Ubukata Ubukulu Ubwa Ŋanda ya kwa Yehova

“[Nkesusha] mu ŋanda iyi ubukata e fyo Yehova wa milalo asosa.”—HAGAI 2:7.

 1. Umupashi wa mushilo wayampana shani ku citetekelo no mulimo?

ILINTU umo uwa Nte sha kwa Yehova aleshimikila ku ŋanda ne ŋanda, asangile namayo uwa ku calici lya Pentecost uwatile, ‘Ifwe twalikwata umupashi wa mushilo, lelo imwe ni mwe mulebomba umulimo.’ Calilondolwelwe kuli wena mu mucenjelo ukuti, uukwete umupashi wa mushilo mu cifyalilwa fye, akakuntwa ukubomba umulimo wa kwa Lesa. Yakobo 2:17 alondololo kuti: “Icitetekelo, nga tacakwata milimo cabe cafwa icine.” Mu kuba no kwaafwa kwa mupashi wa kwa Yehova, Inte shakwe shalilundulula icitetekelo cakosa, kabili ‘alisusha mu ŋanda yakwe ubukata’ ukupitila mu kubatuma ukubomba imilimo yalungama—ukucilisha ‘ukubila imbila nsuma iyi ya bufumu ku fyalo fyonse ku kubo bunte ku nko shonse.’ Lintu uyu mulimo wabombwa ica kuti Lesa aikushiwa, “e lyo impela ikesa.”—Mateo 24:14.

 2. (a) Ukobelwa mu mulimo wa kwa Yehova kukatuletela mapaalo nshi? (b) Mulandu nshi tulingile ukusansamukila pa cilemoneka kwati ‘kushingashinga’?

² Kuli aya mashiwi ya kwa Yesu, twasanga ukuti umulimo wesu ilelo ufwile ukutonta pa kushimikilako bambi “imbila nsuma ya bukata iya kwa Lesa uwe shuko,” iyo twaseekeshiwa. (1 Timote 1:11) Ilyo twacishamo ukobelwa mu mulimo wa kwa Yehova mu nsansa, e lyo impela ikamoneka kwati yayangufyanya ukwisa. Pali Habakuki 2:2, 3, tubelengapo amashiwi ya kwa Yehova aya kuti: “Lembe cimonwa, no kulenga cimonekeshe pa cipampa ici, ku kuleka uulecibelenga abutukemo. Pantu icimonwa cicili cilelola ku nshita iyalingilwe, cilabutukisha ukulola ku mpela—tacakabepe ubufi; nga cashingashinga e lyo ucilolele, pantu ukwisa cikesa, tacakashimbe iyo.” Ee, “icimonwa” ukwisa cikesa nangu ‘cikashingashinge.’ Muli uno mwaka walenga 83 uwa kuteka kwa kwa Yesu mu Bufumu, bamo kuti bayumfwe fyo kale kale cileshingashinga. Nangu ni fyo, bushe tatulingile ukuba aba nsansa ukuti impela tailati ise? Muli ino myaka ya ba1990, ifibindo pa lwa mulimo wa kushimikila fyalifumishiwapo, ku Bulaya bwa ku Kabanga, mu fyalo fimo ifya mu Afrika, na mu fyalo fimbi kwati fye ni mu cipesha amano. Icilemoneka ngo ‘kushingashinga’ cilesuminisha ukuti “impaanga” shafulilako shilonganikwe ukufuma muli fi fifulo umo ukushimikila kusuminishiwe fye nomba line.—Yohane 10:16.

 3. Mulandu nshi ukumfwikisha cipya cipya pa lwa “inkulo ino” kulingile ukutucincimusha ukucincilila umulimo wa kwa Lesa?

³ “Tacakashimbe iyo,” e fyasosa kasesema. Yesu atile inkulo ibifi iya ndakai tayakapite fikasuke “ifi fyonse afiisa.” (Mateo 24:34) Bushe ukumfwikisha cipya cipya ukwa mashiwi yakwe kulepilibula ukuti umulimo wesu uwa kushimikila tauli uwe pamfya nga nshi?a Ifishinka filanga ukuti uli uwe pamfya nga nshi! Ino nkulo yesu iletotobela mu mibele ya bubifi no kubotelela ukushatala akumonwapo kale lyonse. (Linganyeniko Imilimo 2:40.) Tulingile ukucincilila umulimo wesu. (2 Timote 4:2) Amasesemo yonse pa lwa kwisa kwa bucushi bukalamba yalangisha ukuti buli no kwisa mu kupumikisha, mu kashita nyunsu, cinshinshi—ngo mupupu. (1 Abena Tesalonika 5:1-4; Ukusokolola 3:3; 16:15) “E ico na imwe mube abaiteyanya; pa kuti Umwana wa muntu akesa mu kashita mushikashile.” (Mateo 24:44) Ilyo ino nkulo yabula bukapepa iya bantunse ileshininda pa nembenembe ya kuloba, mu cine cine tatwingafwaya ukupoosa isubilo lyesu ilyaumo mutengo ilya bumi bwa ciyayaya ukupitila mu kubwelela ku “kuikunkusha mu matipa” ya fya kupuusaula fya ku calo!—2 Petro 2:22; 3:10; Luka 21:32-36.

 4. Mibele nshi yapinda ukuti kube ukufushako “ifya kulya mu nshita iyene,” kabili ni shani fintu uku kukabila kwabombelwapo?

⁴ Umwabela ubusesemo bwa kwa Yesu, mu 1914 kwali “citendekelo ca kushikitika kwa kupaapa” ilyo umuntunse aingile mu “[kusondwelela, NW] kwa pano isonde.” Amalanda, utuyofi, no bupulumushi fyalingilishiwako ukufika mu nshiku shesu. (Mateo 24:3-8, 12) Pa nshita imo ine, Yehova alituma ibumba lyakwe ilyasubwa ilya musha wakwe uwa cishinka kabili uwashilimuka ukupayanishisha aba mu ŋanda ya kwa Shikulu wabo Kristu, “ifya kulya mu nshita iyene.” (Mateo 24:45-47) Ukufuma ku cipuna cakwe ica bufumu mu myulu, iyi Mfumu ya buMesia nomba iletungulula programu wa kuliisha kwa ku mupashi uwa kupapusha ukupulinkana isonde lyonse.

“Umulingo wa Filyo” Uwapaka

 5. ‘Icilyo’ cikalamba cilesakamanwa shani?

⁵ Langulukeni ukupekanya kwa “mulingo wa filyo.” (Luka 12:42) Icilyo cikalamba pa filyo fya Bena Kristu caba Cebo ca kwa Lesa, Baibolo. Pa kusambilisha Baibolo bwino, icikabilwa sana sana bupilibulo bwayanguka ukubelenga, ubwalungika. Mu kupita kwa myaka uku kukabila kwalibombelwapo panono panono, ukucilisha ukufuma mu 1950 lintu New World Translation of the Christian Greek Scriptures yafumine mu ciNgeleshi. Ilyo calefika 1961 New World Translation yalifumine yonse ukufuma ku Ukutendeka ukufika ku Ukusokolola, kabili mu kwipipa yalifumine na mu ndimi shimbi ishikalamba. Amavolyumu yatatu ayafumine mu mwaka wa mulimo uwa 1996 yalenga ukuti ifike 27 ubwingi, pali aya 14 yalikumanina, ukufuma ku Ukutendeka ukufika ku Ukusokolola. Pa kubombela pali uyu mulimo wa maBaibolo, pamo pene no wa mpapulo shimbi isha kwaafwa ukusambilila Baibolo, Abena Kristu baipeela mupepi na 1,174 balebomba nomba inshita yonse pa fya kupilibula mu fyalo 77.

 6. Ni shani fintu Sosaite yabombelapo pa kukabila kwa mpapulo sha Baibolo?

⁶ Pa kutungilila umulimo wa aba bakapilibula bafulisha, amaofesi ya Watch Tower Society 24 ayapulinta yalafumya impapulo shafulilako. Pa kuti ifyo fibombwe, bamashini ba kupulinta ababutukisha balitwalilila ukubikwa mu maofesi yakalamba. Ukupulinta kwa bamagazini ba Ulupungu lwa kwa Kalinda na Loleni! kwalikulilako umweshi no mweshi, ukufika ku bwingi bonse pamo 943,892,500, ukufulilako kwa maperesenti 13.4 mu mwaka wapwile. Ukupulinta kwa maBaibolo ne fitabo fya nkupo shakosa ukwa United States, Brazil, Finland, Germany, Italy, Japan, Korea, na Mexico fye ukukusansha pamo kwafulilako amaperesenti 40 ukufuma mu 1995 ukufika ku makope 76,760,098 mu 1996. Amaofesi yambi na yo yalilenga ukuti kube ukufulilako kukalamba mu kupulinta impapulo.

 7. Ni shani fintu Esaya 54:2 acishapo ukuba uwe pamfya nomba?

⁷ Icikalamba icalenga ukwingilishiwako muli ba1990 caba kufumishiwapo kwa fibindo pa Nte sha kwa Yehova ku Bulaya bwa ku Kabanga na mu Afrika. Muli fi fifulo balifwa insala ya ku mupashi. Muli fyo ubwite bwakonkapo bulomfwika mu kuba ne pamfya nga nshi ubwa kuti: “Tangula apa kwikale hema lyobe, ansa ne fipembe fya bwikalo bobe, wishako; lefye myando yobe, ikasha ne mambo shobe.”—Esaya 54:2.

 8. Kwankulako nshi kwa bukapekape kuleafwa ukupayanya ukwaafwa kwa mu fya ndalama?

⁸ Caliba kanshi icakabilwa ukukushako ifikuulwa ifingi ifya maofesi ya Sosaite 104. Pa mulandu wa bupiina mu fifulo fyaisuka nomba line ifya kubombelamo, indalama ishingi isha kulipila pali uku kukushako shifuma ku misangulo isangwilwa ku kwafwilisha umulimo wa mu calo conse ukufuma ku fyalo fya busambashi. Ku ca nsansa, ifilonganino na bantu balyankulako no mutima onse, mu kumfwana no mupashi wa pa Ukufuma 35:21 apatila: “Awe baishileko umuntu onse uo umutima wakwe wamwimishe kabili onse uo umutima wakwe wamulengele ukuitemenwa, na bo balete ca musangulo ca kwa Yehova, ku mulimo.” Twashukila ino nshita ukutasha bonse abasangwilako muli uku kupeela kwa bukapekape.—2 Abena Korinti 9:11.

 9. Ni shani fintu Abena Roma 10:13, 18 balefikilishiwa ilelo?

⁹ Mu 1996 impapulo sha Watch Tower Society mu cine cine shalikatamika ishina lya kwa Yehova ne mifwaile yakwe ukufika na ku mpela she sonde. Cili fye kwati ni fintu umutumwa Paulo asobele. Ukwambula ubusesemo bwa kwa Yoele na Ilumbo lyalenga 19, alembele ukuti: “Umuntu onse uwalilila kwi shina lya kwa [Yehova, NW] akapusuka. Lelo ndetila, Bushe tabaumfwile? Kwena balyumfwile: Icebo cabo cafumine caya pano nse ponse, ne fyebo fyabo fyaya ku mpela sha calo.” (Abena Roma 10:13, 18) Ukupitila mu kucindika ishina lyaumo mutengo Yehova muli yo nshila, abantu bakwe balibomba ulubali lwacindama mu kwisusha ubukata mu ŋanda yakwe iya kupepelamo. Nangu ni fyo, ni shani fintu uku kubilisha kwatungulwike mu mwaka wa 1996? Shi bebeteni charti akonkelepo pa mabula 18 ukufika ku 21.

Ukulobolola mu Calo Conse

10. Ni mbali nshi shapulamo isho mulemona mu mibombele ya bantu ba kwa Yehova, nga fintu yasupulwa muli charti pa mabula 18 ukufika ku 21?

¹⁰ Takwabako inshita amashiwi ya kwa Yesu ayasangwa pali Luka 10:2 yaba aya maka nga lelo aya kuti: “Ukulobolola kwena nakukula, lelo ababomfi nabacepa; e ico lombeni Umwine kulobolola ukuti atume ababomfi ku kulobolola kwakwe.” Bushe mulankulako kuli ubo bwite? Amamilioni ya bantu ukushinguluke sonde baleankulako. Ici cilelangililwa ku cipimo cipya ica bakasabankanya ba Bufumu 5,413,769 abatumine amalipoti ya mulimo wa mwi bala mu 1996. Ukulundapo, bamunyina bapya ne nkashi 366,579 balibatishiwe. Fintu twatemwa ifi “ifisuma fya nko shonse,” abo nomba abalebombako ‘ukwisusha ubukata mu ŋanda ya kupepelamo Yehova’!—Hagai 2:7.

11. Mulandu nshi ifwe bonse twakwatila umulandu wa kusamwa nga nshi?

¹¹ Amalipoti ya pa lwa kutanunuka mu mabala yaisulwa nomba line yali ya kupapusha nga nshi. Bushe ifwe bambi tulefinukila abo baleipakisha uku kukula? Mu kupusanako, tulesekelela capamo na bene. Intendekelo mu fyalo fyonse yali inono. Kasesema waikeleko pa nshita imo ine na Hagai, Sekaria, alembele ukuti: “Nani asuulo bushiku bwa tunono?” (Sekaria 4:10, NW) Tulasamwa nga nshi pa kuti mu fyalo umo umulimo wa kushimikila waimikwa bwino bwino, nomba muli amamilioni ya bakasabankanya ba Bufumu, kabili icifulo cilabombelwamo libili libili, nelyo fye cila mulungu mu misumba ikalamba iingi. Bushe paliba umulandu wa kutompokela ilintu Yehova nomba aletambulwila ishuko lya kupusuka mu fifulo ifyo fishakwete amashuko kale? Nakalya! “Icilime ni pano isonde,” e fyasosele Yesu. (Mateo 13:38) Tufwile ukutwalilila ukushimikisha, kwati fye fintu abasambi ba mu kubangilila bashimikishe ilyo imicitile ya fintu iya ciYuda yaleya ku nsondwelelo.—Imilimo 2:40; 10:42; 20:24; 28:23.

Ukulaya fye ku Ntanshi

12. Ca kutukunta nshi twakwata pa kuti ‘tuleya ku ntanshi’? (Moneni no mukululo uleti, “Ukulobolola ‘Ukutula ku Mpela sha Pano Sonde.’”)

¹² Ee, tufwile ukwendela pamo, ukulaselela “ukuya ku ntanshi” (NW) pamo ne celeta lya mu muulu ilya bumalaika ilya kwa Yehova. (Esekiele 1:12) Tuleibukisha amashiwi ya kwa Petro aya kuti: “Shikulu talafyalafya ku kufishe co alaile, filya bamo batungo kulafyalafya; lelo atekanya kuli imwe pa kukanafwayo muntu ukonaika, lelo onse ukulola ku kulapila.” (2 Petro 3:9) Lekeni ukupimpa kwa bamunyinefwe mu fyalo ifipiina ukwaba ca kumwenako kutukunte. Icilemoneka kwati kushimba mu kwisa kwa Armagedone kulesuminisha imyanda ya makana ya bantu ukulonganikwa muli fi fyalo pamo pene na mu fyalo ifyabombelwamo bwino bwino. Mwilufiwa: “Nabupalamo bushiku bukulu bwa kwa Yehova, nabupalama no kwangufyanisha.” (Sefania 1:14) Na ifwe tulingile ukushimikisha no kwangufyanisha mu bunte bwa kapeleko!

13, 14. (a) Cinshi cingasoswa pa lwa kwananishiwa kwa mpapulo mu 1996? (b) Mapange nshi yaibela ayo ifilonganino fingapanga cila mwaka, kabili ni shani fintu mulepanga ukubombako?

¹³ Nangu ca kuti ifishinka fya kulonsha tafilemoneka pali charti wa mibombele, kwaliba ukwingilishiwako kukalamba mu kwananya amaBaibolo, ifitabo, na bamagazini mu mwaka wapwile. Ku ca kumwenako, bamagazini bashalikwe mwi sonde lyonse balangile ukwingilishiwako kwa maperesenti 19, ubwingi bwa makope yashalikwe 543,667,923. Bamagazini besu balatwangushishako ukukondenkana mu kushimikila—mu misebo, mu maparka, pa fitesheni fya basi, mu fifulo fya makwebo. Amalipoti yalangilila ukuti ififulo fya kubombelamo fimo ifyaandatilwa ku kushimikila Ubufumu, abasoma abengi balitemwa ifyo bamagazini besu bapangwa bwino no busuma bwa fipande, kabili balesumina ukusambilila Baibolo na bo.

¹⁴ Cila mwaka mu mweshi wa April, ifilonganino ilingi line filatantika imibombele yaibela iya magazini, iiba ni kampeni wa kupoosa akasuba konse ku ŋanda ne ŋanda na mu fifulo fya cintubwingi. Bushe icilonganino cenu cikabombako uyu mulimo mu April 1997? Ulupungu lwa kwa Kalinda ulwawamisha ulwa mu April na Loleni! nafipekanishiwa, kabili uku kufuma kwa pa nshita imo ine mu calo conse mu kushininkisha kukabomba bwino nga nshi! Mu cishi ca Cyprus, ifilonganino, ukubomfya umucincisho wa kuti “ukuya ku uli onse uwingafikwako no bukombe bwa Bufumu,” fyalikonkeshapo fye no kutantika kwa mulimo wa magazini uwa musango yo cila mweshi, ukufika pa cipimo cipya ica bamagazini 275,359 abashalikwe umwaka wapwile, ukwingilishiwako kwa maperesenti 54.

Ubukombe bwa Kupelako Ubwa kwa Hagai

15. (a) Mulandu nshi Yehova atumine ubukombe bwalundwapo ukupitila muli Hagai? (b) Lisambililo nshi ubukombe bwa citatu ubwa kwa Hagai bulingile ukutusambilisha?

¹⁵ Inshiku 63 pa numa ya kupeela ubukombe bwakwe ubwa cibili, Yehova atumine Hagai no kubilisha kwa citatu, uko cingawama nga twalikumfwilile ilelo. Hagai alandile kwati abaYuda baleimika umufula we tempele, uyo na kuba bali nabemika kale kale ninshi papita ne myaka 17. Na kabili Yehova amwene ukuti calilingile ukusangulula. Bashimapepo na bantu basangwike aba mulekelesha na muli fyo bali abashasanguluka mu menso ya kwa Yehova. Bushe abantu ba kwa Yehova bamo kuti batompoka ilelo, nelyo fye ukuyobeka mu nshila sha ku calo isha mulekelesha no kutemwe fikwatwa? Cili ice pamfya ukuti ifwe bonse tubikepo imitima “ukutula pali buno bushiku, na ku ntanshi” pa kuletela ishina lya kwa Yehova ubukata, abacetekela mu bulayo bwakwe ubwa kuti: “Ukutula pali buno bushiku nakulamupaala.”—Hagai 2:10-19; AbaHebere 6:11, 12.

16. ‘Kutensha’ nshi kupalamine nga nshi, kabili cinshi cikafumamo?

¹⁶ Pali bulya bushiku bumo bwine, icebo ca kwa “Yehova wa milalo” caishile kuli Hagai umuku walenga bune kabili uwa kupelelekesha. Alondolwele icabimbilwemo mu ‘kutensho muulu ne calo’ uko Aali no kutensha, ukusosa ati: “[Ndi] no kuwishe cipuna ca mabufumu; nalaswa ŋonaule amaka ya mabufumu ya nko, no kupinuna amaceleta na batentemamo; na bakafwalo na batentemapo bakawa, umuntu no muntu ku lupanga lwa kwa munyina.” (Hagai 2:6, 21, 22) ‘Ukutensha’ kanshi kukafika pa kalume lintu Yehova akasangulule sonde umupwilapo pa Armagedone. Pali yo nshita “ifisuma fya nko shonse” fikaba nafiisa, ku kupanga icitendekelo ca sosaite wa bantunse aba calo cipya. Mwandi milandu yawama iya kusekelelapo no kulumbanishishapo Yehova!—Hagai 2:7; Ukusokolola 19:6, 7; 21:1-4.

17. Ni shani fintu Yesu aimikwa nge “nindamunwe cikomeneno”?

¹⁷ Mu kusondwelelo busesemo bwakwe, Hagai alembo kuti: “Muli ubo bushiku, cisemo ca kwa Yehova wa milalo, nkakubuula, we Serubabele . . . , no kukucita kwati ni nindamunwe cikomeneno; pantu nasala iwe, cisemo ca kwa Yehova.” (Hagai 2:23) Kristu Yesu nomba e walepashanishiwa ku Mfumu ya buMesia kabili Shimapepo Mukalamba uwa kwa Yehova, mu myulu ukupuminkanya imilimo iyo Umulashi Serubabele na Shimapepo Mukalamba Yoshua balebomba pale pale muli Yerusalemu wa pe sonde. Ukupala icikomeneno ca mu bulashi ku kuboko kwa kulyo ukwa kwa Yehova, Yesu e waba “E” apantu e cibombelo ca kwa Yehova ica kufikilishishamo “amalayo ya kwa Lesa” ayashaifulila. (2 Abena Korinti 1:20; Abena Efese 3:10, 11; Ukusokolola 19:10) Ubukombe bwa busesemo bonse ubwa muli Baibolo butonta pa kupayanya kwa kwa Yehova uko apayenye Kristu nge Mfumu kabili Kalubula wa bushimapepo.—Yohane 18:37; 1 Petro 1:18, 19.

18. Ni shani fintu ukusondwelela kwa “cisemo ca kwa Yehova” kukafikilishiwa ukufikilishiwa kwa kupembesula?

¹⁸ Cine cine muli buno bushiku bwesu, ubukata bwakulisha buli no kusangwa mwi tempele lya ku mupashi ilya kwa Yehova ilyabengeshima! Kabili nomba line fye, pa numa Yehova afumyapo imicitile ya kwa Satana yonse, Hagai 2:9 akafikilishiwa ukufikilishiwa kwawamisha ukwalundwapo: “Muno muntu nkapeelo mutende, cisemo ca kwa Yehova.” Umutende wasuka waisa!—umutende ubelelela, uwa mu kubumbwa konse, uwaebekeshiwa ku “nindamunwe cikomeneno” ca kwa Yehova, Kristu Yesu, “Cilolo wa mutende,” uyo calembwa pa lwa wene ukuti: “Ku kukula kwa bukateka bwakwe, na ku mutende, takwakabe mpela . . . Ukucincila kwa kwa Yehova wa milalo kukacite ci.” (Esaya 9:6, 7) Ku ciyayaya conse ubukata bwa ŋanda ya kupepelamo iya kwa Yehova bukalabelebeshiwa ukupulinkana ubwikashi bwa mutende ubwa bumulopwe bwakwe ubwa mu kubumbwa konse. Shi natwikalilile muli iyo ŋanda!—Ilumbo 27:4; 65:4; 84:10.

[Futunoti]

Bushe Kuti Mwalondolola?

Ni shani fintu iŋanda ya kwa Lesa ‘ileisulamo ubukata’ ilelo?

Mulandu nshi cishabelapo ice pamfya nga fintu cili nomba ukushimikila imbila nsuma?

Ca kutukunta nshi ku kushimikila mu kupamfiwa ico Lipoti wa Mulimo wa Mwaka wa 1996 alepeela?

Ni shani fintu Kristu alebomba nge “nindamunwe cikomeneno” ca kwa Yehova?

[Akabokoshi pe bula 15]

Ukulobolola “Ukutula ku Mpela sha Pano Isonde”

PALI Esaya 43:6, tubelengapo ikambisho lya kwa Yehova ilya kuti: “Witana, no kuleta abana bandi abaume ukutulo kutali, na bana bandi abanakashi ukutula ku mpela sha pano isonde.” Ili lembo lilefikilishiwa mu kuibela ilelo ku Bulaya bwa ku Kabanga. Buuleni ku ca kumwenako, icalo ico kale icali ca ciKomyunizimu ica Moldova. Kwaliba imishi umo hafu wa bantu nomba ni Nte. Balenda intamfu shalepa ku kusanga ififulo fya kushimikilako, lelo balebombesha! Bakasabankanya abengi muli fi filonganino bana ba bafyashi abaile bunkole ku Siberia mu kutendeka kwa ba 1950. Nomba indupwa shabo e basolwesolwe mu mulimo wa kulobolola. Pali bakasabankanya 12,565, ababatishiwa umwaka wapwile ni 1,917. Pa filonganino fyabako, 43 fyakwata bakasabankanya mupepi na 150 cimo na cimo, kabili imiputule yalifulilako ukufuma pali 4 ukufika kuli 8 muli uno mwaka upya uwa mulimo.

Na cimbi icawamisha, cili kutanunuka kwa mu Albania. Kulya Inte sha busumino aba kupenda fye bashipikishe ukuteka kwa lucu ukwatapata pa myaka napamo 50. Abafulilako balipaiwe. Ici citucinkulako ubulayo bwa kwa Yesu ubwa kuti: “Witiina ifyo walaswa uculeko. Moneni, Kaseebanya alaswa apoosepo bamo ba muli imwe mu cifungo, ukuti mukeshiwe . . . Ube uwa cishinka ukufika ku mfwa, na ine nkakupeele cilongwe ca mweo.” (Ukusokolola 2:10; moneni na Yohane 5:28, 29; 11:24, 25.) Cinshi twingamona nomba mu Albania? Ukufikilishiwa kwa kwebekesha mu cine cine ukwa bulayo bwa kwa Yehova ubusangwa pali Esaya 60:22 ubwa kuti: “Umunono akabe kana limo”! Mu 1990 kwali fye kasabankanya umo e watumine lipoti wa mwi bala mu Albania. Nangu cibe fyo, “ababomfi” bafulilako ukufuma ku Italy ne fyalo fimbi balyankwileko ku bwite bwa kwa Yesu ubwa kuti: “E ico kabiyeni, kalengeni . . . abasambi, [mulebabatisha].” (Mateo 28:19; Luka 10:2) Ukufika pa nshita ya Cibukisho ca mfwa ya kwa Yesu mu 1996, bakasabankanya balebomba mwi bala bali 773, kabili aba balonganike abantu 6,523 ukusangwa ku kulongana kwabo ukwa Cibukisho, ico cili miku 8 ukucila impendwa ya bakasabankanya! Amalipoti yalangilile ukuti kwali impendwa ya cipesha amano ku ncende shabela ukutali. Abasangilweko mu musumba wa Kukës bali 192 na 230 mu musumba wa Divjakë nangu ca kuti takwali bakasabankanya bekala muli fi fifulo. Mu Krujë, umwaba fye kasabankanya umo, abasangilweko bali 212. Bakasabankanya 30 aba mu Korçë basonkeele icikuulwa ku kulonganamo abasangilweko abacilile pali 300. Lintu abo bonse baingile mu ciyanda, bambi 200 baebelwe ukubwelelamo apantu incende yalipwile. Mu cine cine libala ilyabuutila ukuseepa!

Ku Romania kwafuma ili lyashi: “Ilintu twalebomba umulimo wa ku ŋanda ne ŋanda, twakumenye umuntu uwatile aali ni umo uwa Nte sha kwa Yehova kabili aleikala mwi tauni ilyo ifwe twaishibe ukuti takwaba Nte nangu umo. Atwebele ukuti kwaliba na bambi 15 abo pa myaka iingi balongana pali Cine na pa Mulungu no kuti balitendeke ukushimikila ku ŋanda ne ŋanda. Ubushiku bwakonkelepo twaimine ubulendo ukuya kuli ilyo line itauni. Mu miputule ibili mwali abaume 15 abaletupembelela, abanakashi, na bana abapokeleko ifitabo 20 na bamagazini bapya 20. Twalibalangile ifya kutungulula amasambililo ya Baibolo. Twalimbile na bo inyimbo no kwasuka ifipusho fya mu kampampa. Uwaletungulula ili bumba asokolwele ati: ‘Inshiku fye shinono ishapitapo, nalipepele kuli Yehova ukututumina umucemi, kabili nalyasukwa ipepo lyandi.’ Twali aba nsansa nga nshi, kabili ilyo twaleya, ukupala umwana wa nshiwa uyo uwasuka asanga wishi, uyu mwaume atile: ‘Twapaapaata mwikatulaba. Mukabwele mu kutupempula!’ Twalibweleleko, kabili nomba amasambililo ya Baibolo 7 yaletungululwa muli lilya itauni. Mu fifulo fya kubombelamo ifipya ifingi, umulimo utampa mu nshila yawamisha mu kuba fye ne mpapulo sha Baibolo, isho batasha nga nshi, kabili ici cilelangilila ukuti intulo ya uyu mulimo ya bulesa.”

[Charti pe bula 18-21]

LIPOTI WA MWAKA WA MULIMO UWA 1996 UWA NTE SHA KWA YEHOVA UWA MU CALO CONSE

(Moneni muli magazini)

[Ifikope pe bula 16, 17]

“Ifisuma fya nko shonse” filelonganikwa mu Fishi fya bemba (1), South Amerika (2), mu Afrika (3), ku Asia (4), ku North Amerika (5), na ku Bulaya (6)