Ukulingana na Baibolo

Mwalicindama mu Menso ya kwa Lesa!

UMWANAKASHI UMO UMWINA KRISTU ATILE: “NALICULULUKA NGA NSHI PA MYAKE INGI KU MULANDU WA KUIMONA UUSHACINDAMA. TE MULANDU NA FINTU NATEMWISHA YEHOVA, NELYO MUBOMBELE SHANI, LYONSE MONA FYE KWATI TAPALI ICO NDECITA.”

BUSHE mwalishibapo uuli onse uushomboka no kuimona kwati tacindama? Nelyo bushe ne mwe bene limo mulatontonkanyapo ifyo fine? Ukutontonkanya kwa musango yo kwaliseeka nangu fye ni kuli bakapepa ba cishinka aba kwa Lesa. Takwaba uushambukilwa ku mafya ya muli shino “inshita ishayafya.” Abengi balabasuula no kubateka bubi bubi ku bantu “ababulo kuiteka, abankalwe; . . . abashatemwa busuma.” (2 Timote 3:1-5) Ukucululuka kwa musango yo kuti kwasha imikofu yabipa mu nkuntu, ukulenga umuntu ukulaimona ngo ushacindama.

Limo icilenga mulandu wa kuti umuntu alepanga ukucita ifyo ashingacita. Nga afilwa, alamona kwati cifilwafilwa. Te mulandu ne cingalenga, abamona kwati tabacindama balafilwa ukwishiba umulandu bafwile ukusuminina ukuti balitemwikwa kuli Lesa nangu ku muntu uuli onse. Napamo balasumina fye no kuti takwaba uwingabatemwa.

Lelo ifyo te fyo Yehova Lesa atontonkanya! Mu Cebo cakwe, Yehova alitusoka ukuibaka ku “mingalato ya kulufya” iya Cibambe cakwe, Satana Kaseebanya. (Abena Efese 6:11, muli Jewish New Testament) Satana alabomfya imingalato ya kulufya pa kuti twingaleka ukupepa Lesa wesu. Pa kuti atucimfye, alalenga tuleimona abashacindama, kwati Yehova teti atutemwe. Lelo Satana “wa bufi,” na kuba “e wishi wa buko.” (Yohane 8:44) Kanshi tatufwile ukulufiwa ku mingalato yakwe! Muli Baibolo, Yehova aliilandila, alitulondolwela bwino ukuti twalicindama mu menso yakwe.

Ukwishiba Bwino Ifyo Twacindama

Baibolo ilatusokapo pa fyo ukuimona abashacindama kwingatufuupula. Amapinda 24:10 yatila: “Nga watompoka mu bushiku bwa kumanama, ninshi amaka yobe yanono.” Ukutontonkanya lyonse ukuti tatwacindama kuti kwatupoka amaka, twalaumfwa abanaka, abaundaalila. Ibukileni ukuti Satana alipwa no kwishibe ci. Cilaafya nga ca kuti umutima wesu lyonse uletulungulusha ku kuimona abashacindama. Lelo, Satana nga ashukila uko kwine kutontonkanya kwesu, e lyo icisendo cicilanapo ukufina.

Calicindama kanshi ukuti twishibe bwino ifyo tufwile ukulaimona. Umutumwa Paulo akonkomeshe ati: “Ndetila ku muntu onse uwa muli imwe, eitontonkanishisho kucila ifyo afwile ukutontonkanya; lelo atontonkanye no kutekanya.” (Abena Roma 12:3) Muli Baibolo imbi bapilibula ukuti: “Bonse ndemweba nati umuntu onse eibika apo ashaba, lelo afwile ukuibika apo afwile ukuba.” (Charles B. Williams) Kanshi amalembo yatukoselesha ukwishiba umwa kupelela pa fyo tufwile ukulaimona. Lubali lumbi, tufwile ukuibaka ku kuituntumba; e lyo kabili tatufwile ukulaimona nge cinangwa, pantu Paulo atila tufwile ukutekanya, tufwile twaimona abacindamako. Cine cine, Paulo alipuutilwemo no mupashi ilyo alembele ukuti bonse twalicindama mu menso ya kwa Yehova.

Ukwishiba umwa kupelela pa fyo tufwile ukulaimona kwalilangililwa bwino mu mashiwi ya kwa Yesu aya kuti: “Uletemwo mubiyo nga we mwine.” (Mateo 22:39) Amashiwi ya kuti “nga we mwine” yalangilila ukuti tulaimona abacindamako. Cine cine, tuli bena kuluba. Lelo ilyo tuletukuta ukutemuna Lesa, tufwile twaumfwa ububi pa fyo tupelebela, twalomba no bwelelo, nalyo line tufwile twaimona abacindamako. Imitima yesu iitusenuka lyonse kuti yapampamina pa kulenga tuleimona nga abasuulwa, lelo mwilaba ukuti, “Lesa alikula acile mitima yesu.” (1 Yohane 3:20) E kutila, umo tuimwena fwe bene, napamo Yehova te mo atumwena.

Abaputuke Misana, na Bafunshike Mitima

Kemba wa malumbo Davidi alembele ukuti: “Yehova aba mupepi na ku baputuke misana, kabili abafunshike mitima alabapususha.” (Amalumbo 34:18) Pa kulanda pali ici cikomo, icitabo ca Matthew Henry’s Commentary on the Whole Bible citila: “Abalungama . . . balaputuke misana no kubombomana, e kutila balacushiwa pa mulandu wa lubembu lwabo, balaimona abashacindama; balaicefya, kabili tabacetekela mu mano yabo yene.”

“Abaputuke misana” nelyo ‘ukufunshike mitima’ kuti bamona kwati Yehova aba ukutali nga nshi, kwati balicepesha ica kuti na Yehova teti abasakamane. Lelo te fyo caba. Amashiwi yalandile Davidi yalatukoselesha ukuti Yehova talekelesha ‘abaimona nga abashacindama.’ Lesa wesu uwa nkumbu alishiba ukuti ilyo tuleimona ifyo e lyo tukabila nga nshi ubwafwilisho, kabili alaba mupepi.

Umfweni ici ca kumwenako. Imyaka imo iyapitapo nyina umo abutushishe umwana mwaume wa myaka ibili ku cipatala ilyo alwele icifuba icishaibipila. Ilyo badokota bamupimine, baebele banyina ukuti balamuteka bamone ifyo bwalaca. Ni kwi banyina basendeme? Mu mupando, lwa mupepi no busanshi bwa mwana wabo mu cipatala mwine. Umwana alilwele, banyina te kuti bamushe. Cine cine kuti twaenekela ifyacilanapo kuli Shifwe wa kutemwa uwa ku muulu, uo twapangwa mu cata cakwe! (Ukutendeka 1:26; Esaya 49:15) Amashiwi ya kucincisha ayaba pa Amalumbo 34:18 yatukoselesha ukuti ilyo ‘twaputuka umusana,’ Yehova, uwaba nga umufyashi wa kutemwa, alaba “mupepi,” e kuti alalolekesha, alapooseshako amano, ukufwaya atwafwilishe.—Amalumbo 147:1, 3.

“Imwe Umutengo Mwacilamo Apakalamba ku Nseba”

Ilyo Yesu aleshimikila pano isonde, alisokolwele ifingi ifyo Yehova atontonkanya ne fyo omfwa, ukusanshako ne fyo Yehova amona ababomfi Bakwe aba pano isonde. Imiku ne miku, Yesu aebekeshe abasambi bakwe ifyo baba abacindama mu menso ya kwa Yehova.—Mateo 6:26; 12:12.

Ku ca kumwenako, pa kulangilila ifyo cila musambi acindama, Yesu atile: “Bushe inseba shibili tashishitwa ku kalikobili kamo kanini? kabili nangu lumo pali isho te kuti lupone pa nshi ukwabula Shinwe ukusuminisha: lelo ne mishishi ya ku mitwe yenu yalipendwa yonse. E ico mwitiina; imwe umutengo mwacilamo apakalamba ku nseba.” (Mateo 10:29-31) Natumone umwalolele aya mashiwi kuli balya abalekutika kuli Yesu mu mwanda wa myaka uwa kubalilapo.

Inseba shifwile shali pa fyuni fyanakisha nga nshi umutengo ifyo balelya. Utu tuni twaba utunono, baletusesa no kututunga ku mitungo, e lyo batukanga. Yesu afwile alemonako ilyo abanakashi ababusu balependa utumakobili twabo pa fisankano pa kuti bamone ni nseba shinga bengashitamo. Inseba imo yalinakile umutengo ica kuti mu kalikobili kamo baleshitamo inseba shibili (akalikobili kali ni assarion umo, aka mutengo uushafikile na ku ma cent yasano).

Inshita imbi Yesu alilandilepo pali ici cine cilangililo, lelo alandileko mu nshila imbi. Ukulingana na Luka 12:6, Yesu atile: “Bushe inseba shisano tashishitwamo mu tumakopere tubili?” Apa pantu tontonkanyenipo. Mu kalikopere kamo, baleshitamo inseba shibili. Lelo abalepoosapo utumakopere tubili, baaleshita inseba shisano, cibe nga kukonka bafwile bashita shine. Balebalundilapo ne ya mbasela, ukubapa kwati ya kutoola fye. Yesu atila: “Kabili talulabwapo nangu lumo [no lwa mbasela lwine] mu menso ya kwa Lesa.” Pa kulanda umwalolele icilangililo, Yesu asondwelele ukuti: “Mwacilamo umutengo ku nseba ishingi.” (Luka12:7) Mwandi aya mashiwi yafwile yalikoseleshe abalekutika!

Bushe mwailuka umo Yesu aloseshe pa kulanda ici cilangililo cishaiwamina? Nga Yehova alicindika utuni twacepesha, ninshi ababomfi bakwe aba pano isonde balicilapo nga nshi! Kuli Yehova takwaba nelyo umo pali ifwe uwingalubila mu bwingi. Alyangwako nga nshi kuli ifwe ica kuti alamona no tuntu utunono muli ifwe, nangu fye mushishi wa ku mitwe yesu walipendwa onse.

Kwena, Satana na o akatwalilila ne ‘mingalato yakwe iya kulufya,’ ukushukila ukutontonkanya kwesu ukwa kuimona nga abashacindama, pa kuti engatufumya ku kubombela Yehova. Lelo mwileka Satana ukumucimfya! Ibukisheni umwanakashi Umwina Kristu ulya tulandilepo pa kutendeka. Alyafwilishiwe ne cipande ca mu Ulupungu lwa kwa Kalinda icasokele pa fyo Satana alwisha pa kuti engashukila ukutontonkanya kwesu.a Atila: “Nshaishibe ukuti Satana alesha ukubomfya inkuntu shandi ku kumfuupula. Ukwishibe co kwalincincisha ukulwisha isho nkuntu. Nomba kuti nalwisha ukusansa kwa musango yo ukufuma kuli Satana, ninshi nincetekela no kuti nkamucimfya.”

Yehova “aishiba fyonse.” (1 Yohane 3:20) Alishiba ne filetucusha ilelo. Alishiba ne fyatucitikilapo kale ifyo napamo ifyalenga umucinshi wa pa lwesu ukonaika nga nshi. Ibukisheni, icacilapo ukucindama ni fintu Yehova atumona! Te mulandu ne fyo twingaimona abapatwa nelyo abashacindama, Yehova alitwebekesha ukuti alicindika ababomfi bakwe bonse. Kuti twacetekela fyonse ifyo Yehova alanda, pantu alipusana ne Cibambe cakwe Satana, Lesa ena ‘tabepa.’—Tito 1:2.

[Futunoti]

[Amashiwi pe bula 12]

Nga filya fyaba umufyashi wa nkumbu, Yehova alaba mupepi kuli bonse abekala mu bulanda

[Ifikope pe bula 13]

Nga Yehova tengalaba ku nseba, kuti amulaba shani?

[Abatusuminishe]

Lydekker

Illustrated Natural History