“Kabiyeni, Kalengeni aba Nko Shonse Ukuba Abasambi”

1, 2. Bushe ifyo Yesu alandile ifyalembwa pali Mateo 24:14 kuti fyalenga twayipusha amepusho nshi?

YESU asobele ukuti mu nshiku sha kulekelesha, imbila nsuma ya Bufumu ikabilwa ku bantu bonse. (Mateo 24:14) Icalenga ukuti fwe Nte sha kwa Yehova twishibikwe mwi sonde lyonse ni co tulabila imbila nsuma. Abantu bamo balitemwa imbila iyo tubila, lelo bambi tabaitemwa. Nangu ca kuti bamo tabaitemwa, balitucindika pa mulimo tubomba. Kwena tutila ni fwe tubomba umulimo uo Yesu asobeele, lelo bushe ca cine ni fwe fye tuubomba? Bushe kuti twaishiba shani ukuti umulimo wa kubila uo tubomba e mulimo Yesu asobeele?

² Aba mu macalici ayengi batila balabila imbila ya kwa Yesu. Lelo bashimikila fye mu macalici, pa TV, pa Intaneti nelyo ukweba fye abantu ifyo cali pa kuti basambilile pali Yesu. Bamo bamona kwati nga baleyafwa abapiina nelyo nga balebomba umulimo wa kwafwa abantu pamo nga budokota, bunasi nelyo bukafundisha ninshi baleshimikila abantu imbila nsuma. Lelo bushe kuti twatila iyi milimo yonse e mulimo wa kubila imbila nsuma uo Yesu alandilepo?

 3. Ukulingana na Mateo 28:19, fintu nshi fine ifyo abasambi ba kwa Yesu balingile ukulacita?

³ Bushe Yesu alefwaya ukuti abasambi bakwe balelolela abantu ukuya kuli bena? Awe iyo! Ilyo Yesu abuushiwe, aebele abasambi bakwe abengi ati: ‘Kabiyeni, kalengeni aba nko shonse ukuba abasambi, mulebabatisha, mulebasambilisha ukulakonka fyonse ifyo namwebele.’ (Mateo 28:19, 20) Apo tuli basambi ba kwa Yesu, tulingile ukulacita ifintu fine ifyo ilembo lyalandapo. Tulingile ukulenga abantu ukuba abasambi, ukubabatisha, e lyo no kubasambilisha. Lelo ica kubalilapo ico tulingile ukucita, kuya ku bantu. Uwasambilila sana ifya mu Baibolo alandile ukuti: “Uwasumina onse afwile ‘ukuya,’ nampo nga ni mu misebo nelyo kwabuka bemba.”—Mateo 10:7; Luka 10:3.

 4. Bushe ukuba “abalondo ba bantu” e kuti shani?

⁴ Finshi Yesu aleenekela abasambi bakwe ukucita? Bushe alefwaya ukuti cila musambi alebila imbila nsuma eka nelyo bushe alefwaya ukuti balebila nge bumba ilyateyanishiwa bwino? Apo umuntu umo te kuti abile imbila nsuma ku “ba nko shonse,” abasambi bakwe balingile ukuba ibumba ilyateyanishiwa bwino. Ifi fine e fyo Yesu alefwaya ukuti abasambi bakwe balebomba ilyo abetile ukuti babe “abalondo ba bantu.” (Belengeni Mateo 4:18-22.) Yesu talelanda pa mulondo we sabi uulebomfya indobo e lyo alelolela ukuti isabi likatwe ku ndobo, lelo ubulondo alelandapo ni bulya ubwa kubomfya amasumbu. Uyu umusango wa kwipailamo isabi ulakabila ukubombesha, ukuipekanya, e lyo no kubombela pamo na bambi.—Luka 5:1-11.

 5. Mepusho nshi yane ayo tulingile ukwasuka, kabili mulandu nshi?

⁵ Pa kuti twingeshiba ababila imbila nsuma muno nshiku, tulingile ukwasuka amepusho yane ayakonkapo:

• Ni mbila nshi iyo abasambi ba kwa Yesu balingile ukulabila?

• Cinshi cifwile ukulenga balebila imbila nsuma?

• Ni nshila nshi isho bafwile ukulabomfya pa kubila imbila nsuma?

• Bushe uyu mulimo ubombwa shani, kabili ufwile ukubombwa ukufika lilali?

Ifyasuko kuli aya mepusho fyalalenga twishibe ababomba umulimo uukalenga abantu bakapusuke, kabili fyalalenga tulefwaisha no kutwalilila ukushimikila abantu imbila nsuma.—1 Timote 4:16.

 6. Mulandu nshi twingashininkishisha ukuti imbila iyo Inte sha kwa Yehova babila ni ilya ine iyo Yesu atweba ukulabila?

⁶ Belengeni Luka 4:43. Yesu aleshimikila abantu “imbila nsuma iya bufumu,” kabili afwaya abasambi bakwe nabo balebila imbila imo ine. Ni bani ababila imbila nsuma iya Bufumu ku bantu bonse? Ni Nte sha kwa Yehova fye epela! Nangu fye bantu abatupata balasumina ukuti ni fwe fye tubila imbila nsuma. Ku ca kumwenako, shimapepo uwali mishonari kabili uwaikelepo mu fyalo ifyalekanalekana aebele Inte ya kwa Yehova ati, mu fyalo fyonse umo aikelepo aleipusha ba Nte ukumweba imbila iyo babilisha ku bantu. Uyu shimapepo atile: “Bonse bawelewele, balenjasuka fye fimo fine abati: ‘Tubila imbila nsuma iya Bufumu.’” Ifyo uyu shimapepo alandile filanga fye apabuuta tuutu ukuti fwe Bena Kristu ba cine twalikatana, tatuli bawelewele. (1 Abena Korinti 1:10) Ulupungu lwa kwa Kalinda Ulusabankanya Ubufumu bwa kwa Yehova nalo lulanda sana pa Bufumu bwa kwa Lesa. Iyi magazini ilafuma mu ndimi 254 kabili cila mweshi amakope nalimo 59,000,000 yalapulintwa. Iyi magazini e isabankanishiwa sana mu calo ukucila ulupapulo ululi lonse.

 7. Twaishiba shani ukuti bashimapepo ba mu macalici ya batila Bena Kristu tababila imbila iyo Yesu atweba ukulabila?

⁷ Bashimapepo ba mu macalici ya batila Bena Kristu tabashimikila abantu pa Bufumu bwa kwa Lesa. Abengi batila Ubufumu bwa kwa Lesa bwaba mu mutima wa muntu. (Luka 17:21) Tabasambilisha abantu ukuti Ubufumu bwa kwa Lesa buteko bwa ku muulu ubo Imfumu ya buko ni Yesu. Lelo balanda sana pali Yesu nga kwaba Krisimasi nelyo Isita. Tabasambilisha ukuti Ubufumu bwa kwa Lesa bukafumyapo amafya yonse ayo abantu baculako no kuti nomba line bukafumyapo ifyabipa fyonse pano isonde. (Ukusokolola 19:11-21) Kanshi bashimapepo tabaishiba ifyo Yesu, Imfumu ya Bufumu bwa kwa Lesa akacita. Apo tabaishiba imbila iyo Yesu afwaya tulebila, tabaishiba no mulandu balingile ukulabilila iyi mbila.

 8. Cinshi tulingile ukulabilila imbila nsuma?

⁸ Abasambi ba kwa Yesu tababila imbila nsuma pa kuti balepanga indalama nelyo pa kuti balekuula ifikuulwa ifya lulumbi. Yesu atile: “Mwapeelwe fye ubupe, na imwe mulepeela fye.” (Mateo 10:8) Kanshi umulimo wa kubila te wa kupangilapo indalama iyo. (2 Abena Korinti 2:17) Abasambi ba kwa Yesu tabalingile ukulafwaya ukulipilwa pa mulimo uwa kubila uo babomba. (Belengeni Imilimo 20:33-35.) Nangu ca kuti Yesu tapitile mu mbali ilyo alandile aya mashiwi, aba mu macalici abengi babika sana amano ku kupoka indalama sha mutulo pa kuti amacalici yekawa, na pa kuti balefolesha bashimapepo babo e lyo na babomfi bambi abe calici. Ne ci calenga bashimapepo abengi ukuba abakankaala.—Ukusokolola 17:4, 5.

 9. Bushe Inte sha kwa Yehova balanga shani ukuti ico babilila imbila nsuma te kufwaya ukukwata indalama?

⁹ Bushe Inte sha kwa Yehova balapoka umutulo nga balelongana mu Mayanda yabo aya Bufumu nelyo pa kulongana ukukalamba? Awe! Umulimo babomba wafwilishiwa ne ndalama isho bapeela mu kuitemenwa. (2 Abena Korinti 9:7) Umwaka wapwile, inshita Inte sha kwa Yehova bapoosele pa kubila imbila nsuma ku bantu yali amaawala amabilioni yabili, kabili baletungulula amasambililo ya Baibolo ukucila pa mamilioni 9 cila mweshi. Tababalipila pa kubila imbila nsuma lelo balaitemenwa ukubomfya indalama shabo pa kubomba uyu mulimo. Uufwailisha pa malyashi umo alandile pa mulimo Inte sha kwa Yehova babomba ati: “Ico babikako sana amano kubila no kusambilisha.” Na kabili atile Inte sha kwa Yehova tabakwata bashimapepo aba bafolesha. Nomba apo tabatulipila pa mulimo tubomba, mulandu nshi tubilila imbila nsuma? Tulaitemenwa ukubomba uyu mulimo pantu twalitemwa Yehova na bantu. Ifi fine e filanda no kusesema ukwaba pa Amalumbo 110:3. (Belengeni.)

10. Ni nshila nshi Yesu na basambi bakwe balebomfya pa kubila imbila nsuma?

¹⁰ Ni nshila nshi Yesu na basambi bakwe balebomfya pa kubila imbila nsuma? Baleya konse fye ukwalesangwa abantu. Ku ca kumwenako, baleshimikila abantu mu misebo, pa maliketi, kabili baleshimikila abantu na pa mayanda yabo. (Mateo 10:11; Luka 8:1; Imilimo 5:42; 20:20) Ukubila imbila nsuma ku ng’anda ne ng’anda yali ni nshila iisuma iya kushimikilamo abantu abalekanalekana imbila nsuma.

11, 12. Bushe ifyo Inte sha kwa Yehova babila imbila nsuma fyapusana shani ne fyo aba mu macalici ya batila Bena Kristu babila?

¹¹ Bushe aba mu macalici ya batila Bena Kristu balabila imbila nsuma nga filya Yesu alebila? Ilingi line bashimapepo abo bafolesha bashimikila abo bapepa nabo mu calici. Tabaya mu kulenga bantu ukuba abasambi lelo basungilila fye abantu ababa kale mu calici yabo. Kwena limo baleesha ukukoselesha abantu babo ukulashimikila abantu. Ku ca kumwenako, mu 2001, Papa John Paul II alembele kalata ku calici ukuti bonse abaya ku mapepo balingile ukulabila Imbila, kabili balingile ukuba abacincila pa kubomba uyu mulimo nga filya fine umutumwa Paulo ali, uwatile: “Iye, ca bulanda kuli ine nga nshibila imbila nsuma.” Lyena papa alandile ati, bonse fye abaya ku calici balingile ukulabila imbila nsuma te kulekela fye abantu abanono abasambilila ifya kushimikila abantu. Na lyo line banono fye abacitile ifyo alandile.

¹² Inte sha kwa Yehova e babila fye ukuti Yesu atendeke ukuteka mu 1914. Balakonka ifyo Yesu abebele kabili balibika sana amano ku kubila imbila nsuma. (Marko 13:10) Icitabo cimo citila, umulimo uo Inte sha kwa Yehova babikako amano, mulimo wa kushimikila abantu. Calandile no kuti, ba Nte nga basanga abantu abali ne nsala, abatalalilwa nelyo abalwele, balabafwa lelo tabalaba umulimo wacindamisha uwa kushimikila abantu pa mpela ya cino calo e lyo no kubasambilisha pe pusukilo. (Pillars of Faith—American Congregations and Their Partners.) Inte sha kwa Yehova balabila imbila kabili babomfya inshila isho Yesu na basambi bakwe balebomfya pa kubila.

13. Bushe umulimo wa kubila ufwile ukubombwa ukufika kwi?

¹³ Yesu alandile ati abasambi bakwe bali no kubila imbila nsuma no kusambilisha “abantu bonse aba pe sonde.” Abebele ukulalenga abantu mu “nko shonse” ukuba abasambi. (Mateo 24:14; 28:19, 20) Ici cilepilibula ukuti imbila nsuma ifwile ukubilwa pano isonde ponse.

14, 15. Finshi filanga ukuti Inte sha kwa Yehova balefikilisha ukusesema kwa kwa Yesu ukulanda pa fyo umulimo wa kubila ulingile ukubombwa? (Moneni icikope pa ntendekelo ya cino cipande.)

¹⁴ Ni Nte sha kwa Yehova fye e bafikilisha ukusesema kwa kwa Yesu ukwa kuti imbila nsuma ikabilwa isonde lyonse. Mulandu nshi twalandila ifi? Mu United States mwaba bashimapepo nalimo 600,000 aba mu macalici ya batila Bena Kristu, lelo mwaba Inte sha kwa Yehova nalimo 1,200,000 ababila imbila nsuma muli ici calo. Mwi sonde lyonse, mwaba bashimapepo ba ku Katolika 400,000 lelo Inte sha kwa Yehova balicila pali 8 milioni kabili balashimikila abantu imbila nsuma mu fyalo 240. Ukwabula no kutwishika, Inte sha kwa Yehova balabila imbila nsuma isonde fye lyonse, ici cilenga Yehova acindikwa no kulumbanishiwa!—Amalumbo 34:1; 51:15.

¹⁵ Ico fwe Nte sha kwa Yehova tufwaisha, kubila imbila nsuma ku bantu abengi nga nshi ilyo impela ishilaisa. Pa kuti tubombe uyu mulimo, twalipilibula no kusabankanya ifitabo ifingi nga nshi, magazini, amatrakiti no tupepala twakwitilapo abantu ku Cibukisho na ku kulongana kwa citungu mu ndimi ukucila pali 700. Tulapeela abantu ishi impapulo ukwabula ukubalipilisha. Mu mwaka wapwile, twasabankenya impapulo ishilanda pali Baibolo nalimo amabilioni 4.5. E lyo twalisabankenye na Baibolo—Amalembo ya Calo Cipya ukucila pa mamilioni 200 mu ndimi ukucila pali 130. Nangu fye ni pa webusaiti yesu paba ifyebo mu ndimi ukucila pali 750. Ni Nte sha kwa Yehova fye e balebomba uyu mulimo uusuma.

16. Twaishiba shani ukuti Inte sha kwa Yehova balikwata umupashi wa kwa Lesa?

¹⁶ Bushe umulimo wa kubila ufwile ukubombwa ukufika lilali? Yesu alandile ukuti imbila nsuma yali no kubilwa mpaka impela ikese. Icilenga ukuti fwe Nte sha kwa Yehova tutwalilile ukubila imbila nsuma muli shino nshiku sha kulekelesha, ni co Yehova alatupeela umupashi wakwe uwa mushilo. (Imilimo 1:8; 1 Petro 4:14) Abantu bamo abaya ku calici batila: “Twalikwata umupashi wa mushilo,” nomba bushe balabomba umulimo Inte sha kwa Yehova babomba muli shino nshiku sha kulekelesha? Amacalici yamo yalyesha ukushimikila abantu nga fintu tucita, lelo balifilwa. Bamo balaipeelesha ukushimikila abantu lelo babila fye pa nshita iinono baleka no kuleka. E lyo bambi nabo nalimo balabila ku ng’anda ne ng’anda, lelo tababila imbila nsuma ya Bufumu. Kanshi nangu bengashimikila abantu, tababila imbila iyo Yesu alebila.

17, 18. (a) Mulandu nshi twashininkishisha ukuti Inte sha kwa Yehova e babila fye imbila nsuma iya Bufumu? (b) Cinshi cilenga ukuti tutwalilile ukubomba umulimo wa kubila imbila nsuma?

¹⁷ Kanshi ni bani muno nshiku ababila imbila nsuma ya Bufumu? Ni Nte sha kwa Yehova fye epela! Twaishiba shani? Pantu tubila imbila ilya ine na Yesu alebila, e kutila imbila nsuma ya Bufumu. Tulaya mu kufwaya abantu, kabili tulabomfya inshila ishisuma isha kubililamo. Ico twila mu kushimikila abantu ni co twalitemwa Yehova na bantu. Umulimo wa kubila imbila nsuma ulabombwa mu fyalo ifingi, pantu tulashimikila abantu aba mu nko shonse ne ndimi shonse. Kabili tukatwalilila ukushimikila abantu imbila nsuma ya Bufumu mpaka impela ikese!

¹⁸ Tulatemwa sana ukumona umulimo uusuma uo abantu ba kwa Yehova babomba muli shino nshiku sha kulekelesha. Cinshi cilenga ukuti tutwalilile ukubomba umulimo wa kubila imbila nsuma? Umutumwa Paulo alondolwele ati: “Lesa e ulebombela muli imwe, pa mulandu wa kufwaya kwakwe pa kuti mulefwaya e lyo no kucitapo cimo.” (Abena Filipi 2:13) Shi Yehova natwalilile ukutupa amaka pa kuti tulebombesha mu mulimo wa kushimikila abantu imbila nsuma!—2 Timote 4:5.