Mwe Bacaice Bushe Namuipekanya Ukubatishiwa?

1, 2. (a) Cinshi cimo icilenga abantu ba kwa Lesa muno nshiku ukuba ne nsansa? (b) Bushe abafyashi Abena Kristu na baeluda kuti bayafwa shani abacaice ukwishiba umwalola ulubatisho?

ELUDA aebele Christopher uwa myaka 12 ati, “Nalikwishiba ukutula apo wafyalilwa, kabili nintemwa ifi ulefwaya ukubatishiwa. Nomba ndefwaya nkwipusheko, ‘Mulandu nshi uo ulefwaila ukubatishiwilwa?’” Ici cipusho amwipwishe calicindeme sana. Cila mwaka tulatemwa nga twamona abacaice abengi nga nshi balebatishiwa. (Lukala Milandu 12:1) Ico abafyashi Abena Kristu na baeluda mu cilonganino bafwaya, kwafwa abacaice ukuipingwila abene ukubatishiwa no kwishiba umo ulubatisho lwalola.

² Tusambilila mu Baibolo ukuti ukuipeela e lyo no kubatishiwa e ntendekelo ya kuba Umwina Kristu. Nga twasalapo ukuba Umwina Kristu Yehova alatupaala nga nshi, lelo Satana ena tafwaya ukuti tulebombela Yehova, alatukaanya. (Amapinda 10:22; 1 Petro 5:8) E mulandu wine abafyashi Abena Kristu balingile ukusambilishisha abana babo ifyo cipilibula ukuba umusambi wa kwa Kristu. Nga ca kuti abafyashi ba mwana uulefwaya ukubatishiwa te ba Nte, baeluda mu cilonganino e bafwile ukumwafwa ukwishiba umo ukuipeela e lyo no kubatishiwa kwalola. (Belengeni Luka 14:27-30.) Nga filya fine umuntu alingile ukuipekanya ilyo ashilatendeka ukukuula ing’anda, abacaice nabo balingile ukuipekanya ilyo bashilabatishiwa pa kuti bakalebombela Yehova ne cishinka ukufika na “ku mpela.” (Mateo 24:13) Cinshi cingafwa abacaice ukulafwaisha ukubombela Yehova? Natumone.

 3. (a) Bushe amashiwi ayo Yesu na Petro balandile yatusambilisha cinshi pa fyo ulubatisho lwacindama? (Mateo 28:19, 20; 1 Petro 3:21) (b) Mepusho nshi twalalandapo, kabili mulandu nshi?

³ Bushe uli wacaice uulefwaya ukubatishiwa? Nga ulefwaya ukubatishiwa ninshi walipanga ukucita icintu icisuma! Lishuko nga nshi ukubatishiwa no kuba Inte ya kwa Yehova. Ifyo fine e fyo Umwina Kristu alingile ukucita, kabili ukubatishiwa kwalicindama pantu kuti kwalenga twaisapusuka mu nshita ya bucushi bukalamba. (Mateo 28:19, 20; 1 Petro 3:21) Nga wabatishiwa, ninshi walaya ukuti wakulabombela Yehova kabili ufwile ukufikilisha ifyo walaya. Kanshi amepusho yakonkapo kuti yakwafwa ukumona nga naufikapo ukubatishiwa. Ulingile ukuyipusha auti: (1) Bushe ndi mukalamba mu fya kwa Lesa uwa kuti mbatishiwe? (2) Bushe nine ne mwine mpingwilepo ukubatishiwa? (3) Bushe nalishiba umo ukuipeela kuli Yehova kwalola? Natulande pali aya amepusho.

4, 5. (a) Mulandu nshi na baice bene bengabatishiwilwa? (b) Bushe ukuba umukalamba mu fya kwa Lesa e kuti shani?

⁴ Baibolo tayalanda ukuti abafwile ukubatishiwa bakalamba fye nelyo ukuti kwaliba umushinku wa kubatishilwapo. Pa Amapinda 20:11 paba amashiwi ya kuti: “Umulumendo eshibikilwa ku micitile yakwe nga ca kuti imilimo yakwe isuma kabili yalilungama.” Kanshi nangu mwaice kuti aishiba ifyo cipilibula ukucita icalungama no mwalola ukuipeela kuli Kabumba wakwe. Kanshi umwaice uulelanga ukuti mukalamba mu fya kwa Lesa kabili aliipeela na kuli Yehova kuti abatishiwa.—Amapinda 20:7.

⁵ Bushe ukuba umukalamba mu fya kwa Lesa e kuti shani? Baibolo yalanda ukuti ukupitila mu kubelesha, abakalamba mu fya kwa Lesa “balikwata amano aya kulekanya” icalungama ne calubana. (AbaHebere 5:14) Umukalamba mu fya kwa Lesa aleshiba icalungama kabili alapanga mu mutima wakwe ukucita icalungama. E co te kuti abelelekwe bwangu ukucita icalubana, kabili takabila uwa kumucinkulako lyonse ukuti alecita icalungama. Kanshi uwacaice uwabatishiwa kuti acita icalungama na lintu abafyashi bakwe nelyo abakalamba bambi bashili nankwe.—Linganyeniko Abena Filipi 2:12.

6, 7. (a) Londololeni amafya ayo Daniele akwete ilyo ali mu Babiloni. (b) Bushe Daniele alangile shani ukuti ali mukalamba mu fya kwa Lesa?

⁶ Bushe kwena uwacaice kuti aba umukalamba mu fya kwa Lesa? Natulande pali Daniele. Ilyo bamufumishe pa bafyashi no ku mutwala ku Babiloni, nalimo ali fye umusepela. Ku Babiloni atendeke ukwikala na bantu abashalekonka amafunde ya kwa Lesa. Bushe imikalile yakwe yali shani mu Babiloni? Abantu balimucindike sana, ali pa bacaice abanono abo basalile ukulabombela imfumu. (Daniele 1:3-5, 13) Nalimo icifulo icikalamba ico Daniele akwete mu Babiloni nga tacikwete aba mu Israele.

⁷ Bushe Daniele aleumfwa shani pa cifulo icikalamba ico bamupeele? Bushe ifyo abena Babiloni balecita fyalilengele aluke, nelyo bushe fyalilengele icitetekelo cakwe ukunaka? Nakalya! Baibolo yalanda ukuti ilyo Daniele ali mu Babiloni, “apangile mu mutima wakwe ukukanaikowesha” kuli fyonse ifyayampene no kupepa kwa bufi. (Daniele 1:8) Ifyo acitile filanga ukuti ali mukalamba mu fya kwa Lesa!

 8. Finshi mwingasambilila kuli Daniele?

⁸ Finshi mwingasambilila kuli Daniele? Uwacaice lelo umukalamba mu fya kwa Lesa alekalilila mu fyo asuminamo nangu ifintu fyafye shani. Taba nga fulunyemba, uwalula amalangi yakwe ukulingana napo ali. Taba cibusa wa kwa Lesa pa Ng’anda ya Bufumu e lyo nga aya ku sukulu aba cibusa wa calo. Lelo alaba uwa cishinka na lintu aleeshiwa.—Belengeni Abena Efese 4:14, 15.

9, 10. (a) Finshi uwacaice engeshiba nga atontonkanya pa fyo acitile ilyo aeshiwe? (b) Bushe ulubatisho lwalola mwi?

⁹ Kwena bonse fye tatwapwililika. Nampo nga tuli baice nelyo nga tuli bakalamba, bonse fye tulalufyanya. (Lukala Milandu 7:20) Nga ulefwaya ukubatishiwa, ufwile ukuiceceeta no kumona nga ulakonka amafunde ya kwa Yehova. Yipushe auti, ‘Bushe ndakonka amafunde ya kwa Yehova lyonse?’ Tontonkanya pa fyo wacitile ilyo waeshiwe. Bushe walishibe icalungama ico walingile ukucita? Bushe kwaliba uwakukoseleshepo ukuti ulebomfya ifyo wacenjelamo mu calo ca kwa Satana nga filya cali kuli Daniele? Ifya musango uyu nga fileesha icitetekelo cobe, bushe uleluka icaba ukufwaya kwa kwa Yehova?—Abena Efese 5:17.

¹⁰ Mulandu nshi cicindamine ukwishiba amasuko kuli aya mepusho? Pantu kuti yalenga waishiba ukutila ulubatisho lwalicindama nga nshi. Nga wabatishiwa ninshi walanga abantu ukutila walilaya Yehova ukuti ukatwalilila ukumutemwa no ku mubombela no mweo obe onse. (Marko 12:30) Onse uwabatishiwa afwile ukufikilisha ifyo alaya Yehova.—Belengeni Lukala Milandu 5:4, 5.

11, 12. (a) Finshi umuntu uulefwaya ukubatishiwa afwile ukucita? (b) Finshi ifingalenga umuntu alamona ulubatisho nge fyo Yehova alumona?

¹¹ Baibolo yalanda ukuti abantu ba kwa Yehova bonse ukubikako fye na baice bakalamubombela “mu kuitemenwa.” (Amalumbo 110:3) Kanshi umuntu uulefwaya ukubatishiwa e ulingile ukuipingwila umwine. E ico alingile kuibebeeta bwino pa kuti eshibe ico alefwaila ukubatishiwilwa, maka maka nga ca kuti akulila mu ng’anda ya bafyashi ba Nte.

¹² Ukufika pa mushinku mulipo, mufwile mwalimona abantu abengi ababatishiwa, bamo pali abo nalimo fibusa fyenu nelyo abo mwafyalwa nabo. Lelo tamufwile ukulafwaya ukubatishiwa pa mulandu wa kuti mulemona kwati na mukula, nelyo pa mulandu wa kuti abanenu balebatishiwa. Kuti mwacita shani pa kuti mulemona ulubatisho nge fyo Yehova alumona? Mufwile ukutontonkanya pa fyo ulubatisho lwacindamina. Muli cino cipande na mu cikonkelepo mwalasambilila pa fyo ukubatishiwa kwacindama.

13. Kuti waishiba shani ukuti uipingwililepo fye we mwine ukubatishiwa?

¹³ Kwaliba ifingi ifyo wingeshibilako ukuti cine cine ulefwaisha ukubatishiwa. Cimo ico wingeshibilako kubebeeta amapepo yobe. Bushe ulapepa lyonse kuli Yehova? Bushe ulapepa mu kulungatika? Amasuko kuli aya amepusho kuti yakwafwa ukwishiba nga ca kuti Yehova ni cibusa obe uwa cine cine nelyo iyo. (Amalumbo 25:4) Ilingi line Yehova asuka amapepo yesu ukupitila muli Baibolo. Na cimbi icingakwafwa ukwishiba nga ca kuti ulefwaya ukupalama kuli Yehova no kulamubombela no mutima obe onse, kubebeeta ifyo uisambilisha. (Yoshua 1:8) Yipushe auti: ‘Bushe ndaisambilisha Baibolo lyonse? Bushe ndaitemenwa ukuba pa mapepo ya lupwa no kulandapo?’ Amasuko kuli aya amepusho kuti yakwafwa ukwishiba nga ca kuti uipingwilile fye we mwine ukubatishiwa nelyo iyo.

14. Londololeni ubupusano bwaba pa kuipeela e lyo no kubatishiwa.

¹⁴ Abacaice bamo tabaishiba ubupusano bwaba pa kuipeela e lyo no kubatishiwa. Bamo nalimo kuti batila kale baipeela kuli Yehova lelo tabalaipekanya ukubatishiwa. Bushe ici kuti cacitika? Ukuipeela, kupepa kuli Yehova ukumulaya ukuti wakulamubombela ubumi bobe bonse. Nga wabatishiwa, ninshi walanga abantu ukuti waliipeela kale kuli Yehova. Kanshi ilyo ushilabatishiwa, ufwile ukwishiba umo ukuipeela kuli Lesa kwalola.

15. Bushe ukuipeela kwalola mwi?

¹⁵ Nga waipeela kuli Yehova ninshi waba umuntu wakwe. Ninshi wamulaya ukuti icacindama sana mu bumi bobe kulamubombela. (Belengeni Mateo 16:24.) Nga walaya Lesa ufwile ukufikilisha! (Mateo 5:33) Kuti walanga shani ukuti walishiba ukuti uli wa kwa Yehova kabili tauikalila we mwine?—Abena Roma 14:8.

16, 17. (a) Langilileni umo ukuikaana kwalola. (b) Bushe umuntu nga aipeela ninshi cinshi alaya Yehova?

¹⁶ Natulangilile. Elenganyeni ukuti cibusa wenu amushitila motoka. Amupeela na mapepala yonse aya motoka e lyo amweba ukuti: “Na kupeela iyi motoka, lelo amaki yena nakulasunga e lyo no kwensha nine na kulaensha, te iwe iyo.” Bushe kuti mwaumfwa shani pali ubu bupe? Inga umunenu uwamupeele motoka kuti mwamumona shani?

¹⁷ Umuntu nga aipeela kuli Yehova, ninshi amweba ukuti: “Ni mwe napeela ubumi bwandi. Nakulacita ukufwaya kwenu.” Yehova enekela umuntu uwaipeela kuli ena ukufikilisha ifyo alaya. Nomba bushe kuti twatila umuntu alecita ukufwaya kwa kwa Yehova nga ca kuti atendeka ukwishishanya no muntu uushibombela Lesa? Nelyo nga ca kuti aingila incito iilemusendela sana inshita ica kuti alafilwa no kulashimikila abantu imbila nsuma nelyo ukulasangwa lyonse ku kulongana? Uyu muntu ninshi talefikilisha ifyo alaya Yehova. Kuti caba kwati kusunga amaki ya motoka. Nga twaipeela kuli Yehova, ninshi twamweba ukuti, “Ni mwe napeela ubumi bwandi.” Kanshi tulingile ukulacita fyonse ifyo Yehova alefwaya nangu ca kuti limo ifyo engatweba ukucita te kuti tufitemwe. Natulepashanya Yesu uwatile: “Ico nafumina ku muulu te ku kucita ukufwaya kwandi, lelo ni ku kucita ukufwaya kwa wantumine.”—Yohane 6:38.

18, 19. (a) Bushe ifyo Rose na ba Christopher balandile filanga shani ukuti ukubatishiwa lishuko ililenga twapaalwa? (b) Bushe mufwile ukulamona shani ulubatisho?

¹⁸ Nga fintu twasambilila, ulubatisho te cintu ca kusenda buyefya buyefya. Lishuko nga nshi ukuipeela kuli Yehova no kubatishiwa. Abacaice abatemwa Yehova kabili abaishiba umo ukuipeela kwalola tabashingashinga ukuipeela kuli Lesa e lyo no kubatishiwa. Tabatontonkanya ukuti balilufyenye pa kupingulapo ukubatishiwa. Rose umusepela uwabatishiwa atile: “Nalitemwa Yehova, kabili tapali icingalenga naba ne nsansa ukucila pa kumubombela. Nalishininkisha ukuti nalicitile fye bwino ukupingulapo ukubatishiwa.”

¹⁹ Inga ba Christopher abo tulandilepo pa ntendekelo ya cino cipande, bomfwa shani filya babatishiwe ninshi bali ne myaka 12? Balandile ukuti baliba sana ne nsansa filya bapingwilepo ukubatishiwa. Batendeke bupainiya ninshi bali ne myaka 17, kabili ilyo bali ne myaka 18 balibasontele ukuba umubomfi atumikila, kabili ino nshita babombela pa Bethel. Ba Christopher batile: “Nalicitile bwino pa kusalapo ukubatishiwa. Naliba sana ne nsansa pa kulabombela Yehova ne cilonganino cakwe.” Mwe bacaice, finshi mufwile ukucita pa kuti mukabatishiwe? Tukasuka ici cipusho mu cipande icikonkelepo.