Ubumi bwa kwa Yesu no Butumikishi

Icilangililo ca Mutebeto wa Bwinga

UKUPITILA mu filangililo fibili, Yesu nasansalika bakalemba na bashimapepo bakalamba, kabili balefwaya ukumwipaya. Lelo Yesu acili alebalondolwela. Atwalilila ukubeba na cimbi icilangililo, ukusoso kuti:

“Ubufumu bwa mu mulu bwapale mfumu imo iyatebetele umwana wa iko umutebeto wa bwinga. Yatumine na basha ba iko ku kwita abalaalikwe bese ku mutebeto wa bwinga; na bo bakene ukwisako.”

Yehova Lesa e Mfumu iipekanya umutebeto wa bwinga bwa Mwana wakwe, Yesu Kristu. Mu kupelako, nabwinga wakwe uwa bakonshi basubwa ba 144,000 bakalundana na wene mu mulu. Abatekwa ba Mfumu bantu ba kwa Israele, abo, pa kuletwa mu cipingo ce Funde mu 1513 B.C.E., bapokelele ishuko lya mu nshita ilya kuba “ubufumu bwa bashimapepo.” Muli ifyo, pali ako kashita, mu kutendekelako batambulwilweko ukulaalikwa ku mutebeto wa bwinga.

Nangu cibe fyo, ubwite bwa kubalilapo ku balaalikwe tabwaile ukufikila shinde wa 29 C.E., lintu Yesu na basambi bakwe (abasha ba mfumu) batendeke umulimo wabo uwa kushimikilo Bufumu. Lelo abena Israele ba cifyalilwa abapokelele ubu bwite ubwatendekwe na basha ukutula mu 29 C.E. ukufika mu 33 C.E. tabaitemenwe ukwisa. E co Lesa apeele uluko lwalaalikwe ishuko lya mu nshita na limbi, nga fintu Yesu alondolola ukuti:

“Yatumine kabili abasha bambi, aiti, Kebeni abalaalikwe, amuti, Moneni, nimpekanyo mutebeto wandi; iŋombe shandi shilume no tutekwa twandi twaina nafiipaiwa, na fyonse nafipekaniwa: iseni ku mutebeto wa bwinga.” Ubu bwite bwa cibili kabili ubwa kulekelesha ku balaalikwe bwatendeke pa Pentekoste 33 C.E., lintu umupashi wa mushilo wapongolwelwe pa bakonshi ba kwa Yesu. Ubu bwite bwatwalilile ukufika mu 36 C.E.

Icinabwingi ca abo bena Israele, nangu cibe fyo, na bo bakeene mu misuula ubu bwite. “Tabasakamene, balifumine,” e fyo Yesu alondolola, “umo aile ku cilime cakwe, umbi ku bukwebo bwakwe, na bashele baikete abasha ba iko, balibakalukile, no kubepaya.” “Awe,” e fyatwalilila Yesu, “imfumu yalifulilwe; yatumine ifita fya iko, yaonawile aba misoka balya, no koco mushi wabo.” Ici cacitike mu 70 C.E., lintu Yerusalemu aonawilwe umupwilapo ku bena Roma, kabili aba misoka balipaiwe.

Yesu lyene alondolola icacitike pali iyi nshita ukuti: “E lyo [imfumu] yatile ku basha ba iko, Umutebeto wa bwinga wena naupekaniwa, lelo abalaalikwe tabali abawamina. E ico kabiyeni ku masansa ya nshila, na bonse abo mulesanga mubete bese ku mutebeto wa bwinga.” E fyo abasha bacitile, “ne ŋanda ya bwinga yaiswilemo aba bwinga.”

Uyu mulimo wa kulonganika abatandashi ukufuma mu masansa ya nshila uwa balaalikwe watendeke mu 36 C.E. Mushika wa mpuka ya bena Roma Korneli no lupwa lwakwe bali e ba kubalilapo ukulonganikwa mu bashali baYuda bashasembululwa. Ukulonganikwa ukwa aba bashali baYuda, abo bonse bene bali bakupyanikishapo pali abo abakeene mu kutendekelako ubwite, kwalitwalilila ukutentemukila muli uno mwanda wa myaka uwalenga 20.

Ni mu kati ka mwanda wa myaka uwalenga 20 e mo iŋanda ya kusefeshamo ubwinga ileisushiwa. Yesu ashimika icacitika lyene, pa kusoso kuti: “Lelo imfumu ilyo yaingilemo ku kumona aba bwinga, yamwenemo umuntu uushifwele ilaya lya bwinga. Kabili yatile kuli wene, Mune, bushe wingile muno shani, we ushaba ne laya lya bwinga? Na o alitalele. E lyo imfumu yaebele bakapyunga, aiti, Mukakeni amakasa na maboko, mumupoose pa nse, ku mfifi ya ku nse; ukukabo kulila no kusumanya ameno.”

Umuntu uushikwete ilaya lya bwinga acite cikope Abena Kristu ba mu Kristendomu aba kupashanya fye. Aba Lesa tabala abapokelela nga bakwata ukwishibikwa bwino nga bena Israele ba ku mupashi. Lesa tabalile abasuba no mupashi wa mushilo nge mpyani sha Bufumu. E co bapooswa ku nse ku mfifi uko bakacula ubonaushi.

Yesu asondwelela icilangililo cakwe pa kusoso kuti: “Pantu abaitwa bengi, lelo abasalwa banono.” Ee, kwali abengi abalaalikwe ukufuma mu luko lwa Israele ku kuba nabwinga wa kwa Kristu, lelo bena Israele ba cifyalilwa abanono fye e basalilwe. Ubwingi bwa ba 144,000 abatandashi abapokelela icilambu ca mu mulu bashininwa ukuba abashili bena Israele. Mateo 22:1-14; Ukufuma 19:1-6; Ukusokolola 14:1-3.

◆ Ni bani abalaalikwa mu kutendekelako ku mutebeto wa bwinga, kabili ni lilali batambulwilweko ukulaalikwa?

◆ Ni lilali mu kubalilapo ubwite bwaile kuli abo balaalikwe, kabili basha nshi babomfiwa ku kubutendeka?

◆ Ni lilali ubwite bwa cibili bwatambululwa, kabili ni bani pa numa balaalikwa?

◆ Ni ani acitwe cikope no muntu uushikwete ilaya lya bwinga?

◆ Ni bani abengi abaitwa, na banono abasalwa?