Afusha Imikate Kabili Asoka Abasambi Pa Citutumushi

Abantu abengi baliile kuli Yesu ilyo ali mu citungu ca Dekapoli, ku kabanga ka Bemba wa Galili. Baile mu kumfwa ifyo alesambilisha e lyo na ku kundapwa. Balisendele ne miseke iikalamba iya fya kulya.

Lelo ilyo papitile inshita, Yesu aebele abasambi bakwe ati: “Naumfwila ibumba uluse, pantu nomba inshiku shaba shitatu isho baikala na ine kabili tabakwete ifya kulya; kabili nga nabaleka baye ku mwabo ne nsala, kuti bafwa ulushile mu nshila. Na kuba, bamo bafumine ukutali.” Abasambi bakwe bamwipwishe abati: “Ni kwi umuntu pano pa mpanga engafumya imikate ya kuti aba bantu balye bekute?”—Marko 8:2-4.

Yesu e pa kubepusha ukuti: “Muli ne mikate inga?” Abasambi batile “7, no tusabi utunono fye.” (Mateo 15:34) Lyena Yesu aebele abantu ukwikala pa nshi. Abuulile imikate no tusabi, kabili apepele kuli Lesa e lyo apeela abasambi bakwe pa kuti baakanye abantu. Icapapwishe abantu ca kuti, bonse baliliile no kwikuta baikuta kabili ilyo balonganike ifyasheleko, fyaiswile imiseke 7 nangu ca kuti abaliileko bali abaume nalimo 4,000 ukufumyako abanakashi na bana!

Ilyo Yesu aebele abantu ukubwelelamo ku mwabo, ena na basambi bakwe baninine mu bwato no kwabukila ku Magadani, ku masamba ya Bemba wa Galili. Ilyo ali kulya, abaFarise abaile na kalibumba kamo aka baSaduke kuli Yesu batendeke ukumwesha, bamulombele ukuti abalange icishibilo ukufuma mu muulu.

Apo Yesu alishibe ico balefwaila abalange icishibilo, abaswike ati: “Ilyo caba icungulo mutila, ‘Bukaca bwino mailo, pantu umuulu naukashika ce,’ kabili ulucelo mutila, ‘Lelo kuleba impepo ne mfula pantu umuulu naukashika ce, kabili kuli icikutuma.’ Mwalishiba ukwiluka imimonekele ya muulu, lelo tamwiluka ifishibilo fya nshita.” (Mateo 16:2, 3) Lyena Yesu aebele abaFarise na baSaduke ukuti tabakapeelwe icishibilo cimbi, kano fye ica kwa Yona.

Yesu na basambi bakwe baingile mu bwato no kuya kwi tauni lya Betsaida ilyabelele lwa ku kapinda ka ku kuso aka lulamba lwa bemba. Ilyo baleya, abasambi basangile ukuti tabaasendele imikate iingi. Bakwete fye umukate umo. Lelo Yesu ena aletontonkanya pa fyo abaFarise na baSaduke abaletungilila Herode bacitile. E ico asokele abasambi ati: “Loleni, cenjeleni ku citutumushi ca baFarise ne citutumushi ca kwa Herode.” Abasambi bena bamwene kwati alelanda pa mikate iyo balabile ukusenda. Apo Yesu alishibe ukuti tabaishibe ico alelandapo, atile: “Mulandu nshi mulekansanina pa mulandu wa kuti tamukwete imikate?”—Marko 8:15-17.

Yesu e lyo afumine fye mu kupeela abantu abengi sana imikate. E ico abasambi bakwe balingile ukwishiba ukuti talelanda pa mikate fye. Abepwishe ati: “Bushe tamuleibukisha? Miseke inga mwaiswishe ku fyasheleko ilyo namokawile imikate isano no kuliisha abaume 5,000?” Na bo bamwaswike abati: “Yali 12.” Yesu akonkenyepo ukubeba ati: “Ilyo namokawile imikate 7 no kuliisha abaume 4,000, bushe miseke inga iyaiswilemo ifyasheleko?” Na bo bayaswike abati: “Cinelubali.”—Marko 8:18-20.

Yesu abepwishe ati: “Nga cinshi tamwilukile ukuti nshacilamweba pa mikate?” Lyena alandile no kuti: “Cenjeleni ku citutumushi ca baFarise na baSaduke.”—Mateo 16:11.

Abasambi basukile baumfwa umo aloseshe. Icitutumushi bacibomfya ku kulenga ifya kunwa ukubila nelyo umufuba wa kupangila umukate ukwima. Kanshi ilyo Yesu alandile pa citutumushi alelanda pa fisambilisho fya bufi. Alesoka abasambi bakwe ukukanakonkelela ‘ifyo abaFarise na baSaduke balesambilisha’ ifyalelenga abantu ukukanaishiba Lesa.—Mateo 16:12.