Finshi Tufwile Ukucita pa Kuti Tutwalilile Ukwikatana?

 1. Bushe imilimo ya kwa Lesa ibombwa shani ukutula fye na pa kutendeka?

UKUTULA fye pa kutendeka, Yehova na Yesu balikatana. Yehova abalilepo ukubumba Yesu ilyo ashilabumba ifintu fyonse. Pa numa, Yesu alibombeele pamo na Yehova kabili ali “nankwe, ngo waishibisha imilimo.” (Amapinda 8:30) Ababomfi ba kwa Yehova nabo balikatene pa kubomba imilimo babapeele. Ku ca kumwenako, Noa no lupwa lwakwe balibombeele pamo pa kukuula icibwato. Pa numa, abena Israele balebombela pamo pa kupanga icikuulwa ca mushilo, pa ku cikuululula, na pa kusenda ifyo balecipangila ukufuma pa cifulo cimo ukuya ku cifulo cimbi. Pe tempele, abantu baleimbila pamo inyimbo sha kulumbanya Yehova kabili ishi nyimbo shaleumfwika bwino. Icalengele ukuti abantu ba kwa Yehova bacite ifi fyonse ni co balikatene.—Ukutendeka 6:14-16, 22; Impendwa 4:4-32; 1 Imilandu 25:1-8.

 2. (a) Bushe Abena Kristu ba mu nshita ya batumwa bali shani? (b) Mepusho nshi twalalandapo?

² Abena Kristu ba mu nshita ya batumwa nabo balikatene. Umutumwa Paulo alandile pali aba Abena Kristu ukuti nangu ca kuti balipusene mu fyo bacenjelemo na mu milimo balebomba, balikatene. Bonse baletungululwa na Yesu Kristu Intungulushi yabo. Paulo alingenye Abena Kristu ku mubili uwakwata ifilundwa ifyalekanalekana ifibombela pamo. (Belengeni 1 Abena Korinti 12:4-6, 12.) Inga ifwe muno nshiku, kuti twabombela shani pamo mu mulimo wa kubila imbila nsuma, mu cilonganino e lyo na mu lupwa?

 3. Finshi umutumwa Yohane amwene mu cimonwa?

³ Mu nshita ya batumwa, umutumwa Yohane alimwene bamalaika 7 mu cimonwa abalelisha amapenga. Ilyo malaika walenga 5 alishishe ipenga, Yohane amwene “ulutanda ulwaponene pe sonde ukufuma mu muulu.” Ulu “lutanda” balilupeele ulufungulo kabili lwaiswile pa cilindi cabula impela. Ica balilepo ukufuma mu cilindi, cushi, lyena mu cushi mwafumine bamakanta abengi. Aba bamakanta tabaonawile ifimuti ne fimenwa, lelo baonawile “abantu abashafwatikwapo icishibilo ca kwa Lesa pa mpumi shabo.” (Ukusokolola 9:1-4) Yohane alishibe ukuti bamakanta balonaula sana ifimenwa, pantu balyonawile sana ifimenwa mu Egupti mu nshita ya kwa Mose. (Ukufuma 10:12-15) Bamakanta abo Yohane amwene bemininako Abena Kristu abasubwa ababila imbila ya bupingushi ku baba mu mipepele ya bufi. Abasubwa babomba uyu mulimo pamo na bantu abengi nga nshi abafwaisha ukwikala pano isonde. Uyu mulimo walilenga abantu abengi ukufuma mu mipepele ya bufi no kukanalatungululwa na Satana.

 4. Mulimo nshi uo abantu ba kwa Lesa babomba, kabili cinshi bafwile ukucita pa kuti baubombe bwino?

⁴ Twalikwata umulimo wa kubila “imbila nsuma” ku bantu bonse isonde lyonse ilyo impela ishilaisa. Uyu mulimo ukalamba nga nshi! (Mateo 24:14; 28:19, 20) Tufwile ukulaita bonse ababa ne “cilaka” ku kunwa “amenshi ya mweo,” e kutila tufwile ukusambilisha bonse abafwaya ukwishiba icine ca mu Baibolo. (Ukusokolola 22:17) Kuti twasambilisha fye abantu icine nga ca kuti ‘twalundinkana bwino bwino,’ nelyo twaikatana e lyo no kulabombela pamo mu cilonganino.—Abena Efese 4:16.

5, 6. Bushe twikatana shani ilyo tubila imbila nsuma?

⁵ Pa kuti tuleshimikila abantu abengi imbila nsuma, tulingile ukuteyanishiwa bwino. Ifyo batweba mu cilonganino filalenga twaiteyanya. Ilyo tushilaya mu kubila imbila nsuma ya Bufumu tulabala twakumana pamo e lyo pa numa twaya mu mulimo wa mwi bala. Tulapeela abantu impapulo ishilanda pa fya mu Baibolo, na kuba twalipeela abantu mu calo conse impapulo ishingi nga nshi. Inshita shimo balatukoselesha no kubombako umulimo wa kubila nga kwaba amakampeni yaibela. Nga tulebombako uyu mulimo, ninshi tulebombela pamo na ba bwananyina mwi sonde lyonse ababila imbila nsuma iyo na ifwe tubilako! Kabili ninshi tulebombela pamo na bamalaika, abafwa abantu ba kwa Lesa ukubila imbila nsuma.—Ukusokolola 14:6.

⁶ Tulatemwa nga nshi ukubelenga ifyo umulimo ulebombwa mwi sonde lyonse mu citabo citila Ilyashi lya Nte sha kwa Yehova! Tontonkanyeni na pa fyo tubombela pamo isonde lyonse nga tuleita abantu ku kulongana kwa citungu. Pali uku kulongana tusambilila ifyebo fimo fine, palaba amalyashi, ifyangalo, ne filangililo ifitukoselesha ukulabombela Yehova no mweo wesu onse. Na kabili tulekatana na ba bwananyina isonde lyonse nga twasangwa ku Cibukisho ca mfwa ya kwa Yesu icibako cila mwaka. (1 Abena Korinti 11:23-26) Tulebukisha imfwa ya kwa Yesu pa bushiku bumo bwine ubwa Nisani 14 cilya akasuba kawa ku kulanga ukuti tulatasha Yehova pa fyo atucitila, kabili tulakonka ifunde lya kwa Yesu ilya kuti tuleibukisha imfwa yakwe. Imilungu iinono ilyo ubushiku bwa Cibukisho bushilafika, tulabombela pamo ku kwita abantu abengi ukwisasangwa ku kulongana kwacindama sana ukwa Cibukisho ca mfwa ya kwa Yesu.

 7. Bushe ukubombela pamo kulenga twabomba shani umulimo wa kwa Lesa?

⁷ Makanta umo fye te kuti onaule ifimenwa. Kanshi no muntu umo fye te kuti ashimikile abantu bonse. Lelo apo tulabombela pamo tulashimikila abantu abengi nga nshi pali Yehova, kabili bamo balatendeka no kumulumbanya no kumucindika.

8, 9. (a) Cilangililo nshi Paulo abomfeshe pa kufunda Abena Kristu ukuba abaikatana? (b) Kuti twacita shani pa kuti tulebombela pamo mu cilonganino?

⁸ Paulo alilondolwelele abena Efese ifyo icilonganino cateyanishiwa, kabili abebele ati bonse mu cilonganino balingile ‘ukukula muli fyonse.’ (Belengeni Abena Efese 4:15, 16.) Paulo abomfeshe icilangililo ca mubili pa kulondolola ifyo bonse mu cilonganino balingile ukucita pa kuti batwalilile ukwikatana no kulakonka Yesu, Intungulushi ya cilonganino. Alandile ati ifilundwa fyonse ifya mubili fyalilundinkana bwino bwino “mu mfyufyu shonse” kabili fibombela pamo. Finshi ifyo bonse tulingile ukucita nampo nga tuli baice nelyo nga tuli bakalamba, nga twaliba no bumi ubusuma nelyo nga tulalwalilila?

⁹ Yesu alisonta baeluda ukulatungulula mu filonganino kabili afwaya tulebacindika no kulakonka ifyo batweba. (AbaHebere 13:7, 17) Nomba limo cilafya ukucita ifi, lelo kuti twalomba Yehova ukuti atwafwe. Umupashi wakwe uwa mushilo kuti watwafwa ukulakonka ifyo baeluda batweba. Tontonkanyeni na pa fyo icilonganino twabamo cingaba nga tuli abaiceefya kabili tulebombela pamo na baeluda. Bonse mu cilonganino kuti twaikatana, kabili kuti twatemwana nga nshi.

10. Bushe ababomfi batumikila balenga shani icilonganino caikatana?

¹⁰ Ababomfi batumikila nabo balatwafwa ukutwalilila abaikatana mu cilonganino. Balabombesha ukwafwa baeluda, kabili tulatasha nga nshi pa milimo babomba. Ku ca kumwenako, ababomfi batumikila balabombesha pa kuti lyonse tulekwata impapulo sha kubomfya mu mulimo wa kubila, balasengela abesa mu kulongana, balawamya ifyonaika pa Ng’anda ya Bufumu, kabili balaisunga iya busaka. Nga tulebombela pamo na aba bamunyinefwe, tukekatana kabili tukalabombela bwino Yehova.—Linganyeniko Imilimo 6:3-6.

11. Finshi bamunyinefwe bacaice bengacita pa kuti mu cilonganino mube ukwikatana?

¹¹ Baeluda bamo balibomba mu cilonganino pa myaka iingi. Nomba pa mulandu wa kuti nabakula, tababomba nge fyo balebomba kale. Kanshi bamunyinefwe bacaice nga babakansha kuti balebomba imilimo iingi mu cilonganino. Nga ca kuti ababomfi batumikila balebombesha, kuti bafikapo ukuba baeluda ku ntanshi. (1 Timote 3:1, 10) Baeluda bamo abacaice balalunduluka ica kuti balafikapo ukuba bakangalila ba muputule, kabili balafwa aba bwananyina mu filonganino ifingi. Tulatasha bamunyinefwe bacaice nga baleitemenwa ukubombela aba bwananyina.—Belengeni Amalumbo 110:3; Lukala Milandu 12:1.

12, 13. Finshi fingalenga aba mu lupwa baikatana?

¹² Kuti twacita shani pa kuti bonse mu lupwa tulebombela pamo? Tulingile ukulakwata amapepo ya lupwa cila mulungu. Abafyashi na bana nga balesambilila pali Yehova capamo, bakatemwana sana. Pa mapepo ya lupwa, kuti bapekanya ifyo bakalanda pa kushimikila abantu, ukucita ifi kuti kwabafwa ukuipekanya ilyo bashilaya mu kubila imbila nsuma. Aba mu lupwa nga baumfwa ifyo uwa mu lupwa munabo alelanda pa cine, bamona ne fyo bonse mu lupwa batemwa Yehova ne fyo bafwaisha ukumusekesha, bakekatana sana.

¹³ Bushe abaupana kuti bacita shani pa kuti batwalilile ukwikatana? (Mateo 19:6) Abaupana nga balitemwa Yehova kabili balebombela pamo umulimo wakwe, bakaba ne nsansa kabili bakekatana. Abaupana bafwile no kutemwana nga filya Abrahamu na Sara, Isaki na Rebeka e lyo na Elkana na Hana batemwanene. (Ukutendeka 26:8; 1 Samwele 1:5, 8; 1 Petro 3:5, 6) Abaupana nga nabatemwana, balekatana kabili balapalama sana kuli Yehova.—Belengeni Lukala Milandu 4:12.

14. Finshi mufwile ukucita pa kuti mukoshe icupo cenu nangu ca kuti abena mwenu tababombela Yehova?

¹⁴ Baibolo yalilanda ukwabula ukupita na mumbali ukuti tatufwile ukuupa nelyo ukuupwa ku muntu uushibombela Yehova. (2 Abena Korinti 6:14) Na lyo line kwaliba bamunyinefwe na bankashi abaupa nelyo abaupwa ku bashili ba Nte. Bamo basambilile icine ninshi balyupa nelyo balyupwa kale, lelo abena mwabo bena tabasambilila cine. Bambi nabo baupile nelyo ukuupwa kuli ba Nte, lelo abena mwabo balileka ukulongana. Abena Kristu ababa mu fyupo fya musango uyu balesha na maka ukukonka ifyo Baibolo ilanda pa kuti ifyupo fyabo fitwalilile ukuba ifyakosa. Kwena cilafya ukucita ifi. Ku ca kumwenako, ba Mary na bena mwabo ba David balebombela Yehova capamo. Lelo ba David balilekele ukulongana. Na lyo line ba Mary balitwalilile ukuba ne mibele iisuma ku bena mwabo. Balisambilishe na bana babo 6 pali Yehova kabili tabalekele ukuya ku kulongana kwa pa cilonganino e lyo no kwa citungu. Na pa numa ya myaka iingi ninshi na bana balikula balifuma na pa ng’anda, ba Mary tabalekele ukubombela Yehova nangu ca kuti calyafishe ukucita ifi. Mu kupita kwa nshita, ba David balitendeke ukubelenga magazini iyo ba Mary balebapeela. Pa numa, balitendeke na kabili ukuya mu kulongana. Umwishikulu wabo uwa myaka  6 alebasungila lyonse apa kwikala, kabili ba David nga tabele mu kulongana, alebeba ukuti, “Shikulu tamwacisa mu kulongana lelo.” Pa numa ya myaka 25, ba David balibwelele kuli Yehova, kabili bena na bena mwabo baliba ne nsansa pantu nomba babombela Yehova capamo.

15. Bushe abaupana kale kuti bayafwa shani abaupene nomba line?

¹⁵ Muno nshiku Satana alasansa indupwa. Uyu e mulandu abaupana ababombela Yehova bafwile ukulabombela pamo. Nangu ca kuti palipita imyaka iingi ukutula apo mwaupanina, muletontonkanya pa fyo mwingalalanda no kucitila abena mwenu ifingakosha icupo cenu. Nga ca kuti kale mwaupana, mulecita ifingalenga abaupene nomba line basambililako. Nalimo kuti mulebetako ku mapepo ya lupwa. Nga mulecita ifi bakeshiba ukuti abaupana bafwile ukutwalilila ukutemwana no kulabombela pamo nangu papite imyaka iingi ukutula apo baupanina.—Tito 2:3-7.

16, 17. Mapaalo nshi ayo ababomfi ba kwa Lesa abaikatana bakapokelela?

¹⁶ Ilyo abena Israele baleya ku Yerusalemu mu kusefya imitebeto, balebombela pamo. Balepekanya fyonse ifyo balekabila pa bulendo, baleendela pamo kabili baleyafwana. Pe tempele bonse balelumbanya no kupepela Yehova capamo. (Luka 2:41-44) Muno nshiku ilyo tuleipekanya ukwisaikala mu calo cipya, tulingile ukwikatana no kulabombela pamo. Finshi mwingacita pa kuti mwikatane no kulabombela pamo na ba bwananyina?

¹⁷ Abantu mu calo tabomfwana kabili balwila pa fintu ifyalekanalekana. Lelo ifwe tulatasha Yehova pantu alitwafwa ukuba aba mutende kabili alitusambilisha icine! Abantu ba kwa Yehova balikatana sana maka maka muli shino nshiku sha kulekelesha. Nga filya Esaya na Mika baseseme, tulanina ukuya ku “lupili lwa kwa Yehova” capamo. (Esaya 2:2-4; belengeni Mika 4:2-4.) Tukaba ne nsansa nga nshi ilyo abantu bonse ‘bakalundinkana bwino bwino’ no kwikatana mu kupepa Yehova!