Ukupusushiwa ku “Nkulo Yapondama”

“Mwe nkulo iishitetekela kabili iya mufulo, bushe ukufika ku nshita nshi nkaba na imwe, no kushipikisha kuli imwe?”—LUKA 9:41.

 1. (a) Cinshi cintu inshita shesu isha tuyofi shilesobela? (b) Cinshi cintu Amalembo yasosa pa lwa abo bakapusuka?

TULEIKALA mu nshita sha tuyofi. Ifinkukuma, bamulamba, ifipowe, amalwele, ubupulumushi, ukuponya amabomba, inkondo shileta ukukankamana—ifi fintu na fimbipo fyalikatilila umutundu wa muntu mu mwanda wesu uwa myaka uwalenga 20. Nangu cibe fyo, akayofi kakulisha pali tonse kalesumbila ukwisa lwa mupepi fye. Kayofi nshi ako? Kali “bucushi bukalamba ubushatala abubako ukutula pa kutendeka kwa pano isonde ukufika kuli nomba, nangu takwakabeko.” (Mateo 24:21) Lelo, ubwingi ubwa ifwe kuti twaenekela inshita ya ku ntanshi iya kusekelela! Mulandu nshi? Pantu Icebo ca kwa Lesa umwine cilondolola “ibumba likalamba ilishingapendwa ku muntu nangu umo, abafuma ku luko lonse ne mikowa ne misango ya bantu na ’bantu na ’ba ndimi . . . Aba e bafuma mu Bucushi bukalamba . . . Tabakomfwe nsala kabili, tabakomfwe cilaka kabili, . . . kabili Lesa akafuute filamba fyonse ku menso yabo.”—Ukusokolola 7:1, 9, 14-17.

 2. Ifikomo fya kwiswila ifya muli Mateo 24, Marko 13, na Luka 21 fyakwete ukufikilishiwa nshi ukwa kutendekelako?

² Ubulondoloshi bwapuutwamo ubwalembwa pali Mateo 24:3-22, Marko 13:3-20, na Luka 21:7-24 buletako ukulondolola kwa mu busesemo ukwa “kusondwelela kwa micitile ya fintu.” (NW)a Ubu busesemo bwalifikilishiwe mu kutendekelako pa micitile ya fintu iya ciYuda iyabotelela iya mu mwanda wa myaka uwa kubalilapo uwa Nshita Yesu, iyaishilepwila mu “bucushi bukalamba” pa baYuda ubo bashatalile abamonapo. Icimpangilile conse ica fya mipepele na mapolitiki ica micitile ya ciYuda, icashimpilwe pe tempele lya mu Yerusalemu, calyonawilwe, ukukanabukululwa na kabili.

 3. Mulandu nshi cibelele ice pamfya ukumfwila ubusesemo bwa kwa Yesu ilelo?

³ Natulanguluke nomba imibele yashingulwike ku kufikilishiwa kwa kubalilapo ukwa busesemo bwa kwa Yesu. Ici calatwaafwa ukumfwikisha bwino ukufikilishiwa kwayampanako ilelo. Kuli no kutulanga fintu cili ice pamfya ukucitapo cimo nomba pa kupusunsuka ubucushi bwakulisha pa macushi yonse ubuletiinya umutundu wa muntu onse.—Abena Roma 10:9-13; 15:4; 1 Abena Korinti 10:11; 15:58.

“Impela”—Ni Lilali?

4, 5. (a) Mulandu nshi abaYuda baletiina Lesa aba mu mwanda wa myaka uwa kubalilapo C.E. babelele abasekelela mu busesemo bwa kwa Daniele 9:24-27? (b) Ni shani fintu ubu busesemo bwafikilishiwe?

⁴ Mupepi no mwaka wa 539 B.C.E., kasesema wa kwa Lesa Daniele apeelwe icimonwa ca fya kuponako ifyali no kucitika mu kati ka “cinelubali umo uwa myaka,” uwa kupelako uwa ciputulwa ca nshita ica “bacinelubali amakumi cinelubali aba myaka” [490]. (Daniele 9:24-27) Aba “bacinelubali” batendeke mu 455 B.C.E. lintu Imfumu Artakishashete iya Persia akambishe ukuti umusumba wa Yerusalemu ukuulwe cipya cipya. “Cinelubali umo wa myaka” uwa kupelako atendeke pa kumoneka kwa kwa Mesia, Yesu Kristu, pa kubatishiwa kwakwe no kusubwa mu 29 C.E.b AbaYuda baletiina Lesa aba mu mwanda wa myaka uwa kubalilapo C.E. baali abaibukila ulwa ici ca kucitika ica mu busesemo bwa kwa Daniele. Ku ca kumwenako, ukukuma ku mabumba ayalekonkomokela ku kumfwa ukushimikila kwa kwa Yohane Kabatisha mu 29 C.E., Luka 3:15 alondolola ukuti: “Abantu balelolela, na bonse baletontonkanya ulwa kwa Yohane mu mitima yabo, nga wene engaba e Kristu.”

⁵ “Cinelubali umo wa myaka” uwalenga 70 aali no kuba myaka cinelubali iya kusenaminwa kwaibela ukwatambulwilwe ku baYuda. Ukutendeka mu 29 C.E., yasanshishemo ulubatisho no butumikishi bwa kwa Yesu, imfwa yakwe iya bulilambo “kuli hafu wa cinelubali uyu wa myaka” mu 33 C.E., na “hafu wa cinelubali” umbi ukufika mu 36 C.E. Mu kati ka uyu “cinelubali umo wa myaka,” ishuko lya mu nshita ilya kusanguka abasambi basubwa aba kwa Yesu lyatambulwililwe mu kuibela ku baYuda baletiina Lesa ne nsangu sha ciYuda. Lyene mu 70 C.E., ubushiku ubushaishibikilwe kabela, imilalo ya ciRoma pe samba lya kwa Titus yalyonawile imicitile ya ciYuda iya busangu umupwilapo.—Daniele 9:26, 27.

 6. Ni shani fintu “ica muselu” catendeke ukubomba mu 66 C.E., kabili ni shani fintu Abena Kristu bayankwileko?

⁶ Muli fyo bushimapepo bwa ciYuda, ubo bwakoweseshe itempele lya mu Yerusalemu no kuumana kapi mu kwipaya Umwana wa kwa Lesa, bwalyonawilwe. Na kabili, ifyalembwa fya luko ne mikowa, na fyo fyalyonawilwe. Pa numa ya ico, takwali umuYuda uwingaitunga ukuba mu bupyani bwa bushimapepo nelyo ubwa cifumu. Mu nsansa, nangu ni fyo, abaYuda basubwa aba ku mupashi baali nabapaatulwa nga bushimapepo bwa cifumu “ku kuleka balondolole ifya bulumba” fya kwa Yehova Lesa. (1 Petro 2:9) Lintu umulalo wa ciRoma intanshi washingile Yerusalemu no kunyanta mu ncende ye tempele mu 66 C.E., Abena Kristu baishibe ulya mulalo wa fita pamo nga “ica muselu icipomona icasosele kasesema Daniele, naciiminina umuntu mwashila.” Mu cumfwila ku kukambisha kwa kwa Yesu ukwa mu busesemo, Abena Kristu mu Yerusalemu na mu Yudea bafulumukile ku fitungu fya mpili ku kucingililwa.—Mateo 24:15, 16; Luka 21:20, 21.

 7, 8. “Cishibilo” nshi ico Abena Kristu babakile, lelo cinshi cintu bashaishibe?

⁷ Balya Bena Kristu ba busumino aba ciYuda balimwene ukufikilishiwa kwa busesemo bwa kwa Daniele kabili baali ni bansangwapo pa nkondo shabamo akayofi, ifipowe, ifikuko, ifinkukuma, no bupulumushi ifyo Yesu aali nasobela pamo ngo lubali lwa “ciishibilo . . . ca kusondwelela kwa micitile ya fintu.” (Mateo 24:3) Lelo bushe Yesu alibebele lintu Yehova mu kulungatika aali no kuputunkanya ubupingushi pali ilya micitile yabotelela? Iyo. Cintu aseseme pa lwa kalume ka kubapo kwakwe ukwa cifumu ukwa ku nshita ya ku ntanshi mu cine cine kwalibombele na ku “bucushi bukalamba” ubwa mu mwanda wa myaka uwa kubalilapo: “Ulwa bushiku bulya na ’kashita kalya takuli uwaishiba, nangu ni bamalaika ba mu muulu, nangu Mwana, kano Tata.”—Mateo 24:36.

⁸ Ukufuma ku busesemo bwa kwa Daniele, abaYuda baali na maka ya kupende nshita no kusanga ilyo Yesu aali no kumoneka nga Mesia. (Daniele 9:25) Lelo tabapeelwe inshita iya “bucushi bukalamba” ubo mu kupelako bwaonawile imicitile ya fintu iya ciYuda iya busangu. Cali fye ni pa numa ya konaulwa kwa Yerusalemu ne tempele lya uko e lyo bailwike ukuti inshita yali ni 70 C.E. Nangu cibe fyo, baleibukisha amashiwi ya busesemo aya kwa Yesu aya kuti: “Inkulo ino tayakapite, fikasuke ifi fyonse afiisa.” (Mateo 24:34) Mu kumoneka, ukubomfiwa kwe shiwi “inkulo” pano nakupusanako na pali Lukala Milandu 1:4, apalanda ulwa nkulo shakonkana ishiisa no kuya pa ciputulwa cimo ica nshita.

“Inkulo Ino”—Ni Nkulo nshi?

 9. Ni shani fintu amadikishonari yalondolola ishiwi lya ciGreek ge·ne·aʹ?

⁹ Lintu abatumwa bane abaikele na Yesu pa Lupili lwa Miolife baumfwile ubusesemo bwakwe pa lwa “kusondwelela kwa micitile ya fintu,” ni shani baumfwile inumbwilo ya kuti “inkulo ino”? Mu malandwe ishiwi “inkulo” lyapilibulwa ukufuma kwi shiwi lya ciGreek ge·ne·aʹ, ilyo bakalemba ba madikishonari ba muno nshiku balondolola muli aya mashiwi ukuti: “[Mu kukonke shiwi] ni abo abatuntuka [ku] cikolwe cimo cine.” (Greek-English Lexicon of the New Testament iya kwa Walter Bauer) “Icintu icafyalwa, ulupwa; . . . ifilundwa fyakonkana ifya mu ntuntuko imo . . . nelyo ifya mushobo wa bantu . . . nelyo cinkupiti onse uwa bantu abali abomi pa nshita imo ine, [Mateo] 24:34; Marko 13:30; Luka 1:48; 21:32; [Abena Filipi] 2:15, no kucilisha aba mushobo wa ciYuda abaikeleko abomi pa ciputulwa cimo cine ica nshita.” (Expository Dictionary of New Testament Words iya kwa W. E. Vine) “Icintu icafyalwa, abantu bafuma ku musango umo wine, ulupwa; . . . cinkupiti onse uwa bantu abali abomi pa nshita imo ine: Mt. xxiv. 34; Mk. Marko xiii. 30; Lk. i. 48 . . . libomfiwa [maka maka] ku mushobo wa ciYuda abaikeleko abomi pa ciputulwa cimo cine ica nshita.”—Greek-English Lexicon of the New Testament iya kwa J. H. Thayer.

10. (a) Bulondoloshi nshi bwapalana buntu ukulandapo kubili kwapeela mu kulosha kuli Mateo 24:34? (b) Ni shani fintu dikishonari umo uwa fya mapepo na mabupilibulo yamo aya Baibolo yafwilisha ubu bulondoloshi?

¹⁰ Muli fyo Vine na Thayer bonse balosha kuli Mateo 24:34 mu kulondolola “inkulo ino” (he ge·ne·aʹ hauʹte) pamo nga “cinkupiti onse uwa bantu abali abomi pa nshita imo ine.” Theological Dictionary of the New Testament (1964) alafwilisha ubu bulondoloshi, ukulondololo kuti: “Ukubomfya kwa ‘inkulo’ kuli Yesu kulumbulula imifwaile yakumanina: atonta pa bantu bonse kabili alishiba ulwa kwikatana kwabo mu lubembu.” Mu cine cine “ukwikatana mu lubembu” kwamoneke mu luko lwa ciYuda lintu Yesu aali pe sonde, nga fintu fye kwishibisha imicitile ya mu calo ilelo.c

11. (a) Bulashi nshi ubulingile maka maka ukututungulula mu kupima ifya kubomfya he ge·ne·aʹ hauʹte? (b) Ni shani fintu uyo mulashi abomfeshe iyi numbwilo?

¹¹ Kwena, Abena Kristu abalesambilila uyu mulandu batungulula ukutontonkanya kwabo maka maka ku nshila bakalemba bapuutwamo aba Malandwe babomfeshemo inumbwilo ya ciGreek he ge·ne·aʹ hauʹte, nelyo “inkulo ino,” mu kucita lipoti amashiwi ya kwa Yesu. Iyi numbwilo yalibomfiwe mu kukanaalukako mu nshila ya kusuusha. Muli fyo, Yesu aitile intungulushi sha mapepo isha ciYuda “Mwe nsoka! mwe bufyashi bwa mafwafwa” no kutwalililo kuti ubupingushi bwa Gehena bwali no kuputunkanishiwa pa “nkulo ino.” (Mateo 23:33, 36) Nangu cibe fyo, bushe ubu bupingushi bwapeleshiwe fye kuli bashimapepo ba bumbimunda? Nakalya. Pa tushita utwingi, abasambi ba kwa Yesu bamumfwile alelanda ulwa “nkulo ino,” ukubomfya inumbwilo mu nshila fye imo ine mu mano yasaalala. Yali ni numbwilo nshi iyo?

“Inkulo iyi Iyabipa”

12. Ilyo abasambi bakwe balekutika, ni shani fintu Yesu asuntinkenye “amabumba” na “inkulo iyi”?

¹² Mu 31 C.E., mu kati ka butumikishi bukalamba ubwa kwa Yesu ubwa mu Galili kabili mu kwipipa fye pa numa ya Ca Kucilila, abasambi bakwe bamumfwile alesosa ku “mabumba” ati: “Lelo ndeipashanya ku nshi inkulo iyi? Yapala abaice abekele mwi sokoni, no kubilikisha ababiye, abati, Natumulishishe fimpeta, na imwe tamucindile; natupumapo imisowa, na imwe tamulooseshe. Pantu Yohane [Kabatisha] aishile talelya kabili talenwa, na ’bantu batila, Ali ne ciwa; Umwana wa muntu [Yesu] aisa alelya kabili alenwa, na ’bantu batila, Mona, muntu mufunushi kabili munwi, umunabo wa bakasangula na ’babembu!” Takwali kusekesha yalya “mabumba” yabule fishinte!—Mateo 11:7, 16-19.

13. Ninshi na basambi bakwe e po bali, ni bani bantu Yesu aishibishe no kusenuka nga “inkulo iyi yabipa”?

¹³ Pa numa mu 31 C.E., ilyo Yesu na basambi bakwe baimine ulwendo lwabo ulwa kushimikila ulwa cibili ulwa ku Galili, “bamo ba muli bakalemba na ’baFarise” balombele Yesu ukuti aciteko icishibilo. Aebele bene na “mabumba” abalipo ukuti: “Inkulo ibifi kabili iya bucende ilefwaye ciishibilo; kabili iciishibilo tacakapeelwe kuli yene, kano iciishibilo ca kwa Yona kasesema; pantu ifyo Yona ali mu nda ya cisabi inshiku shitatu akasuba no bushiku, e fyo no Mwana wa muntu akaba mu nda ya calo inshiku shitatu akasuba no bushiku. . . . Ifyo fine e fyo cikaba na ku ba nkulo iyi yabipa.” (Mateo 12:38-46) Ukwabulo kutwishika, “inkulo iyi yabipa” yasanshishemo intungulushi sha mapepo na “mabumba” abo bashatesekeshe icishibilo icafikilishiwe mu mfwa ya kwa Yesu no kubuushiwa.d

14. Abasambi ba kwa Yesu bamumfwile alesenuka abaSaduke na baFarise mu nshila nshi?

¹⁴ Pa numa ya Ca Kucilila ica mu 32 C.E., ilyo Yesu na basambi bakwe baingile mu citungu ca bena Galili ica Magadani, abaSaduke na baFarise na kabili balombele Yesu icishibilo. Alibwekeshepo kubeba ukuti: “Inkulo ibifi kabili iya bucende ifwaye ciishibilo, kabili iciishibilo tacakapeelwe kuli yene, kano iciishibilo ca kwa Yona. E lyo abashile, afuminepo.” (Mateo 16:1-4) Balya ba bumbimunda ba fya mapepo baali abacishamo abatungwa kabi pantu baali e ntungulushi pa kati ka “mabumba” yabulwo busumino abo Yesu asenwike nga “inkulo iyi yabipa.”

15. Pa ntanshi fye kabili lyene na pa numa ya kwaluka, ca kucitika nshi Yesu na basambi bakwete ne ‘nkulo iyi’?

¹⁵ Ukulola ku mpela ya butumikishi bwakwe ubwa mu Galili, Yesu aitile bumba na basambi kuli wene kabili atile: “Uyo onse uukabela ine ne fyebo fyandi insoni mu nkulo ino ya bucende ne ya lubembu, Umwana wa muntu na o akamubele nsoni.” (Marko 8:34, 38) E ico amabumba ya baYuda babulo kulapila aba ilya nshita ukwabulo kutwishika e bapangile “inkulo ibifi kabili iya bucende.” Pa kupitapo inshiku shimo, pa numa ya kwaluka kwa kwa Yesu, Yesu na basambi bakwe “bafikile kwi bumba,” kabili umwaume amulombele ukuti amundapileko mwana wakwe umwaume. Yesu alandilepo ati: “Mwe nkulo iishitetekela kabili iya mufulo, bushe ukufika ku nshita nshi nkaba na imwe, no kushipikisha kuli imwe?”—Mateo 17:14-17; Luka 9:37-41.

16. (a) Kusenuka nshi “amabumba” uko Yesu abwekeshepo mu Yudea? (b) Ni shani fintu “inkulo iyi” yaishilecita umusoka uwabipisha pa misoka yonse?

¹⁶ Mu kumonekesha cali ni mu Yudea, pa numa ya Mutebeto wa Nsakwe mu 32 C.E., “ilyo amabumba yalelonganapo,” ukushinga Yesu, e lintu abwekeshepo ukusenuka kwakwe pali bene, ukusoso kuti: “Inkulo iyi ni nkulo mbifi: ilefwaye ciishibilo, ne ciishibilo tayakapeelwe kano iciishibilo ca kwa Yona.” (Luka 11:29) Mu kupelako, lintu intungulushi sha mapepo shaletele Yesu ku kumulubulwisha, Pilato amwebele fyo aali uwaitemenwa ukumukakula. Icalembwa citila: “Bashimapepo bakalamba na ’bakalamba banashishe amabumba ukuti balombe Baraba, no konaula Yesu. . . . Pilato atile kuli bene, Nga kanshi ndecita shani Yesu uwitwa Kristu? Bonse batile, [Napoopelwe, NW]. Awe umulashi atile, Nga cinshi, cibi nshi acitile? Lelo bene balabilikisho kucila, abati, Napoopelwe.” Ilya “nkulo mbifi” yalepinda ukuti Yesu aputunkanishiwe!—Mateo 27:20-25.

17. Ni shani fintu bamo aba mu “nkulo iyi iyapondama” bayankwile ku kushimikila kwa kwa Petro pa Pentekoste?

¹⁷ “Inkulo iishitetekela kabili iya mufulo,” ukucincishiwa ne ntungulushi shabo isha mipepele, muli fyo e babombeshe mu kuletako imfwa ya kwa Shikulu Yesu Kristu. Inshiku 50 pa numa, pa Pentekoste mu 33 C.E., abasambi bapokelele umupashi wa mushilo no kutendeka ukulandila mu ndimi shalekanalekana. Pa kumfwa iciunda, “icinabwingi caishilelongana,” kabili umutumwa Petro abetile nga “bena Yudea, na mwe bonse mwe baikala mu Yerusalemu,” ukusoso kuti: “uyo [Yesu], . . . [mwapoopele pa cimuti, NW] mu minwe ya bapulumushi no kumwipaya.” Ni shani fintu bamo muli abo bakakutika bayankwileko? “[Calibapitile] ku mitima.” Petro lyene abapaapaatile ukuti balapile. “Ashimikishepo ne fyebo fimbi ifingi, no kubapaapaata, ati, Muituule ku nkulo iyi iyapondama.” Mu kwankulako, mupepi na 3,000 “bapokelele icebo cakwe [kabili] balibatishiwe.”—Imilimo 2:6, 14, 23, 37, 40, 41.

“Inkulo Ino” Yaishibikwa

18. Ukubomfya kwa kwa Yesu ukwe shiwi “inkulo ino” lyonse kulosha kuli cinshi?

¹⁸ Cinshi, lyene, icaba e “nkulo” iyo libili libili yaleloshiwako na Yesu lintu aaleba na basambi bakwe? Cinshi cintu baleumfwa ku mashiwi yakwe aya kuti: “Inkulo ino tayakapite, fikasuke ifi fyonse afiisa”? Mu kushininkisha, Yesu talepaasuka ku kubomfya kwakwe ukwaimikwa ukwa numbwilo “inkulo ino,” iyo mu kukanaalukako abomfeshe ku mabumba yaikeleko pali ilya nshita ne “ntungulushi mpofu” bakwete abo capamo bapangile uluko lwa ciYuda. (Mateo 15:14) “Inkulo ino” yakumenye ukumanama konse ukwasobelwe na Yesu kabili yalyonawilwe mu “bucushi bukalamba” ubushingalinganishiwako ubwaishile pali Yerusalemu.—Mateo 24:21, 34.

19. Ni lilali lintu “umuulu na pano isonde” ifya micitile ya ciYuda fyapitile kabili fyapitile shani?

¹⁹ Mu mwanda wa myaka uwa kubalilapo, Yehova alepingula abaYuda. Bamo abalapile, abaishilebelesha icitetekelo mu kupayanya kwa nkumbu ukwa kwa Yehova ukupitila muli Kristu, balipusushiwe ukufuma muli bulya “bucushi bukalamba.” Kwati fye fintu Yesu asobele, fyonse ifyasesemwe fyalicitike, kabili lyene “umuulu na pano isonde” ifya micitile ya fintu iya ciYuda—uluko lonse, ne ntungulushi sha luko isha mipepele no bwikashi bubifi ubwa bantu—fyalipitile. Yehova ali naputunkanya ubupingushi!—Mateo 24:35; linganyako 2 Petro 3:7.

20. Kukonkomesha nshi ukwalingana ne nshita ukubomba ne pamfya ku Bena Kristu bonse?

²⁰ Balya baYuda abakutikishe ku mashiwi ya busesemo aya kwa Yesu balilwike ukuti ipusukilo lyabo lyashintilile, te pa kwesha ukupenda ifyo “inkulo” yalepa nelyo “inshita nangu myaka” ifyashininkishiwa, lelo ipusukilo lyashintilile pa kuisunga abapaatukako ku nkulo ibifi iyo baikelemo na mu kupimpa ukulacito kufwaya kwa kwa Lesa. Nangu line amashiwi ya kupelako aya busesemo bwa kwa Yesu yabomba ku kufikilishiwa kukalamba ukwa mu kasuba kesu, Abena Kristu ba ciYuda aba mu mwanda wa myaka uwa kubalilapo na bo bene baali no kumfwila ukukonkomesha ukwa kuti: “Lelo loleni mu nshita yonse, mube abapaapaata ukuti mukose ku kupusuka kuli ifi fyonse ifikesapona, no kwiminina ku menso ya Mwana wa muntu.”—Luka 21:32-36; Imilimo 1:6-8.

21. Ca kuponako nshi ica kupumikisha ico pambi twingenekela mu nshita ya ku ntanshi iipalamishe?

²¹ Ilelo, “ubushiku bukulu bwa kwa Yehova, nabupalama no kwangufyanisha.” (Sefania 1:14-18; Esaya 13:9, 13) Mu kupumikisha, pa “bushiku na ’kashita” ifyo Yehova umwine aimikila libela, icifukushi cakwe cikalekelwako pa fibombelo fya mu calo ifya mipepele, amapolitiki, ne fya makwebo, capamo na pa bantu bapumbuka abapanga ino “nkulo ibifi kabili iya bucende.” (Mateo 12:39; 24:36; Ukusokolola 7:1-3, 9, 14) Ni shani fintu wingapusushiwa ukufuma mu “bucushi bukalamba”? Icipande cesu icikonkelepo cili no kwasuka no kutweba ulwe subilo lya lulumbi ilya ku nshita ya ku ntanshi.

[Amafutunoti]

Ni Shani Wingaasuka?

◻ Cinshi cintu tusambilila ukufuma ku kufikilishiwa kwa kwa Daniele 9:24-27?

◻ Ni shani fintu amadikishonari ya nomba line yalondolola “inkulo ino” nga fintu ishiwi lyabomfiwa muli Baibolo?

◻ Ni shani fintu Yesu lyonse abomfeshe ishiwi “inkulo”?

◻ Ni shani fintu Mateo 24:34, 35 afikilishiwe mu mwanda wa myaka uwa kubalilapo?

[Icikope pe bula 12]

Yesu alingenye “inkulo iyi” ku mabumba ya bana ba bumankonso

[Icikope pe bula 15]

Ni Yehova fye e waishibe mu kubangilila akashita ka kuputunkanya ubupingushi pa micitile ibifi iya ciYuda