Impaanga Shimbi ne Cipingo Cipya

“Bambi bambi . . . , abaikatisha mu cipingo cakwe, onse uulame sabata apabulo kulipelula, na bo nkaleta ku lupili lwandi lwa mushilo.”—ESAYA 56:6, 7.

 1. (a) Ukulingana ne cimonwa ca kwa Yohane, cinshi cipwishishiwa ilyo imyela ya bupingushi bwa kwa Yehova iketwe? (b) Libumba nshi ilya kusungusha lintu Yohane amwene?

MU CIMONWA calenga bune mwi buuku lya Ukusokolola, umutumwa Yohane amwene imyela ya bonaushi iya bupingushi bwa kwa Yehova yaikatwa ilyo ukukakatika kwa bonse aba muli “Israele wa kwa Lesa” kulepwishishiwa. Aba e babalilapo ukupaalilwa muli Yesu, ulubali lukalamba mu bufyashi bwa kwa Abrahamu. (Abena Galatia 6:16; Ukutendeka 22:18; Ukusokolola 7:1-4) Mu cimonwa cimo cine, Yohane amwene “ibumba likalamba ilishingapendwa ku muntu nangu umo, abafuma ku luko lonse ne mikowa ne misango ya bantu na bantu na ba ndimi . . . , balebilikishe shiwi likalamba, abati, Ipusukilo lya kwa Lesa wesu uwaikala pa cipuna ca bufumu, ne lya Mwana wa mpaanga.” (Ukusokolola 7:9, 10) Mu kusosa ukuti, “Ipusukilo . . . lya Mwana wa mpaanga,” ibumba likalamba lilangilila ukuti na bo bene bapaalilwa mu Bufyashi bwa kwa Abrahamu.

 2. Ni lilali ibumba likalamba lyamoneke, kabili ni shani fintu lishibikwa?

² Ili bumba likalamba lyaishibikwe mu 1935, kabili ilelo lyalicila pa mamilioni yasano. Apo bashilwa akashilwa ka kupusuka ubucushi bukalamba, bakapaatulwa ukuya ku mweo wa muyayaya lintu Yesu akapaatula “impaanga” ku “mbushi.” Abena Kristu ba mwi bumba likalamba baba mu “mpaanga shimbi” isha mu mulumbe wa kwa Yesu uwa macinka. Basubilo kwisaikala kuli pe na pe mu paradise pe sonde.—Mateo 25:31-46; Yohane 10:16; Ukusokolola 21:3, 4.

 3. Ni shani fintu Abena Kristu basubwa ne mpaanga shimbi bapusana ukulosha ku cipingo cipya?

³ Kuli ba 144,000, ipaalo lya cipingo ca kwa Abrahamu lipitila mu cipingo cipya. Pamo nga baba muli ici cipingo, baba “bena kusenamina” kabili “mu malango ya kwa Kristu.” (Abena Roma 6:15; 1 Abena Korinti 9:21) E co, ni ba 144,000 fye aba muli Israele wa kwa Lesa abalyako fye ifimpashanya mu kulinga pa Cibukisho ca mfwa ya kwa Yesu, kabili Yesu apangile icipingo ca Bufumu na ba bene beka fye. (Luka 22:19, 20, 29) Aba mwi bumba likalamba tababa mu cipingo cipya. Nangu cibe fyo, babishanya na Israele wa kwa Lesa no kwikala na bo mu “calo” cabo. (Esaya 66:8) Kanshi calibamo fye amano ukusosa ukuti na bo bene baba mu kusenamina kwa kwa Yehova na mwi funde lya kwa Kristu. Nangu cingati tababa mu cipingo cipya, balanonkelamo.

“Bambi Bambi” na “Israele wa kwa Lesa”

4, 5. (a) Ukulingana na Esaya, libumba nshi lyali no kupyungila Yehova? (b) Ni shani fintu Esaya 56:6, 7 afikilishiwa pe bumba likalamba?

⁴ Kasesema Esaya alembele ukuti: “Bambi bambi abailunda kuli Yehova, ku kumupyungila no kutemwe shina lyakwe, ku kuba kuli wene ababomfi abaikatisha mu cipingo cakwe, onse uulame sabata apabulo kulipelula, na bo nkaleta ku lupili lwandi lwa mushilo, no kubalengo kusamwa mu ng’anda yandi ye pepo; ifya kuninika fyabo na malambo yabo fikabe fya kuntemuna pa ciipailo candi.” (Esaya 56:6, 7) Mu Israele, ici capilibwile ukuti “bambi bambi,” e kuti abashali abena Israele, kuti bapepa Yehova—ukutemwa ishina lyakwe, ukumfwila icipingo ce Funde, ukusunga Isabata, no kupeela amalambo pe tempele, “ing’anda ya kupepelamo” iya kwa Lesa.—Mateo 21:13.

⁵ Mu nshiku shesu, “bambi bambi abailunda kuli Yehova” baba libumba likalamba. Aba bapyungila Yehova mu kubishanya na Israele wa kwa Lesa. (Sekaria 8:23) Bapeela amalambo yamo yene ayasuminishiwa nga ya kwa Israele wa kwa Lesa. (AbaHebere 13:15, 16) Bapepa mwi tempele lya ku mupashi ilya kwa Lesa, ‘ing’anda yakwe iya kupepelamo.’ (Linganyeniko Ukusokolola 7:15.) Bushe balasunga Isabata lya cila mulungu? Abasubwa nelyo impaanga shimbi tabakambishiwa ukucite co. (Abena Kolose 2:16, 17) Nangu cibe fyo, Paulo aebele Abena Kristu basubwa aba ciHebere ukuti: “Kwashilwapo abantu ba kwa Lesa isabata lya Kutusha pantu umuntu ilyo aingila mu kutusha kwakwe, wene atusha na ku milimo yakwe, ifyo fine na Lesa atushishe ku milimo yakwe iine.” (AbaHebere 4:9, 10) Balya baHebere baingile muli ili “sabata lya Kutusha” lintu bainashishe ku “bulungami bwa kwa Lesa” no kutusha ku kwesha ukuilungamikila ku milimo ye Funde. (Abena Roma 10:3, 4) Abena Kristu basubwa Abena fyalo baipakisha ukutusha kumo kwine ukupitila mu kuinashisha ku bulungami bwa kwa Yehova. Ibumba likalamba liilunda kuli bene muli uko kutusha.

 6. Ni shani fintu impaanga shimbi ilelo bainashisha ku cipingo cipya?

⁶ Mu kulundapo, impaanga shimbi bainashisha ku cipingo cipya nga fintu bambi bambi aba ku kale bainashishe ku cipingo ce Funde. Mu nshila nshi? Te mu kuti nomba balabamo lelo kupitila mu kunakila ku mafunde yakuma kuli cene no kunonkelamo mu kutantika kwa ciko. (Linganyeniko Yeremia 31:33, 34.) Ukupala abanabo abasubwa, impaanga shimbi shalilembwa ifunde lya kwa Yehova ‘mu mitima yabo.’ Balitemwisha amafunde ne fishinte fya kwa Yehova kabili balaficita. (Ilumbo 37:31; 119:97) Ukupala Abena Kristu basubwa, balishiba Yehova. (Yohane 17:3) Nga pa lwa kusembululwa? Imyaka 1,500 ilyo icipingo cipya cishilapangwa, Mose akonkomeshe abena Israele ukuti: “Sembululeni inkanda ya pa mpela ya mitima yenu.” (Amalango 10:16; Yeremia 4:4) Nangu cingati ukusembululwa kwa ku mubili ukwa bonse kwapwilile pamo ne Funde, abasubwa ne mpaanga shimbi bafwile ‘ukusembulula’ imitima yabo. (Abena Kolose 2:11) Mu kupelako, Yehova alekelela ifilubo fya mpaanga shimbi ukushimpwa pa ‘mulopa wa cipingo’ uwa kwa Yesu. (Mateo 26:28; 1 Yohane 1:9; 2:2) Lesa tabapokelela nga bana ba ku mupashi, nga fintu acita ba 144,000. Lelo alalungamika impaanga shimbi, mu nshila ya kuti Abrahamu alilungamikwe nga cibusa wa kwa Lesa.—Mateo 25:46; Abena Roma 4:2, 3; Yakobo 2:23.

 7. Cilolelo nshi impaanga shimbi ishalungamikwa nga fintu Abrahamu alungamikwe, shakwata ilelo?

⁷ Kuli ba 144,000, ukulungamikwa kwisula inshila ya kukwata isubilo lya kuteka na Yesu mu Bufumu bwa mu muulu. (Abena Roma 8:16, 17; Abena Galatia 2:16) Ku mpaanga shimbi, ukulungamikwa nge fibusa fya kwa Lesa kubalenga ukukwata isubilo lya mweo wa muyayaya mu paradise pe sonde—atemwa ukupitila mu kupusuka Armagedone nga be bumba likalamba nelyo “ukwima ku bafwa kwa balungama.” (Imilimo 24:15) Fintu caba ishuko ukukwata isubilo lya musango yu no kuba cibusa wa kwa Mulopwe wa kubumbwa konse, ‘ukulebela mwi hema lyakwe’! (Ilumbo 15:1, 2) Ee, abasubwa ne mpaanga shimbi balipaalwa mu nshila iisuma ukupitila muli Yesu, Ubufyashi bwa kwa Abrahamu.

Ubushiku bwa Kukonsolwela Ubwacilapo

 8. Finshi amalambo ya Bushiku bwa Kukonsolwela yalecita icinshingwa ukulingana ne Funde?

⁸ Lintu alelanda pa cipingo cipya, Paulo acinkwileko bakabelenga bakwe pa lwa Bushiku bwa Kukonsolwela ubwa cila mwaka ukulingana ne cipingo ce Funde. Pa bushiku ubo, amalambo yapusana yalepeelwa—limo ilya mukowa wa bena Lebi uwa bashimapepo na limbi ilya mikowa 12 iishali ya bashimapepo. Ici ukutula kale calondololwa nge calecite cinshingwa ilambo likalamba ilya kwa Yesu ilyali no kunonsha ba 144,000 abakwata isubilo lya ku muulu na mamilioni abakwata isubilo lya pe sonde.a Paulo alangilile ukuti mu kufikilishiwa, ubunonshi bwe lambo lya kwa Yesu bupitila mu Bushiku bwa Kukonsolwela ubwacilapo umwabele cipingo cipya. Pamo nga Shimapepo Mukalamba wa bushiku ubu ubwacilapo, Yesu apeele umweo wakwe uwapwililika nge lambo lya cikonsolwelo ku kumwena abantu “icilubula ca muyayaya.”—AbaHebere 9:11-24.

 9. Pa kuba mu cipingo cipya, finshi Abena Kristu basubwa abaHebere bengapokelela?

⁹ Abena Kristu abengi abaHebere aba mu mwanda wa myaka uwa kubalilapo baali bacili ‘balesakamana Amalango ya kwa Mose.’ (Imilimo 21:20) Cali icalinga kanshi ukuti Paulo abacinkuleko ukuti: “[Yesu] aba kawiikishanya wa cipingo cipya, ukuti abaitwa bapokelele icilayo ca bupyani bwa muyayaya, ico kwali imfwa iyabalubula ku fya bumpulamafunde ifya mu cipingo ca ntanshi.” (AbaHebere 9:15) Icipingo cipya calubwile Abena Kristu abaHebere ukufuma ku cipingo ca kale, icabasansalike ukuti babembu. Pa mulandu wa cipingo cipya, kuti bapokelela “icilayo ca bupyani [bwa ku muulu] bwa muyayaya.”

10. Finshi Abena Kristu basubwa ne mpaanga shimbi batashishapo Lesa?

¹⁰ “Onse . . . uutetekelo Mwana” akamwenamo mwi lambo lya cilubula. (Yohane 3:16, 36) Paulo atile: “Kristu, pa kutuulwa limo ku kusende membu sha bengi, akamoneka libili, ukwabulo kusendo lubembu, ku kupususha aba mulolela no kufuluka.” (AbaHebere 9:28) Ilelo, abafwaisha Yesu basanshamo Abena Kristu basubwa aba kwa Israele wa kwa Lesa abacilipo na mamilioni abapanga ibumba likalamba, na bo bene abakwata ubupyani bwa muyayaya. Amabumba yonse yabili yatasha Lesa pa cipingo cipya na mapaalo yapeela ubumi ayaba pamo na cene, ukusanshako Ubushiku bwa Kukonsolwela ubwacilapo no butumikishi bwa kwa Shimapepo Mukalamba, Yesu, uwaba mu muulu Umwashilisha.

Abapamfiwa mu Mulimo Washila

11. Mu kuba na bakampingu basangululwa mwi lambo lya kwa Yesu, finshi abasubwa ne mpaanga shimbi bacita mu nsansa?

¹¹ Muli kalata wakwe ku baHebere, Paulo akomaile pa mutengo wacilapo uwe lambo lya kwa Yesu mu cipingo cipya ukulinganya ku malambo ya pa lubembu mu cipingo ca kale. (AbaHebere 9:13-15) Ilambo lya kwa Yesu ilyacilapo ukuwama kuti ‘lyasangulula bakampingu wesu ku milimo yafwa no kutulosha mu kubombela Lesa wa mweo.’ Ku Bena Kristu abaHebere, “imilimo yafwa” yasanshishemo “bumpulamafunde ifya mu cipingo ca ntanshi.” Ku Bena Kristu ilelo, isanshamo imembu shacitilwe kale pali isho umo alapila icine cine kabili isho Lesa amulekelela. (1 Abena Korinti 6:9-11) Mu kuba na bakampingu basangululwa, Abena Kristu basubwa ‘babombela Lesa wa mweo.’ E fyo ne bumba likalamba licita. Mu kuba nabasangulula bakampingu wabo mu “mulopa wa Mwana wa mpaanga,” baba mwi tempele lya ku mupashi ilikalamba ilya kwa Lesa, ‘balemubombela akasuba no bushiku.’— Ukusokolola 7:14, 15.

12. Ni shani fintu tulangisha ukuti twalikwata “umwisulo wa kutetekela”?

¹² Mu kulundapo, Paulo atile: “Tupalamineko ne mitima ine ine mu mwisulo wa kutetekela, ukuba ne mitima yesu iyakanwako ku kusangululwa bakampingu wa bubifi, kabili abasambwe mibili mu menshi ayalengama.” (AbaHebere 10:22) Ni shani fintu twingalangisha ukuti twalikwata “umwisulo wa kutetekela”? Paulo akonkomeshe Abena Kristu abaHebere ukuti: “Twikatishe ukulumbula kwa kucetekela kwesu [ukwa ku muulu] no kukanaungwaungwa pantu wa cishinka uwalaile; kabili twetetule umwa kucincimushanisha ku kutemwa kabili ku kubombe milimo isuma; twiba abaleko kulongana, ifyo wabo musango wa bamo, lelo tukonkomeshanye, pali bufi apo mulemono Bushiku bulya bulepalama.” (AbaHebere 10:23-25) Nga ca kuti icitetekelo cesu ca mweo, na ifwe ‘tatwakaleke ukulongana.’ Tukabekelwa mu kucincisha bamunyinefwe no kucincishiwa na bene ku kutemwa kabili ku kubombe milimo isuma no kukoshiwa ukuti tubombe umulimo wacindama uwa kubilisha isubilo lyesu, nampo nga lya kwikala pe sonde nelyo lya ku muulu.—Yohane 13:35.

“Icipingo ca Muyayaya”

13, 14. Ni mu nshila nshi umo icipingo cipya caba ica muyayaya?

¹³ Cinshi cikacitika lintu uwa kulekelesha uwa ba 144,000 aya ku muulu? Bushe icipingo cipya cikaleka ukubomba? Pali ilya nshita, pe sonde tapakabe uuli onse uwa kwa Israele wa kwa Lesa. Bonse aba mu cipingo cipya bakaba na Yesu “mu bufumu bwa kwa [Wishi].” (Mateo 26:29) Lelo twibukisha amashiwi ya kwa Paulo muli kalata wakwe ku baHebere aya kuti: ‘Lesa wa mutende aninike ukufuma ku bafwa Shikulwifwe Yesu, Umucemi mukalamba wa mpaanga, ku mulopa wa cipingo ca muyayaya.’ (AbaHebere 13:20; Esaya 55:3) Ni mu nshila nshi umo icipingo cipya cabela ica muyayaya?

¹⁴ Ica kubalilapo, ukupusanako ne cipingo ce Funde, tacakapyanikwepo. Ica bubili, ifya kufumamo mu mulimo wa ciko fya muyayaya, nga fintu caba ku kuteka kwa kwa Yesu. (Linganyeniko Luka 1:33 na 1 Abena Korinti 15:27, 28.) Ubufumu bwa mu muulu bwakwata icifulo ca muyayaya mu mifwaile ya kwa Yehova. (Ukusokolola 22:5) Kabili ica butatu, impaanga shimbi shikatwalilila ukunonkelamo mu cipingo cipya. Mu Kuteka kwa Myaka Ikana ukwa kwa Kristu, abantunse ba busumino bakatwalilila ‘ukubombela Yehova mwi tempele lyakwe akasuba no bushiku’ nga fintu fye bacita nomba. Yehova takebukishe na kabili imembu shabo isha ku numa isho alekelele pa cishinte ca “mulopa wa cipingo” uwa kwa Yesu. Bakatwalilila ukuipakisha ukwiminina kwalungama nge fibusa fya kwa Yehova, ne funde lyakwe likatwalilila ukulembwa mu mitima yabo.

15. Londololeni ukwampana kwa kwa Yehova na bakapepa bakwe aba pe sonde mu calo cipya.

¹⁵ Lyene bushe Yehova akasosa kuli aba bantunse ababomfi bakwe ati: ‘Nine Lesa wabo, na bo bantu bandi’? Ee. “Akekalilila pamo na bo; na bo bakaba abantu bakwe, na Lesa umwine akaba pamo na bo.” (Ukusokolola 21:3) Bakasanguka “inkambi ya ba mushilo,” abemininako isonde aba “Musumba uwatemwikwa,” nabwinga wa ku muulu uwa kwa Yesu Kristu. (Ukusokolola 14:1; 20:9; 21:2) Fyonse ifi fikacitika pa mulandu wa citetekelo cabo mu “mulopa wa cipingo” uwa kwa Yesu uwapongololwa no kunakila ku shamfumu sha ku muulu na bashimapepo, abo lintu bali pe sonde bali ni Israele wa kwa Lesa.—Ukusokolola 5:10.

16. (a) Finshi filolela abakabuushiwa pe sonde? (b) Mapaalo nshi yakabako pa mpela ya myaka ikana?

¹⁶ Nga pa lwa bafwa abakabuushiwa pe sonde? (Yohane 5:28, 29) Na bo bene bakalaalikwa ‘ukuifwailo kupaalwa’ muli Yesu, Ubufyashi bwa kwa Abrahamu. (Ukutendeka 22:18) Na bo bakakabilwa ukutemwa ishina lya kwa Yehova, ukumupyungila, ukupeela amalambo yasuminishiwa, no kubomba umulimo washila mu ng’anda yakwe iye pepo. Abakacite co bakengila mu kutusha kwa kwa Lesa. (Esaya 56:6, 7) Ilyo cikalafika ku mpela ya myaka ikana, bonse aba busumino bakaba nabaletwa ku kupwililika ukupitila mu kupyunga kwa kwa Yesu Kristu na ba 144,000 bashimapepo banankwe. Bakaba abalungami, te kulungamikwa fye nge fibusa fya kwa Lesa. Bakaba ‘no mweo,’ ukulubulwa ku lubembu umupwilapo na ku mfwa iyapyanwa ukufuma kuli Adamu. (Ukusokolola 20:5; 22:2) Fintu ico cikabe paalo! Ukulingana na fintu tulemona ilelo, kwati umulimo wa bushimapepo uwa kwa Yesu na ba 144,000 ukaba naupwishishiwa. Amapaalo ya Bushiku bwa Kukonsolwela ubwacilapo yakaba nayabomfiwa mu kukumanina. Mu kulundapo, Yesu “akalubwilo bufumu kuli Lesa Wishi.” (1 Abena Korinti 15:24) Abantunse bakeshiwa umuku wa kulekelesha, lyene Satana ne fibanda fyakwe bakonaulwa kuli pe na pe.—Ukusokolola 20:7, 10.

17. Mu kumona ubuseko buletulolela, finshi umo umo uwa ifwe afwile ukupampamina ukucita?

¹⁷ Nga kukaba umulimo uo “icipingo ca muyayaya” cikakwata mu nshita ya kucincimusha iikatendeka, mulimo nshi? Tatwaishiba. Ifyo Yehova asokolola fyalilinga pali ino nshita. Citulenga aba mwenso nga nshi. Cintontonkanyeni—ubumi bwa muyayaya ngo lubali lwa “myulu ipya ne calo cipya”! (2 Petro 3:13) Twileka icili conse ukunenuna ukufwaisha kwesu ukwa kupyana ubo bulayo. Ukwiminina abashangila te kuti cibe icintu cayanguka. Paulo asosele ukuti: “Ukuteko mutima [“ukushipikisha,” NW] e ko mukabila, ukuti, ilyo mukacito kufwaya kwa kwa Lesa, mukapokelele icalaiwa.” (AbaHebere 10:36) Nangu cibe fyo, muleibukisha ukuti ubwafya bonse ubwa kucimfya, ukukaanya konse ukwa kulwisha, tafili nangu cimo ukulingana ku buseko buletulolela. (2 Abena Korinti 4:17) E co, peba nangu umo pali ifwe ‘uukwinda no konaika.’ Lelo, natube “abakwate citetekelo no kusunge mitima yesu.” (AbaHebere 10:39) Bonse natucetekele Yehova, Lesa wa fipingo, pa kuti umo umo uwa ifwe akapaalwe umuyayaya.

[Futunoti]

Bushe Mwacumfwikisha?

◻ Ni bani balepaalwa ukupitila mu Bufyashi bwa kwa Abrahamu ukufumyako Abena Kristu basubwa?

◻ Mu kupaalilwa mu cipingo cipya, ni shani fintu impaanga shimbi shaba kwati ni nsangu mu cipingo ca kale?

◻ Ni shani fintu impaanga shimbi shipaalilwa mu Bushiku bwa Kukonsolwela ubwacilapo?

◻ Mulandu nshi Paulo aitile icipingo cipya nge “cipingo ca muyayaya”?

[Akabokoshi pe bula 21]

Umulimo Washila Mwi Tempele

Ibumba likalamba lipepa na Bena Kristu basubwa mu lubansa lwa pe sonde ulwe tempele likalamba ilya kwa Yehova ilya ku mupashi. (Ukusokolola 7:14, 15; 11:2) Takuli umulandu wa kusondwelela ukuti bali mu Lubansa lwa Bena fyalo ulwapusana. Lintu Yesu ali pe sonde, kwaliko Ulubansa lwa Bena fyalo mwi tempele. Nangu cibe fyo, mu mapulani yapuutwamo na Lesa aye tempele lya kwa Solomone na Esekiele, twakwali Ulubansa lwa Bena fyalo. Mwi tempele lya kwa Solomone, kwali ulubansa lwa ku nse uko abena Israele ne nsangu, abaume na banakashi, balepepela pamo. Iyi mitantikile ya cipasho ca mu busesemo iya lubansa lwa pe sonde ulwe tempele lya ku mupashi, umo Yohane amwene ibumba likalamba lilebomba umulimo washila.

Nangu cibe fyo, ni bashimapepo fye na bena Lebi e baleingila mu lubansa lwa mu kati, umwali icipailo cikalamba; ni bashimapepo fye beka e baleingila Umwashila; kabili ni shimapepo fye mukalamba eka e waleingila Umwashilisha. Casoswo kuti ulubansa lwa mu kati no Mwashila fyalecita icinshingwa imibele ya ku mupashi iyaibela iya Bena Kristu basubwa pe sonde. Kabili Umwashilisha mwimininako imyulu ine, uko Abena Kristu basubwa bapokelela umweo ushifwa pamo na Shimapepo wabo Umukalamba uwa ku muulu.—AbaHebere 10:19, 20.

[Icikope pe bula 23]

Mu kumona ubuseko buletulolela, ‘natukwate icitetekelo no kusunge mitima yesu’