Icipandwa 21

Ukuboko kwa kwa Yehova Kwatumpuka

Esaya 25:1–27:13

 1. Mulandu nshi Esaya atemwishisha Yehova?

ESAYA alitemwa Yehova icine cine kabili abekelwa mu kumulumbanya. Abilikisha ati: “Mwe Yehova, ni mwe Lesa wandi, ndemutonda, ndetootele shina lyenu.” Cinshi cayafwa uyu kasesema ukutemwisha Kalenga wakwe nge fi? Icikalamba icamwafwa cili ni fintu aishiba Yehova ne milimo yakwe. Amashiwi Esaya akonkeshapo yalesokolola uku kwishiba: “Pantu mwacite fipesha amano, ifya kupanda amano fya ku kale, fya cishinka cishinka.” (Esaya 25:1) Ukupala Yoshua uwaliko pa ntanshi yakwe, Esaya alishiba ukuti Yehova wa cishinka kabili kuti acetekelwa no “kupanda amano” kwakwe, e kuti ifintu afwaya, filacitika.—Yoshua 23:14.

 2. Kupanda amano nshi ukwa kwa Yehova uko Esaya nomba abilisha, kabili ni kwi napamo kulungatikwe?

² Ukupanda amano kwa kwa Yehova kusanshako ukubilisha ubupingushi pa balwani ba kwa Israele. Esaya nomba alanda pa bupingushi bumo ati: “Mwacito musumba ukubo mwina, umusumba we linga ukube cawishiwa; no bukuule bukankaala bwa bambi bambi tauli musumba nomba, tabwakakuulwe umuyayaya.” (Esaya 25:2) Musumba nshi uyu uushalumbulwa ishina? Napamo Esaya alelanda pali Ari wa kwa Moabu—Moabu aba mulwani wa bantu ba kwa Lesa pa nshita yalepa.a Nelyo kuti alelanda pa musumba umbi uwakosa—uwa Babele.—Esaya 15:1; Sefania 2:8, 9.

 3. Ni mu nshila nshi abalwani ba kwa Yehova bamucindikila?

³ Bushe abalwani ba kwa Yehova bakacita shani ilyo ukupanda amano kwa kwa Yehova kwaishila umusumba wabo uwakosa? “Bakamucindikila abantu na bantu abakosa, umusumba wa nko isha kututumya ukaba na katiina kuli imwe.” (Esaya 25:3) Kuti twaumfwikisha umulandu abalwani ba kwa Lesa wa maka yonse bakamutiinina. Lelo ni shani bakamucindika? Bushe bali no kuleko kupepa balesa babo aba bufi no kutendeka ukupepa kwasanguluka? Nakalya! Lelo, ukupala Farao na Nebukadnesari, bakacindika Yehova ilyo bakapatikishiwa ukwishiba ukupulamo kwakwe ukushingalinganishiwako.—Ukufuma 10:16, 17; 12:30-33; Daniele 4:37.

 4. Bushe “umusumba wa nko isha kututumya” uwabako lelo musumba nshi, kabili ni shani ababamo na bo bacindika Yehova?

⁴ Muno nshiku “umusumba wa nko isha kututumya” waba “musumba ukalamba uwaba no bufumu pa shamfumu sha pe sonde,” no yu ni “Babele Mukalamba,” ubuteko bwa calo ubwa kupepa kwa bufi. (Ukusokolola 17:5, 18) Umukalamba sana muli ubu buteko ni Kristendomu. Ni shani ifyo bashimapepo ba mu Kristendomu bacindika Yehova? Ni lintu basumina pa fipesha amano ifyo acitila Inte shakwe, nangu ca kuti cilabakalipa ilyo balesumine ci. Aba bashimapepo “balikankamene, bapeele umucinshi kuli Lesa wa mu muulu,” maka maka ukutula mu 1919 lintu Yehova abweseshe ababomfi bakwe ku kubomba umulimo wa maka pa numa ya kukakulwa kwabo ukufuma muli bunkole bwa ku mupashi muli Babele Mukalamba.—Ukusokolola 11:13.b

 5. Ni shani ifyo Yehova acingilila abamutetekela ukwabula ukushako?

⁵ Nangu ca kuti abalwani bakwe bamumona uwa kutiinya, Yehova aba cubo ku bafuuka kabili abaicefya abafwaya ukumubombela. Bashimapepo ba culukusu na bapolitishani kuti baesha na maka yabo yonse ukushimya icitetekelo ca bakapepa bene bene, lelo balafilwa pantu aba, bacetekela Yehova ukwabula ukushako. Mu kupita kwa nshita, ukwabula no bwafya alashimya abamulwisha, abashimya kwati alefimba ikumbi pa kasuba kalotoka aka mu ciswebebe nelyo kwati aleimika ilinga ku kucilikila icikuuku ca mfula ya citalawe.—Belengeni Esaya 25:4, 5.

‘Umutebeto wa Nko Shonse’

6, 7. (a) Mutebeto wa musango nshi Yehova apekanya, kabili apekanishisha bani? (b) Cinshi umutebeto wasesemwe na Esaya wimininako?

⁶ Yehova aba nga wishi wa kutemwa, alacingilila abana bakwe no kubaliisha, maka maka ifya ku mupashi. Ilyo abalubwile mu 1919, abateyanishishe umutebeto wa kucimfya, ifilyo fya ku mupashi ifingi: “Mu lupili ulo lwa Sione, Yehova wa milalo akacitile nko shonse umutebeto wa fya mafuta, umutebeto wa myangashi ya pa fisekwa, ifya mafuta ifyaisulamo ubufyompo, imyangashi ya pa fisekwa iyalengululwa.”—Esaya 25:6.

⁷ Umutebeto wapekanishiwa mu “lupili” lwa kwa Yehova. Bushe ulu lupili cinshi? Lwaba “lupili lwa ng’anda ya kwa Yehova” ukukonkomokela inko shonse “mu nshiku [sha ku mpela, NW].” Lwaba “lupili [lwa kwa Yehova] ulwa mushilo,” umo bakapepa bakwe aba busumino bashicita bubi nelyo ukonaula. (Esaya 2:2; 11:9) Muli ici cifulo casumbulwa ica kupepelapo, epo Yehova apekanishisha abantu bakwe aba busumino umutebeto wa fya mabwenge. Kabili ifintu fya ku mupashi ifipeelwa mu kupaka nga nshi nomba fimininako ifintu fya ku mubili ifili no kupeelwa lintu Ubufumu bwa kwa Lesa bwaba e buteko bweka ubwa bantunse. Lyene takwakabe insala na kabili. “[Mukaba] ukupaka kwa ngano mu calo, na pa muulu wa mpili.”—Amalumbo 72:8, 16.

8, 9. (a) Filwani nshi fibili ifya bantunse ifikafumishiwapo? Londololeni. (b) Cinshi Lesa akacita ku kufumyapo ukuseebana kwa bantu bakwe?

⁸ Abo abalyako nomba uyu mutebeto wa ku mupashi uwapekanishiwa na Lesa balikwata isubilo lyawamisha. Kutikeni ku mashiwi yakonkapo aya kwa Esaya. Ilyo alelinganya ulubembu ne mfwa ku “cifimbo,” nelyo ku cintu “ica kukupana” icingalenga umuntu ukupwilila umweo, atila: “Mu lupili ulu akafuule ca kukupana icikupa pa bantu na bantu bonse, ne cifimbo icafimba pa nko shonse; akamine mfwa ukumina kwa pe. Shikulu Yehova akafuuta ne filamba pa finso fyonse.”—Esaya 25:7, 8a.

⁹ Cishinka, takwakabe kabili ulubembu ne mfwa! (Ukusokolola 21:3, 4) Ukulundapo, umuseebanya ababomfi ba kwa Yehova bapitamo pa myanda ya myaka ku mulandu no kubepeshiwa na o uli no kufumapo. “Ukuseebana kwa bantu bakwe akafumyapo pano isonde ponse; pantu Yehova asosa.” (Esaya 25:8b) Bushe ici cikacitika shani? Yehova akafumyapo kaseebanya, Satana no bufyashi bwakwe. (Ukusokolola 20:1-3) E mulandu wine kanshi ici cikalengela abantu ba kwa Lesa ukubilikisha ati: “Moneni, Lesa wesu uyu, uo twalelolela ukuti aletupususha. Uyu ni Yehova, uo twalelolela. Tuleanga no kusamwa mu kupususha kwakwe.”—Esaya 25:9.

Aba Matutumuko Bacendwa

10, 11. Kulimuna nshi Yehova abakila Moabu?

¹⁰ Yehova mu bantu bakwe apusushamo abaicefya. Lelo, Moabu umwina mupalamano wa kwa Israele, wa matutumuko, kabili Yehova apata amatutumuko icibi. (Amapinda 16:18) Moabu kanshi abikilwe pa bakonaulwa. “Ukuboko kwa kwa Yehova kukatuleko kutusha mu lupili ulu; lelo Moabu akanyantawilwa mu cifulo cakwe, ngo kunyantaulwa kwa mpimbili mu mafi ya ng’ombe. Kabili Moabu akafungulula amaboko yakwe mu kati ka ciko, ifyo uuleowa afungulula amaboko ku kowa, lelo Yehova akacenda amatutumuko yakwe, pamo no bunyinu bwa maboko yakwe. Amalinga ayasansuka aya fibumba fyobe akayapomona, akayawisha, akayashiba pa nshi, mu lukungu.”—Esaya 25:10-12.

¹¹ Ukuboko kwa kwa Yehova ‘kukatusha’ pa lupili lwa Moabu. Cinshi cili no kukonkapo? Moabu wa matutumuko akapamwa no kunyantaulwa nga “mu mafi ya ng’ombe.” Mu nshiku sha kwa Esaya, icani cilanyantawilwa mu mafi ya ng’ombe ku kupanga umufundo; e co Esaya alesobela ifyo Moabu ali no kuseebana, te mulandu na malinga yakwe ayatali, ayamoneka nga yashingengililwa.

12. Mulandu nshi Moabu asobwelwapo ukuti eo abilishiweko ubupingushi bwa kwa Yehova?

¹² Mulandu nshi Yehova asobwelapo Moabu ukuti amufunde na maka? Abena Moabu batuntuka kuli Lote, mwana Abrahamu muli ndume nankwe kabili kapepa wa kwa Yehova. E co bena mupalamano ba bantu Lesa apingene na bo icipingo, e lyo na kuba ni balupwa lwabo. Te mulandu ne fi, bayalukila kuli balesa ba bufi kabili bauminina fye pa bulwani na Israele. Icili no kubaponena nacibalinga. Muli fi, Moabu apala abalwani ba babomfi ba kwa Yehova aba lelo. Apala maka maka Kristendomu, uuitunga ukuti atuntuka mu cilonganino ca Bwina Kristu ica mu mwanda wa myaka uwa kwamba, lelo uwaba e lubali lukalamba ulwa Babele Mukalamba nga fintu twamona ku numa uku.

Ulwimbo lwe Pusukilo

13, 14. “Umusumba wakosa” untu abantu ba kwa Lesa bakwata lelo musumba nshi, kabili ni bani basuminishiwa ukwingilamo?

¹³ Ni shani ku lwa bantu ba kwa Lesa? Apo nabacankwa pa kusenaminwa na Yehova no kucingililwa, basansula amashiwi yabo mu kwimba. “Muli ubo bushiku mukembilwo lwimbo ulu mu calo ca kwa Yuda: Tuli no musumba uwakosa, aimike pusukilo e linga kabili umuncingi; isuleniko ku mpongolo no kuleka lwingile uluko lwa bulungami ululinde cishinka.” (Esaya 26:1, 2) Ilintu aya mashiwi ukwabulo kutwishika yalifikilishiwe ku kale, yalafikilishiwa bwino bwino ne lelo. “Uluko lwa bulungami” ulwa kwa Yehova, e kuti Israele wa ku mupashi, lwalipeelwa ukuteyanya ukwakosa, ukwapala umusumba. Mwandi ca kulenga ukusekelela, no kwimba!

¹⁴ Bantu ba musango nshi besa muli uyu “umusumba”? Ulwimbo lwayasuka aluti: “Abo imitima yabo yashintilila kuli imwe [mwe Lesa] mubalinda mutende mutende, pantu bamutetekela. Tetekeleni Yehova pe pe, pantu muli Shikulu Yehova ni mu cilibwe ca muyayaya.” (Esaya 26:3, 4) “Imitima” iyo Yehova atungilila ni ilya ifwaya ukumfwila amafunde yakwe ayalungama kabili iifwaya ukucetekela wene, te kucetekela ifya makwebo, ifya bupolitiki, ne fya mipepele ya buno bwikashi ifyatebelelwa ku mafya. “Shikulu Yehova” e Cilibwe fye ceka icacetekelwa ica kuubamo. Abacetekela Yehova umupwilapo balacingililwa no kuba “mutende mutende.”—Amapinda 3:5, 6; Abena Filipi 4:6, 7.

15. Ni shani fintu “umusumba uwasansuka” wacendwa lelo, kabili ni mu nshila nshi “amakasa ya bapina” yaunyantaula?

¹⁵ Fintu capusana ne cacitikila abalwani ba bantu ba kwa Lesa! “Aisha abekashi ba pa muulu, umusumba uwasansuka, auwisha, auwisha pa nshi, auwisha mu lukungu, aleka unyantaulwe ku makasa, amakasa ya bapina, inyatilo sha balanda.” (Esaya 26:5, 6) Pano napo, Esaya nalimo alelanda pa “musumba uwasansuka” mu Moabu, nelyo pa musumba umbi, pamo nga Babele, uwasansuka ku mulandu wa matutumuko. Te mulandu no musumba ulelandwapo, Yehova ayalukila “umusumba uwasansuka” kabili ‘abalanda bakwe na bapina’ baunyantaula. Uku kusesema lelo kwalinga Babele Mukalamba, maka maka Kristendomu. Mu 1919 uyu “umusumba uwasansuka” walipatikishiwe ukulubula abantu ba kwa Yehova, uko kwali kuwa kwa uko ukwa museebanya, kabili na bo balitendeka ukunyantaula pali uyu musumba wabatekele ubusha. (Ukusokolola 14:8) Mu nshila nshi? Ukupitila mu kubilisha icilandushi ca kwa Yehova icileishila wene.—Ukusokolola 8:7-12; 9:14-19.

Ukufuluka Ubulungami ne “Ciibukisho” ca kwa Yehova

16. Ca kupashanya nshi cisuma ica kuipeelesha ico Esaya atupeela?

¹⁶ Pa numa ya ulu lwimbo lwa kucimfya, Esaya asokolola ifyo ukuipeelesha kwakwe kwashika ne filambu fyaba mu kubombela Lesa wa bulungami. (Belengeni Esaya 26:7-9.) Uyu kasesema atupeela ica kupashanya cisuma ica ‘kulolela Yehova’ no kufulukisha “ishina” lya kwa Yehova ne “ciibukisho.” Bushe iciibukisho ca kwa Yehova e cinshi? Ukufuma 3:15 kutila: “Yehova . . . e shina lyandi umuyayaya, kabili ici e ciibukisho candi ku nkulo ne nkulo.” Esaya alitemwisha ishina lya kwa Yehova na conse ico limininako, ukusanshako ifipimo Fyakwe ifyalungama ne mibele. Abalundulula ukutemwa Yehova ukwapala uku bali no kukwata amapaalo apeela.—Amalumbo 5:8; 25:4, 5; 135:13; Hosea 12:5.

17. Mashuko nshi ayo ababifi bakabatana?

¹⁷ Lelo kwena, te bonse batemwa Yehova ne fipimo fyakwe ifyasumbuka. (Belengeni Esaya 26:10.) Ababifi, nangu ni lintu baitwako balakaana mu bumankonso ukusambilila ubulungami pa kuti bengengila “mu calo umwabe fya kushikimika,” mu calo umwaikala ababomfi ba kwa Yehova abashikimana mu mibele na mu fya ku mupashi. Muli fyo, ababifi “[tabakamone] kupulama kwa kwa Yehova.” Tabakabeko ku kuipakisha amapaalo yakesa ku bantunse ilyo ishina lya kwa Yehova likashishiwa. Nangu fye ni mu calo cipya, ilyo icalo conse cikaba “calo umwabe fya kushikimika,” bamo kuti bafilwa ukucitapo icili conse pa cikuuku ca kwa Yehova icabamo ukutemwa. Amashina ya abo bantu tayakalembwe mwi buuku lya mweo.—Esaya 65:20; Ukusokolola 20:12, 15.

18. Ni mu nshila nshi bamo mu nshiku sha kwa Esaya baifwaila fye ukube mpofu, kabili ni lilali bakapatikishiwa “ukumona” Yehova?

¹⁸ “Mwe Yehova, nakutumpuko kuboko kwenu, lelo babulo kumona, lekeni bamone no kwikatwe nsoni, bamone ukucincila kwenu ukwa pa bantu benu! cene lekeni ubapwishe umulilo uwacitilwe fibambe fyenu!” (Esaya 26:11) Mu nshiku sha kwa Esaya, ukuboko kwa kwa Yehova kwaishininkisha ukuti kwalitumpuka lintu Yehova acingilila abantu bakwe pa kulwisha abalwani babo. Lelo abengi tabeshibe ci. Abantu ba ifyo, abaifwaila fye ukube mpofu sha ku mupashi, kuli pele pele bakapatikishiwa “ukumona,” nelyo ukusumina Yehova lintu umulilo wa kupimpa kwakwe ukabapwisha. (Sefania 1:18) Ku ntanshi Lesa aeba Esekiele ati: “[Bakeshibo] kuti nine Yehova.”—Esekiele 38:23.

“Uo Shikulu Atemwa Alamufunda”

19, 20. Mulandu nshi Yehova afundila abantu bakwe kabili abafunda shani, kabili ni bani bamwenamo mu kufunda kwa ifyo?

¹⁹ Esaya naishiba ukuti umutende uuli onse no lubanda ifyo abekala calo banankwe bakwata ni ku mulandu we paalo lya kwa Yehova. “Mwe Yehova, mutucitile umutende; pantu ne milimo yesu yonse, ni mwe mwatubombela.” (Esaya 26:12) Te mulandu ne ci, e lyo te mulandu ne shuko Yehova ababikile pa ntanshi ilya kuba “ubufumu bwa bashimapepo kabili uluko lwa mushilo,” uku Yuda afuma, aacita ubusuma no bubi. (Ukufuma 19:6) Abantu bakwe balipepa balesa ba bufi libili libili. Muli fyo, balifundwapo imiku iingi. Lelo ukufunda kwa musango yo, kushininkisha fye ukuti Yehova alibatemwa, pantu “uo Shikulu atemwa alamufunda.”—AbaHebere 12:6.

²⁰ Ilingi line Yehova asalapwila abantu bakwe ukupitila mu kuleka inko shimbi, “bashikulu bambi,” ukubateka. (Belengeni Esaya 26:13.) Mu 607 B.C.E., aleka abena Babele ukubasenda bunkole. Bushe ici calenga bamwenemo? Ukucula kwena, takulenga umuntu ukumwenamo. Lelo nga ca kuti uwapita mu kucula asambililako, alapila, no kuipeelesha fye kuli Yehova, lyene alamwenamo. (Amalango 4:25-31) Bushe kuli abaYuda abali bonse abalapila ukulapila kwa bukapepa? Ee! Mu kusesema Esaya atila: “Ni muli imwe mweka e mo tulumbwile shina lyenu.” Ilyo bafumine muli bunkole mu 537 B.C.E., abaYuda ilingi line baalekabila ukufundwa pa membu shabo shimbi, lelo tababwekeshepo kabili ukupepa balesa ba mabwe.

21. Cinshi cikacitikila abatitikisha abantu ba kwa Lesa?

²¹ Ni shani pa lwa batekele Yuda ubusha? “[Balifuubalishiwa mu mfwa, tabakabuuke, NW]; e ico mwabakanda no kubafita, mwalofyo kubebukisha konse.” (Esaya 26:14) Babele akaculila pa bubi aletele pa luko lwa kwa Yehova ulwasalwa. Yehova akabomfya abena Madai na bena Persia ukupinuna Babele wa cilumba no kulubula abantu bakwe bankole. Umusumba ukalamba uwa Babele, ukafuubalishiwa, ukaba fye ngo wafwa. Mu kupita kwa nshita ukalobelela.

22. Bushe abantu ba kwa Lesa aba muno nshiku bapaalwa shani?

²² Mu kufikilishiwa kwa muno nshiku, abena Israele ba ku mupashi abashalapo abasalapwilwe balilubwilwe ukufuma muli Babele Mukalamba no kubweshiwa ku kubombela Yehova mu 1919. Apantu baalisumbwamo, Abena Kristu basubwa baipoosele pa mulimo wabo uwa kushimikila. (Mateo 24:14) Mu kukonkapo, Yehova alilenga balelunduluka, aliletamo ne bumba likalamba ilya “mpaanga shimbi” ku kubombela capamo na bo. (Yohane 10:16) “Mwakusho luko lwesu, mwe Yehova, mwakusho luko lwesu, mwacindikwa; mwatalukanye mipaka yonse ya calo ca luko. Mwe Yehova, mu kumanama e mo bamufwaile, baitulwile ipepo lya kantepentepe kuli imwe, ilyo ukulimuna kwenu kwali pali bene.”—Esaya 26:15, 16.

“Fikema”

23. (a) Kulangisha nshi ukwa maka ya kwa Yehova ukwacitika mu 537 B.C.E.? (b) Kulangisha nshi ukwapalako ukwacitike mu 1919 C.E.?

²³ Esaya abwelela ku kulanda pa mibele yalolenkene na Yuda ilyo acili muli bunkole ku Babele. Apalanya lulya luko ku mwanakashi uli mu kushikitika kwa kupaapa lelo uushafwiwe. (Belengeni Esaya 26:17, 18.) Uko kwafwa kwaisa mu 537 B.C.E., kabili abantu ba kwa Yehova babwelela ku calo cabo, balefwaisha ukuyakuula itempele cipya cipya no kubwesha ukupepa kwa cine. Cili kwati ulu luko lwabuushiwa ukufuma ku bafwa. “Bakaba no mweo abafwa benu; ifitumbi fyandi fikema. Shibukeni no kwaulo tupundu, mwe baikala mu lukungu! Pantu umume wenu mume wa lubuuto, mwe Yehova, uwa kuti mukaleke [abafuubalishiwa mu mfwa bakabwele, NW] pa calo.” (Esaya 26:19) Mwandi kulangisha kwa maka ya kwa Yehova! Kabili kwali kulangisha kukalamba lintu aya mashiwi yafikilishiwe lwa ku mupashi mu 1919! (Ukusokolola 11:7-11) Kabili tulasubila inshita ilyo aya mashiwi yakafikilishiwa mu nshila ya cine cine mu calo cipya na bafuubalishiwa mu mfwa ‘bakomfwamo ishiwi lya kwa Yesu no kufuma’ mu nshishi sha ciibukisho!—Yohane 5:28, 29.

24, 25. (a) Cinshi abaYuda ba mu 539 B.C.E. napamo bacitile pa kumfwila ukukambisha kwa kwa Yehova ukwa kufisama? (b) Bushe muno nshiku, “imiputule” kuti yaba finshi, kabili mibele nshi tulingile ukukusha pa lwa yene?

²⁴ Lelo, nga ca kuti aba busumino balefwaya ukuipakisha amapaalo yalaiwe ukupitila muli Esaya, bafwile ukumfwila amakambisho ya kwa Yehova aya kuti: “Kabiyeni, mwe bantu bandi, ingileni mu miputule yenu, no kwisalako ifiibi fyenu; fisamenimo inshita inono iyacepesha, cisuke cipite icipyu cakwe; pantu, moneni, Yehova alefuma umo aikala ku kukanda abekashi ba pano isonde pa mampuulu yabo. Icalo cikasokolole milopa iyasumiwe pali cene, tacakashiike kabili pa baipayaulwa ba ciko.” (Esaya 26:20, 21; linganyeniko Sefania 1:14.) Ili lembo napamo kuti lyafikilishiwa umuku wa kubalilapo lintu abena Madai na bena Persia abaletungululwa ne Mfumu Koreshe, bacimfya Babele mu 539 B.C.E. Ukulingana na kalemba wa lyashi lya kale umuGriki Xenophon, lintu Koreshe aingila mu Babele, akambisha bonse ukuisalila mu mayanda pantu ifita fyakwe ifya pali bakabalwe “fikambishiwe ukwipaya bonse abasangwa pa nse.” Muno nshiku, “imiputule” yalandwapo muli uku kusesema kuti yaba filonganino fishaifulila ifya bantu ba kwa Yehova mwi sonde lyonse. Ifyo filonganino fikatwalilila ukuba ifya kwafwa nga nshi mu myeo yesu, nelyo fye ukupula mu “Bucushi bukalamba.” (Ukusokolola 7:14) Fintu cili icacindama kanshi ukuti tukwate imibele iisuma pa lwa cilonganino no kutwalilila ukubishanya na co lyonse!—AbaHebere 10:24, 25.

²⁵ Nomba line fye icalo ca kwa Satana cili no kupwa. Tatulaishiba ifyo Yehova akacingilila abantu bakwe pali ilya nshita ya kutiinya. (Sefania 2:3) Lelo ico twaishiba ca kuti nga tulefwaya ukupusuka tufwile twatetekela Yehova no kuba aba cishinka e lyo no kumumfwila.

26. Bushe “Icishukushuku” ica mu nshiku sha kwa Esaya ne shesu cinshi, kabili cinshi cacitikila uyu “Shimweshimwe wa muli bemba”?

²⁶ Ilyo aleelenganya iyo nshita, Esaya asesema ati: “Muli ubo bushiku Yehova akakanda ku lupanga lwakwe ulwayafya, ulukalamba, ulwakosa, icishukushuku, icisoka icibutukisha, ne cishukushuku icisoka ica nyongana, na Shimweshimwe wa muli bemba akamwipaya.” (Esaya 27:1) Mu kufikilishiwa kwa ntanshi, “Icishukushuku” e fyalo umo abena Israele basalanganina, pamo nga Babele, Egupti, na Ashuri. Ifi fyalo tafyakaleshe abantu ba kwa Yehova ukubwelela ku calo ca ku myabo inshita nga yafika. Lelo, nani Icishukushuku ca muno nshiku? Cimoneke fyo ni Satana—“icisoka cikote”—pamo no bwikashi bwakwe ububifi pano isonde ubo abomfya ku kulwisha Israele wa ku mupashi. (Ukusokolola 12:9, 10; 13:14, 16, 17; 18:24) “Icishukushuku” calilekeleko ku bantu ba kwa Lesa mu 1919, kabili nomba line cili no kufumishiwapo lintu Yehova “[akepaya] Shimweshimwe wa muli bemba.” Pali ino nshita, tapali ifyo “Icishukushuku” cingesha ukucita ku bantu ba kwa Yehova icili no kubomba.—Esaya 54:17.

“Ibala lya Myangashi Ilyawama”

27, 28. (a) Finshi ibala lya myangashi ilya kwa Yehova lyaisusha pano nse? (b) Ni shani ifyo Yehova acingilila ibala lyakwe ilya myangashi?

²⁷ Esaya aimba ulwimbo na lumbi umo alangilila ubusaka sana ukutwala kwa bantu ba kwa Yehova abalubuka ati: “Muli ubo bushiku sashikeni ulwe bala lya myangashi ilyawama. Ine Yehova ndelilinda, ku kashita na kashita ndelitapilila; ndelilinda ubushiku na kasuba, epali icabipa cingalipempula.” (Esaya 27:2, 3) Abashalapo aba muli Israele wa ku mupashi na banabo ababombesha, cine cine balisusha isonde lyonse ne fisabo fya ku mupashi. Mwandi ca kulenga ukusekelela, no kwimba! Amalumbo yonse yaya kuli Yehova uusakamana ibala lyakwe mu kutemwa.—Linganyeniko Yohane 15:1-8.

²⁸ Cumi ubukali bwa kwa Yehova ubwa pa kubala bwapyanwapo no kusekelela! “Nshaba na cipyu. Iye, impeelwa ku kulwa ne myunga ne fimfungwa! Kuti natampula naya muli fyene, kuti nafyocela pamo. Napamo leka bekate mu bukose bwandi, no kucito mutende kuli ine; cene, leka bacite umutende kuli ine!” (Esaya 27:4, 5) Pa kushininkisha ukuti amabala yakwe aya myangashi yatwalilila ukutwala ‘imyangashi iyawama,’ Yehova ashonaula no koca nga ku mulilo imibele yonse iyaba nge ya mankumba iingonaula ibala lya myangashi. E co, te kwesha ukuleka uli onse ukufufya umutende wa cilonganino ca Bwina Kristu! Lelo lekeni bonse ‘bekate ku bukose bwa kwa Yehova,’ ukufwaya abasenamine no kubacingilila. Pa kucite fyo, balaba pa mutende na Lesa—icintu cacindama icine cine ico Esaya alumbula imiku ibili. Cinshi cifumamo? “Mu nshita ishikesa Yakobo akatwale mishila pa nshi, Israele akabalula no kutute luba, bakesushapo pano nse ifisabo.” (Esaya 27:6)c Mwandi ukufikilishiwa kwa ici cikomo kuli bushininkisho bwawamisha ubwa maka ya kwa Yehova! Ukutula 1919, Abena Kristu basubwa balisusha isonde ne “fisabo,” fya ku mupashi ifyabamo umulyo. Ici calenga ukuti kwise ne mpaanga shimbi isha cishinka ukufika ku mpendwa ya mamilioni, ababombela capamo na bo ‘ukubombela Lesa . . . akasuba no bushiku.’ (Ukusokolola 7:15) Mu kati ka calo cibifi, aba balasungilila ifipimo fyakwe ifyasumbuka mu nsansa. Kabili Yehova atwalilila ukubalundilako na bambi. Shi twikatala atulaba ishuko lyawamisha twakwata ilya kulyako “ifisabo” no kwakanyako bambi ukupitila mu kubilikishako amalumbo na ifwe!

[Amafutunoti]

[Akabokoshi pe bula 285]

“Intandala Nkalamba” Yabilisha Ukulubuka

Mu 607 B.C.E., ukukalipwa kwa Yuda kwalundwako ilyo Yehova asalapula abantu bakwe abatalansuka no kubatwala muli bunkole. (Belengeni Esaya 27:7-11.) Ifilubo fya ulu luko fikalamba ica kuti tafingakonsololwa ku malambo ya nama. E co nga fintu fye umo engapasanganya impaanga nelyo imbushi pa kushitamfya nelyo ‘ukuulula’ amabula ku mwela, e fyo na Yehova atamfya abena Israele ukufuma mu calo cabo. Pa numa ya ico, abantu bonse, na banakuka kumo, abemininwako ku banakashi, bashukila ifyashala mu calo no kusenda.

Lelo inshita yafika iya kuti Yehova alubule abantu bakwe ukufuma muli bunkole. Abalubula nga fintu shibulimi engalubula imiolife iyali nge yaikatwa ubufungwa ku muti wa muolife. “Muli ubo bushiku Yehova akalakunte ngano, ukutula pa mulonga Yufrate ukufika pa mumana wa mukuku wa Egupti, na imwe mukasotwa umo umo, mwe bana ba kwa Israele; nomba, muli ubo bushiku, kukalishiwe ntandala nkalamba, e lyo bakesa abalobela mu calo ca Ashuri, na batamfishiwa mu calo ca Egupti, bakesashinshimuna Yehova mu lupili lwa mushilo mu Yerusalemu.” (Esaya 27:12, 13) Ukukonka pa kucimfya ukwa mu 539 B.C.E., Koreshe abilisha icipope ca kulubula abaYuda bonse mu buteko bwakwe, ukusanshako aba mu Ashuri na mu Egupti. (Esra 1:1-4) Cili kwati “intandala nkalamba” yalila, ukulenga ulwimbo lwa nsansa ulwa kulubuka kwa bantu ba kwa Lesa ukumfwika.

[Ifikope pe bula 275]

“Umutebeto wa fya mafuta”

[Icikope pe bula 277]

Babele anyantaulwa ku bali abafungwa

[Icikope pe bula 278]

“Ingileni mu miputule yenu”