Ubufumu bwa kwa Lesa Bwaonaula Abalwani ba Buko

1, 2. (a) Finshi filanga ukuti ukutendekela mu mwaka wa 1914 Imfumu yesu ilateka? (b) Finshi twalalandapo muli cino cipandwa?

NANGU ca kutila kwaliba abalwani ba Bufumu bwa kwa Lesa abengi, icitetekelo cesu nacikoselako pa numa ya kupituluka mu fyo ubu Ubufumu bwacita. (Amalu. 110:2) Imfumu yesu yalikwata ibumba lya bantu abaitemenwa ukushimikila. Yalibasangulula no kubalopolola lwa ku mupashi na mu mibele. Nangu ca kutila abalwani ba Bufumu balyesha inshila shalekanalekana pa kuti batulekanye, twalitwalilila ukwikatana mwi sonde lyonse. Ifi twalandapo e lyo na fimbi ifingi ifyo Ubufumu bwa kwa Lesa bwacita ifyo tulandilepo muli cino citabo, filalanga apabuuta tuutu ukuti Imfumu yesu yalitendeka ukuteeka mu kati ka balwani baiko ukutula mu mwaka wa 1914.

² Ubufumu bukacita ifintu na fimbi ifisuma sana ku ntanshi. Ilyo ‘bukesa,’ “bukashonaula no kupwisha” abalwani ba buko. (Mat. 6:10; Dan. 2:44) Lelo ilyo Ubufumu bushilaisa, kukaba ifintu ifikalamba ifikacitika. Finshi fikacitika? Amasesemo ayengi aya mu Baibolo yalilanda pali ifi fintu. Natulande pa masesemo yamo yamo pa kuti twishibe ifikacitika ku ntanshi.

 3. Cinshi icikabalilapo ukucitika ico tulelolela?

³ Ukulanda ukuti umutende no mutelelwe. Ilyo Umutumwa Paulo alembeele Abena Tesalonika kalata, alilondolwele ica kubalilapo icikacitika ico tulelolela. (Belengeni 1 Abena Tesalonika 5:2, 3.) Muli iyi kalata Paulo alandile pa “bushiku bwa kwa Yehova” ukuti, bukatendeka ilyo “Babiloni Mukalamba” bakamusansa. (Ukus. 17:5) Lelo ilyo ubushiku bwa kwa Yehova bushilatendeka, inko shikalalanda ukuti kuli “Umutende no mutelelwe!” Nalimo bakalanda fye umuku umo nelyo bakalanda imiku iingi ukuti kuli umutende no mutelelwe. Bushe ne ntungulushi sha mapepo nasho shikalandako? Apo balaitumpa mu fya calo, nalimo bakalandako ukuti: “Kuli umutende!” (Yer. 6:14; 23:16, 17; Ukus. 17:1, 2) Ukulanda ukuti kuli umutende no mutelelwe, cikaba cishibilo ca kutila ubushiku bwa Yehova buli mupepi no kutendeka. Abapata Ubufumu bwa kwa Lesa “tabakapusuke nakalya.”

 4. Busuma nshi bwaba mu kwishiba ubusesemo bwa kwa Paulo ubwa kuti abantu bakalanda ukuti kuli umutende no mutelelwe?

⁴ Busuma nshi bwaba mu kwishiba ubu ubusesemo? Paulo atile: “Tamuli mu mfifi, pa kuti ubushiku bulya bukamupumikishe nge fyo amacaca yapumikisha abapuupu.” (1 Tes. 5:3, 4) Ifwe tatwaba nga bantu bambi pantu twalishiba ifikakonka pa filecitika muno nshiku. Bushe uku ukusesema ukwa kulanda pa mutende no mutelelwe kukafikilishiwa shani? Tatwaishiba bwino bwino, tufwile ukulolela no kumona ifyo cikaba. Kanshi tube fye ‘abalola kabili tutekanye.’—1 Tes. 5:6; Sefa. 3:8.

 5. Ciputulwa nshi ica “bucushi bukalamba” icikabalilapo?

⁵ Ukusansa imipepele. Ibukisheni yalya amashiwi Paulo alembele aya kuti: “Ilyo balesosa abati: ‘Umutende no mutelelwe!’ e lyo ubonaushi bwa kupumikisha bukabemina.” Nga filya fine ukubyata kwa nkuba kukonkana no kupanta kwa nkuba, e fyo no bonaushi bukacitika pa numa fye ya kulanda ukuti kuli “Umutende no mutelelwe!” Finshi fikonaulwa? Icikabalilapo ukonaulwa ni “Babiloni Mukalamba,” imipepele yonse iya bufi, iyaishibikwa no kuti “cilende.” (Ukus. 17:5, 6, 15) Ukonaula Kristendomu ne mipepele imbi iya bufi kukaba e ciputulwa ca kubalilapo ica “bucushi bukalamba.” (Mat. 24:21; 2 Tes. 2:8) Ici cikapapusha abengi. Mulandu nshi? Pantu ukufika na pali ilya nshita, cilende akalaimona ukuti ni “namfumu” ‘uushakalooshe nakalya.’ Lelo mu kupumikisha fye akamona ukuti aleibepa fye. Bakamonaula bwangu bwangu kwati ni “mu bushiku fye bumo.”—Ukus. 18:7, 8.

 6. Ni bani bakasansa “Babiloni Mukalamba”?

⁶ Ni bani nelyo ni cinshi cikasansa “Babiloni Mukalamba”? “Ciswango” ica “nsengo 10.” Ibuuku lya Ukusokolola lilondolola ukuti ici ciswango kabungwe ka United Nations (UN). Insengo 10 shimininako ifyalo fyonse ifyakwata amaka ya bupolitiki ifyabako pali ino nshita ifitungilila “iciswango icakashika ce.” (Ukus. 17:3, 5, 11, 12) Bushe ubonaushi bwakwe bukaba shani? Ifyalo ifitungilila akabungwe ka UN fikamupoka icuma cakwe conse, fikamulya umubili, no “kumoca fye onse mu mulilo.”—Belengeni Ukusokolola 17:16.a

 7. Bushe amashiwi Yesu alandile pali Mateo 24:21, 22 yafikilishiwe shani mu nshita ya batumwa, kabili yakafikilishiwa shani ku ntanshi?

⁷ Inshiku ukwipifiwa. Imfumu yesu yalisokolola ifikacitika ilyo kukaba ubucushi bukalamba. Yesu atile: “Pa mulandu wa basalwa, isho nshiku bakashipifya.” (Belengeni Mateo 24:21, 22.) Amashiwi ya kwa Yesu yafikilishiwe umuku wa kubalilapo mu 66 C.E. ilyo Yehova ‘aipifye’ inshiku isho abashilika abena Roma basanshilemo Yerusalemu. (Marko 13:20) Ukwipifya inshiku kwalengele ukuti Abena Kristu abali mu Yerusalemu na mu Yudea bapusuke. Nomba cinshi cikacitika mwi sonde lyonse ilyo ubucushi bukalamba bukatendeka? Yehova akabomfya Imfumu yesu ‘ukwipifya’ inshiku isho akabungwe ka United Nations kakasansamo imipepele pa kuti ukupepa kwa cine kwikonaulwa pamo ne mipepele ya bufi. Kanshi ilyo imipepele yonse iya bufi ikonaulwa, ukupepa kwa cine kumo fye e kushakonaulwe. (Amalu. 96:5) Natulande nomba pa fikacitika pa numa ya ici ciputulwa ca bucushi bukalamba.

8, 9. Finshi nalimo Yesu alelandapo ilyo alandile pa fintu fya kutiinya ifikacitika, kabili abantu bakomfwa shani ilyo bakafimona?

⁸ Ubusesemo bwa kwa Yesu ubulanda pa nshiku sha kulekelesha bulanga ukuti ifintu ifingi ifikalamba fikacitika ilyo Armagedone ishilatampa. Ifya kubalilapo fibili ifyo twalalandapo fyalembwa mu mabuuku ya Mbila Nsuma aya kwa Mateo, Marko, na Luka.—Belengeni Mateo 24:29-31; Marko 13:23-27; Luka 21:25-28.

⁹ Ifintu fya kutiinya mu muulu. Yesu asobele ukuti: “Akasuba kakafiita no mweshi tawakabalike, kabili intanda shikapona mu muulu.” Intungulushi sha mapepo tashakabe kwati lubuuto, e kutila abantu tabakafwaye ukulatungululwa nasho. Bushe Yesu alelosha mu kuti na mu muulu mukaba ifishibilo? Nalimo e fyo alepilibula. (Esa. 13:9-11; Yoele 2:1, 30, 31) Bushe abantu bakacita shani ilyo bakamona ifya musango yu? Bakaba no “bulanda” pantu ‘bakapelelwa.’ (Luka 21:25; Sefa. 1:17) Ca cine, abalwani ba Bufumu bwa kwa Lesa, ‘bashamfumu na basha,’ ‘bakalafwa umutombo pa mulandu wa mwenso na pa mulandu wa kulolela ifikacitika,’ kabili bakafwaya ukwa kubelama pa mulandu wa kutiina ubukali bwa Mfumu yesu. Lelo tabakakusange nakalya.—Luka 21:26; 23:30; Ukus. 6:15-17.

10. Bushe Yesu akapingula shani abantu, kabili cikaba shani ku baba ne cishinka ku Bufumu bwa kwa Lesa e lyo na ku balwani ba buko?

¹⁰ Inshita ya bupingushi. Abalwani bonse aba Bufumu bwa kwa Lesa bakapatikishiwa ukumona icintu icikalenga ukuti bakabe sana no mwenso. Yesu atile: “Bakamona Umwana wa muntu aleisa mu makumbi ali na maka ayengi no bukata.” (Marko 13:26) Uku kumoneka na maka kukalanga ukuti Yesu aisa ku kupingula. Mu busesemo bumo bwine, ubwaba na mu Mbila Nsuma iya kwa Mateo, ubulanda pa nshiku sha kulekelesha, Yesu alilandile na fimbi pa fyo ubu bupingushi bukaba. Ifi fyebo fyaba mu cilangililo ca mpaanga ne mbushi. (Belengeni Mateo 25:31-33, 46.) Ababa ne cishinka ku Bufumu bwa kwa Lesa bakabapingula ukuti ni “mpaanga” kabili ‘bakenuna imitwe yabo,’ pantu bakeshiba ukuti ‘ukulubuka kwabo nakupalama.’ (Luka 21:28) Lelo abalwani ba Bufumu abo bakapingula ukuti ni “mbushi,” ‘bakaloosha nga nshi,’ pantu bakeshiba ukuti ‘balaonaulwa umuyayaya.’—Mat. 24:30; Ukus. 1:7.

11. Finshi tulingile ukulatontonkanyapo ilyo tulelolela ifikacitika ku ntanshi?

¹¹ Yesu nga apingula “inko shonse,” kukaba ifintu ifikalamba na fimbi ifingi ifikacitika ilyo Armagedone ishilatendeka. (Mat. 25:32) Nomba twalalanda fye pa fintu fibili: ukusansa kwa kwa Goge no kulonganikwa kwa basubwa. Ilyo tulelanda pali ifi fibili, tulingile ukwishiba ukuti Icebo ca kwa Lesa tacalanda mu kulungatika inshita iyo ifi fikacitikilapo. Na kuba, cimoneka kwati ilyo ica kubalilapo cishilapwa fye, icalenga bubili na co cikatampa.

12. Bushe Satana akasansa shani Ubufumu?

¹² Ukusansa. Goge wa ku calo ca Magoge akasansa abasubwa abakashalapo e lyo ne mpaanga shimbi. (Belengeni Esekiele 38:2, 11.) Uku kusansa Ubufumu ubuleteka kukaba e kwa kulekelesha mu bulwi bwa kwa Satana ubwa kulwisha abashalapo ubo atendeke ilyo bamutamfishe ku muulu. (Ukus. 12:7-9, 17) Satana atampile ukusansa sana abasubwa ilyo batendeke ukulonganikwa mu cilonganino ca Bena Kristu ba cine. Alyesha ukonaula ukupepa kwabo ukwa cine, lelo alifilwa. (Mat. 13:30) Ilyo imipepele ya bufi yonse ikonaulwa, abantu ba kwa Lesa bena tabakonaulwe, lelo Satana akamona kwati tabacingililwa na ‘malinga, imipindo nangu ifiibi,’ kabili akafwaya ukubonaula. Akatunka abantu bakwe ababipa ukuyasansa ababa ne cishinka ku Bufumu bwa kwa Lesa.

13. Bushe Yehova akapokolola shani ababomfi bakwe?

¹³ Esekiele alilondolola ifikacitika. Ukusesema kulanda pali Goge kutila: “Ukesa ukufuma ku cifulo cobe, ukufuma ku kapinda ka ku kuso ukutali sana, iwe pamo ne nko ishingi, bonse abendela pali bakabalwe, ibumba ilikalamba, kabili ibumba lya bashilika ilikalamba. Ukaninina abantu bandi.” (Esek. 38:15, 16) Bushe Yehova akacita shani ilyo Satana na bantu bakwe bakasansa abantu ba kwa Lesa? Yehova atila: “Nkakalipa nga nshi,” kabili “nketa ulupanga.” (Esek. 38:18, 21; belengeni Sekaria 2:8.) Yehova akapokolola ababomfi bakwe aba pe sonde, kabili ifi fine e fyo inkondo ya Armagedone ikatendeka.

14, 15. Cinshi cimbi icikacitika ilyo Satana akatendeka fye ukusansa ababomfi ba kwa Lesa?

¹⁴ Ilyo tushilalanda pa fyo Yehova akapokolola abantu bakwe mu nkondo ya Armagedone, natubale tulande pa cintu na cimbi icikalamba icikacitika. Ici cikacitika pa kati ka nshita iyo Satana akatendeka ukusansa abantu ba kwa Lesa, ne nshita Yehova akema ukuti apokolole abantu bakwe pa Armagedone. Nge fyo twacisambilila mu paragrafu 11, ici icalenga bubili icikacitika kulonganikwa kwa basubwa abashalapo.

¹⁵ Ukulonganika abasubwa. Bonse babili Mateo na Marko balilembele ifyo Yesu alandile pa “basalwa,” e kutila Abena Kristu basubwa. Ifyo alandile fyaba pa fikacitika ilyo Armagedone ishilatendeka. (Moneni paragrafu 7) Ilyo Yesu alelanda pa fyo akacita ku ntanshi ilyo akaba Imfumu, aseseme ukuti: “Akatuma bamalaika no kulonganika pamo abasalwa bakwe ukufuma ku kabanga, ku masamba, ku kapinda ka ku kuso na ku kapinda ka ku kulyo, ukufuma ku mpela ya pano isonde no kufika ku mpela ya muulu.” (Marko 13:27; Mat. 24:31) Bushe kulonganika nshi uko Yesu alelandapo? Yesu talelanda pa kufwatikwa kwa kulekelesha ukwa Bena Kristu basubwa, ukukabako ilyo ubucushi bukalamba bushilatendeka. (Ukus. 7:1-3) Lelo alelanda pa cikacitika mu bucushi bukalamba. Kanshi ilyo Satana akatendeka ukusansa abantu ba kwa Lesa, kukaba inshita imo ilyo Abena Kristu basubwa abakaba pe sonde bakalonganikwa ku muulu.

16. Finshi ifyo abasubwa abakabuushiwa bakacita pa nkondo ya Armagedone?

¹⁶ Bushe uku ukulonganikwa kwa basubwa kwayampana shani ne nkondo ya Armagedone iikakonkapo? Inshita bakalonganikilwapo ilangilila ukuti abasubwa bonse bakaba ku muulu ilyo inkondo ya kwa Lesa iya Armagedone ishilatendeka. Ku muulu, ba 144,000, impyani shinankwe isha kwa Kristu bakapeelwa amaka pa kuti bakabombele pamo na Yesu ukubomfya “nkonto ya cela” ku konawilako abalwani ba Bufumu bwa kwa Lesa bonse. (Ukus. 2:26, 27) Pa numa, ba malaika ba maka, pamo na basubwa abakabuushiwa bakakonka Kristu, Imfumu ya Bulwi, ilyo akasansa “ibumba lya bashilika ilikalamba” ilikemina abantu ba kwa Yehova. (Esek. 38:15) Uku ukusansa abalwani ba kwa Yehova, e kutendeka kwa Armagedone.—Ukus. 16:16.

17. Pa Armagedone, cinshi cikacitika ku bantu abo bakapingula ukuti ni “mbushi”?

¹⁷ Ukonaula bonse ababipa. Inkondo ya Armagedone e ikaba iciputulwa ca kulekeleshako ica bucushi bukalamba. Pali iyi nshita, Yesu akabomba umulimo na umbi. Pa mbali ya kuba Kapingula wa “nko shonse,” akonaula ne nko shonse, e kutila abantu bonse abo akapingula ukuti ni “mbushi.” (Mat. 25:32, 33) Imfumu yesu ikabomfya “ulupanga ulutali ulwatwa” ku ‘kuuminako inko.’ Bonse fye abakapingulwa ukuti ni mbushi, “ishamfumu,” na “basha” kumo “bakonaulwa umuyayaya.”—Ukus. 19:15, 18; Mat. 25:46.

18. (a) Bushe cikaba shani kubo bakapingula ukuti ni “mpaanga”? (b) Bushe Yesu akapwishishisha shani ukucimfya?

¹⁸ Ala cikawama nga nshi ku bantu ba kwa Lesa abo Yesu akapingula ukuti ni “mpaanga”! Ibumba lya “mbushi” ilya kwa Satana talyakabonaule, lelo ili “ibumba likalamba” abakamoneka kwati takuli uwa kubacingilila, bakabapokolola ku balwani kabili ‘bakafuma mu bucushi bukalamba.’ (Ukus. 7:9, 14) Yesu nga acimfya no konaula abalwani bonse aba Bufumu bwa kwa Lesa pano isonde, akapoosa Satana ne fibanda fyakwe mu cilindi. Ilyo bakapooswa muli ici icilindi, bakaba fye kwati balifwa, kabili tabakalelufya abantu pa myaka 1000.—Belengeni Ukusokolola 6:2; 20:1-3.

19, 20. Cinshi twingasambilila ku mashiwi yalembwa pali Esaya 26:20 na pali Esaya 30:21?

¹⁹ Kuti twaipekanya shani ku fintu ifya kutiinya ifili no kucitika? Ulupungu lwa kwa Kalinda lumo ulo twasambilile kale lwalandile ukuti: “Ipusukilo likashintilila pa cumfwila.” Mulandu nshi? Icasuko kuti twacisanga mu mashiwi aya kusoka ayo Yehova aebele abaYuda abali abasha mu Babiloni. Yehova asobele ukuti ubuteko bwa Babiloni baali no kubucimfya. Bushe abantu ba kwa Lesa baali no kuipekanya shani? Yehova abebele ukuti: “Kabiyeni, mwe bantu bandi, ingileni mu miputule yenu iya mu kati, kabili isaleniko ifiibi. Fisameni inshita inono mpaka ubukali bupite.” (Esa. 26:20) Nga mwamona, Yehova abebele ati, “kabiyeni,” “ingileni,” “isaleniko,” e lyo no kuti “fisameni.” Aya mashiwi yalelanga ukuti Yehova alebakonkomesha. AbaYuda abakonkele ifyo abebele tabafumine mu mayanda yabo kabili ilyo abashilika balesansa mu misebo, bena balicingililwe. Kanshi ipusukilo lyabo lyashintilile pa kumfwila ifyo Yehova abebele.b

²⁰ Cinshi twingasambila ku fyo bacitile? Nge fyo cali kuli aba ababomfi ba kwa Lesa, pa kuti na ifwe tukapusuke ubucushi bukalamba, tufwile ukulakonka ifyo Yehova atweba. (Esa. 30:21) Yehova abomfya icilonganino cakwe pa kutweba ifyo tulingile ukucita. Kanshi tufwile ukulaumfwila amafunde yakwe. (1 Yoh. 5:3) Nga tulomfwila amafunde yakwe ino nshita, ninshi tacakatwafye ukuba ne cumfwila na ku ntanshi, kabili Shifwe Yehova, ne Mfumu, Yesu, bakatucingilila. (Sefa. 2:3) Yehova nga atucingilila ninshi tukamonako na menso uko Ubufumu bwa kwa Lesa bukalaonaula abalwani ba buko bonse, kabili tatwakatale atulaba ica musango yu!