Beni Aba Kutootela—Ubufumu bwa kwa Yehova Ubwa Bumesia Buleteka

“Twatoota kuli imwe, mwe [Yehova, “NW”] Lesa, wa maka yonse . . . ico mwabuula amaka yenu yakalamba, no kube Mfumu.”—UKUSOKOLOLA 11:17.

 1. Cinshi presidenti wa Watch Tower Society alondolwele pa numa ya lwendo lwakwe ulwa Europe mu 1911?

MU KUBANGILILA mu 1911, presidenti wa Watch Tower Society, C. T. Russell, apeele ukukonkana kwa malyashi ya Baibolo mu misumba ikalamba iya Europe. Ukulanda pali lulya lwendo, Russell alembele ifyakonkapo muli The Watch Tower, May 15, 1911: “Twalipapushiwe ukusanga ubushininkisho bwafule fyo ubwa lubanda ukuli konse . . . Bakabelenga besu balishiba ukuti pa myaka imo twaleenekela iyi Nkulo ukwisalila mu kuba ne nshita ya kulengo mwenso iya bwafya, kabili twenekela yene ukupasamuka mu kuba no kupumikisha na maka te patali pa numa ya October, 1914, untu, ukulingana na fintu twingomfwikisha Amalembo, e bushiku umo Inshita ya Bena fyalo—ukusuminishiwa kwa kutekwa kwe sonde ku Bena fyalo—kukapwa; inshita, kanshi, lintu ubufumu bwa buMesia bukaba apepi no kutendeka ukubelesha kwa buko amaka.” Bushe uku kwenekela kwalifikilishiwe?

 2. Ni shani umutende wabongolwelwe mu 1914, kabili mu kuba na fya kufumamo nshi ifya bulanda?

² Mu kati ka citika wa kubalilapo uwa 1914, icalo camoneke ukuba icacingililwa kabili icabakwa ukufuma ku nkondo. Lelo umutende mu kupumikisha walibongolwelwe mu kuba no kwipaiwa kwa mpyani ya cipuna ca bufumu bwa Austria ku mwina Serbia pa June 28, 1914. Austria na Hungary mu kwangufyanya babilishe nkondo ya kulwisha Serbia. Russia ayafwilishe Serbia, e co Germany abilishe nkondo ukulwisha Russia pa August 1. Lyene Germany abilishe nkondo ukulwisha France pa August 3; Great Britain ukulwisha Germany pa August 4; Montenegro ukulwisha Austria na Hungary pa August 7; Japan ukulwisha Germany pa August 23; Austria na Hungary ukulwisha Belgium pa August 28. Abengi basumine ukuti inkondo yali no kupwa mu kwangufyanya. Mu cifulo ca ico, yalisumbene ukufika mu nkondo yacilishapo kubipa iya lyashi lya kale ukufika pali ilya nshita, mu kuba ne fyalo na fimbi 19 ukuibimba mu kwipayaulula kwa pa kati ka nko ukwasendele imyeo ya bashilika na bashili bashilika ukucila pali 13,000,000, mu kuba na bacila pali 21,000,000 ukulemanikwa no kucenwa.

3, 4. Cinshi cacitike pa cishinte cikalamba ica Sosaite pali Cisano ulucelo, October 2, 1914?

³ Ulucelo lwa pali Cisano, October 2, 1914, Russell abilishe kwi bumba lya bakabomba ba pa cishinte cikalamba ica Watch Tower Society mu Brooklyn, New York ukuti: “Inshita sha Bena fyalo nashipwa; ishamfumu shabo nashipwisha akasuba kabo.” Ici capokelelwe no kwaulo tumpundu kwacincimuka ku lupwa pa Bethel, “iŋanda ya kwa Lesa.”

⁴ Kulungamika nshi C. T. Russell na balebishanya nankwe bakwete ukwa kubela no buseko ifyo pali lulya lucelo lwa mu October? Ni kwi ukwatuntuka inumbwilo “Inshita sha Bena fyalo”? Bushininkisho nshi bwabako ubwa kuti Inshita sha Bena fyalo shapwile mu October 1914? Kabili ni shani fintu ico cilingile ukukwambukila?

Yerusalemu ne Nshita sha Bena Fyalo

 5. Ni kwi uko inumbwilo “Inshita sha Bena fyalo” yatuntuka?

⁵ Inumbwilo “Inshita sha Bena fyalo,” nelyo “inshita shasontwa isha nko,” ifuma ku busesemo bukalamba ubwa kwa Yesu ukukuma ku bonaushi bwa Yerusalemu. (Luka 21:5-36, King James Version) Inshiku shibili pa ntanshi ya kupeela bwene, Yesu aitambike umwine ku bekashi ba Yerusalemu pamo nga Mesia wabo. Ilintu aninine mu kuicefya pa mpunda ukulola ku musumba, amabumba ya baYuda babilikishe mu kucimfya, pamo fye nga fintu Sekaria 9:9 asobele. “Yalipaalwa Imfumu iileishila mwi shina lya kwa [Yehova, NW],” e fyo babilikishe na maka.—Luka 19:28-40.

6, 7. Mulandu nshi uwa mulopa uwa kulengo munsokwe abena Yudea ba mu mwanda wa myaka wa kubalilapo baletele pa bene, kabili mu kuba na fya kufumamo nshi?

⁶ Lelo Yesu alishibe ukuti itontonkanyo lya cintubwingi mu kwangufyanya lyali no kumwalukila pa mulandu wa lupato lwa bukomi ulwa ntungulushi sha butotelo isha mu Yerusalemu pe samba lya kusonga kwa kwa shibo, Ciwa. (Ukutendeka 3:15; Yohane 8:44) Bwangu bwangu fye pa numa ya ico, pa Nisani 14, ibumba lya baYuda bapindile imfwa ya kwa Yesu. “Umulopa wakwe ube pali ifwe, na pa bana besu,” e fyo babilikishe kuli kateka wa ciRoma uwashimunuka. (Mateo 27:24, 25) Mu cifulo ca kupokelela Yesu nge Mfumu ya buMesia, bashimapepo bakalamba babilishe ukuti: “Tatukwete mfumu, kano Kaisare.” (Yohane 19:15) Mesia wa cine lyene apopelwe ku cimuti ca kucushiwilwapo ku kufwa, pa kuba napeelwa imilandu ya bufi pamo ngo wa kupinuna Roma kabili uwa kupontela Lesa wa baYuda.—Marko 14:61-64; Luka 23:2; Yohane 18:36; 19:7.

⁷ Ubukali bwa bulesa bwali ubwashininkisha ukwisa pa bekashi ba Yudea pa mulandu wa kukwata kwabo umulandu wa mulopa uwa kulengo munsokwe. Yerusalemu, mu kuba ne tempele lyakwe ilya lulumbi, tali na maka na kabili aya kwitwa “umusumba wa Mfumu nkulu,” Yehova. (Mateo 5:35; Luka 13:33-35) Inshiku shimo pa ntanshi ya mfwa ya kwa Yesu, abasambi bakwe balandile mu kukumbwa kwa filya fikuulwa fye tempele lya musumba. Mu kwankulako, Yesu asobele ukuti: “Ifi mulelolesha, inshiku shikesa ilyo tapakashale ilibwe pa mulu wa libwe libiye ilishakapooswe pa nshi.”—Luka 21:5, 6.

 8. Lintu Yesu apeele “cishibilo” ca fya kuponako ukutungulula ku konaulwa kwa Yerusalemu, cinshi cimbi cabimbilwemo?

⁸ Abasambi ba kwa Yesu baipwishe mu kupapushiwa ukuti: “Mwe Kasambilisha, nga kanshi ifintu ifi fikaba lilali? Kabili cinshi cikabe cishibilo ilyo ifi fintu fikasungamina ukubako?” (Luka 21:7) Mu kwasuka Yesu mu kulungika asobele ifya kuponako ifyatungulwile ku konaulwa kwa Yerusalemu, kabili alundileko ili longo lya mashiwi lyakatama ukuti: “Yerusalemu ukabo wanyantwapo ku Bena fyalo, shikasuke ashifishiwapo inshita sha Bena fyalo.” (Luka 21:8-24, KJ) Yesu muli ifyo asontele ku ntanshi ku cintu cimo bushilya bwa konaulwa kwa Yerusalemu—icintu cimo icali no kulolela “shikasuke ashifishiwapo inshita sha Bena fyalo.” Ukulosha ku “cishibilo,” Yesu atile: “Ilyo mukamona ifi fintu fileisa, ishibeni ukuti ubufumu bwa kwa Lesa buli mupepi.” (Luka 21:31) E ico, icishibilo cali no kukwata ukufikilishiwa kwa mbali shibili. Ukufikilishiwa kwa kubalilapo, nelyo ukwa pa cipimo cinono, kwali no kulangilila ukuti ‘ukupomonwa kwa Yerusalemu nakupalama.’ (Luka 21:20) Ukufikilishiwa kwa cibili, kabili ukwacilapo bukulu, kwali no kwisa lintu Inshita sha Bena fyalo shapwile, kabili kwali no kulangilila ukuti “ubufumu bwa kwa Lesa buli mupepi.”—Linganyeniko Mateo 24:3.

Yerusalemu wa pe Sonde Apyanikwapo no Musumba Wacilapo

 9. Ni lilali Yerusalemu wa pe sonde alufishe imibele yakwe iyasenaminwa, kabili apyanikwapo na cinshi?

⁹ Ku kusoso kuti “Yerusalemu ukabo wanyantwapo ku nko, ukufikila inshita shasontwa isha nko ashifishiwa,” (NW) bushe Yesu aletubululo kuti umusumba wa pe sonde mu kupelako wali no kubweshiwa ku kusenamina kwa bulesa? Iyo. Pa numa ya kwipaiwa kwa Mwana wa kwa Lesa uwatemwikwa, Yerusalemu wa pe sonde alufishe imibele yakwe iyaibela kuli pe na pe kabili alipyanikwapo no “musumba wa kwa Lesa wa mweo, Yerusalemu wa mu mulu” uwacilapo nga nshi.—AbaHebere 12:22; Mateo 23:37, 38; 27:50, 51.

10. Cinshi capilibulwa ku numbwilo “Yerusalemu wa mu mulu”?

¹⁰ Inumbwilo “Yerusalemu wa mu mulu” ilabomfiwa muli Baibolo ku kulondolola Ubufumu bwa mu mulu ubushingonaika uko Abena Kristu basubwa baitwa.a (AbaHebere 11:10; 12:22, 28) Lintu umutumwa Paulo alembele ici, umusumba wa pe sonde mu kuba ne tempele lya uko wali ucili ulekumbwa apakalamba nga nshi abaYuda. Muli fyo, Paulo acinkwileko Abena Kristu ba ciHebere ukuti “pano tatukwete umusumba wa kwikalilila, lelo tufwayo musumba uuleisa.”—AbaHebere 13:14.

Umulandu Etiilwa Yerusalemu wa mu Mulu

11. Ukufikila Yerusalemu alufishe ukusenamina kwa kwa Yehova, cinshi aiminineko?

¹¹ Yerusalemu aali pa nshita ntali umusumba ukalamba uwa luko lwa kwa Israele, ulo ishamfumu sha luko shasoselwe ‘ukwikala pa cipuna ca kwa Yehova.’ (1 Imilandu 29:23) Na kabili, Yehova acitile cipingo na Davidi ica kuti bumfumu bwali no kutwalilila mu lupwa lwakwe kuli pe na pe. Pamo fye nga fintu imisumba ikalamba iya kasuba ka lelo, pamo nga Washington, Moscow, Canberra, na Pretoria, ilabomfiwa ku kwishibisha amakamfulumende ya iko yene, e fyo na Yerusalemu abomfiwa muli Baibolo ku kwimininako ubufumu bwa buDavidi.—2 Samwele 7:16; Luka 1:32.

12. Ni shani inumbwilo “Inshita sha Bena fyalo” ili no kubomfiwa?

¹² Ubufumu bwa kwa Davidi bwakwete ukuteka kwapelela, ukutanunukila fye ku mipaka yalondolwelwe na Lesa iya kwa Israele wa pa kale. Yerusalemu wa pe sonde kanshi aali fye ca kupashanya kwa Bufumu bwa buMesia ubwa cine cine ubwali no kuteka ukufuma ku mulu no kukwate sonde lyonse ngo buteko bwa buko. (Ilumbo 2:2, 7, 8; Daniele 7:13, 14; 2 Timote 4:18) Muli fyo, icitabo The Time Is At Hand, icasabankanishiwe na Watch Tower Society mu 1889, mu kumfwika calondolwele ukuti: “Inumbwilo ‘Inshita sha Bena fyalo’ yabomfiwe na Shikulwifwe kuli kulya kutusha kwa lyashi lya kale ilye sonde pa kati ka kufumishiwapo kwa Bufumu bwa cimpashanya ubwa kwa Lesa, Ubufumu bwa kwa Israele (Esek. 21:25-27), no kutendeka no kwimikwa kwa calepashanishiwako, Ubufumu bwa cine ubwa kwa Lesa.”

Inshita sha Bena Fyalo—Butali Bwaba Shani?

13. Ni lilali Inshita sha Bena fyalo shatendeke, kabili mulandu nshi wayasukile fyo?

¹³ Ubufumu bwa cimpashanya ubwa kwa Lesa bwawishiwe ku mfumu ya cina Babiloni Nebukadnesari mu 607 B.C.E. Ukufika ku mweshi walenga cinelubali uwa ciYuda, mupepi na pa kati ka October, impanga yalele amapopa.b (2 Ishamfumu 25:8, 9, 22, 25, 26) Mu kushininkisha kwa kuti ici cacitike ku kusuminisha kwa bulesa, Yehova Lesa apeele Nebukadnesari iciloto. Cabimbilemo umuti uwatemenwe no kusuminishiwa ukukula na kabili pa numa ya ciputulwa ca “nshita cinelubali.” (NW) Iciloto cakwete ukufikilishiwa kwa kutendekelako lintu Nebukadnesari abweshiwe ku cipuna cakwe ica bufumu pa numa ya mibele ya pa nshita inono iya kupena.—Daniele 4:10-17, 28-36.

14. Cinshi cali icishinka cikalamba ica ciloto ca kwa Nebukadnesari?

¹⁴ Nangu cibe fyo, umutwe wa ciloto ca kwa Nebukadnesari walangile ukuti ukufikilishiwa kwa ciko kukalamba kwabimbilemo ubufumu bwa cimpashanya ubwa kwa Lesa, ubo ilya mfumu ya Bena fyalo yasuminishiwe ‘ukutema.’ Iciloto casondwelele mu kuba na ubu bulondoloshi bwa mifwaile: “Ukuti aba mweo beshibe ukuti Wapulamo e uteka mu bufumu bwa bantunse, kabili abupeela ku o atemenwe, no kulaasapo umuntu umulanda.”—Daniele 4:17.

15. Ni shani Yesu Kristu aali uwafikapo pamo ngo “muntu mulanda”? (Mateo 11:29)

¹⁵ Umuntu fye umo eka e wabele uwafikapo mu mbali shonse ukwitwa “umuntu umulanda.” Umwana wafyalwa eka uwa kwa Lesa e waishininkishe umwine ukubo wa musango uyo pa kusha mu kuitemenwa ubukata bwakwe ubwa mu mulu ku kwisafyalwa ngo muntunse, pamo nga Yesu, uwaculile ukucendwa kwacilishapo ne mfwa ya bunkalwe pa kuboko kwa kwa Satana. (Abena Filipi 2:3, 5-11) Pa numa ya kubuuka kwakwe ukubwelela ku bukata bwa mu mulu, Yesu aali no kulolela ukufikila iciputulwa ca nshita cinelubali ica kuteka kwa Bena fyalo capwile pa ntanshi ya kubikwa pa cipuna ca bufumu pamo nge Mfumu ya buMesia pa mutundu wa muntu.—AbaHebere 10:12, 13.

16. Ni shani ibuku lya Ukusokolola lyafwilisha Abena Kristu ukupenda lintu inshita cinelubali shapwile?

¹⁶ Lelo ni shani fintu Inte sha kwa Yehova baishile ku kumfwikisha ubutali bwa nshita cinelubali? Baibolo isokolola ukuti “Inshita imo, ne Nshita shimbi, na hafu wa Nshita,” nelyo inshita shitatu na citika, shalingana ne nshiku 1,260. (Ukusokolola 12:6, 14) E ico, cite miku ibili iyo mpendwa, nelyo inshita cinelubali, kuti shalingana ne nshiku 2,520. Ukushimpa pa kutungulula kwa mu busesemo ukwa “bushiku bumo bumo pakabo mwaka umo,” inshita cinelubali kuti shalingana ne myaka 2,520. (Impendwa 14:34; Esekiele 4:6) Kuli iyi mipendele, Inshita sha Bena fyalo, ishatampile mu October 607 B.C.E., shapwile imyaka 2,520 pa numa mu October 1914.

17. Kubilisha nshi ukwa nsansa kwali mupepi no kulengwo kwishibikwa mu 1914?

¹⁷ Mu October 1914, Yehova Lesa aimike Umwana wakwe uwatemwikwa, Shikulu Yesu Kristu, pa cipuna mu Bufumu bwa mu mulu. Mu kupelako, icimonwa ca Ukusokolola ica mutumwa wa Bwina Kristu Yohane catampile ukuba bucine, kabili ukubilisha kwali no kucitwa ukwa kuti: “Ubufumu bwa pe sonde bwaisabo bwa kwa Shikulwifwe [Yehova], no bwa kwa Kristu wakwe, na o [Yehova] akulabe Mfumu umuyayaya umuyayaya.” (Ukusokolola 1:10; 4:1; 11:15) Mwandi iyi ili ni mbila ya bukata kabili mwandi mulandu wa nsansa shakulisha pa lubali lwa mpyani shonse na batekwa ba bulya Bufumu!—Ukusokolola 11:17.

18. Mulandu nshi imibele ya bulanda yacululusha umutundu wa muntu ukutula 1914?

¹⁸ Ca cine, ku bengi aba mutundu wa muntu, takwabako insansa ishingi pe sonde ukutula 1914. Lelo imibele ya kalanda pe sonde ili bushinino bwa kuti ukuteka kwa kwa Satana kuli mupepi no kupwa. Twaishiba shani ici? Ibuku lya Ukusokolola lyalangilile ukuti ukwimikwa kwa Bufumu bwa kwa Lesa kwali no kufumamo inkondo mu mulu. Satana ne fibanda fyakwe baali no kupooswa ukufuma mu mulu no kupeleshiwa ku bwina mupalamano bwe sonde lyesu. Pa numa ya kumona uku kucimfya mu cimonwa ca mu busesemo, Yohane aumfwile ishiwi likalamba lileti: “Sangalaleni, mwe myulu, na mwe baikalamo. Kalanda kuli imwe, mwe calo na bemba, pa kuti [Ciwa, NW] naikila pali imwe, ali ne cipyu cikalamba, pa kwishibo kuti ali ne nshita inono fye.”—Ukusokolola 12:1-12.

19. Mulandu nshi Abena Kristu ba cine bali aba kutasha nga nshi pa kuba aba mweo pali ino nshita?

¹⁹ Imibele ya calo iibipilako ukutula 1914 ili bushinino bwa kuti icimonwa ca kwa Yohane casanguka bucine no kuti impela ya bantunse bonse abakaana ukunakila kuli bumulopwe bwa kwa Lesa ilepalamina mu kubamo busanso. (Luka 21:10, 11, 25-32) Fintu cili ica kucincimusha ukuba aba mweo pali iyi nshita ya kupapusha lintu Yehova Lesa, Uwa maka yonse, akapwisha ifikansa fikalamba ifya bumulopwe bwakwe pa lwe sonde! Lyene, isonde likalwilwa muli paradise wayemba, kabili bakapusunsuka ba buntunse abalungama bakasumbwilwa ku kupwililika. Nelyo fye abafwa bakemishiwa no kupeelwe shuko lya mu nshita pa kuba abafikapo ku bumi bwa muyayaya.—Ukusokolola 20:1-3, 12, 13; 21:3-5.

Ukukabila kwa Muno Nshiku ku Kuteuluka

20. (a) Pe sonde, ni bani bashininkishe ukuba ababomfi ba cine aba kwa Yehova pa ntanshi ya 1914? (b) Kuteuluka nshi Abena Kristu basubwa aba busumino baali abaitemenwa ukucita?

²⁰ Pa myaka 38 pa ntanshi ya 1914, Abasambi ba Baibolo, nga fintu Inte sha kwa Yehova baleitwa lilya, basontele kuli bulya bushiku ngo mwaka lintu Inshita sha Bena fyalo shali no kupwa.c Mwandi buli bushinino bwapulamo ubwa kuti baali babomfi ba cine aba kwa Yehova! Nalyo line, ukupala ababomfi ba kwa Lesa aba mu mwanda wa myaka wa kubalilapo, na bo bene balikwete ukwenekela kumo ukwalubana. Ku ca kumwenako, baenekele ukuti impendwa yakumanina iya Bena Kristu basubwa yali no kwimishiwa ku mulu ukufika mu October 1914. Na kabili batontonkenye ukuti inkondo iyatampile mu 1914 yali no kutungulula mu kulungatika ukufika ku mpela ya calo ca kwa Satana.

21. Kusalapula nshi Abena Kristu ba cine bakumenye mu kati ka Nkondo ya Calo iya I?

²¹ Mu nshita, nangu ni fyo, Abena Kristu basubwa bamwensekeshe ukuti kwaliko umulimo ukalamba kuli bene uwa kucita pe sonde. Pa mulandu wa mupampamina wabo mu kucitilo bunte kwa ku cintubwingi mu kati ka Nkondo ya Calo iya I, bakumenye ukupakaswa kwatapata ukufuma ku mabulashi ya bupolitiki, ayaluminishiwe na bashibutotelo ba Kristendomu. (Ilumbo 2:1-6) Imibombele ya Bena Kristu ba cine yapuuminwe cabipisha pa June 21, 1918, lintu abalashi baletungulula aba Watch Tower Society mu United States bapingwililwe ku myaka 20 mu cifungo pe samba lya kupeelwe milandu ya bufi.

22, 23. (a) Cinshi Abena Kristu basubwa aba busumino bacita ukutula 1919, kabili mu kuba na kwankulako nshi ukwa mbali shibili? (b) Cinshi cili Yerusalemu wabulwo busumino uwalepashanishiwa?

²² Inkondo ya Calo iya I yaishile ku mpela ya kupumikisha mu November 1918. Lyene, pa March 25, 1919, abalashi ba Watch Tower Society balikakwilwe ukufuma mu cifungo. Pa numa balifumishiwe mu mulandu mu kukumanina. Iciputulwa ca nshita cishaenekelwe ica mutende caiswike kuli balya Abena Kristu basubwa aba busumino, icapala ku mashuko ya mu nshita ayaitambike ayene yeka ku basambi ba kwa Kristu aba mu kubangilila pa numa lintu bapeelwe amaka ku mupashi wa mushilo mu 33 C.E.—Imilimo 2:17-21, 41.

²³ Ukutula 1919, Abena Kristu basubwa aba busumino pamo nge bumba balyumfwila mu kupimpa ukukambisha ukwabimbwa mu mashiwi ya kwa Yesu aya pali Mateo 24:14 aya kuti: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” Pamo nge ca kufumamo, mupepi na mamilioni yane aya “mpaanga shimbi” isha kwa Kristu balipeelesha ubumi bwabo ku kubombela Yehova mu kwikatana na bashalapo basubwa. (Yohane 10:16) Kristendomu, pe samba lya kusonga kwa bashibutotelo bakwe, atwalilila ukukaana ubukombe bwa Bufumu. Ukusobolapo kwakwe amapange ya bupolitiki aya buntunse no kupakasa kwakwe ukwa Nte sha kwa Yehova kwalingana ne misungilwe ya kutulumusha iya kwa Kristu ku bekashi ba mu mwanda wa myaka wa kubalilapo aba Yudea. Pamo fye nga fintu Yehova aputunkenye ubupingushi bwakwe pali Yerusalemu, e fyo akacita na kuli Yerusalemu walepashanishiwa uwabulo busumino, ukumulumbula, Kristendomu. Kabili pamo fye nga fintu inkulo iyaumfwile ubukombe bwa bupingushi ubwa kwa Kristu yaikele iya mweo ku kukumanya ubonaushi asobele, e fyo inkulo yabapo ukutula 1914 “tayakapite” ilyo “ubucushi bukalamba” ubwasobelwa tabulaisa.—Mateo 24:21, 22, 34.

24. Pa kupusunsuka ukwingila mu calo cipya ica kwa Lesa, cinshi tufwile ukucita?

²⁴ Cinshi tufwile ukucita pa kupusunsuka ubucushi bukalamba no kutwalilila ukwikala aba mweo ukwingila mu calo cipya ica kwa Lesa? Te mulandu no kwenekela kwalubana abali bonse aba ifwe pambi twakwete, tufwile ukupempwila ku kulaalo tulo ukukuma ku milimo yesu iya Bwina Kristu. (Habakuki 2:3; 1 Abena Tesalonika 5:1-6) Abo abali na maka ya kwibukisha ifya kuponako ukufuma 1914 baleya balecepelako lyonse. Muli fyo, tulekabila ukuba abailuka; takuli inshita ya kulufya. (Mateo 24:42) Bonse abalefwaya ukupusunsuka impela ya calo cibifi ica kwa Satana bafwile ukubombapo nomba mu nshila iilanga ukusuminishanya na mashiwi yapuutwamo aya kuti: “Twatoota kuli imwe, mwe [Yehova, NW] Lesa, wa maka yonse . . . ico mwabuula amaka yenu yakalamba, no kube Mfumu.”—Ukusokolola 11:17.

[Amafutunoti]

Kuti Wayasuka Shani?

◻ Cinshi Yerusalemu wa pa kale aiminineko, lelo ni shani fintu alufishe imibele yakwe iya mucinshi?

◻ Ni lilali Inshita sha Bena fyalo shatendeke no kupwa, kabili mu kuba na ca kufumamo nshi icasobelwe?

◻ Cinshi ukonaulwa kwa Yerusalemu wabulo busumino kwacitile cikope?

◻ Twaishiba shani ukuti ubucushi bukalamba nabupalama, kabili cinshi tufwile ukucita pa kupusunsuka bwene?

[Icikope pe bula 16]

Yerusalemu ne tempele lya uko alufishe imibele yakwe iya mucinshi, lelo Lesa atwalilile ukupaala Umwana wakwe, Mesia, nelyo fye ukulanda nankwe mu kulungatika ukufuma ku mulu