Ifyo Baibolo Isambilisha

Kuti Mwacita Shani pa Kuti Muwikishanye na Banenu?

BAIBOLO ilanda pa bantunse ukuti: “Bonse babembu kabili balifilwa ukufika pa bukata bwa kwa Lesa.” (Abena Roma 3:23) Icilenga kuleba ukupusana ni co abantunse fye bonse abaikala pe sonde babembu. Kuti twacita shani pa kuti twawikishanya na banensu nga twapusana?

Baibolo ilatweba ifyo twingacita. Yalondolola Kabumba wesu Yehova, ukuti ni “Lesa wa mutende.” (AbaHebere 13:20; Amalumbo 83:18) Lesa afwaya abana bakwe pe sonde ukuti baleumfwana. Kabili Lesa umwine alitulanga ukuti alafwaisha ukumfwana na bantu. Ilyo abantu ba kubalilapo babili bamupondokele, ukwabula no kupoosa inshita Lesa alicitilepo fimo ifyalengele ukuti ababweseshe ku mwine. (2 Abena Korinti 5:19) Moneni ifintu fitatu ifyo mwingacita pa kuwikishanya na bantu bambi.

Mulebelelana Uluse

Finshi Baibolo yalandapo? “Muleshipikishanya no kubelelana uluse nga umo ali ne ca kuilishanya ku munankwe. Ifyo Yehova amubelela uluse, e fyo na imwe mulebelelana uluse.”—Abena Kolose 3:13.

Bwafya nshi ubwingabapo? Nalimo kuti pali icikulu icalenga ukuti ‘muleilishanya’ no kulamona kwati ca nsambu tamulingile ukulaumfwana no muntu mupusene nankwe. Kabili kuti mwalamona no kuti uumulufyenye e ufwile ukwisalomba ubwelelo. Nomba nga ca kuti uyo muntu teshibe ukuti alimulufyanya, nangu limbi alemona kwati ni mwe mwamulufyanya, ninshi te kuti muwikishanye.

Finshi mwingacita? Mulingile ukukonka ifyo Baibolo yalanda ukuti mulebelelana uluse maka maka nga ca kuti ubwafya bulipo bunono. Muleibukisha ukuti Lesa nga alesunga ifilubo fyonse ifyo tulufyanya, te kuti twiminine pa ntanshi yakwe. (Amalumbo 130:3) Baibolo itila “Yehova wa nkumbu kabili wa mutembo, alakokola ukukalipa kabili afulisha icikuuku. Pantu umwine alishiba bwino ifyo twapangwa, alebukisha ukuti tuli lukungu.”—Amalumbo 103:8, 14.

Tontonkanyeni na pe pinda lyalembwa mu Baibolo ilitila: “Umuntu wa mano takalipa bwangu, kabili atemwa ukusuulako fye ku filubo.” (Amapinda 19:11) Amano yalatwafwa ukwiluka no kwishiba icilelenga umuntu ukulanda nangu ukucita ifintu mu nshila alecitilamo. Umuntu nga amukalifya muleipusha amuti, ‘Bushe kunaka kwalenga, nelyo bushe nalwala, nangu limbi nakwata amafya?’ Nga mwailuka icilengele, ne fyo umuntu aleumfwa, e lyo ne fyo caciba pa kuti uyo muntu amulufyanye kuti camwafwa ukukanafulwa sana kabili mukalasuula na ku filubo fyabo.

Lanshanyeni

Finshi Baibolo yalandapo? “Nga munonko acita ulubembu, kabiye no kumweba icilubo cakwe ninshi muli fye babili. Nga akuumfwa, ninshi wabwesesha munonko mu nshila.”—Mateo 18:15.

Bwafya nshi ubwingabapo? Umwenso, ubukali, no kumfwa insoni nalimo kuti fyalenga mwafilwa ukulanshanya no muntu mupusene nankwe pa kuti mupwishe ubwafya. Ubwafya bumbi ubwingabapo bwa kufwaya ukushimikilako bambi pa bwafya mukwete, nomba ukucita ifi kuti kwalenga ubwafya ukukulilako.

Finshi mwingacita? Ubwafya nga bukalamba ubwa kuti te kuti musuuleko fye, mulingile ukuyalanshanya no umulufyenye. Mukesheko ukucita ifi:

(1) Mufwile ukwangufyanya: Tamulingile ukukokola. Nga mwakokola ubwafya kuti bwakula. Mukeshe ukukonka ifyo Yesu alandile ukuti: “Nga uletwala ica bupe ku ciipailo, kabili palya pene waibukisha ukuti munonko ali na cimo kuli iwe, ushe ica bupe cobe pa ntanshi ya ciipailo, no kubwelelamo; utale uyeumfwana na munonko, kabili nga wabwela, e lyo utuule ica bupe cobe.”—Mateo 5:23, 24.

(2) Mufwile ukuba fye babili: Tamufwile ukwamba uumulufyenye. “Lubululeni no munobe umulandu babili, ne nkama ya muntu wisokolwela umbi.”—Amapinda 25:9.

(3) Mufwile ukulanshanya mu mutende: Mwilafwaya fye ukwishiba uulufyenye no uushilufyenye. Ico mufwile ukufwaisha ukucita kuwikishanya, te kufwaya fye ukuipokolola. Mwilalanda kwati mulefwaya ukupeela umunenu umulandu. Ukucila ukulanda ukuti “Naunkalifya!” kuti cawama ukulanda ukuti “Ine ico mfulilwe ni ci . . . ” Baibolo itweba ukuti: “Natulecita ifingaleta umutende kabili ifingatukuula.”—Abena Roma 14:19.

Muleshishimisha

Finshi Baibolo yalandapo? “Mwilabwesesha ububi pa bubi. . . . Awe, ‘umulwani obe nga ali ne nsala, umupe ifya kulya; nga ali ne cilaka, umupe ifya kuti anwe.’”—Abena Roma 12:17, 20.

Bwafya nshi ubwingabapo? Nga ca kuti uo mulefwaya ukuwikishanya nankwe akaana, nalimo kuti mwanenuka.

Finshi mwingacita? Mufwile ukutekanya. Abantu balapusanapusana mu fyo bakalipa na mu fyo bakula mu mano. Bamo pa kuti ubukali bupwe palakokola; bamo e lyo balesambilila ukulakonka ifyo Lesa afwaya. Mufwile ukutwalilila ukuba ne cikuuku kuli bena no kubatemwa. Baibolo itila: “Wileka ububi bukucimfye, lelo ulecimfisha ububi pa kucita ifisuma.”—Abena Roma 12:21.

Pa kuwikishanya na bambi, tufwile ukuba abaiceefya, aba mano, abatekanya kabili abatemwa abantu. Ala ukumfwana na bantu cisuma nga nshi!

BUSHE MWALIPUSHAPO UKUTI . . .

● Cinshi icingamwafwa ukubelela uluse uumulufyenye?—Abena Kolose 3:13.

● Finshi ifingamwafwa ukuya mu kulanshanya no muntu uo mupusene nankwe?—Mateo 5:23, 24.

● Finshi mwingacita nga ca kuti uo mulefwaya ukuwikishanya nankwe akaana?—Abena Roma 12:17-21.

[Amashiwi pe bula 11]

“Umuntu wa mano takalipa bwangu, kabili atemwa ukusuulako fye ku filubo.”—AMAPINDA 19:11.