Baibolo—Citabo Umwaba Amasesemo Ayafikilishiwa, Ulubali 2

Fumeni mu Babiloni!

Ici icipande, cili pa fipande 8 ifikalafuma muli Loleni! ifikalalanda pa cintu cimo icacindama ico Baibolo yalandapo, ne ci, busesemo nelyo ifyasobelwe ukuti fikacitika ku ntanshi. Ifi fipande fili no kumwafwa ukwasuka aya mepusho: Bushe abalembele ubusesemo bwaba mu Baibolo bantu abacenjela fye? Bushe ubu busesemo bwafuma kuli Lesa? Kuti cawama mwabelenga ifi fipande pa kuti mwaishiba ifyasuko kuli ifi fipusho.

MU CIPANDE cafumineko, twalandile pa masesemo yatatu ayaba mu Baibolo ayalanda pa ba mu lupwa lwa kwa Abrahamu. Kwaliba ifishinka ifilanga ukuti Lesa alifikilishe yalya malayo ukupitila mu luko lwa bena Israele, ulwafumine muli Abrahamu.

Icalo ca Babiloni na co calilwandwapo sana mu Baibolo, maka maka muli ba 600 B.C.E. Natulande pa masesemo yatatu ayalanda pali ubu ubufumu no kumona nga ca kuti na yo yafumine kuli Lesa.

Kasesema Mose asokele abena Israele ukuti: “Nga ca kuti mukalaba Yehova Lesa wenu no kukonka balesa bambi no kubabombela no kubafukamina, . . . ukuloba mukaloba.” (Amalango 8:19; 11:8, 9) Na lyo line, abena Israele balitwalilile ukupondokela Lesa no kupepa tulesa twa bufi.—1 Ishamfumu 14:22-24.

Mu kuya kwa nshita, ifyo abena Israele balecita fyalengele Lesa akalipe no kuleka abena Babiloni babasanse. Abena Babiloni abatungulwilwe ne Mfumu Nebukadnesari balishingile Yerusalemu no kusansa abena Israele. Bushe uku kusansa kwalisobelwe? Natumone ifyo kasesema Yeremia alembele imyaka 20 ilyo abena Babiloni bashilasansa Israele.—Yeremia 25:1.

Ubusesemo 1: “Pa mulandu wa kuti tamwaumfwilile [mwe bena Israele] amashiwi yandi [aya kwa Lesa], moneni ndetuma ubukombe . . . kuli Nebukadresari imfumu ya ku Babiloni, . . . kabili nkabaleta [abena Babiloni] ku kulwisha ici calo na bekashi ba ciko. . . Ne calo conse ici cikaba icibolya, ica kupapa, ne nko ishi shikabombela imfumu ya ku Babiloni imyaka 70.”—Yeremia 25:8-11.

Bwalifikilishiwe: Pa numa ya kushinga umusuma wa Yerusalemu pa nshiku ishingi, Nebukadnesari alyonawile uyu musumba mu 607 B.C.E. Alicimfishe ne misumba imbi mu Yuda. Pali iyi misumba pali Lakishi na Aseka. (Yeremia 34:6, 7) Abapuswike abatwele ku Babiloni uko baileikala muli bunkole pa myaka 70.

Ifyalandwapo mu lyashi lya kale:

● Baibolo itila, Nebukadnesari e wali imfumu ya Babiloni ilyo umusumba wa Yerusalemu waonawilwe. Ifyo bashula filanga ukuti ifyo Baibolo yalanda fya cine. Mu musumba wa Florence, ku Italy mwaliba icipaapaatu ico bapangile kwi libwe apo balemba ati: “Umucinshi kuli shikulu Merodaki, Nebukadnesari, imfumu ya Babiloni iyapangile ici ilyo yali pano calo.” Nebukadnesari atekele ukufuma mu 624 ukufika mu 582 B.C.E.

● Icitabo ca The Bible and Archaeology citila, ifyo bashula no kufwailisha mu Lakishi filanga ukuti: “Umusumba walyonawilwe sana. Umulilo walikulile sana ica kuti waonawile umusumba [Lakishi] kabili amabwe ayo bakuulile umusumba yalishonaike.”

Ubusesemo 2: “Ilyo ikafikilishiwa imyaka 70 ku Babiloni, nkamupempula kabili nkafikilisha [Yehova] kuli imwe [abaYuda abali muli bunkole] amashiwi yandi ayasuma no kumubwesesha kuli cino cifulo [icalo ca Yuda].”—Yeremia 29:10.

Bwalifikilishiwe: Pa numa ya kuba muli bunkole pa myaka 70, ukufuma mu 607 ukufika mu 537 B.C.E., Imfumu Sailasi iya ku Persia yalilubwile abaYuda abali muli bunkole no kubasuminisha ukubwelela ku mwabo ku kuyakuula Yerusalemu cipya cipya.—Esra 1:2-4.

Ifyalandwapo mu lyashi lya kale:

● Bushe abena Israele bali muli bunkole pa myaka 70 nga fintu Baibolo yasobele? Umfweni ifyalandile Ephraim Stern, umukalamba wa babebeta ifyashulwa. Atile: “Tapaba icili conse icilanga ukuti ukutula mu 604 B.C.E. ukufika mu 538 B.C.E. mu Israele mwaleikala abantu. Pali ilya inshita yonse, takwali umusumba uuli onse uo abena Babiloni baonawile umo abantu baikele na kabili.” Inshita iyo kushali abaikele nelyo ababwelele mu misumba yaonawilwe, e ilya ine inshita abena Israele bali muli bunkole mu Babiloni, ukufuma mu 607 B.C.E. ukufika mu 537 B.C.E.—2 Imilandu 36:20, 21)

● Inko shali mu Mesopotamia shalelemba pa fipaapatu ifyo balepangila ne bumba ilyanaka. Icipaapatu cimo ice bumba icitwa ati, Cyrus Cylinder, ca mu mwaka wa 539 B.C.E., umwaka Imfumu Sailasi iya bena Persia yacimfishe ubuteko bwa Babiloni. Amashiwi yamo ayabapo yatila: “Nine Sailasi, . . . imfumu ya bena Babiloni. Nakuulile cipya cipya amatempele kwi shilya lya mumana wa Tigris, ayali ayaonaika pa nshita ntali no kubweseshamo ifipe fyalimo. . . . Nalonganike (na) bonse abali muli bunkole no kubabwekesha ku misumba yabo (iyo baleikalamo kale).”

Ifi ifyalembwa, filomfwana sana no busesemo bwa mu Baibolo ubwasobelwe ninshi kucili imyaka 200 pa kuti bukafikilishiwe. Ubusesemo bwaleti, abaYuda abali muli bunkole baali no kubwelelamo ku mwabo.

Ubusesemo 3: “Babiloni, ubusuma bwa mabufumu, ukuyemba kabili ica kuitakishishapo ica bena Kaldi, akaba nga filya cali ilyo Lesa awishishe Sodomu na Gomora. Takekalwemo.”—Esaya 13:19, 20.

Bwalifikilishiwe: Icapapwishe abantu ca kuti, ubuteko bwa Babiloni ubwakwatishe amaka balibucimfishe ku bashilika ba bena Madai na Persia mu 539 B.C.E.a Uyu musumba tawakuulilwe na kabili. Lelo waleya uleonaikilako fye ukufikila waba icibolya ‘umushali umwikashi.’—Yeremia 51:37

Ifyalandwapo mu lyashi lya kale:

● Babiloni yalyonawilwe umupwilapo ica kuti ba Tom Boiy, abasoma ilyashi lya kale balandile pa “ba ku fyalo fya basungu abasambilile ifyalecitika kale na baletandala kuli ilya ncende muli ba 1500 ukufika muli ba 1700” ukuti, balishibe ifyo umusumba wa Babiloni wacindeme lelo balefilwa “ukwishiba bwino apo wabelele.”

● Mu 1919, ba H. R. Hall, abalesunga ifintu fya kale ifyo basangile mu Egupti na mu Asiria ifyasungilwa mu British Museum, balondolwele umusumba wa Babiloni ukuti: “Waba fye cimbi cimbi, ifibumba fyawa fyasanguka fye imiina ye loba no mucanga.”

Cinshi twasambilila muli ili lyashi lilanda pa fyo aya masesemo yafikilishiwe? Cailanga fye apabuuta ukuti amasesemo ayengi ayo Baibolo yalandapo yalifikilishiwa bwino bwino. Amasesemo yalandile pali Yuda na Babiloni yalifikilishiwe filya fine fye yasobelwe!

Umusumba wa Yerusalemu walyonawilwe pantu abantu tabaumfwile ilyo Lesa abasokele ukuleka ukucita ifyabipa. Pa numa ya kuba muli bunkole mu Babiloni pa myaka 70, abena Israele balibasuminishe ukubwelela ku Yerusalemu. Umusumba wa Babiloni walyonawilwe nga filya fine ubusesemo bwalondolwele, kabili ukufika na lelo tamwaba abaikalamo. Lelo aya te masesemo fye yeka ayaba mu Baibolo.

Muli Loleni! ikakonkapo, tukalanda pa fyo ifyacitike mu nshita ya Bena Kristu ba kubalilapo fyasobelwe kale. Aya masesemo yafikilishiwa, nayo yalalenga twacetekela sana ukuti ifyo Baibolo ilanda fya cine.

[Futunoti]

[Caption pe bula 31]

Icipaapaatu ca Cyrus Cylinder apalembwa ifyo Sailasi alubwile abantu no kubabwekesha ku calo cabo

[Caption pe bula 30]

IFYACITIKE MU BABILONI

(B.C.E.)

[Icikope pe bula 30]

Ifilembo basangile mu Lakishi filanga ukuti filya Yeremia alondolwele ukuti Babiloni yalyonawile Yuda, fya cine

[Icikope pe bula 31]

[Abatusuminishe Ukubomfya Ifikope pa mabula 12 na 13]

Ibula 12, Lachish Letter: Photograph taken by courtesy of the British Museum; ibula 13, Cyrus Cylinder: © The Trustees of the British Museum