Icipandwa 10

Nani Engemina Mushika wa Bamushika?

1, 2. Mulandu nshi icimonwa Daniele amwene mu mwaka wa citatu ku bufumu bwa kwa Belshasari cacindamina kuli ifwe?

IMYAKA 57 naipita apo itempele lya kwa Yehova mu Yerusalemu lyaonawililwe. Belshasari na wishi, Nabonidasi, batekela capamo Babele, icalo cakwatisha amaka icalenga fitatu ica kusesema kwa Baibolo.a Daniele kasesema wa kwa Lesa ni nkole mu Babele. Kabili “mu mwaka wa citatu ku bufumu bwa kwa Belshasari imfumu,” Yehova atumina Daniele icimonwa cilesokolola ifishinka fimo fimo pa lwa kubweshiwa kwa kupepa kwa cine.—Daniele 8:1.

² Icimonwa ca cebo ca kusesema ico Daniele amwene calimukumine nga nshi kabili e fyo citukuma na ifwe fwe baleikala mu “nshita ya ku mpela.” Malaika Gabriele aeba Daniele ukuti: “Ine ndekulengo kwishibe cikaba mu nshita sha kulekelesha isha cipyu; pantu icimonwa ca nshita iyalingwa iya ku mpela.” (Daniele 8:16, 17, 19, 27) Lyene, apo tulefwaisho kwishibe fi, natubebete ifyo Daniele amwene ne fyo fitukuma ilelo.

SUKUSUKU WA NSENGO SHIBILI

3, 4. Cinama nshi Daniele amwene naciminina pa mbali ya mumana, kabili cimininako cinshi?

³ Daniele alembele ukuti: “Namwene mu cimonwa; nomba mu kumona kwandi ine nali mu Shushani mu musumba, mu Elamu icalo ca bulashi; kabili namwene mu cimonwa candi, na ine nali pa mulonga wa Ulai.” (Daniele 8:2) Tacalandwa nampo cine cine Daniele ali mu Shushani (Susa), umusumba wa bwangalishi uwa Elamu, uwali amakilomita nalimo 350 ku masamba ya Babele, atemwa aliko fye mu cimonwa.

⁴ Daniele akonkanyapo ukuti: “Ilyo nainwine amenso no kumona, moneni, sukusuku umo eminine pa mbali ya mumana, ali ne nsengo shibili.” (Daniele 8:3a) Daniele alasokolwelwa ifyo sukusuku aleimininako. Malaika Gabriele pa numa aisatila: “Sukusuku uo umwene, cibinda wa nsengo shibili, insengo ni mfumu sha ku Madai na Persia.” (Daniele 8:20) Abena Madai bafumine ku mpili sha ku kabanga ka Ashuri, kabili abena Persia ilingi balelulumba fye ku kapinda ka kuso aka Cofi ca ku Persia. Lelo, ilyo Ubuteko bwa Madai na Persia bwalekulilako, abekashi ba buko batendeke ukutemwisha ubumi bwa kucibondola.

 5. Ni shani fintu ulusengo “lwalekelesho kumena” lwalundwike ukucilo lubiye?

⁵ Daniele ashimika ukuti: “Insengo shibili ishalunduka, lelo lumo lwalunduko kucilo lubiye, kabili ulwalundukisha e lwalekelesho kumena.” (Daniele 8:3b) Ulu lusengo lwalunduka ukucila ulubiye ulo lwalekelesho kumena lwimininako abena Persia, ulu lusengo lumbi lwena lwimininako abena Madai. Pa kubala, abena Madai e bakwatishe amaka. Lelo mu 550 B.C.E., calimwangukile Koreshe kateka wa ku Persia ukucimfya Astyages, Imfumu ya Madai. Koreshe aikatenye imyata na mafunde ya ifi fyalo fibili, ukwikatanya amabufumu ya fiko, no kucimfisha capamo amabufumu ayengi. Ukutula lilya, ubu buteko bwaishileba buteko bwakwatishe amaka ubwa fyalo fibili ifyaumana akapi.

SUKUSUKU AITUUMIKA

6, 7. Cali shani ukuti “ifinama fyonse fyafililwe ukwiminina ku cinso” ca kwa sukusuku?

⁶ Ilyo alekonkanyapo ukulondolola uyu sukusuku, Daniele atila: “Namwene sukusuku alepunka ukulola ku masamba na ku kapinda ka ku kuso na ku kapinda ka ku kulyo; ne finama fyonse fyafililwe ukwiminina ku cinso cakwe, takwali na wa kupokolola mu maka yakwe; awe acite co atememwe, no kuituumika.”—Daniele 8:4.

⁷ Mu cimonwa cafumineko icapeelwe kuli Daniele, Babele aleimininwako ne ciswango icafumine muli bemba kabili icapalile inkalamo yakwete amapindo ya kwa kapumpe. (Daniele 7:4, 17) Cilya ciswango ca cimpashanya cafililwe ukwiminina ku cinso ca kwa “sukusuku” wa muli ici cimonwa cipya. Babele acimfiwe kuli Koreshe Mukalamba mu 539 B.C.E. Imyaka nalimo 50 pa numa ya ico, takwali “ifinama” nelyo imitekele ya bupolitiki iyaimine Ubuteko bwa Madai na Persia, ubwali Buteko bwakwatishe amaka ubwalenga bune mu cebo cakusesema ica mu Baibolo.

8, 9. (a) Ni shani fintu “sukusuku alepunka ukulola ku masamba na ku kapinda ka ku kuso na ku kapinda ka ku kulyo”? (b) Finshi ibuuku lya kwa Estere lilanda pa lwa mpyani ya kwa Dariusi I Imfumu ya ku Persia?

⁸ Apo bwalefumina ku kabanga “ukutula akasuba,” Ubuteko Bwakwatishe Amaka Ubwa Madai na Persia bwalecita ifyo butemenwe, ‘bwalepunka ukulola ku masamba na ku kapinda ka ku kuso na ku kapinda ka ku kulyo.’ (Esaya 46:11) Imfumu Cambyses II, iyapyene Koreshe Mukalamba yacimfishe Egupti. Uwamupyene ali ni Dariusi I, Imfumu ya ku Persia, uwalolele lwa ku masamba no kwabuka umulonga wa Bosporus mu 513 B.C.E. kabili asanshile Thrace, icitungu ca ku Bulaya icakwete umusumba wa bwangalishi baleita Byzantium (uo nomba beta Istanbul). Mu mwaka wa 508 B.C.E., acimfishe Thrace, kabili acimfishe na Makedonia mu 496 B.C.E. E co, ilyo Dariusi aishiletendeka ukuteka, ninshi uyu “sukusuku” aleimininako Madai na Persia alicandila ifitungu fitatu ifikalamba ifyali: ku kapinda ka kuso ukuya mu Babele na Ashuri, ku masamba ukupulinkana mu Asia Minor, na ku kapinda ka kulyo ukuya mu Egupti.

⁹ Baibolo ilanda pa lwa kwa Xerxes I, uwapyene Dariusi ukuti “e Ahasuerusi uwali ni mfumu ukutula pa India ukufika na ku Kushi, ifyalo fya bulashi [127].” Kabili ubu e bunte bwa kuti Ubuteko bwa Madai na Persia bwali bukalamba. (Estere 1:1) Lelo ubu buteko bukalamba bwali no kucimfiwa kuli bumbi, kabili e mulandu wine icimonwa ca kwa Daniele casokolwela ifishinka fimo fimo ifya kucincimusha ifilingile ukutukosha ukutetekela icebo ca kusesema ica kwa Lesa.

SAWE AUMA SUKUSUKU

10. Mu cimonwa ca kwa Daniele, ni nama nshi yaumine “sukusuku”?

¹⁰ Tontonkanyeni ifyo Daniele asunguka pa fyo nomba amona. Ilembo lisosa ukuti: “Ilyo nalecetekanya, moneni, sawe afuma ku masamba aisapita pa calo conse, no kukanakumya pa nshi. Kabili imbushi yali no lusengo ulwamonekesha pa kati ka menso ya iko. Yaisa na kuli sukusuku, cibinda wa nsengo shibili, uo namwene naiminina pa mbali ya mulonga, no kubutukilako ne cipyu ca maka ya iko. Namwene yafika pali sukusuku naibimbuka, yauma na sukusuku, no kutobe nsengo shakwe shibili; tamwali maka muli sukusuku ku kwiminina ku cinso ca iko, apooswa na pa nshi no kunyantaulwa; kabili takwali wa kupokolola sukusuku mu maka ya iko.” (Daniele 8:5-7) Bushe fyonse fi filolele mwi?

11. (a) Ni shani fintu malaika Gabriele alondolwele “sawe” no ‘lusengo lwakwe ulukalamba’? (b) Nani aleimininwako no lusengo lwalemonekesha?

¹¹ Daniele atemwa ifwe tatulekabila ukuilwila umo ici cimonwa cilolele. Malaika Gabriele aeba Daniele ukuti: “Sawe ni mfumu ya ku Yabani [Greece, NW], no lusengo lukalamba lwa pa kati ka menso yakwe ni mfumu ya ntanshi.” (Daniele 8:21) Mu 336 B.C.E., Dariusi III (Codommanus), imfumu ya kulekelesha iya Buteko bwa Persia yabikilwe pa bufumu. Muli ulya wine mwaka, Alekesandere abele mfumu mu Makedonia. Ilyashi lya kale lilangilila ukuti Alekesandere Mukalamba e wali “mfumu ya ku Greece” iya ntanshi iyasobelwe. Ukutendekela “ku masamba,” mu mwaka wa 334 B.C.E., Alekesandere alecimfya lubilo lubilo. Acimfishe fyalo no kuma “sukusuku” kwati ‘talekumya pa nshi.’ Pa kucimfya ubuteko bwa Madai na Persia ubwa myaka mupepi na 200 icalo ca Greece caishileba buteko bwakwatishe amaka ubwalenga bune ubwaleimininako fimo mu Baibolo. Mwandi kufishiwapo kwa kusungusha ukwa kusesema kwa bulesa!

12. Ni shani fintu “ulusengo lukalamba” ulwa kwa sawe wa cimpashanya ‘lwakontweke,’ kabili cinshi cali isho nsengo shine ishamenene pe punda lya luko?

¹² Lelo ukuteka kwa kwa Alekesandere kwali no kuba fye kwa pa kashita. Icimonwa cikonkanyapo ukusokolola ukuti: “E lyo sawe aituumike apakalamba. Lelo ilyo ali no bulamba, e pa kukontoko lusengo lwakwe lukalamba, na pe punda lya luko pamenene shine ishamonekesha ukulola ku myela ine ya mu muulu.” (Daniele 8:8) Ilyo Gabriele alelondolola uku kusesema atile: “Ulwakontoka, ulo shine shaima pe punda lya luko, amabufumu yane yakemo kufuma ku luko ulo, lelo te bwa kuba na maka nga ya iko.” (Daniele 8:22) Nga fintu casobelwe, ilyo Alekesandere afikile pa kalume ka kucimfya kwakwe, ‘alikontweke,’ nelyo ukufwa ilyo ali fye ne myaka 32. Kabili ubuteko bwakwe ubukalamba bwasukile bwayakaniwa pali bane aba muli bamushika bakwe.

ULUSENGO LUCE ULWA NKAMA

13. Cinshi camenene muli lumo ulwa ishi nsengo shine kabili calecita finshi?

¹³ Ulubali lwakonkapo ulwa ici cimonwa lwali no kufishiwapo pa numa ya myaka ukucila pali 2,200, e kuti ukufika na mu nshita tulimo. Daniele alembele ukuti: “Kuli lumo lwa muli isho [nsengo shine] kwafumine ulusengo lumo uluce, na lo lwakulile apakalamba ukulola ku kapinda ka ku kulyo na ku kabanga, na ku calo icayemba. Lwakula ukufika na ku mulalo wa mu muulu, lwaponeshe pa nshi ne sha mu mulalo, isha mu ntanda, no kunyatapo. Awe lwaliituumike ukufika pali Mushika wa mulalo, lwafumishe kuli wene ne ca kuninika ca pe, no kuwishe cifulo ca mwashila mwakwe. E fyo umulalo wapeelwe kuli lwene pamo ne ca kuninika ca pe, pa mulandu wa bupulumushi, na bucine bwafuntwilwe pa nshi, kabili ulusengo lwalicitile kabili lwashuka.”—Daniele 8:9-12.

14. Cinshi malaika Gabriele asosele pa lwa ncitilo sha ulu lusengo luce ulwa cimpashanya, kabili cinshi cali no kucitika kuli lulya lusengo?

¹⁴ Ilyo tushilaumfwikisha umulolele amashiwi yambwilwe pa muulu, tufwile ukwangwako kuli malaika wa kwa Lesa. Pa numa ya kulanda pa lwa kuteka kwa aya mabufumu yane ayafumine mu buteko bwa kwa Alekesandere, malaika Gabriele atila: “Mu nshiku sha kulekelesha sha bufumu bwa shiko, ilyo fyafishiwa ifya bupulumushi, e lyo kukeme mfumu iyakalabane cinso kabili iya kwiluke fya kufinsha, kabili amaka ya iko yakaba ayakalamba, lelo te ku maka ya iko iine; ikonaulo kwa kupesha amano, ikashuka no kucita, ikonaula aba bulamba na bantu ba mu ba mushilo. Kabili ku kushilimuka kwa iko ikalengo bucenjeshi ukuba pa muulu ku kuboko kwa iko; ikaikusha na mu mutima wa iko, no konaula abengi mu kupumikisha; ikemina na Mushika wa bamushika, lelo ikatobaulwa apabulo kuboko.”—Daniele 8:23-25.

15. Cinshi malaika aebele Daniele ukucita pa lwa cimonwa?

¹⁵ Malaika aeba Daniele ukuti: “Iwe kupikile cimonwa, pantu ca ku nshiku ishingi.” (Daniele 8:26) Ukufishiwapo kwa ulu lubali lwa cimonwa twakwali na kubako “inshiku ishingi,” kabili Daniele ali no ‘kukupikile cimonwa.’ Cimoneke fyo Daniele taishibe umo calolele. Lelo, pali nomba, isho “nshiku ishingi” shifwile shalipita. E co kuti twaipusha ukuti: ‘Cinshi ilyashi lya kale lilangilila pa kufishiwapo kwa ici cimonwa ca cebo ca kusesema?’

ULUSENGO LUCE LWABA NA MAKA YAKALAMBA

16. (a) Ulu lusengo luce lwafumine mu lusengo nshi ulwa cimpashanya? (b) Ni shani fintu icalo ca Roma caishileba icalo cakwatishe amaka icalenga 6 ica kusesema kwa Baibolo, lelo mulandu nshi cishabelele e lulya lusengo luce ulwa cimpashanya?

¹⁶ Ukulingana ne lyashi lya kale, ulu lusengo luce lwamenene muli lumo ulwa muli shilya nsengo sha cimpashanya, ulwaleimininako ubufumu bwa ku masamba. Ubu bwali bufumu bwa ciGriki ubwa kwa Mushika Cassander uwaleteka Makedonia na Greece. Ubu bufumu bwaishilecimfiwa ku bufumu bwa kwa Mushika Lysimachus, uwali ni mfumu ya Thrace na Asia Minor. Mu mwanda wa myaka uwalenga bubili uwa Nshita Yesu, ifi fyalo fya ku masamba ifya buteko bwa ciGriki fyaishilecimfiwa kuli Roma. Kabili ilyo umwaka wa 30 B.C.E. walefika, Roma aali nataasha amabufumu ya ciGriki yonse, na muli fyo aishileba icalo cakwatishe amaka icalenga 6 ica kusesema kwa Baibolo. Lelo Ubuteko bwa ciRoma te bwali lulya lusengo uluce ulwa mu cimonwa ca kwa Daniele, pantu bwene tabwafikile ku “nshita iyalingwa iya ku mpela.”—Daniele 8:19.

17. (a) Kwampana nshi kwali pali Britain no Buteko bwa ciRoma? (b) Ni shani fintu Ubuteko bwa Britain bwakuma ku bufumu bwa ciGriki ubwa ku Makedonia na Greece?

¹⁷ Lyene, kanshi nani aba e “mfumu iyakalabane cinso” kabili iyakaluka ukulingana ne fyo ilyashi lya kale lilangilila? Na kuba icalo ca Britain cafumine ku lubali lwa pa kati ka kapinda ka kuso na masamba mu Buteko bwa ciRoma. Ukufika ku ntendekelo ya mwanda wa myaka uwa busano C.E., mu calo nomba beta Britain mwali ifitungu fya ciRoma. Mu kuya kwa nshita, Ubuteko bwa ciRoma bwalilobele, lelo intambi sha buGriki no bwina Roma capamo ne mikalile fyatwalilile mu Britain na mu fyalo fimbi ifya ku Bulaya. Octavio Paz, kashika wa nshintu umwina Mexico uwapokelepo icilambu ca Nobel kabili kalemba alembele ukuti: “Ilyo Ubuteko bwa ciRoma bwawile, Icalici e caishilekwatisha maka.” Akonkenyepo ukuti: “Bakalemba ba fya buKristu, pamo na basoma bambi abaishilebako balundenye amano ya pano nse aya ciGriki ne fifundisho fya buKristu.” Kabili Bertrand Russell, uwa mano ya buntunse kabili uwaishibisha amapendo uwa mu mwanda wa myaka uwalenga 20 atile: “Imikalile ya ba ku Basungu, iyatuntuka ku buGriki yashimpwa pa mano ya pano nse ne fya busayansi ifyatendeke ku Milete [umusumba wa baGriki mu Asia Minor], imyaka 2,500 iyapitapo.” E co kuti twatila imikalile ya Buteko bwa Britain yatuntwike ku bufumu bwa ciGriki ubwa ku Makedonia na Greece.

18. Bushe ulu lusengo luce ulwaishileba “imfumu yakalabane cinso” mu ‘nshita ya ku mpela’ ni cinshi? Londololeni.

¹⁸ Ilyo umwaka wa 1763 walefika, Ubuteko bwa Britain bwali nabucimfya ifilwani fya buko ifya maka Spain na France, ifyali fyalo fya maka ifya Buteko Bwashila ubwa ciRoma. Ukutula lilya Ubuteko bwa Britain bwaishileba buteko bwaishibishe ifya pa menshi kabili bwaishileba icalo cakwatisha amaka icalenga 7 ukulingana no kusesema kwa Baibolo. Nangu fye ni lintu ifyalo 13 ifya bena America ifyo Britain yaleteka fyapokele ubuntungwa mu 1776 no kwisapanga icalo ca United States of America, Ubuteko bwa Britain bwaleteka 25 pesenti uwa fyalo fya pe sonde kabili umuntu umo pali bane aletekwa no bu buteko. Ici calo cakwatisha amaka icalenga 7 caishilekwatilako amaka lintu icalo ca United States of America caumene akapi na Britain ku kupanga ubuteko bwakwatisha amaka ubwa Britain na America. Ubu buteko cine cine bwaba ni “mfumu iyakalabene cinso” mu fya bunonshi ne fya fita. E ico, ulu lusengo luce ulwaishileba ulwakalabana mu fya bupolitiki mu ‘nshita ya ku mpela’ lwaba Fyalo Fyakwatisha Amaka Ifyaumana Akapi Ifya Britain na America.

19. Bushe “icalo cayemba” icalandwapo muli ici cimonwa cinshi?

¹⁹ Daniele amwene ukuti ulu lusengo luce “lwakulile apakalamba” ukulola “ku calo cayemba.” (Daniele 8:9) Icalo Calaiwe, ico Yehova apeele abantu bakwe abasalwa cali icisuma nga nshi ica kuti caleitwa “icayemba pa fyalo fyonse,” e kuti icayemba mwi sonde lyonse. (Esekiele 20:6, 15) Ca cine ukuti Britain yacandile Yerusalemu pa December 9, 1917, kabili mu mwaka wa 1920, akabungwe ka League of Nations kasuminishe Great Britain ukuteka Palestine ukufika mu May 14, 1948. Lelo ici cimonwa ca mu kusesema, icakwata ifimpashanya ifingi. Kabili ici “calo cayemba” icalumbulwa muli ci cimonwa cimininako, abantu pe sonde abo Lesa amona nga bashila mu nshita ya buteko bwakwatisha maka ubwalenga 7, te Yerusalemu iyo. Natumone ifyo Ifyalo Fyakwatisha Amaka Ifyaumana Akapi Ifya Britain na America fyesha ukutiinya aba bashila.

“ICIFULO CA MWASHILA MWAKWE” CAWISHIWA

20. Bushe “umulalo wa mu muulu” ne “ntanda” ifyo ulu lusengo luce lwesha ukuwisha ni bani?

²⁰ Ulu lusengo uluce “lwakula ukufika na ku mulalo wa mu muulu, lwaponeshe pa nshi ne sha mu mulalo, isha mu ntanda.” Ukulingana ne fyo malaika alondolwele, uyu “mulalo wa mu muulu” ne “ntanda” ifyo ulu lusengo luce lwesha ukuwisha fyaba “bantu ba mu ba mushilo.” (Daniele 8:10, 24) Aba “ba mushilo” baba Bena Kristu basubwa no mupashi. Pa mulandu wa kwampana na Lesa ukupitila mu cipingo cipya, icibomba ku mulopa wapongolwelwe uwa kwa Yesu Kristu, balishishiwa, ukusangululwa, no kupaatwilwa umulimo wa kwa Lesa. (AbaHebere 10:10; 13:20) Yehova abamona nga ba mushilo kabili abasonta ukuba impyani no Mwana wakwe mu bupyani bwa ku muulu. (Abena Efese 1:3, 11, 18-20) E co, mu cimonwa ca kwa Daniele, ulya “mulalo wa mu muulu” ulanda pa bashalapo pe sonde ababa 144,000 “aba mushilo,” abakateka mu muulu no Mwana wa mpanga.—Ukusokolola 14:1-5.

21. Ni bani baba “umwashila” icifulo ico ubuteko bwakwatisha amaka ubwalenga 7 bwafwaya ukupomona?

²¹ Ilelo abashalapo aba ba 144,000 pe sonde bemininako “Yerusalemu wa mu muulu,” Ubufumu bwa kwa Lesa ubwapalo musumba ne tempele lya buko. (AbaHebere 12:22, 28; 13:14) E co twingasoselo kuti, baba “umwashila” icifulo ico ubuteko bwakwatisha amaka ubwalenga 7 bufwaya ukunyantapo no konaula. (Daniele 8:13) Ukulanda pa lwa cilya cifulo cashila nge ‘cifulo ca mwashila mwa kwa Yehova,’ Daniele atile: “Lwafumishe kuli [Yehova] ne ca kuninika ca pe, no kuwishe cifulo ca mwashila mwakwe. E fyo umulalo wapeelwe kuli lwene pamo ne ca kuninika ca pe, pa mulandu wa bupulumushi, na bucine bwafuntwilwe pa nshi, kabili ulusengo lwalicitile kabili lwashuka.” (Daniele 8:11, 12) Bushe ici cafishiwepo shani?

22. Ilyo kwali Inkondo ya Calo iya Cibili, ni shani fintu ubuteko bwakwatisha amaka ubwalenga 7 bwacitile “ubupulumushi” bwamonekeshe?

²² Cinshi Inte sha kwa Yehova shapitilemo ilyo kwali Inkondo ya Calo iya Cibili? Shapakeswe icabipisha! Ukupakaswa kwatendekele mu fyalo fya baNazi na baFascist. Lelo mu kwangufyanya, “bucine bwafuntwilwe pa nshi,” mu bufumu bukalamba ubwa lulya ‘lusengo uluce ulwaishilekwata amaka yakalamba.’ “Umulalo” wa bakabilisha ba Bufumu no mulimo wabo uwa kushimikila “imbila nsuma” fyalibindilwe mu fyalo ifingi ifya kabungwe ka British Commonwealth. (Marko 13:10) Lintu ifi fyalo fyalefula aba kuya ku nkondo icibaalo, fyalikene ukufumyapo Inte sha kwa Yehova, na muli fyo tafyacindike ukusontwa kwabo ukwa bulesa nga batumikishi ba kwa Lesa. Ababomfi ba kwa Yehova aba busumino mu United States balipakeswe ku mabumba no kuseebanishiwa. Na muli fyo, ubu buteko bwakwatisha amaka ubwalenga 7 bwaeseshe ukufumyapo ilambo lya malumbo, e kutila “icisabo ca milomo” ico abantu ba kwa Yehova lyonse balemupeela nge “ca kuninika ca pe” ica kupepa kwabo. (AbaHebere 13:15) E co bulya buteko bwakwatisha amaka bwacitile “ubupulumushi” ubwa kwingilila mu cifulo ca kwa Lesa Wapulamo, e kuti “icifulo ca mwashila mwakwe.”

23. (a) Ilyo kwali Inkondo ya Calo iya Cibili, ni shani fintu Ifyalo Fyakwatisha Amaka Ifyaumana Akapi ifya Britain na America fyaimine “Mushika wa bamushika”? (b) Bushe “Mushika wa bamushika” nani?

²³ Ulu lusengo luce lwaliituumike “ukufika pali Mushika wa mulalo” ukupitila mu kupakasa “abashila” ilyo kwali Inkondo ya Calo iya Cibili. Atemwa kuti twatila lwaimine “Mushika wa bamushika” nga fintu malaika Gabriele asosele. (Daniele 8:11, 25) Ilumbo lya kuti “Mushika wa bamushika” libomba fye kuli Yehova Lesa epela. Ishiwi lya ciHebere sar ilyapilibulwa “mushika,” lyaampana na verbu apilibula “ukuteka.” Ukulunda pa kulosha ku mwana wa mfumu nelyo uwa ku bufumu, ili shiwi lilosha na kuli kateka nelyo umukalamba. Ibuuku lya kwa Daniele lilalumbula na bamushika bambi aba bumalaika pamo nga Mikaele. Lesa e Mushika Mukalamba, uwa Bamushika ba musango yu bonse. (Daniele 10:13, 21; linganyeniko Ilumbo 83:18.) Bushe tuletontonkanya ifyo kuti kwaba uwingemina Yehova, Mushika wa bamushika?

“UMWASHILA” MWALUNGAMIKWA

24. Cilayo nshi Daniele 8:14 atulaya?

²⁴ Takwaba uwingemina Mushika wa bamushika nangu fye ni “mfumu iyakalabane cinso” iyaba Fyalo Fyakwatisha Amaka Ifyaumana Akapi Ifya Britain na America! Iyi mfumu yalitukuta ukonaula umwashila mwa kwa Lesa lelo yalifilwa. Iyi nkombe malaika yatile pa numa ya “nshita amakana yabili ne myanda itatu [2,300] isha cungulo no lucelo; e lyo umwashila mukalungamikwa,” nelyo “ukucimfya.”—Daniele 8:13, 14; The New English Bible.

25. Bushe inshita ya nshiku 2,300 isha mu kusesema yalepele shani, kabili cinshi cacitike ico twingaloshako?

²⁵ Ishi nshiku 2,300 shaba ni nshita ya mu kusesema. E co, umwaka wa cebo ca kusesema uwa nshiku 360 walibimbwamo. (Ukusokolola 11:2, 3; 12:6, 14) E ico, ishi nshiku 2,300 kuti shafika ku myaka 6, imyeshi ine, ne nshiku 20. Bushe iyi nshita yaliko lilali? Muli ba1930, abantu ba kwa Lesa batendeke ukupakaswa sana mu fyalo fyalekanalekana. Kabili ilyo kwali Inkondo ya Calo iya Cibili, Inte sha kwa Yehova shapakeswe icabipisha mu fyalo fyali fya Buteko bwakwatisha maka ubwa Britain na America. Mulandu nshi? Pa mulandu wa kupampamina pa “kunakila Lesa ukucilo kunakila abantu.” (Imilimo 5:29) E co, ishi nshiku 2,300 shifwile shakumine kuli ilya nkondo.b Lelo finshi fingalandwa pa lwa ntendekelo ne mpela ya ilya nshita ya mu cebo ca kusesema?

26. (a) Ukupenda kwa ishi nshiku 2,300 kulingile kwatendeke lilali? (b) Ici ciputulwa ca nshiku 2,300 capwile lilali?

²⁶ Nga ca kuti “umwashila” mwa kwa Yehova ‘mwalungamikwa’ nelyo ukubweshiwa ku fyo mufwile ukuba, ninshi ishi nshiku 2,300 shilingile shatendeke pa nshita lintu mwali ‘umwalungamikwa’ ukulingana na Lesa. Ici cali ni pa June 1, 1938, lintu The Watchtower (Ulupungu lwa kwa Kalinda) yasabankenye ulubali lwa ntanshi ulwa cipande caleti “Organization” (Ukuteyanya). Ulubali lwa cibili lwali muli The Watchtower ya June 15, 1938. Ukutendeka ukupenda inshiku 2,300 (imyaka 6, imyeshi ine, ne nshiku 20 pali kalenda wa ciHebere) ukutula pa June 1 nelyo 15, 1938, kutuleta ku October 8 nelyo 22, 1944. Pa bushiku bwa kubalilapo ubwa kulongana kwaibela ukwabelele pa Pittsburgh, Pennsylvania, U.S.A., pa September 30 na October 1, 1944, presidenti wa Watch Tower Society alandile pa mutwe waleti “Ukulungika Ukuteyanya Ukwa Teokrasi Ilelo.” Pa kukumana kwalembeshiwa mwi funde ukwa cila mwaka pa October 2, umutande wa mafunde aya Sosaite walyalwilwe pa kuti yaleumfwana no kutantika kwa Teokrasi ukulingana ne fyo ifunde lingasuminisha. Mu kuba no kusabankanishiwa kwaumfwika ukwa fyo Baibolo ikabila, ukuteyanya kwa teokrasi mu kwangufyanya kwaimikwe mu kukumanina mu filonganino fya Nte sha kwa Yehova.

27. Bushinino nshi bwaliko ukuti “ica kuninika ca pe” cacefiwe cibi mu myaka ya kupakaswa iya Nkondo ya Calo iya Cibili?

²⁷ Ilyo ishi nshiku 2,300 shalepita lintu kwali Inkondo ya Calo iya Cibili, iyatendeke mu 1939, “ica kuninika ca pe,” pa cifulo cashila ica kwa Lesa calicefiwe cibi pa mulandu wa kupakaswa. Mu 1938, Watch Tower Society yakwete amaofesi mu fyalo 39 ayaleangalila umulimo wa Nte mu calo conse, lelo ilyo 1943 yalefika yali fye 21. Kabili muli ilya ine nshita te bengi balesanguka bakabilisha ba Bufumu.

28, 29. (a) Ilyo Inkondo ya Calo iya Cibili yalesungamina ukupwa, kulunduluka nshi kwali mu kuteyanya kwa kwa Yehova? (b) Finshi fingalandwa pa lwa matukuto yabipa aya uyu mulwani ku kupomona no konaula “umwashila”?

²⁸ Mu myeshi ya kulekelesha iya Nkondo ya Calo iya Cibili, Inte sha kwa Yehova shapampamine cipya cipya pa kulumbanya ukuteka kwa kwa Lesa ukupitila mu kumubombela ngo kuteyanya kwa teokrasi. E mulandu wine kwaishilebelako ukutantika cipya cipya ukwa mulimo wabo ne mitungulwilwe mu 1944. Na kuba, The Watchtower iya October 15, 1944, yakwete icipande caleti “Organized for Final Work” (Abateyanishiwa ku Kubomba Umulimo wa Kupelako). Ici cipande ne fipande fimbi ifyalelanda pa mulimo wa mwi bala ifya pa nshita imo ine fyalangilile ukuti ishi nshiku 2,300 shalipwa no kuti “umwashila” mwali ‘namulungamikwa’ na kabili.

²⁹ Amatukuto ya uyu mulwani aya kupomona no konaula “umwashila” tayabombele nangu panono. Cine cine, abashalapo aba “ba mushilo” pe sonde, pamo ne fibusa fyabo ifye “bumba likalamba,” balicimfishe. (Ukusokolola 7:9) Kabili umwashila, umuli nga fintu Lesa afwaya, nomba muletwalilila ukubomba umulimo washila kuli Yehova.

30. Cinshi cili no kucitikila iyi “mfumu yakalabane cinso” nomba line?

³⁰ Ifyalo Fyakwatisha Amaka Ifyaumana Akapi Ifya Britain na America tafilaaluka. Malaika Gabriele atile: “Lelo [fikatobaulwa] apabulo kuboko.” (Daniele 8:25) Nomba line fye, ubu buteko bwakwatisha amaka ubwalenga 7 ubwa lyashi lya mu Baibolo, iyi “mfumu yakalabane cinso” bukatobaulwa ku maka ya bulesa pa Armagedone, te ku bantu iyo. (Daniele 2:44; Ukusokolola 16:14, 16) Ifyo twacincimushiwa ukwishiba ukuti e lyo bumulopwe bwa kwa Yehova Lesa, Mushika wa bamushika bukebelwa!

[Amafutunoti]

FINSHI MWAILUKAMO?

• Finshi fimininwako na

“sukusuku” wa “nsengo shibili”?

“sawe” no ‘lusengo lwakwe ulukalamba’?

insengo shine ishamena pe punda lya “lusengo lukalamba”?

ulusengo luce ulwamenene muli lumo ulwa shilya nsengo shine?

• Ilyo kwali Inkondo ya Calo iya Cibili, ni shani fintu Ifyalo Fyakwatisha Amaka Ifyaumana Akapi ifya Britain na America fyaeseshe ukupomona “umwashila,” kabili bushe fyalipomwene?

[Mapu ne Cikope pe bula 166]

(Nga mulefwaya ukumona mapu, moneni mu citabo)

Ubuteko bwa Madai na Persiab

MAKEDONIA

EGUPTI

Memfisi

ETIOPIA

Yerusalemu

Babele

Akimeta

Susa

Persepolis

INDIA

[Mapu ne Cikope pe bula 169]

(Nga mulefwaya ukumona mapu, moneni mu citabo)

Ubuteko bwa ciGriki

MAKEDONIA

EGUPTI

Babele

Umumana wa Indus

[Mapu pe bula 172]

(Nga mulefwaya ukumona mapu, moneni mu citabo)

Ubuteko bwa ciRoma

BRITANNIA

ITALY

Roma

Yerusalemu

EGUPTI

[Icikope pe bula 164]

[Ifikope pe bula 175]

Abantu bamo bamo abalumbuka aba Fyalo Fyakwatisha Amaka Ifyaumana Akapi Ifya Britain na America:

1. George Washington, presidenti wa ntanshi uwa ku United States of America (1789-97)

2. Namfumu Victoria uwa ku Britain (1837-1901)

3. Woodrow Wilson, presidenti wa ku United States of America (1913-21)

4. David Lloyd George, cilolo mukalamba uwa ku Britain (1916-22)

5. Winston Churchill, cilolo mukalamba uwa ku Britain (1940-45, 1951-55)

6. Franklin D. Roosevelt, presidenti wa ku United States of America (1933-45)