Finshi Mwingasambilila Ku Bana?

“ULECITA fye ifintu kwati mwana umunono!” Nga ca kuti umuntu atweba aya mashiwi limbi kuti twakalipa. Kwena abana banono balamoneka bwino, lelo tabaishiba ifingi, kabili tabakwata na mano ayo abakalamba abengi bakwata.—Yobo 12:12.

Nangu cibe fyo, inshita imo Yesu alyebele abasambi bakwe ukutila: “Ndemwebe cine cine nati, Tamwakengile mu bufumu bwa mu muulu nakalya kano mwapilibuka no kuba nga bana banono.” (Mateo 18:3) Bushe ni mwi Yesu aloseshe? Bushe mibele nshi abana bakwata iyo abakalamba bengasambililako?

Ukuiceefya nga Abana

Tontonkanyeni pa calengele Yesu ukulanda aya mashiwi. Ilyo bafikile mu Kapernahumu pa numa ya kwenda ulwendo ulutali, Yesu aipwishe abasambi bakwe ukuti: “Cinshi mwali mulekansanina mu nshila?” Abasambi balyumfwile insoni, ica kuti baikele fye tondolo, pantu balekansanina pa kufwaya ukwishiba uwali umukalamba pali bena. Awe basukile bashipa, kabili baipwishe Yesu ati: “Nani kanshi aba umukalamba mu bufumu bwa muulu?”—Marko 9:33, 34; Mateo 18:1.

Ca kupapa ukusanga ukuti pa numa ya kuba na Yesu mupepi ne myaka itatu, abasambi bacili balekansanina pa uufwile ukuba ne cifulo cikalamba pali bonse. Kwena, abasambi bakuliile mu kupepa kwa baYuda, umo balecindika sana umuntu pa mulandu wa cifulo cikalamba ico akwata. Kanshi, ukupepa kwabo ukwa kale, e lyo no kukanapwililika, e fyalengele abasambi ukulatontonkanya muli ilya nshila.

E ico Yesu alikeele no kwita abasambi, kabili abebele ati: “Umuntu nga alefwaya ukuba uwa ntanshi, afwile aba uwa kupelekesha pali bonse kabili afwile aba kapyunga wa bonse.” (Marko 9:35) Abasambi bafwile balipapile ilyo baumfwile aya mashiwi. Ifyo Yesu alandile fyalipusene sana ne fyo abaYuda balemona ukuti e fyo uwaba ne cifulo cikalamba alingile ukucita! Yesu aitile umwana munono no kumupalamika apo aali. Ilyo amufukatiile, alandile icishinka cacindama ica kuti: “Ndemwebe cine cine nati, Tamwakengile mu bufumu bwa mu muulu nakalya kano mwapilibuka no kuba nga bana banono. E ico onse uuleicefya ngo mwana munono uyu, e mukalamba mu bufumu bwa mu muulu.”—Mateo 18:3, 4.

Kwena, ici cilangililo ca kuiceefya ico Yesu abomfeshe caliweme nga nshi! Elenganyeni icacitike. Abaume abakalamba, nabashinguluka umwana munono kabili bonse fye balemulolesha. Kalume alemoneka fye uwa nsoni kabili alicetekeele sana ukuti tapali icabipa icingamucitikila! Taletontonkanya ukuti pali abo acilile kabili taletontonkanya na pa fyabipa! Ali uwa cumfwila kabili taleimona ukucindama ukucila bambi! Ulya mwana munono ali ne mibele isuma iyo Lesa afwaya iya kuiceefya.

Ico Yesu alelandapo nacumfwika. Pa kwingila mu Bufumu bwa kwa Lesa, ifwe bonse tufwile ukuiceefya nga bana banono. Mu kuteyanya kwa kwa Yehova ukwaba ngo lupwa, tamwaba ukucimfyanya no kukansana nelyo ukuituumika. (Abena Galatia 5:26) Na kuba, iyi ine misango, e yalengele Satana Kaseebanya ukupondokela Lesa pa kabala ntanshi. E mulandu wine Yehova aipatila!—Amapinda 8:13.

Abena Kristu ba cine bafwaisha ukubombela bambi, tabafwaya ukuilanga ukuti nabakwata amaka pali bambi. Nangu ca kuti umulimo tulebomba walisuulwa sana nelyo umuntu tulebombela muntu yaweyawe fye, ukuiceefya kwine kwine kulatulenga ukubombela bambi. Ukubombela bambi mu kuiceefya mwaliba amapaalo sana. Yesu atile: “Onse uwapokelela umo uwa bana banono ngo yu pa mulandu we shina lyandi, ninshi apokelela ine; na onse uwapokelela ine, ninshi te ine fye apokelela, lelo no wantumine.” (Marko 9:37) Ukuba no mutima wapala uwa bana banono uwa kubombela bambi no kuiceefya, kulatwikatanya na Lesa Uwapulamo mu bubumbo bonse e lyo no Mwana wakwe. (Yohane 17:20, 21; 1 Petro 5:5) Kabili tukasanga insansa shaba mu kupeela. (Imilimo 20:35) Kabili tulatemwa ukutila na ifwe natucitapo fimo ifilengele ukuti pabe umutende no kwikatana ifyo tumona pa bantu ba kwa Lesa.—Abena Efese 4:1-3.

Abana Balasambilila Kabili Balacetekela Abafyashi

Yesu alanda pe sambililo na limbi ilyo abakalamba bengasambilila ku bana banono. Atila: “Onse uushipokelela ubufumu bwa kwa Lesa ngo mwana munono, takengilemo nakalya.” (Marko 10:15) Abana bali-icefya, kabili balasambilila bwangu ifintu. Namayo umo atile, “balomfwa bwangu ifyebo kwati ni filya ubutonge boonka amenshi.”

Kanshi pa kupyana Ubufumu bwa kwa Lesa, tufwile ukumfwa ubukombe bwa Bufumu no kulacita ifyo butweba. (1 Abena Tesalonika 2:13) Filya fine utunya tufuluka umukaka, e fyo na ifwe tulingile ‘ukufuluka umukaka uwasanguluka uwa cebo, ukuti e o tukulileko ukufika kwi pusukilo.’ (1 Petro 2:2) Nomba, nga ca kuti amasambililo ya mu Baibolo yaleumfwika ayakosa ukumfwa? Namayo umo uubomba umulimo wa kusakamana abana atile: “Abana tabaleka ukwipusha, ‘Mulandu nshi?’ pantu balafwaisha ukwishiba icishinka pa fyo baleipusha.” Kuti cawama sana nga twabapashanya. Kanshi twalilileni ukusambilila. Ipusheniko na Bena Kristu abakosoka. Lombeni amano kuli Yehova. (Yakobo 1:5) Ukwabula no kutwishika umukoosha wenu mu kupepa ukamulenga ukupaalwa.—Mateo 7:7-11.

Nomba bambi kuti batila, ‘Bushe umuntu uusambilila bwangu ifintu te kuti alufiwe mu kwangufyanya?’ Te kuti alufiwe nga ca kuti uulemusambilisha muntu uo acetekela. Ku ca kumwenako, abana baleshiba fye ukuti abafyashi babo e bafwile ukubafwa. Wishi umo atile: “Filya abafyashi bacingilila no kusakamana abana pa kubapeela ifyo balekabila cila bushiku, e cilenga abana ukucetekela sana abafyashi.” Cine cine na ifwe bene mu nshila imo ine kuti twacetekela Shifwe uwa ku muulu Yehova. (Yakobo 1:17; 1 Yohane 4:9, 10) Yehova alatutungulula bwino sana ukupitila mu Cebo cakwe icalembwa. Umupashi wakwe no kuteyanya kwakwe kulatusansamusha kabili kulatwafwilisha. (Mateo 24:45-47; Yohane 14:26) Ukunakila umupashi wakwe no kuteyanya kwakwe kukatucingilila na ku fingonaula Ubwina Kristu bwesu.—Amalumbo 91:1-16.

Ukucetekela Lesa nga filya umwana acetekela abafyashi kutulenga ukukanaba na masakamika. Uwasambilila Baibolo umo atile: “Ilyo tuli abana, kabili tuli pa lwendo, tatukwata indalama sha kwendela, kabili tatwishiba ne fyo twalafika kuntu tuleya, nomba tatutwishika abafyashi besu nangu fye panono ukuti limbi balafilwa ukutufisha bwino uko tuleya.” Bushe na ifwe twalicetekela sana Yehova ilyo twaba pa lwendo lwa bumi bwesu pano calo?—Esaya 41:10.

Ukucetekela Lesa umupwilapo kulatwafwa ukukanaba ne mitima yabipa ne misango iingalenga Ubwina Kristu bwesu ukuba mu bwafya. Twalicetekela nga nshi amashiwi yalandile Yesu aya kutila Shifwe wa ku muulu aleshiba ifyo tucita no kutila nga twafwaya intanshi Ubufumu no bulungami bwa kwa Lesa, Lesa umwine akulatusakamana. Ukucita ifi kukatwafwa ukucimfya amatunko ya kupoosa amano ku kunonka icuma ica kuti twalekelesha ne milimo ya kupepa kwesu.—Mateo 6:19-34.

“Ku Bubi E ko Mube Abacece”

Nangu ca kuti bafyalwa abashapwililika, abana banono baba ne mitima iyasanguluka kabili balatontonkanya ifisuma. E mulandu wine na Baibolo ikoselesesha Abena Kristu ukuti: “Ku bubi e ko mube abacece.”—1 Abena Korinti 14:20.

Tontonkanyeni pali Monique, umwana wa myaka isano uwaebele banyina ninshi natemwa icine cine ati: “Sarah cibusa wandi umupya, akwata imishishi yanyongana bwino, ifi fine fye ne mishishi yandi yaba!” Monique talandilepo ukuti Sarah alikwata inkanda iyapusana ne yo akwete, nelyo ukuti balipusene imitundu. Umufyashi umo atile: “Abana abanono tabapoosa amano ku calo umuntu aafumako nelyo imimonekele ya nkanda yakwe. Akapaatulula ka nkanda ne mpatila tabafishiba.” Muli iyi nshila abana balalanga sana ifyo na Lesa wesu uushaba na kapatulula aba, ukutila ni Lesa uwatemwa abantu ba mu fyalo fyonse.—Imilimo 10:34, 35.

E lyo na kabili, abana balalekelela bwangu sana abantu bambi. Umufyashi umo atile: “Nga ca kuti bakalume babili Jack na Levi balwa, tulabeba ukuti cila muntu alombe ubwelelo ku munankwe kabili tapapita ne nshita balatendeka ukwangala pamo na kabili ninshi nabasansamuka. Tabasunga icikonko ku mukoshi kabili tabebukisha ifyapita nelyo ukulanda ukuti pa kuti nkakwelele kano wacitapo fimo. Batendeka fye ukwangalila pamo na kabili.” Ala mwandini abana baba ne mibele isuma iyo abakalamba bengasambililako!—Abena Kolose 3:13.

Te apo peka, abana banono balasumina bwangu ukuti Lesa e ko aba. (AbaHebere 11:6) Tabomfwa umwenso ukulanda kabili ico cibalenga ukulashimikila abantu bambi Icebo ca kwa Lesa mu kushipa. (2 Ishamfumu 5:2, 3) Amapepo bapepa ayepi kabili ayafuma pa nshi ya mutima, yalanasha abakalamba ababa ne mitima yatalama. Na lintu baletunkwa, balaba ne mibele isuma kabili abakosa icine cine. Kwena abana baba bupe ubwacindama nga nshi!—Amalumbo 127:3, 4.

Kuti Twaba ne Mibele Isuma na Kabili

Limbi kuti mwatontonkanya amuti, ‘Bushe kwena abakalamba kuti bakwata na kabili iyi mibele isuma iyakwata abana banono?’ Ee! Kuti bakwata iyi mibele na kabili. Cine cine, filya Yesu akonkomeshe ukuti tufwile “ukuba nga bana banono” filangilila ukutila abakalamba kuti baba ne mibele isuma na kabili.—Mateo 18:3.

Natulangilile: Ibumba lya bantu limo kuti lyabombesha ku kuwamya icikope cimo ica mutengo uukalamba sana. Ilyo balewamya, kuti bafumya ifiko ifingi ifyalambatila pa cikope, no kulungika tonse uto ababalilepo ukwesha ukuwamya bafililwe ukulungika. Pa numa ya kuwamya icikope ninshi na bateeka no mutima, icikope catendeka ukumoneka bwino sana ica kuti bacileta na kuli bonse ukuti bacimone. Mu nshila imo ine, nga twatwalilila ukubombesha, e lyo no mupashi wa mushilo uwa kwa Yehova nga watwafwa, kabili nga ca kuti ababa mu cilonganino ca Bwina Kristu nabo batwafwa, kuti twabwesha imibele isuma iyo twakwete kale lintu twali abana banono.—Abena Efese 5:1.

[Icikope pe bula 9]

Abana baba fye abaiceefya

[Icikope pe bula 10]

Abana banono tabakwata impatila, kabili baleleela bwangu no kulabako