Yesu Aundapa Umukashana E Lyo No Mwaume Nkomamatwi

Pa numa ya kukalipila abaFarise abalekonka intambi sha bantu pa kuti baleisekesha fye abene, Yesu alifuminepo na basambi bakwe. Alungeme lwa ku kapinda ka ku kuso, mu citungu ca Foinike, mwi tauni lya Turi na Sidone kabili pa kuyafika balyendele amakilomita ayengi.

Yesu alisangile ing’anda ya kwikalamo, lelo talefwaya abantu beshibe uko ali. Na lyo line balishibe. Umwanakashi umuGriki uwafyalilwe muli ici cine icifulo alisangile Yesu no kumupaapaata ati: “Mbeleleni uluse, mwe Shikulu, Mwana Davidi. Umwana wandi umwanakashi naikatwa icibi ku cibanda.”—Mateo 15:22; Marko 7:26.

Ilyo papitile inshita, abasambi baebele Yesu abati: “Mwebeni aleya; pantu ekalile fye ukulabilikisha kuli ifwe.” Pa kwasuka Yesu alondolwele ico ashabikileko amano kuli ulya mwanakashi. Atile: “Nshatuminwe ku bantu bambi, kano ku mpaanga ishaluba isha mu ng’anda ya kwa Israele.” Lelo tataleele. Aile kuli Yesu no kumupaapata ati: “Mwe Shikulu, njafweni!”—Mateo 15:23-25.

E ico pa kuti amone nga ca kuti umwanakashi aali ne citetekelo, Yesu alandile pa fyo abaYuda balemona abena fyalo. Atile: “Tacawama ukubuula umukate wa bana no kupoosela utubwa.” (Mateo 15:26) Ilyo Yesu abomfeshe ishiwi lya kuti “utubwa,” alelanga fye ukuti alibikileko amano ku bena fyalo. Ifyo icinso cakwe calemoneka ne fyo ishiwi lyaleumfwika, fifwile fyalilangile ukuti alibabikileko amano.

Umwanakashi tafulilwe, lelo ali-icefeshe kabili na o wine alilandile pa mpatila yali pa baYuda na bena fyalo ilyo atile: “Ca cine ico, mwe Shikulu; lelo no tubwa twine tulalyako ubufungau ubupona kwi tebulo lya bashikulu ba tuko.” (Mateo 15:27, 28) Yesu alimwene ukuti uyu mwanakashi ali no mutima uusuma, e ico atile: “We mwanakashi, icitetekelo cobe cikalamba; nacibe ifyo fine we mwine ulefwaya.” (Mateo 15:27, 28) Ifyo alefwaya fyalicitike, kabili umwana wakwe alipolele nangu ca kuti ali ukutali! Ilyo umwanakashi abweleele ku ng’anda, asangile umwana wakwe nalaala pa busanshi, napola, “ne cibanda nacifumamo.” (Marko 7:30)

Lyena Yesu na basambi bakwe bafumine mu citungu ca Foinike no kulungama ku Mumana wa Yordani. Cimoneka kwati ba-abwike Umumana wa Yordani ku kapinda ka ku kuso aka Bemba wa Galili, e lyo baya ku citungu ca Dekapoli. Ilyo bafikile kulya, baninine ulupili, lelo abantu balibasangile. Abantu batwele kuli Yesu abantu babo abalemana, ba makunkutu, abapofula e lyo na bacibulu. Bailebabika pa makasa ya kwa Yesu, na o alibondepe. Abantu balipapile kabili balitashishe Lesa wa kwa Israele.

Yesu abikile sana amano ku mwaume umo, nkomamatwi uwalebulubusa. Elenganyeni ifyo uyu umwaume aumfwile ilyo aali pe bumba ilikalamba. Nalimo ilyo Yesu aishibe ukuti uyu umwaume alikwete sana umwenso, amusendele pa mbali. Ilyo bali fye babili, amwebele ifyo ali no kumucitila. Yesu Aingishe iminwe mu matwi ya ulya mwaume, kabili pa numa ya kufwisa amate, alimwikete pa lulimi. Lyena aloleshe ku muulu e lyo alanda ishiwi lya ciYuda ilyalola mu kuti “Komoka.” Apo pene fye amatwi yakwe yalikomweke, atendeka no kulanda bwino bwino. Yesu abebele ukuti be-ebako nangu umo icacitike, pantu alefwaya abantu balemutetekela pa mulandu wa fyo abene balemona no kuyumfwila.—Marko 7:32-36.

Abalemona uko Yesu aleposha abantu mu cipesha amano “balepapa nga nshi.” Baleti: “Nacita ifintu fyonse bwino. Alenga na bankomamatwi ukuumfwa na bacibulu ukulanda.”—Marko 7:37.