. Nga tuletontonkanya pa fyo Yehova acitile abantu bakwe ku kale, icitetekelo cesu cikakosa. Nga ca kuti ukufikilishiwa kwa kubalilapo kwalisansamwishe abantu ba kwa Lesa, ninshi ukufikilishiwa ukukalamba kukacilanapo! Tontonkanyeni pa fyo Yehova atucitila muno nshiku.
Ifyo Yehova Atendeka Ukufikilisha Amalayo Yakwe Muno Nshiku
8. “Calo” ca musango nshi abantu ba kwa Lesa bekalamo muno nshiku?
8 Abantu ba kwa Yehova muno nshiku tabapanga uluko ulwa cine cine, kabili tabekala mu calo cimo. Lelo, Abena Kristu basubwa e bapanga uluko lwa ku mupashi, “Israele wa kwa Lesa.” (Gal. 6:16) Abanabo aba mu “mpaanga shimbi” bali-isansha kuli bena mu “calo” ca ku mupashi, e kutila balikatana mu kupepa Yehova Lesa. Amafunde ya kwa Lesa e yabatungulula muli fyonse ifyo bacita. (Yoh. 10:16; Esa. 66:8) “Calo” nshi ico Yehova atupeela? Ni paradaise ya ku mupashi. Muli ici calo amalayo ya kwa Lesa ayalanda pa fyo ifintu fyali mu Edeni yalifikilishiwa. Moneni ifya kumwenako fimo.
9, 10. (a) Bushe ukusesema ukwaba pali Esaya 11:6-9 kulefikilishiwa shani muno nshiku? (b) Finshi filanga ukuti abantu ba kwa Lesa baliba no mutende?
9 Umutende. Mu kusesema ukwaba pali Esaya 11:6-9, mwaliba amashiwi ayasuma ayalanda pa mutende wa pa nama sha mu mpanga na bantu e lyo ne fitekwa fyabo. Bushe aya mashiwi yalafikilishiwa muno nshiku? Ee! Mu cikomo 9, tulasambililamo umulandu inama sha musango yu shishakacitile ububi nangu ubonaushi, patila: “Pantu isonde likesulamo ukwishiba Yehova filya amenshi yaisula muli bemba.” Bushe “ukwishiba Yehova” kulalenga inama ukwaluka? Awe, bantu e baaluka nga baishiba Lesa Wapulamo kabili balapashanya imibele yakwe iya mutende. E mulandu wine tumwena uku kusesema kulefikilishiwa muli paradaise wesu uwa ku mupashi. Apo batekwa no Bufumu bwa kwa Lesa, abasambi ba kwa Kristu abaali abankalwe balesambilila ifya kuleka iyi mibele ya bunama kabili baleikala mu mutende na bamunyinabo ne nkashi.
10 Ku ca kumwenako, muli cino citabo twalisambilila pa mulandu Abena Kristu bashi-ipoosela mu fikansa fya calo, twalisambilila na pa Malembo ayalenga tulekaana, e lyo na pa fyo abantu ba kwa Lesa babacusha ilyo bakaana ukuipoosa mu fikansa fya calo. Ala mwandini cipesha amano ukumona ukuti muli cino calo caisulamo ubunkalwe, mwaliba “uluko” ulukulu ulwa bantu abakaana ukucita ulubuli nangu ni lintu balebatiinya ukuti balabepaya! Ubu bushininkisho ubusuma ubwa kuti abatekwa ba mu Bufumu bwa kwa Mesia baliba no mutende nga ulya Esaya alandilepo! Yesu atile abasambi bakwe bakabeshibila ku fyo batemwana. (Yoh. 13:34, 35) Mu cilonganino, Kristu alebomfya “umusha wa cishinka kabili uwashilimuka” ku kusambilisha Abena Kristu bonse aba cine ukuba aba mutende, abatemwana, kabili abanakilila.—Mat. 24:45-47.
11, 12. Ni nsala ya musango nshi iyaba muli cino calo, lelo Yehova apekanishisha shani abantu bakwe ifintu ifingi?
11 Ifintu ukufula. Mu calo mwaliba insala ya ku mupashi. Baibolo yatila: “‘Moneni! Inshiku shikesa,’ e fyasosa Shikulu Mulopwe Yehova, ‘ilyo nkatuma insala mu calo, te nsala ya fya kulya iyo, kabili te cilaka ca menshi, lelo ica kuumfwa amashiwi ya kwa Yehova.’” (Amose 8:11) Bushe abatekwa ba Bufumu bwa kwa Lesa nabo balacula kuli iyi nsala? Yehova alisobele ubupusano bwaba pa bantu bakwe na balwani bakwe ilyo atile: “Ababomfi bandi bakalya, lelo imwe mukaba ne nsala. Moneni! Ababomfi bandi bakanwa, lelo imwe mukaba ne cilaka. Moneni! Ababomfi bandi bakasekelela, lelo imwe mukekatwa insoni.” (Esa. 65:13) Bushe mulemona ifyo aya mashiwi yalefikilishiwa?
12 Ifyo tupokelela kuli Lesa fingi nga nshi kwati mumana uuleya ulekula no kushikilako. Impapulo shilanda pali Baibolo, ukubikako na mavidio na ma CD, ukulongana konse no kulongana kwa citungu, e lyo ne fyebo ifyo babika pa Webu saiti fyonse ifi e fya kulya fya ku mupashi ifyo Lesa atupekanishisha muli cino calo mwaba insala ya ku mupashi. (Esek. 47:1-12; Yoele 3:18) Bushe tamutemenwe ukumona ifyo Yehova alefikilisha ubulayo bwa kumupekanishisha ifintu ifingi? Bushe lyonse mulashininkisha ukuti mwalya pe tebulo lya kwa Yehova?
Mu filonganino fyesu e mo tulya ica kulya ca ku mupashi, e mo tucingililwa, kabili filalenga twaba na bucibusa busuma na Lesa
13. Finshi mwamona ifilanga ukuti ubulayo bwa kwa Yehova ubwa kuti impofu shikamona na bankomamatwi bakomfwa bulefikilishiwa?
13 Bucibusa bwesu na Lesa. Muno nshiku abengi ni bankomamatwi kabili impofu sha ku mupashi. (2 Kor. 4:4) Lelo, Kristu aleundapa amalwele mwi sonde lyonse. Bushe mwalimonapo impofu shamona na bankomamatwi baumfwa? Nga mwalimonapo abantu baishiba bwino icine caba mu Cebo ca kwa Lesa, baleka ukusumina mu bufi bwa mu mipepele ya bufi ubwalengele ukuti babe impofu kabili bacibulu, ninshi mwalimona uko ubu bulayo bwafikilishiwa, ubutila: “Muli ubo bushiku bankomamatwi bakomfwa amashiwi ya mu citabo, kabili mu kati ke kumbi ilyafiita na mu mfiifi amenso ya mpofu yakamona.” (Esa. 29:18) Cila mwaka mu calo conse, abantu abengi nga nshi balepola lwa ku mupashi. Umuntu onse uwafuma muli Babiloni Mukalamba no kwisa muli paradaise wa ku mupashi ninshi alelanga ukuti ubulayo bwa kwa Yehova nabufikilishiwa!
14. Finshi tufwile ukutontonkanyapo ifingakosha icitetekelo cesu?
14 Mu cipandwa cimo na cimo muli cino citabo muli ubushininkisho ubulelanga ukuti Kristu alingisha abasambi bakwe muli paradaise ya ku mupashi muli shino nshiku sha kulekelesha. Lyonse natuletontonkanya pa mapaalo ayalekanalekana ayo tulepokelela muli iyi paradaise ya muno nshiku. Nga tulecita ifi, icitetekelo cesu mu malayo ya kwa Yehova cikalakoselako.
“Ubufumu Bwenu Bwise”
15. Mulandu nshi twingashininkishisha ukuti isonde likaba paradaise?
15 Ukutula fye pa kutendeka, Lesa afwaya isonde lyonse ukuba paradaise. Ilyo apangile Adamu na Efa, ababikile muli paradaise, kabili abebele ukukumana pe sonde no kulasakamana ifitekwa fyonse. (Ukute. 1:28) Lelo, Adamu na Efa bakonkelele Satana no kupondokela Lesa kabili balengele abana babo ukuba ababembu no kulafwa. Nomba ukufwaya kwa kwa Lesa takwa-aluka. Fyonse ifyo Lesa alanda, filafikilishiwa. (Belengeni Esaya 55:10, 11.) Kanshi kuti twacetekela ukuti abana ba kwa Adamu na Efa bakesusha lino isonde no kulimapo, kabili bakalasakamana ifyo Yehova apanga ilyo isonde likaba paradaise. Pali ilya nshita, amalayo ayo Yehova alaile abaYuda abali muli bunkole ayalelanda pali paradaise yakafikilishiwa! Moneni ifya kumwenako fyakonkapo.
16. Bushe Baibolo ilondolola shani umutende uo tukakwata mu Paradaise?
16 Umutende. Pa kulekelesha, amashiwi ayasuma ayaba pali Esaya 11:6-9 yakafikilishiwa. Abaume, abanakashi, na bana bakalacingililwa ukuli konse uko bakalaba pe sonde. Takwakabe ifikalaleta icintiinya, nampo nga bantu nelyo inama. Tontonkanyeni pa fyo cikaba ilyo mushakaleumfwa umwenso ukuba ukuli konse pano calo, mukalaya mu kusamba mu mimana, babemba, na muli fibemba; mukalaya mu kutandala mu mpili, na mu mpanga ukwabula ica kumutiinya! Ubushiku nga bwaila, tamwakaletiina nangu cimo. Amashiwi yaba pali Esekiele 34:25 yakafikilishiwa, ica kuti abantu ba kwa Lesa bakekala “umutende mu matololo no kulaala utulo mu mpanga.”
17. Mulandu nshi twingashininkishisha ukuti Yehova akalatupekanishisha ifyo tukabila ifingi nga nshi ilyo Ubufumu bukalateka isonde?
17 Ifintu ukufula. Elenganyeni pa fyo cikaba ilyo kushakabe ubupiina, ubulwele bwa nsala, ifipowe, no tubungwe twa kwafwilisha abantu. Ifya kulya fya ku mupashi ifyo Lesa apekanishisha abantu bakwe muno nshiku bushininkisho bwa kuti Ubufumu bwa kwa Mesia bukatwalilila ukupekanishisha abatekwa bakwe ifya kulya ifya misango yonse. Ilyo Yesu ali pano calo, alilangile ukuti kuti afikilisha aya malayo ilyo aliishishe abantu abengi ukubomfya fye umukate ne sabi ilinono. (Mat. 14:17, 18; 15:34-36; Marko 8:19, 20) Ilyo Ubufumu bwa kwa Lesa bukalateka isonde lyonse, ukusesema kwa musango yu kukafikilishiwa, ukutila: “Akapeela imfula ya mbuto shenu isho mwabyala mu mushili, kabili umukate ukaba ukulobolola kwa mu mushili wenu, kabili ukaba uwa mulyo kabili uwa mafuta. Muli ubo bushiku, ifitekwa fyenu fikalya mu mulemfwe mu ncende iikalamba.”—Esa. 30:23.
18, 19. (a) Bushe mukanonkelamo shani mu busesemo bwalembwa pali Esaya 65:20-22? (b) Bushe inshiku shesu shikaba shani nge “nshiku sha muti”?
18 Muno nshiku abantu balafilwa ukwelenganya ukuti nabakwata ing’anda iisuma nelyo ukukwata incito iisuma. Muli cino calo ca kwa Satana, abengi batila balabombesha sana lelo indalama bafola shinono ica kuti balafilwa no kuisakamana bwino nangu fye ukusunga bwino aba mu mayanda yabo, ilyo ninshi abakankaala bena balekwata indalama ishingi pa mulandu wa bufunushi. Elenganyeni ifyo cikaba ilyo uku kusesema kukafikilishiwa mwi sonde lyonse, ukutila: “Bakakuula amayanda no kwikalamo; bakalima na mabala ya myangashi no kulya ifisabo fya yako. Tabakakuule amayanda e lyo bambi bakekalemo; tabakalime amabala e lyo bambi bakalye ifisabo. Pantu ifyaba inshiku sha muti e fikaba inshiku sha bantu bandi; kabili umulimo wa minwe yabo abasalwa bandi bakasekelamo nga nshi.”—Esa. 65:20-22.
19 Bushe ni mwi mwalola amashiwi ya kuti ifyaba “inshiku sha muti” e fikaba inshiku shesu? Nga mwaiminina mupepi ne cimuti icikalamba, bushe tamupapa nga mwatontonkanya pa myaka ubwingi caikala, nalimo camenene ilyo na bafyashi baba nakulwinwe tabalafyalwa? Kabili nalimo kuti mwatontonkanya no kuti nga mwatwalilile ukuba abashapwililika, kuti mwafwa cena cashala, kabili kuti catwalilila ukubako ninshi imwe mwalifwa kale. Ala mwandini Yehova musuma, alitwafwa ukucetekela ukuti mu Paradaise tukalaikala imyaka iingi kabili mu mutende! (Amalu. 37:11, 29) Inshita ileisa ilyo tukalaikala imyaka iingi ica kuti ne fimuti ifiikala imyaka iingi, fikalamoneka kwati fyaikala fye inshiku ishinono nge fyani!
20. Bushe abatekwa ba cishinka aba Bufumu bakesaba shani no bumi ubwapwililika?
20 Ubumi ubwapwililika. Muno nshiku, abantu bonse balalwala kabili balafwa. Kabili kuti twatila bonse fye tulibalwele, twalilwala ubulwele ubushipola, ulubembu. Icingatuposha fye lilambo lya cilubula ilya kwa Kristu. (Rom. 3:23; 6:23) Mu Myaka Ikana Limo, Yesu na bakateka banankwe bakabomfya icilubula kabili panono panono bakaya balefumya ulubembu pa bantu ababa ne cishinka kuli Lesa. Lyena ukusesema kwa kwa Esaya kukafikilishiwa, ukutila: “Takuli umwikashi uukatila: ‘Nindwala.’ Abantu abakekala mu calo bantu abaelelwa imembu shabo.” (Esa. 33:24) Elenganyeni inshita ilyo kushakabe impofu, bankomamatwi, nelyo abalemana. (Belengeni Esaya 35:5, 6.) Takwakabe ubulwele nangu bumo ubo Yesu akafilwa ukundapa. Abatekwa ba ubu Bufumu aba cishinka bakaba no bumi ubusuma!
21. Cinshi cikacitika ku mfwa, kabili mulandu nshi ubu bulayo bumusansamushisha?
21 Nomba cikaba shani ku mfwa? Imfwa e ‘mulwani wesu uwa kulekelesha,’ mulwani uucimfya bonse abantu abashapwililika. (1 Kor. 15:26) Nomba bushe imfwa, mulwani uo Yehova engafilwa ukufumyapo? Moneni ifyo Esaya asobele, atile: “Akamina imfwa umuyayaya, kabili Shikulu Mulopwe Yehova akafuuta ifilamba ku menso yonse.” (Esa. 25:8) Bushe kuti mwaelenganya ifyo cikaba pali ilya nshita? Takwakabe ifililo, inshiishi, nelyo ifilamba fya bulanda! Lelo, kukaba ifilamba fya nsansa ilyo Yehova akafikilisha ubulayo bwakwe ubwa kubuusha abafwa! (Belengeni Esaya 26:19.) Awe e fyo ne mfwa ikaloba.
22. Cinshi cikacitika pa numa Ubufumu bwa kwa Mesia bwapwisha shani ukucita ukufwaya kwa kwa Lesa pe sonde?
22 Ilyo Imyaka Ikana Limo ikapwa, Ubufumu bukapwisha ukucita ukufwaya kwa kwa Lesa pe sonde, kabili Kristu akabwesesha Ubufumu kuli Wishi. (1 Kor. 15:25-28) Pa kulekelesha, abantu bakaba abapwililika kabili bakaipekanya ukushipikisha ubwesho bwa kulekelesha ubo Satana akaleta ilyo bakamukakula ukufuma mu cilindi icabula impela. Lyena pa numa, Kristu akashonaula icisoka icibi pamo na bacikonka. (Ukute. 3:15; Ukus. 20:3, 7-10) Lelo bonse abakatwalilila ukuba aba cishinka kuli Yehova bakapaalwa nga nshi. Nalimo takwingaba amashiwi ayengalondolola bwino ifyo cikawama ukucila pa mashiwi ayaba mu Baibolo. Aya mashiwi, bulayo bwa kuti aba cishinka ‘bakalubuka no kuba abana ba kwa Lesa.’—Rom. 8:21.
Ubufumu bukafikilisha amalayo ya kwa Lesa yonse ayakuma abantu ne sonde
23, 24. (a) Mulandu nshi tatutwishikila ukuti amalayo ya kwa Lesa yakafikilishiwa nangu cikabe shani? (b) Cinshi ico mulefwaisha ukucita?
23 Aya, te amalayo ya kwelenganya fye lelo ya cine cine. Yehova akafikilisha ifyo atulaya! Mulandu nshi? Ibukisheni amashiwi Yesu alandile ayo twasambililepo mu cipandwa ca kubalilapo muli cino citabo. Asambilishe abasambi bakwe ukupepa kuli Yehova ati: “Ubufumu bwenu bwise. Ukufwaya kwenu kucitwe pano isonde nga mu muulu.” (Mat. 6:9, 10) Ubufumu bwa kwa Lesa te cintu ica kwelenganya fye. E ko bwaba! Pali ino nshita, bulateka mu muulu. Pa myaka 100 nomba, Ubufumu bwa kwa Lesa bwalifikilisha amalayo ya kwa Yehova mu nshila shalekanalekana mu cilonganino ca Bena Kristu. Kanshi kuti twacetekela ukuti fyonse ifyo Yehova atulaya fikafikilishiwa ilyo Ubufumu bwa kwa Lesa bukatendeka ukuteka isonde!
24 Twalishiba ukuti Ubufumu bwa kwa Lesa bukesa. Twalishiba no kuti fyonse ifyo Yehova alaya fikafikilishiwa. Mulandu nshi? Pantu UBUFUMU BWA KWA LESA BWALITENDEKA UKUTEKA! Bonse tufwile ukuyipusha atuti, ‘Bushe Ubufumu bulanteka?’ Shi bonse natutwalilile ukubombesha pa kuti tube abatekwa ba cishinka aba Bufumu pali ino nshita, pa kuti tukanonkelemo mu mitekele yapwililika kabili iyalungama ku ciyayaya!