Finshi Fikowesha Umuntu?

Ilyo Ica Kucilila ca mu 32 C.E. capaleme, Yesu ali mu Galili umo alesambilisha abantu. Lyena afwile aile ku Yerusalemu ku ca Kucilila, uko alingile ukusangwa ukulingana ne fyo Amafunde ya kwa Lesa yalandile. Lelo talefwaya abantu beshibe ukuti naya pantu abaYuda balefwaya ukumwipaya. (Yohane 7:1) Pa numa abweleele ku Galili.

Yesu afwile ali mu Kapernahumu ilyo abaFarise na bakalemba abafumine ku Yerusalemu baile kuli ena. Mulandu nshi bailiile mu kumumona? Balefwaya apa kumupeelela umulandu. Bamwipwishe abati: “Mulandu nshi abasambi bobe bashikonkela intambi sha ba kale? Pantu tabasamba ku minwe pa kulya.” (Mateo 15:2) Lesa taebelepo abantu bakwe ukulakonka ulu ulutambi lwa ‘kusamba iminwe yabo ukufika na mu nkonkoni.’ (Marko 7:3) Lelo abaFarise baleti uushilesamba ukufika mu nkonkoni ninshi nalufyanya sana.

Yesu tayaswike ici icipusho, lelo alandile pa fyo batoba Ifunde lya kwa Lesa ku mufulo. Abepwishe ati: “Mulandu nshi na imwe mushikonkela amafunde ya kwa Lesa pa mulandu wa ntambi shenu? Pantu, Lesa atile, ‘Ulecindika wiso na noko,’ kabili, ‘Uwatuka wishi nelyo nyina afwile ukufwa.’ Lelo imwe mutila, ‘Onse uwaeba wishi nelyo nyina ati: “Fyonse ifyo nakwata ifyo ningamwafwilishako, nalifipeela kale kuli Lesa,” ninshi tafwile ukucindika wishi nakalya.’”—Mateo 15:3-6; Ukufuma 20:12; 21:17.

AbaFarise baleti indalama, ifipe nelyo conse icapeelwa kuli Lesa ca mwi tempele, kanshi te kuti bafibomfye kuli fimbi. Na lyo line, aba bantu balefisunga ifi ifya bupe. Ku ca kumwenako, umwana kuti atila icipe ico akwata ni “korbani,” e kutila ubupe ubwapeelwa kuli Lesa nelyo kwi tempele, kwati nalimo ubupe bufwile ukubomfiwa fye kwi tempele. Lelo umwana alebomfya isho indalama nelyo ifipe, nangu ca kuti alekaana ukubomfya isho indalama ne fipe ku kusakamana abafyashi bakwe abakote abalekabila ubwafwilisho. E ico tabalebika amano ku kusunga abafyashi babo.—Marko 7:11.

Yesu alyumfwile sana ububi pa fyo abaFarise balenyonganya Amalembo, e calengele abebe ukuti: “Namulenga icebo ca kwa Lesa ukuba ica fye pa mulandu wa ntambi shenu. Mwe ba bumbimunda mwe, Esaya aliseseme bwino pali imwe, ilyo atile, ‘Aba bantu bancindika fye pa tunwa twabo, lelo imitima yabo yalitaluka kuli ine. Kwa fye ukupepa uko bampepa, pantu ifisambilisho basambilisha mafunde ya bantu.’” AbaFarise balifililwe ukumwasuka. E ico aitile ibumba ukuti lipalame kuli ena. Lyena atile: “Kutikeni no kwiluka ici: Ifyo umuntu alya te fimukowesha; lelo ififuma mu kanwa e fikowesha umuntu.”—Mateo 15:6-11; Esaya 29:13.

Pa numa ilyo bali mu ng’anda, abasambi baebele Yesu abati: “Bushe namwishiba ukuti abaFarise bacikalipa pa kuumfwa ifyo mwacisosa?” Yesu ayaswike ati: “Icilimwa conse ico Tata wa mu muulu ashabyele bakacinukula. Balekeni babe. Ni ntungulushi impofu. E ico impofu nga iletungulula impofu inankwe, shonse shibili shikawila mu cilindi.”—Mateo 15:12-14.

Yesu alipapile ilyo Petro amwipwishe icipusho ico na basambi bambi bakwete. Alefwaya ukwishiba bwino bwino icikowesha umuntu. Yesu ayaswike ati: “Bushe tamwishibe ukuti fyonse ifyo umuntu alya fipita mu mala fyaya na mu cimbusu? Lelo, ififuma mu kanwa fifuma mu mutima, kabili ifi e fikowesha umuntu. Pantu mu mutima e mufuma amatontonkanyo ayabipa, ukwipaya, ubucende, ubulalelale, ukwiba, ubunte bwa bufi, ne miponto. Ifi e fikowesha umuntu; lelo ukulya ukwabula ukusamba ku minwe takukowesha umuntu.”—Mateo 15:17-20.

Yesu talebalesha ukuba aba busaka, kabili talelanda ukuti umuntu tafwile ukusamba ku minwe ilyo aleipika nelyo ukulya ifya kulya. Lelo alekalipila bashimapepo abali no bumbimunda, abatemenwe ukukonka intambi sha bantu mu nshita ya kulakonka Amafunde ya kwa Lesa. Ico alelandapo ca kuti, ifyabipa ififuma mu mutima e fikowesha umuntu.