Ifyo Tusambilila Kuli Yesu

Pa “Mpela”

Bushe cinshi cikapwa?

Abasambi ba kwa Yesu bamwipushe ati: “Ni lilali ifi fintu fikabako, kabili cinshi tukeshibilako ukuti e po muli no kuti icalo cili ku mpela?” (Mateo 24:3) Ilyo Yesu aleasuka ici cipusho, tatile cino calo twikalapo cikonaulwa. Pali inshita imbi alandile pa “calo” kabili ilyo abomfeshe ili ishiwi alelanda pa tubungwe twa mapolitiki, utwa makwebo e lyo, no twa mapepo, ututungululwa na Satana. (Mateo 13:22, 40, 49) Kanshi e calo alelandapo ilyo atile: “Impela ikesa.”—Mateo 24:14.

Bushe Yesu alondolwele shani impela?

Ukupwa kwa cino calo cabipa ni “mbila nsuma.” Yesu atile: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” Yesu alondolwele ifyo impela ya cino calo ikaba, ati: “Kukaba ubucushi ubukalamba ubushatala abubako ukutula pa ntendekelo ya ba pano calo ukufika nomba, kabili tabwakatale ababubako na kabili. Isho nshiku nga tashakepifiwe, takuli umuntu nangu umo uukapusuka.”—Mateo 24:14, 21, 22.

Ni bani bakonaulwa?

Abantu abashatemwa Yehova na Yesu kabili abashibabombela e bakonaulwa. Abantu ba musango yu tabomfwila Lesa. Yesu atile: “Filya fine inshiku sha kwa Noa shali, e fyo cikaba na lintu Umwana wa muntu akabapo. Pantu filya balecita mu nshiku shilya ilyo ilyeshi lishilaisa, . . . tabapooseleko amano nakalya mpaka ilyeshi lyaisa no kubasenda bonse.” (Mateo 24:36-39) Yesu atile abengi baba mu musebo uutwala ku bonaushi. Lelo, alaile ukutila kwaliba ‘umusebo uwacepa uwaya ku bumi.’—Mateo 7:13, 14.

Bushe cino calo cikapwa lilali?

Ilyo Yesu bamwipwishe pa cishibilo ca kubapo kwakwe ne ca kuti “icalo cili ku mpela,” atile: “Uluko lukemina uluko lubiye no buteko bukemina ubuteko bubiye, kabili kukaba ifipowe ne finkukuma . . . kabili pa mulandu wa kufulisha kwa bubi, ukutemwa kwa bengi kukacepa.” (Mateo 24:3-12) Kanshi nangu ca kuti ifilecitika muno nshiku filatuletela ubulanda, fitulanga ukuti nomba line Ubufumu bwa kwa Lesa bukaletela abantunse bacumfwila umutende. Ici cilatukosha. Yesu atile: “Ilyo mwamona ifi filecitika, mwishibe ukuti ubufumu bwa kwa Lesa buli mupepi.”—Luka 21:31.

Cinshi mufwile ukucita?

Yesu atile Lesa “apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Pa kuti mutetekele Lesa no Mwana wakwe, mufwile ukubeshiba bwino. E co Yesu alandiile ati: “Pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.”—Yohane 17:3.

Cenjeleni ukuti amasakamika na mafya tafimupumfyenye ukusambilila inshila ya kulangilamo ukuti mwalitemwa Lesa. Yesu atile: “Mucenjele epali imitima yenu yafinininwa ku . . . masakamika ya mikalile, no bushiku bulya bwaisa pali imwe no kupumikisha kwati citeyo. Pantu bukesa.” Nga mwaumfwila ifi Yesu atusokele, ‘mukapusuka kuli fyonse ifikacitika.”—Luka 21:34-36.

Nga mulefwaya ukwishibilapo na fimbi pali ili lyashi, belengeni icipandwa 9, icitila “Bushe Tuli mu Nshiku sha Kulekelesha?,” mu citabo icitila Bushe Cinshi Baibolo Isambilisha?a

[Futunoti]